Monday, December 24, 2007

لحظه وجع فى حب مصر

(1)

بين الشعوب دور تلاقى
اللى اتظلم واللى اتخــدع


*****

واللى الامان ضاع من
ايديه ولايــــوم رجــــــع

*****
واللى التاريخ شاور عليه
واليه ركـــــــــــــــــــــع

*****
اما انا.. فعمـرى لحظه
اسمهــــا لحظــه وجع
*****
لحظه وجع فى حب
ارض اتفتــــــت
*****
لحظه وجع فى قرب
ناس اتشــــتــت
*****
(2)
من كام سنه..ثار اللى ثار
وهاج اللى هــــــــــــاج

*****
وبدل المـــلك بقى عندنا
يجى الـــــف تـــــــاج

*****
تاج للقصور اللى اتبنت
على ظهر ناس تانيه اتحنت
*****
وتاج للغلابه اللى اتنسوا
والفرحه منهم اتأممت

*****
(3)
ومع العبور...هلت نسايم للزهور
والكل اجمع ان بعد الظلمه نور

*****
وفى يوم حزين ... والدنيا ملمومه وبصه
قتلــــلوا الامل وهو قاعد فى المنصــــــه

*****
(4)
ومن يومها م انش خايف
من امبارح ولابكــــــــره

*****
انا سلاحى قلم فاضى
وحبره الفاضى كان فكره
*****
بقت صرخه فى وش الظلم وسنينه
صارت بلسم تداوى جرح وانينه
*****
وللظالم قولوا معايا... مش عوزينه
مــــــش عوزيـــــــــــــــــــــــنه
*****


نيويورك فى 28 اكتــوبر 2007

اسم الاغنيه كان فكره جيمى هــــود


33 Comment:

HafSSa said...

الله الله الله يا فندم
ايه الجمال ده يا زعيمنا الرافتاني؟؟
انا لو اعرف انك كل ما بتغيب فترة تبقى بتكتب حاجة كده مكناش قرفناك بتعلقاتنا
مليون على مليون يا معلم
تسلم ايدك
تحياتي

Iskanderani said...

كل سنة وانت طيب ياأستذ رأفت وكل أبيات شعر وانت مبسوط إن شاء الله

تحيات إسكندراني في بلاد الله الواسعة

DantY ElMasrY said...

انا بس هاعلق على كلمة قتلو الأمل وهو قاعد فى المنصة
اعتقد انه كان ميت سياسيا قبل كدا بكام سنة
والسبب اننا شعب فاسد وافسد قطاع فى الشعب هم المثقفين
لأنهم بيتعاطوا لوثة عقلية اسمها اليسار بكل مشتقاتها
وهم مختلفين تماما عن اليسار فى اوربا اللى انا معجب بأطروحاته
والمشكلة مش انهم يساريين ل
المشكلة انهم مصريين او عرب

رأفــــتلــوجيــا الرأفتـــانى said...

حفصه
كل سنه وانت طيبه
شاكر كلماتك المشجعه يا ست الكل
عُمر ما تعليق ليكى كان يوم من الايام قرف..انت تشرفى فى اى وقت

======
اسكندرانى
استاذ ممدوح..كل سنه وحضرتك طيب..وان شاء الله السنه اللى جايه تكون احسن من اللى فاتت على كل المستويات

======
دانتى المصرى
كل اللى جه فى دماغى لما كتبت قتلوا الامل فى المنصه..انهم ما عطلوش فرصه..
والايام بتثبت صحه ما فعله..
اليسار العربى مثله مثل اى شئ عربى فى هذه الايام..غير كامل
دعاه الحريه..يريودنها حريه تفصيل على مزاجهم..يعنى حريه ليهم فقط

لكن يا صديق برغم وجود دعاه الثقافه وتجار الدين..الا انى اعتقد ان هناك امل يوما ما

شرفتنى بزيارتك وتحليك السياسى لكلمه من كلماتى

بالمناسبه..انا حاولت الدخول لمدونتك اكثر من مره ولكن اجد الصفحه فاضيه
فقط العنوان
مش عارف حد غيرى اشتكى ؟

حدوتة مصرية--ياسر شمس الدين said...

يا رافت كل سنة وانت طيب ايه الجمال ده يا معلم ربنا يكرمك يا رافتانى
كلامك فى الصميم يا معلم رافت يا فاجومى التدوين

الجحيم هو الحقيقه said...

اخبرا
رافت رحيم يكتب من جديد
ولكن اذا كتب
الرافتانى فلابد ان يصمت
الجميع ويجب ان يسمع الفضاء التدوينى
كمية الاعجاز والصدق الحقيقى البعيد البعيد عن الزيف

كلام من قلب موجوع

تحيه بالقوى ياصديق

حركة الحزن جوانا من جديد

بعد ما حولنا ننسى بعد ماقولنا ملعون ابو دى ام بلد

بس بنكتشف اننا برضه

مدبحونى فى حبه


تحياتى ياصديق

albida said...

