Tuesday, March 27, 2007

شكرا لمن قال نعم

اعلان هام
====
يعلن الحزب الوطنى عن شكره الجزيل لكل من قال نعم
ويشكر ايضا كل ما قال لا
ويخص بالشكر امه نعيمه لانها قالت نعمين
احا يا بلد
====
فى امريكا بيقولوا ان نسبه الاقبال ع الاستفتاء اقل من 26 فى المائه
فى مصر المحروسه بيقول اقبال منقطع النظير
فى بعض البقاع من دول العالم الاخر
بيقولو ان الاستفتاء لسه الاسبوع اللى جاى

25 Comment:

شــهــروزة said...

تصحيح
نسبة 26%نسبة غير دقيقة
التواجد تم بنسبة 3%ودى الحقيقة الغير معلنة
الناس ما ين مقاطع وبين لا مبالى
الصناديق يا ابنى رايحة متقفلة مليانة
تقولشى انتخابات برطمان الشعب؟؟

ازيك يا رأفووتة؟
والله العظيم واحشنى جداااااا

المٌهَــــاجِر المَصْـــــــرى said...

شهــــــــرووووووزتى
ايه الاخبار...وحشانى يا جميله
دايما كده معاكى الاخبار الصحيحه
يعنى النسبه 3 فى الميه بس..
طاب نعمل ايه بس يارب

albida said...

ههههههههههههه
أما نعيمة ايه بس؟!!! طب أنت مهاجر وبتقول كده... أمال احنا نعمل ايه بس؟

الاستفتاء والحمدلله نتيجته ظهرت النهاردة وطلعت 75,9% تقريبا.. اعترض بقى, وشكك فى نذاهة الاستفتاء!!!!! مش عارفة هما جابوا النسبة دى على اساس ايه, ده انا سمعت أن اتنين بس من الشعب المصرى راحوا يقولوا رأيهم.. وتحت تهديد السلاح كمان
ههههههههههههه

حسبى الله ونعم الوكيل فى البلد.. وفى اما نعيمة
:)


manal

المٌهَــــاجِر المَصْـــــــرى said...

منــــووووول
انا مش عاوز اسيح واقول للناس انك روحتى وقولتى نعم للتغيرات
الله اعلم مين اللى راح
لان النتائج كانت معروفه من قبل التصويت
وع العموم شكرا ليكى يا منال
لعدم مبالاتك واهتمامك

Iskanderani said...

مساء الفل عليك ارأفت يا أخونا المٌهَــــاجِر المَصْـــــــرى ,

بيقولك أم نعيمه راحت وإستفتت وقالت كلمتها، وعلشان المرأة دي زي الراجل كده خلوا صوتها يبقي بعشرة 10رجاله وكمان مفتي الديار المصريه قال ده ينفع وكمان المسحراتي اللى كان زمااااااااان في شارعنا قال كده ينفع وإذا ماكنتش مصدق روح أساءل سعد الصغير وهو يقولك وعلى فكره ال 2/3 1 % ده صح %100 بس علشان إحنا في المهجر مش واخديين بالنا كويس ماتشككوش في الحاجات الصح بقي وبطلوا سؤ ظن الراجل عايش كده حلو قوي

تعالي ليٌ يامه ، إنت سيبتيني هنا لوحدي ليه بس!!!!!! مانا كنت مش بعرف أقراء بين السطور ليه إتعلمت كده بس؟؟؟

تحيات إسكندراني في بلاد الله الواسعه

المٌهَــــاجِر المَصْـــــــرى said...

اسكنــــــدرانى
استاذ ممدوح
كويس انك عارف سعد الصغير..كده انا اتأكدت ان علاقه بالوطن الام مازلت قويه

انا مش عارف لحد امتى الحكومه دى هتفضل تستخف بمطالب الشعب..وامتى الحكومه هتعرف ان موضوع 99% ده ما بقاش ياكل عيش..

