زاهى محتاس



فى حوار له مع مجله كوندى ناست ترافلر المتخصصه فى السياحه والسفر زاهى حواس جه يكحلها عماها. زاهى حواس هو رئيس المجلس الاعلى للاثار فى مصر ويعتبر اشهر واحد فى علم دراسه المصريات بعد العالم الانجليزى هاورد كارتر. المهم ان عم حواس فى رده على بعض الاسئله لخبط الدنيا خالص واتهم وزاره السياحه انها مش فاهمه قيمه مصر السياحيه ولو انى اتفق معاه فى هذه النقطه. الاجابه اللى زعلت منه الناس هو رده على السؤال ان مصر استقبلت السنه اللى فاتت 9 مليون سايح وده رقم قياسى؟ عمك زاهى قال ايه

قال : انه كان يتمنى ان مصر تستقبل 4.5 مليون سايح اغنياء!!! وطلب من وزاره السياحه انها تغلى اسعار الفنادق والمتاحف واضاف ان فى بعض المجموعات السياحيه بتصرف فقط الف دولار فى الرحله وهذه النوعيه من السياح المفروض يقعدوا فى بلادهم وما يجوش مصر.!!!! هو ده اللى قاله الراجل اللى قاعد على اعلى كرسى للأثار فى مصر. شوف قمه الجهل.!! المهم ان القراء بتوع المجله ما عجبهمش كلام عم زاهى محتاس مع ان كوندى ناست بتخاطب اغنى طبقه سياحيه فى امريكا يعنى معظم قرائها اغنياء ولكنهم لم يعجبهم عنصريه حواس الماديه. وانهالت الخطابات على المحرر اللى عمل الحوار مخاطبه عم زاهى محتاس ومعظم الخطابات كان مضمونها اشبع بمصر بتاعتك احنا هنعمل زى انت ما قولت وهنقعد فى بلادنا ولو عوزنا نزور مكان فى افريقيا هنزور المغرب
زاهى حواس ممكن يكون عالم فى الاثار الفرعونيه لكنه جاهل فى التسويق والدعايه والاعلان وغلط جدا انه يكون واجه السياحه فى مصر وللاسف هو ده الواقع. كل ما افتح قناه ه فى التليفزيون الاقى عم حواس قاعد يبح وحزق من زوره كأنه هيولد!! وشكله يخوف الناس والانجليزى بتاعه يفضح ويموت م الضحك
فى احدى شطحاته ونطحاته عم حواس قال ان توت عنخ امون مش من افريقيا ما هواش اسود وان المصريين لا هم عرب ولا افارقه!!! كسبنا صلاه النبى احسن. لا طولنا نكون افارقه ولا عرب . امال احنا ايه يا عم محتاس

6 comments:

فريدة... said...

مش النهار ده 27 رمضان

طب والله دعتلك وانا بضحك بصوت عالى

ربنا يكرمك يا رافت يا انسان حلو قوى حقيقي

ربنا يكرمك

وربنا يستر

وحسبي الله ونعم الوكيل فى كل محتاسين بلدنا المنكوبة

وجوي من البوست بتاعل القابل ده احساس عالى قوى ب

شر البلية ما يضحك


:)

الأغاني للرأفتاني said...

فريده
ايوه كده ركزى فى الدعاء اليومين دول يمكن ربنا يقبل منك والعمليه تتصلح شويه احسن ماهى متكعبله كده
ربنا يخليكى يارب

^ H@fSS@^ said...

لووووووووووول
التسمية لوحدها مسخرة
محتاس فعلا
بس ايه الطوب اللي هو حدفه ده؟؟ حد يقول كده لقطاع كبير كده من الناس
مش حنلاحقها من المطار و بلاويه و لا تصريحات السادة المحتاسين زيه
عليه العوض فيكي يا مصر

و كمان مصر و الفراعنة لا افارقة و لا عرب
نبقى ايه؟؟ من موزمبيق؟؟
مش عارفة اضحك و لا الطم
انت تقترح ايه سيادتك؟؟

سلام

الأغاني للرأفتاني said...

حفصــه
والله لما تسمعى عم حواس ده تفتكرى ان الهرم وابو الهول اولاده..
الحراره اللى بتكلم بيها يعنى كانه عاوز ينام معاهم
وقاعد يرمى فى طوب ودبش لما فى سنه من السنين هتلاقيه قاعد لواحده مع الهرم ولا فى سايح واحد يعبره
وفعلا هو قال لا احنا عرب ولا افارقه
احنا سخطه..

ياسر شمس الدين said...

يا معلم رافتانى يا جامد اوى مش زاهى حواس بس هو اللى محتاس
كل الحكومة محتاسة ديه لو حكومة بتفهم كانت تجيب سايح يقعد اسبوع واقامة كاملة فى شرم الشيخ وطيران ذهاب وعوده كل ده بالفين دولار
يا معلم لو انا سايح عمرى ما اروح مصر يا عم رافتانى كفاية انهم هيشوفوا الزبالة فى الشوارع
يا عم احنا المفروض نأجر بلد تانية ونحط فيها شوية اثار ونقول ان ديه مصر بس بلد تكون نضيفه
بس يا حاج رافتانى انت بتلاقى وقت فى امريكا تتابع كل البلاوى بتاعتنا ديه ازاى
ربنا يعينك على الغربة يا امريكانى

الأغاني للرأفتاني said...

ياسر
كل سنه وانت طيب يا صديق
مالك اليومين دول ضاربه سواد كده ليه؟
يارب كله يكون تمام معاك
اللى غايظنى فى البلد دى يا ياسر انهم بيخلوا واحد تمرجى بيقى وزير الزراعه ودكتور يبقى وزير المواصلات وكل منصب على قد الواسطه بتاعته؟
الكفاءات اللى بجد هاجرت وهنا فى امريكا اللهم ما صلى ع النبى فخر المصريين تجدهم فى اعظم المناصب
ربنا يعوض