ريحةالحبايـــب

(1)
هفت علىّ ريحه من ريحه الحبايب
رسمت شفايفى ابتسامه قلب دايب
قعدت افكر فى اللى قلبى حبهم
وسألت نفسى عن اللى راح
وعلى اللى غـــــــــايب
*****
(2)
لمسه ايدين..ضحـــكه عنين
بترجعك عشــــــــــــرين سنه
بنت الجيران ..صُحبه زمان
وأيــام بريئه ملــــــــــــــــــونه
*****
(3)
ايه اللى غير كل حاجه فى يوم وليله
فرحه سنينا اصبحت ايام قليله
وبقينا كالطير فى السما مابيده حيله
غير زى مالريح يؤمره يرتاح له ليله
*****
نيويورك فى 1 اكتوبر 2007

18 comments:

Anonymous said...

الابيات حلوه بشكل وبترجع الواحد لذكريات حلوه بشكل
تحياتى

محمد عبد القوى said...

والله فكرتنى بصلاح جاهين..وخصوصا فى الرباعية التانيه
أحساسك عالى ،أعمل على التطوير

الأغاني للرأفتاني said...

رئيس الجمهوريه
انا مبسوط بزيارتك ومبسوط انها عجبتك
الحياه اصبحت مجرد شويه ذكريات يا صديق
تحياتى
-----------------------------
محمــد
شاكر كلامتك ومجاملتك الرقيقه بس حرام عليك تظلم جاهيــن معانا
هههههه
انا متقبل اى نصيحه
فاى تطوير تقصد
تحياتى

hamasat said...

ريحة الحبايب
الله بنتنشق عليهابعد غربة طويلة مش عارفين واخدانا علي فين وياريت خسارتنا بيها اكبر ولا مكسبنا!!!!!
ياريت حد يدلنا
وجعتنا ياعم

كرياكو said...

كل سنة وانت طيب
مش عرف لية كل مقراء شى ليك احس انك كاتبة لية انا


معا تحياتى
كرياكو

الأغاني للرأفتاني said...

همســـات
سلامتك من الوجع
بالنسبه للغربه او للى ساكنين الوطن
فرأى ان مفيش حد منهم كسبان او سعيد تماما
نحن فى المهجر نعيش عيشه سعيده ماديا وننعم بحريه
وفى البلد الام ينعمون بالحبايب والاصحاب
فكلانا له ميزه ويه وجع
----------------------------------
كــرياكو
كل سنه وانت طيب
انا سعيد ان الكلمات دى لمست حاجه فيك
شاكر تواصلك

فريدة... said...

وبقينا كالطير فى السما مابيده حيله
الله عليك

تحياتى يا رأفت
حقيقي الله

الأغاني للرأفتاني said...

فـريده
يا سبحان الله
والله كنت فى باللى النهارده وكنت هابعت لك رساله
عامله ايه؟

آه زى الطير فى السما مابيده حيله
بيطير نعم بس على حسب الريح والجو

أمير القلوب said...

الحقيقة الأبيات دي رائعة بجد
وإحساسك مرهف وتعبيرك راقي
ربنا يزيدك ويفتحها عليك
تقبل تحياتي

Unknown said...

كلماتك جميلة .. معبرة وموجعة فى نفس الوقت

ربنا يهونها علينا فى الغربة

تحياتى

الأغاني للرأفتاني said...

امير القلوب
انت اللى رائع يا صديق
ربنا يفتح عليك ويكرمك
شاكر كلامتك الرقيقه
----------------------------------
انســـــانه
الغربه شعور حتى لو كنتى فى وسط الحبايب ..احيانا بتشعرى بالغربه
ربنا يكرمك

hamasat said...

عزيزي اعلم جيدا ان كل مكان به مميزات وعيوب ولكن؟؟
لا اعلم ان كنت متزوج ام لا وهل لديك اولاد ام لا حسبتك ها تتغير وهتبقي اصعب كل اولادك ما يكبروا كيف توازن بين
1-وصلت بعد جهد جهيد وسنوات تدريب طويلة في مجال تخصصك لمكانة علمية مرموقة لن تتوفر لك ابدا في بلدك ولن تجد من يساعدك هناك اساسا كي تستمر في نجاحاتك وابتكاراتك خصوصا ادا كنت نابغ في مجال بحثي بجانب التفوق العملي من سيتبني ان ندعمك لتسجيل براءة اختراع جديد لك!!!!وغير دلك الكثير والدي يعلمه الجميع
2-اسلوب المعيشة التي يحيا ويتنعم بها اولادك واسلوب التعليم وغيره من الخدمات المتوفرة للادميين هنا ومعاملتك كآدمي برغم ما تواجد من تفرقة عنصرية ملحوظة الي حد ما في بعض اوجه الحياةهده الايام
3-الوجه الاخر من المعادلة الاولاد وما يكتسبوه من المجتمع
اولا العربي مع الغالبية العظمي يحتاج الانعاش عاجل سواء كان الاولاد في مدارس اسلامية ام لا ولاحظ انها نعمة مش متوفرة لكل الاماكن وايضا اسعارها مش في متناول الجميع لو عندك تلات اربع عيال
ثانيا الضغط النفسي اللي بتتعرض ليه انت والاصعب الاولاد من مرحلة اعدادي وصعودا لثانوي وادا ربنا سترها عليهم ووصلوا للجامعة بدون خسائر
ثالثاضياع هوية الاولاد بين بلادنا وبين حياتهم هنا واختفاء بدرة الانتماء للاهل والارض مين سيدي العزيز من ابنائنامش ها اقولك اللي اتولدوا هنا لكن فرضا اللي اتربوا بس هنا ممكن يسيب هنا بعد ما يكبر ويفكر يرجع لبلده او اهله هناك الا اللهم ادا سمحت ظروفه فيما بعد كل عدة سنوات اجازة اسبوعين للفسحة!!
رابعا واللي يوجع اوي بص للاولاد دي المحصلة الاخيرة اللي قدرت تديهالهم من اخلاقنا ودينا وقيمنا واحاسيسنا انت راضي عنها ويا تري هما هايقدروا يدوا لاولادهم ايه منها!!!
سوري غلست وطولت وهناك الكثير الكثير بس مش عايزه اطول اكثر مش باقولك دي خنقة ومتقفلة تقفيلة الدومينا؟