وعلى رأيك الواحد ساعات بيفكر ويتمنى انه يجهل القراءه والكتابه..وساعات كثيره اتمنى ان اكون من الناس اللى لا تبالى..
ع الاقل علشان الضغط والسكر يتأخروا شويه

Iskanderani said...

مساء الفل مرة تانية المٌهَــــاجِر المَصْـــــــرى,

طبعا أعرفه يراجل ماهو أنا برضه ليٌ في الهلس ومش واخد الدنيا كلهاجد علشن الضغط والكلوسترول يتأخر شويه علي أخوك في المهجر وبرضوا النبيت الاحمر بيساعد شويه على هضم الفول والعدس في الكشري بتاع المصاروه اللي انا ماليش فيه ، انا لي فقظ في السمك الشاخورا والجنبري ياأبو إسكندر


تحيات إسكندراني في بلاد الله الواسعه

مجهول said...

اظن يا استاذي
اننا احنا صح
يعني هما كانوا قاعدين بيعدوا الناس ولا ايه
اكيد احنا صح
وكله كانوني
كانوني
ويحيا الكانون

copa said...

ههههههههههههههههه انا شفت التزوير بتاع الانتخابات
روح علي يو تيوب و هتشوف بعنيك الصندوق فاضي والراجل بيوقلوا هو مفيش ولا واحد جه قاله لا و التاني قاعدعلي المكتب بيزور الاسماء و يعمل نعم و يحط في الصندوق احيه علي دي بلد وسخه
علي شعب بياخد علي افا اهله و ساكت زي الاهبل
ليهم حق يتركبوا زي الحمير

smraa alnil said...

يا عم رافت هو مين بس اللي قال نعم

دي اشاعه مغرضة لاننا كلنا ناس وطنيين من الدرجة الاولي
بدليل ان في واحدة سالها المذيع انتي قلتي اه ولا لا
قالتله طبعن قولت اه يا خويا
قالها ليه
قالتله لا حول ولا قوة الا بالله
التليفزيون بيقولنا قولوا نعم
والريس طويل العمر يطول عمره قالنا قولوا نعم
ومجلس الشعب ولشوري قالنا قولوا نعم
يعني الناس دي كلها قالت نعم
هقول انا لا يعني

حوار اخر
واحد من الشباب المذيع بيسالوه
انت هنا ليه
قالوا مش عارف ها قالولي روح قول نعم وخلاص

ووحوار اخر
انت قلت نعم ليه
قاله يا باشا انا قلت نعم عشان اريح الحكومة يمكن الحكومة ترضي عنا وتريحنا

بلا وكسة علينا
وبعدين مين قالك ان النسبة 26%
ايه الاشاعه المغرضة دي

اهو دة عيب الاعلام اللي عندكم بيكبر ويهول من كل حاجة صغنتته

اذا كنت هتحسب عدد اللي قالوا نعم وقالوا لا دة اذا قالوا يبقي كلهم علي بعض مش هيجوا 2,5 % يعني زي ما الشرع بيقول

المصرين والحمد لله اثبتوا وطنيتهم بمشاركة الاستتا بقلبهم
كلنا قلنا لا بقلوبنا متتبعين حديثث رسولنا الكريم
من راي منك منكرا فليغيره اما بقلبه وهذا اضعف الايمان
وبعد كدة هنكشف راسنا وندعي عليهم
ونلحس في باب الحديد
ونبوس باب السيدة

المٌهَــــاجِر المَصْـــــــرى said...

اسكندرانى
استاذ ممدوح
قشطه جدا قائمه الطعام اللى انت كتبتها دى خلت الواحد جاع
بتفكرنى بقدوره وابو اشرف
هههههههههههههههههه
=====================================================================
مجهــــــول
طبعا احنا صدق والدنيا كلها بقر..
وكله طبقا للدستور والقانون
انت عامل ايه؟
======================================================================
كـــــــوبا
المشكله بأه يا عم كوبا ان الحكومه برضه مش مقتنعه باللى بيحصل ده..ومش مصدقه ان فى يوتوب وفى فيديوهات وانترنت واعلام غربى بيجيب الحقيقه
الحكومه لسه مصممه انها تعامل الشعب كاننا فى ايام ابو جهل
======================================================================
سمرا
هى دى عينه الناس اللى انتخبت..الناس اللى الحزب الوطنى بيعمل ليل نهار علشان عيشه افضل وحريه بلا منازع
والله اضعف الايمان كمان مش نافع

tota said...

