Sunday, November 18, 2007

شهيناز النجار عضو سيد قراره بتستقيل

استقاله شهيناز النجار عضو مجلس الشعب عن دائره المنيل تعتبر اول استقاله لمسؤل مصرى او عضو فى مجلس الشعب..الله اعلم ماهى دوافعها للاستقاله..بعض الناس بيقولو ان احمد باشا عز زوجها هو اللى طلب منها الاستقاله.. وطبعا انا لو مكان شهيناز..ملعون ابو المجلس فى ظل امان وفلوس ونفوذ احمد عز.. لكن الاستقاله فى حد ذاتها حاجه كويسه.. عضوه فى المجلس الموقر بتستقيل لوحدها..الظاهر ان التناحه السياسيه لم تؤثر فى هذه السيده..حاكم احنا عندنا فى اعضاء مجلس الشعب والمجالس الحكوميه..اول ما المسؤل من دول يقعد على الكرسى يحلف ميت يمين..انه هيخدم الشعب حتى اخر قطره فى الدم ونبضه فى القلب.. طاب يا عم الحاج المعاش وحالتك الصحيه وظروف البلد اللى اسود من قرن الخروب..مليش دعوه انا عاوز اخدم لحد اخر قطره واخر نبض .. وبيقعد صاحبنا من دول على قلوبنا لحد ما يتحبس او يموت او احنا نموت او نهاجر.. وبعد الهجره نرجع البلد نلاقيه برده قاعد بيخدم لحد اخر قطره واخر نبضه
بمرور السنين بيكتسب النائب من دول خبره سياسيه وطبقه سميكه على الجلد اسمها التناحه والتلامه السياسيه ودول مختلفين عن الكرش السياسى اللى بيطلع فقط بعد اول مليون قطره واول مليون نبضه ما يدخلو البنك

8 Comment:

شـــــهــــروزة said...

ههههههههههههههههه

ماهو انت مش واخد بالك
شهيناز خايفة على رشاقتها
ومش ناوية يطلع لها كرش
ولا ناوية تستنزف دمها فى خدمة الوطن المطحون
ولا ناوية تقطع نفسها على حس المطحونين
ولو ان دايرةالمنيل على رأى اللى قال
حتة جاتوة للمرشح
ويمنها غالى اوى للى بياخدها
لأن مفيهاش مشاكل ولا حد فيها عاوز حاجة من الحكومة ولا وجع راس


وهو برضة حد يبقا جوزه أحمد عز يا رااااجل... ويروح يوجع دماغه فى مجلس شعب وملل وتناحة وكلاحة من اياها؟؟

ولا لمجرد الوجاهةالموجتوماعية و اثبات الوجود؟؟

ازيك كدة؟

ابن حـجـر الـعـسـقـلانـى said...

يااه يا جدع .... تخيل واحدة عملت برنامج انتخابى (بافتراض ما يجب أن يكون) و بذلت مجهود ضخم لتجميع الناخبين و أقنعتهم برغبتها الصادقة فى خدمتهم و منفعتهم و المفروض إنها كانت ماشية فى سكة تنفيذ برنامجها الانتخابى و تحقيق رغبات الناس بل و المشاركة فى سن القوانين و المشاركة فى رسم خطة البلد ... كل دة تديله بالجزمة عشان خاطر عيون الرجل الحديدى أحمد عز .. يااه يا جدع .. شايف الأمانة فى خدمة البلد

يا خسارة .. الست شاهيناز كانت بتعمل شاشات كبيرة فى المنيل و مصر القديمة عشان تذيع ماتشات الكورة المهمة ... هانفتقد الشاشات دى والله .. ماهو خلاص بقى ما بقاش فيه مصلحة مع الناخبين

Anonymous said...

i was worried about u

why u removed the other blog
and why we didnt recieve any msgs from u or anything????????????
noha

رأفــــتلــوجيــا الرأفتـــانى said...

شهــــروزه
زى ابن حجر ما قال..شهيناز كانت مروقه المنيل احلى روقان..انما الواد احمد عز عنيه زايغه..والبنت مكنه نظام 6 سلندر..قالها يا انا ياالمجلس..فهى بتبص لقدام..احمد عز هيبقى الرئيس فى يوما ما..فقالت تصبر شويه لحد ما تبقى السيده الاولى..
وفعلا هى كانت خايفه من الكرش السياسى

وحشـــــــانى
==================================
ابن حجر
برنامج ايه بس يامان..الست كانت بتعمل كل ده علشان تصطاد الفتى الوسيم ..واحنا الخسرانين..الشاشاتت الكبيره بتاعه الماتشات هتضيع
بس ربك هيسهلها..يمكن احمد بيه يشترى شاشات اكبر
==================================
نهــــــــا
عامله ايه..وحشانى والله..معلش انت عارفه الظروف الهباب..
البلوج التانى اتمسح من زمان نظرا لكثره المهاجرين ومنه العبيط والاهيل ..واصحابى فكروا انى انا اللى باكتب تعليقات خايبه كده
ايه حكايه غير معروف دى
متنكره من مين؟؟؟

Iskanderani said...

مساء الفل يامان يأستاذ رأفت؛
أيه اعم الاخبار الحلوة بتاعتك دي جايبها منين؟ ماتكونش الست عايزة تفضي للغسيل وتنقية الرز وشششششششرررررراااااءءءءء الخضار من السوق؟ لان حضرتك عارف يوم الغسيل بيكون يوم مهبب والراجل بيرجع ما يلاقيش أكل كويس علي السفرة فقررت انها تعملها من قصرة وتستكين في البيت وتشوف أمور البيت والعيال والراجل المحترم ده!!!!

تحيات إسكندراني في بلاد الله الواسعة

رأفــــتلــوجيــا الرأفتـــانى said...

اسكندرانى
استاذ ممدوح
عامل ايه وايه اخبارك
لا يا استاذ..الست مش عاوزه تتفرغ لشؤن البيت..الست عنيها على ما بعد جمال مبارك..يعنى ممكن لما احمد عز يبقى نائب رئيس او رئيس وزراء..حاجه زى كده

Anonymous said...

انا زعلانة منك جدا
متنكرة لان كسلانة لدرجة مش قادرة اكتب يوزر و باس
في اخبار كتير عندي
انت بقي اخبارك اية؟؟؟؟؟
زعلانة منك جدا لاني افتكرت حصل لك حاجة

غمض عينيك said...

صباح الفل ياباشا
بص على حد علمي ان هي مش اول حد يستقيل من مجلس الشعب..اوقات الانتخابات الرئاسية المفتكسة بتاعتنا ..كان في شخص بيدعوه انه يرشح نفسه لما عرف عنه من طهارة يد وغيرة على مصالح البلد ولكونه كان كمان اول واحد يستقيل من مجلس الشعب اعتراضا هلى طريقة سلق القوانين..بس مين الشخص ده الحقيقة مش فاكر...معلومة ناقصة اعذرني

اما بخصوص شاهيناز النجار فا انا بستعير تعليق الصديقة شهروزة
حد يتجوز احمد عز ويفكر في مجلس الشعب..وبعدين مجلس الشعب ما بيبصش ع النيل ولا فيه حمام سباحة

تحياتي لك
ولمدونتك الرائعة
محمد سمير