الأغاني للرأفتاني said...

همسات
اولا :انت ماطولتيش ولا حاجه.البيت بيتك
ثانيا:اتفق معكى فى معظم كلامك فانا مثال على هذه الحسبه فلقد اتيت لهذا البلد فى سن صغير وبفضل الله ومجهود الوالدين لم اضع او اخسر الكثير
واتفق معكى فى موضوع البحث العلمى ايضا ففى كثير من الجامعات هنا تجدى رؤسائها من المصريين والعرب واذا رجعوا لبلادنا سوف يعانوا الامرين
وبالنسبه لموضوع الاولاد فليس اكيد ان تربيتهم فى بلادنا سوف تكون افضل فهناك امثله عديده على انحراف الابناء فى مصر وغيرها من الدول العربيه
فى راى ان الابناء كالارض الخضراء بتوفيق من الله وبمجهود من الابوين يمكن زراعتهم كما نرغب فلابد من الاهتمام والعوده دائما للجذور
الامثله عديده على النجاح هنا فى المهجر هناك العديد من الابناء الذين نشؤا على الاخلاق الحميده
المشكلهه اجدها فى انحراف الاباء وضعفهم امام رغبات رخيصه تدمر البيت بما فيه
تحياتى

ياسر شمس الدين said...

المهم يا رافتانى وانا برة مصر ببقى عايز ارجعلها وابوس ارضها ولما ارجعلها ببقى عايز العن سنسقيل ابو اللى جابوا ابوها

الأغاني للرأفتاني said...

ياسـر
ماهو ده حلاوه مصر
وعلى فكره احنا الشعب الوحيد ع الاقل فى امريكا اللى دايما بيظل مرتبط بجذوره
معظم المهاجرين من الدول التانيه خلاص بينسوا اصلهم لكن احنا لا يا معلم

Gemyhood said...

رأفت يا ريت تبعتلى ميل علشان عايزك ضرورى بخصوص الاغانى دى

mr.gemyhoood@gmail.com

سها السباعي said...

سعيدة بمعرفة حضرتك وتشريفك مدونتي الوليدة
سعيدة بمدونتك التانية دنيا ودين واتلخبطت لما قريت تدوينتك اهلا بالرذيلة
كلمة ودعوة صادقة لله سبحانه في العالم الافتراضي تطمئنني الى انني لن اقرا ما يوجع قلبي ويصيبني بالغثيان من كثرة ما لفيت على مدونات اشكال والوان
الانسان بيرتقي طول ما هو قادر يخالف كل الافعال اللي غيرة اللي مايقدروش يمسكوا زمام نفسهم قدام كل حاجة تحط من التكريم اللي ربنا كرمهم بيه
زي بالضبط اللي بعمل دايت عشان صحته تكون كويسة وقوامة معتدل
لو كل صينية بسبوسة بالقشطة هيحس بلذتها وهو بياكلها بس
لكن بعدين
السعرات اللي قعد يحرق فيها ايام واسابيع هترجع وشعور بالندم والاكتئاب مش هيفارقة
لك مني كل تحية

الأغاني للرأفتاني said...

جيمى
عُلم وينفذ يا فندم يا زملكاوى
هههههه
--------------------------------
سهـــــى
يعنى يا سهى ملفتيش غير اهلا بالرذيله وتقريها ما المدونه مليانه
ع العموم كان لازم تقرى اللى قبلها واللى قبلها علشان تعرفى الظروف المحيطه بها
وعلى اى حال انت روحتى لدنيا ودين وهى المكان الصحيح
وهذا جمال التدوين والانترنت
ما حدش يقدر يجبرك انت قرأى ما لا تبغى
وقبل ما تبدأى تتقيئى علطول تقلبى الصفحه لصحفه تانيه
شاكر زيارتك وكلامتك الرقيقه