رأفت
الله يبارك فيك يا عم والله الواحد فرح فرحة كبيرة قوى بالنتيجة اصل النسبة دى 75.9% ممكن تدخل كلية شرطة مستريح
وبكره نفرح بالدستور وهو متخرج ويدخل الجيش ويكمل المسيرة

بذمتك فرقت قلنا نعم واحدة او نعمين قلنا لا قلنا ميت لا قاطعنا ما قاطعناش
النتيجة واحدة فى جميع الاحوال
بس عيب قوى انا مش بحب صوتى ينكشف عل حد ياخدوه ازاى من غير ما حد يقولى
هى دى المشاركة ولا بلاش
وسلملى على اما نعيمة
وطول ما ده بيحصل بطمن انى لسه فى مصر وان كل حاجة تمام
غير كده اشك ان فى حاجة غلط

تحياتى

المٌهَــــاجِر المَصْـــــــرى said...

توتا
مبروك ع النتيجه المشرفه..انت مش عارفه الواحد فخور قد ايه..
ماشى رافع راسه بدرجه 75%..فشر مربع متساوى الاضلاع

امه نعيمه بتبعت لك تحياتها وبتطلع لسانها علشان انت قلتى نعم واحد وهى قالت نعمين

نتيجه انتخابات موريتانيا ظهرت..وكل الدول الغربيه بتشيد بالحياد والديموقراطيه

موريتانيا اللى منعرفهاش غير من ماتشات الكوره
موريتانيا اللى لو سالت اى واحد عن مكانها فى الخريطه مش هيعرف

لك الله يا مصر

أحمد مختار عاشور said...

معلومة هامشية بدون مناسبة
والدة السيد الرئيس محمد حسنى مبارك تدعى نعيمة
...................................

المٌهَــــاجِر المَصْـــــــرى said...

عاشـــــــور
شكرا يامان ع المعلومه المهمه دى
يبقى هى دى بقه اللى قالت نعمين!!!!

علاء السادس عشر said...

عزيزى رأفت
زماااااااان كان فيه وزير داخلية اسمه ممدوح سالم أصبح لاحقاً رئيس وزراء وهو بالمناسبة من أسكندرية وفى أثناء وجوده كوزير داخلية تمت الأنتخابات النزيهة الوحيدة فى تاريخ مصر,يعنى أكثر من خمسين سنة والحال كما هو عليه قوانين قادمة بالتزوير والتدليس تتبدل بقوانين جديدة قائمة على التزوير أيضاً.الحل من وجهة نظرى أن نضحك ونسخر منهم ,لا يصلح أن نأخذ الناس دى بجد , لأننا لما نأخدهم بجد بنوفر لهم أعتبار معنوى .تخيل لو كل مصرى يشوف ظابط أو عسكرى أو وزير يدور وشه ويبتسم بالذمة مش ده أفضل من المظاهرات والخطب الرنانة والأحزاب المكسحة الموجودة حالياً.
تحياتى وسلامى يارأفت

المٌهَــــاجِر المَصْـــــــرى said...

علاء
اتفق معاك والله فى كل شئ.. فانا ذكرت سابقا ان احنا احسن شعب فى العالم يعمل مؤتمرات وندوات وخطابات وشعارات..
وكله على مفيش
الحل هو عدم المبالاه.. او قطع اى علاقه مع الحكومه..لان اصلا مفيش علاقه قائمه على عدل ومساواه
رحم الله ممدوح سالم وكل شريف فى الارض المنكوبه
شفت يا عم ..اسكندريه ما بتجيبش غير رجاله

Nohaz said...

