السفاره فى المغاره


امبارح عملت فيها الشاب الوطنى الهمام وقررت انى اجدد جواز سفرى المصرى. كل مره انزل مصر بانزل بالبسبور الامريكى لكنى قررت ان انزل بالبسبور المصرى المره اللى جايه. اخذت اجازه من الشغل وروحت اتصورت ومليت الورق وصحيت من النجمه علشان اروح القنصليه المصريه اجدد البسبور. كنت واقف امام السفاره من الساعه 9 صباحا. الباب كان مقفول انا قلت لسه البهوات ما وصلوش وفضلت واقف لحد ما عامل نظافه ظهر وقالى ان مستنى السفاره فرضيت عليه نعم فقالى السفار مغلقه النهارده للاحتفال بيوم كولمبس. قلت للراجل كولمبس ماله ومال السفاره المصريه ياعم الحاج, قال لى ان السفاره بتقفل دايما فى هذا اليوم. واتضح لى ان البهوات بتوع السفاره بيقفلوا فى الاعياد المصريه والامريكيه واعياد المسلمين والمسحيين. يعنى يدوب بيفتوح اسبوعين فى السنه والمواعيد من الساعه 10 صباحا للساع 2 ظهرا فشر السجل المدنى بتاع مينا البصل فى اسكندريه. واقسم لكم ان نصف العاملين فى السفاره ما يعرفوش مين هو كولمبس ده اصلا بس اهو فرح اجازات والله يرحم لما الواحد منهم كان يدوب ياخد اجازه مولد المرسى ابوالعباس او عيد تحرير سيناء بالعافيه

3 comments:

الأغاني للرأفتاني said...

مسخره يا عم محمد مسخره وهيئه دبلوماسيه تفضح

Anonymous said...

هههههههههههههه
ولاد الشوز
مش عاتقين
حتى فى امريكا فاضحينا كدة
علشان كدة اطلقوا علينا
مصطلح


الدول النايمة


النامية بقا هى بتاعت شرق اسيا
وذلك لايضاح الفرق
ودمتم

Adel said...

انت اللي جبت لنفسك وجع القلب حد قالك استعمل الباسبور المصري يعني يا خي ايديال سيتزن اوي خليها على ربك يا مواطن