مروه.. بيرم.. احمد شوقى باشا













فى البدايه ارجو المعذره من كل واحد هيقرأ الكلام ده لان الصوره الموجوده مع المقال تعتبر اكثر الصور احتراما للمطربه مروه. يعنى م الاخر لم اجد اى صوره ثانيه عليها هدوم اكثر من كده امبارح واحنا بنفطر فى مطعم مصرى فى نيويورك كان فى اغنيه شغاله فى الكاسيت لمطربه اسمها مروه وكان اسم الاغنيه (اهدى يا واد) و كانت اغنيه اخر مسخره والحقيقه مروه اللى كانت المفروض تهدى شويه وما تتعبناش معاها. كلمات الاغنيه لها ايحاءات حنسيه بحته ولا علاقه لها بالطرب. ولما سمعت كلما ت الاغنيه خصوصا ان انا انسان باحب الشعر العربى تذكرت بيرم التونسى اللى قالوا عنه انه ملك العاميه. بيرم التونسى هو اللى كتب اغانى انا فى انتظارك والحب كده و الهوا غلاب وكل الاحبه لام كلثوم. ولما كتب الاغانى دى واخذها زكريا احمد علشا ن يلحنها وام كلثوم غنتها زعل امير الشعراء احمد شوقى وقال كلمه شهيره:( والله انى اخاف على اللغه العربيه من عاميه بيرم). احمد شوقى يا ساده كان خايف على اللغه العربيه من اغنيه انا فى انتظارك مليت. ربنا رحمه انه مات من زمان لان لو احمد شوقى باشا سمع اغنيه اهدى يا واد وبلاش تنطيط كان زمانه ضرب نفسه بمطوه قرن غزال صناعه حلوان و مسك مروه دى وفرقع لها البلونات الهوائيه اللى عملاهم دول

4 comments:

Anonymous said...

اشمعني مطوة قرن غزال صناعة حلوان ؟؟

Adel said...

انما انت عرفت منين ان اسمها مروة وازاي دورت وجبت لها صورة انت فاضي بقى والله انا اللي خايف عليك من مياصة فروة دي

minesweeper76 said...

ماهو بيرم برضه هو اللي قال "يا اهل المغنى دماغنا وجعنا دقيقة سكوت لله"، لأ و الكلام ده كان إمتى؟ أيام عبد الوهاب و أم كلثوم و فريد و محمد فوزي و عبد الحليم

بس أنا عندى سؤال، هو أحمد شوقي خد الباشوية؟ أنا كنت دايما أسمع أحمد بك شوقي، بس باشا دي جديدة

Anonymous said...

يييييييييية
هو فيه حد دلوقتى يقدر يقرب من حدود مروة وهيفا والعجرميين؟؟
انت ناوى تقلب الدنيا عليك؟؟
ثم المفروض ان احنا معشر البنات اللى نغير من رفارف مروة البلاستيك
والكاوتشات المنفوخة سيليكون هنا وهنا وهناك
----
لاء لاء لاء يا رامى
انت كدة بقيت وحش اوى من جوة
مروة دى راهبة من راهبات الفن ولا مريدين ماليين شوارع الدول العربية وقصورها ودهاليزها


متلعبش فى عداد عمرك يا ابنى
واستهدى باللة كدة

بس والنعمة صورة مروة محترمة طحن يعنى
خصوصا الحتة اللى من غير هدوم فيها دى
ههههههههه
اللهم انى صائم