حصرياً أغنية " يا موزة تعالي جنبي" جامدة في الأفراح


http://www.elmasrya2.com/vb/forumdisplay.php?f=21

shoft el ghaiboba el e7na feha????

omar said...

ya 3am mesh olna nefokena men el syasa we khalina fel hals? ageblak marguerita?

المٌهَــــاجِر المَصْـــــــرى said...

ايوه يا عمــــــــر
خلاص مفيش سياسه تانى يا مان..مفيش فايده..خلينا فى الهلس..
ايوه ابقى هات معاك مخدرات..ربنا يوفقك وتعرف تعدى من الجمارك

وجع دماغ said...

احلى تعليقات سمعتها فى العاشرة مساءا من المصوتين
1دستور أيه؟انا لا أعرف دستور ولا أم الخلول؟
2أنا جاى أنتخب الريس حسنى مبارك
3اتل ماعرفش 88 ولا74 أكيد الحكومة عارفة كل حاجة وعارفة المصلحة(طيب مش كده)ن
تحياتى يا عم رأفت
طنش ..تعش ...تنتعش...ثم تموت مقهور

المٌهَــــاجِر المَصْـــــــرى said...

وجع دماغ
عينه التعليقات اللى انت قلتها دى..هى عينه ونسبه ذكاء الشعب اللى راح صوت وقال احييييييه..
خلاص يا عم الحاج..والله مافى امل ولا عمر..عليه العوض ومنه العوض

وخلاص بجد انا هاطنش..بلاها سياسه..هاحاول انحرف واشرب مخدرات

أنـــا حـــــــــرة said...

يا ابنى فى المؤتمر الصحفى
صحفى ابن ناس بيسأل مسئول الله اكبر عليه
مش هقول مركزه علشان ماتجيليش كرشة النفس
بيقوله
اولا ان منظمة حقوق الانسان بتقول ان التعديلات دى ضد الحقوق بتاعة اسم النبى حارسة و صاينه عمو الانسان

ثانيا
ليه الاستفتاء اتعمل بسرعة كده بعد موافقة المجلس على طول

اسم اجابة عمو المسئول

بالنسبة لاولا
قاله
سنة كام الارهابين قتلوا رئيس الوزراء و سنة كام قتلو رئيس مجلس الشعب و سنة كام قتلولنا السادات
فازاى نسكت

و النبى لولا الملامة كنت قلت كلمتك الشهيرة يا رأفت

بالنسبة لثاثنا بقى
فقاله
ركز معايا كده
قاله
لعلك لا تعلم ان فى مصر يوم اسمه مولد النبى و يوم شم النسيم و اجازات رسمية بيستمتع بيها المواطن علشان كده كنا عايزين نعمل الاستفتاء قبل الاجازات


اتفو على دى بلد يا شيخ
قصدى على دى حكومة

فى كل الجرايد يقولك
واحد راح انتخب و للا اتنين
و الحزب الواطى يقولك النسبة معرفش كام


بلا وكسة

فعلا انتخابات نزيهة شفافة من كتر الشفافية عريتنا

Ma-3lina said...

انا حرة:

يخرب عقلك ايه يا بت الكلام دا انتى بتعارضى عمو حسحس ولا ايه

شكلك كدا من الفئة المعارضة و هتتاخدى فى الرجلين

طيب رافت فى بلاد الواءواء و محدش هيعرف يجيبه من هناك و اما نعيمة معاها
vip
وتصريح من كل الجهات المعنية انها تديها و متخفش من اى حد

انت بقى مش خايفة على نفسك

أنـــا حـــــــــرة said...

ماعلينا

ياستى سيبيها على ربنا
يعنى هتخرب اكتر من كده

:)

ثم انا لو قبضوا عليا
هجركم كلكم معايا
علشان المعتقل يحب اللمة

:)