ايه يا رأفت كمية الكأبة الرهيبة دى؟!! يعنى يوم ما الرأفتانى الفنان يرجع.. يرجع حزين كده؟!
كمان دى أغنية.. امال لو ألفت رثاء هتعمل ايه؟
:) :)

ومن منبرى هذا أحب أسلم على حفصوصة وعلى محمد (الجحيم).. ايه أخبارك؟.. وبرضه على عمر وأستاذ أسامة لو عدوا يعنى... أحب أهنى طنط نادية بالزفاف السعيد و.... لا, كده بقى اليوم المفتوح!!! :) :)

الجحيم هو الحقيقه said...

ازيك يا زعيم جمهوريتنا المبجل رافت

رئيس جمهورية فسادستان العظمى

كل سنه وانت طيب يا مان

............
بما انى قاعد سكيوريتى على بلوجك يا زعيم

وقاعد بسمع دبة النمله فى بلوجك الوقر

انقل تحياتى الحاره جداااااااا الى الاخت

البيدااا والله وحشانا يابنتى اناحاسس التدوين مالوش طعم من غيرك والله مش بننساكى واسالى الزعيم الرافتانى بنشكر فيكى ديما بجد مفتقدين انسانه جميله

ربنا يعينك ويوفقك ان شاء الله ونرجع نشوفك بتكتبى تانى
0000000000000

تحياتى الى السيد الرئيس

والى السيده المبجله منال
والى الساده اعضاء مجلس ادارة البلوج

كان معكم من اما م بلوج الرافتانى مراسكلم

طارق عبد الجابر الله يمسيه بالخير
ههههههههههه

Iskanderani said...

مساء الخير الاخ العزيز أستاذ رأفت؛

كل سنة وحضرتك طيب وبالف خير
عام جديد سعيد عليك وعلى كل احبائك

تحيات إسكندراني في بلاد الله الواسعة

حدوتة مصرية--ياسر شمس الدين said...

كل سنة وانت طيب رافت

رأفــــتلــوجيــا الرأفتـــانى said...

ياسر
كل سنه وانت طيب
بارك الله فيه وشاكر مجاملتك الرقيقه
=========================
محمد
كل سنه وانت طيب يا صديق
ربنا يخليك زى ما انت قاعد تنفخ فى كده
انت عامل ايه
========================
منال
هو الحزن فى الكلام بس؟
عملتيها ما يطلبه المستمعون
نسيتى تقولى ونبلغكم بان سلامه دخل الجيش
اخبار القرصان حتاته ايه
========================
محمد
بلاش هجص..يامان..انت ومنال عاوزين برنامج على الناصيه
=======================
اسكندرانى
كل سنه وانت طيب يا استاذ ممدوح
عام سعيد ان شاء الله
=======================
احمد
كل سنه وانت طيب يا ابوحميد
ان شاء الله 2008 احلى من اللى قبلها

فريدة... said...

كل سنة وانت طيب يا رافت

عمل مليان الم
حقيقي وجهنى
ربنا يعزك يا رافت

بس تعرف اتعودت احس فى كتاباتك الشغب والاصرار والونس الدافئ

لذلك ما يحمله العمل من الم المنى
ربنا يكرمك
حقيقي جميل

غمض عينيك said...

وبدل المـــلك بقى عندنا
يجى الـــــف تـــــــاج

عندك حق والله

albida said...

مرسى يا محمد ربنا يخليك!! والله وانا كمان مفتقداكم ومفتقدة التدوين جدا! منها لله الدراسة بقى! معلش.. كلها ست سنين.. قصدى ست أشهر :) وارجع تانى أن شاء الله (وعلى فكرة أنا مش فى السجن أنا فى الكلية هههههه)

رأفت.. القرصان حتاتة باعتلك أحلى سلام وبيستاذنك تشوفله أى واسطة كده علشان يجدد رخصة القرصنة بتاعته.. أصل شرطة المسطحات المائية قرفينه اليومين دول
:) :)

رأفــــتلــوجيــا الرأفتـــانى said...

فـــــريده
كل سنه وانت كمان بخير واحسن من اللى السنه اللى قبلها
ربنا يكرمك على كلامتك الجمليه دى
================================
غمض عينك
فعلا..ايام الملك كان فى ملك واحد
دلوقت فى ملوك كثير
تحياتى
=================================
منال
حتاته عامل ايه؟
وام نسمه
واخبار الامتحانات

كرياكو said...

الله ينور عليك ياريس

اية المعانى دى
اما انا.. فعمـرى لحظه
اسمهــــا لحظــه وجع
مفيش كلام بعدك اقول اية بس

فريدة... said...

عامل اييييييييييه؟

:)

Iron Cobra said...

هية، أزيك يا زعيم أنا باصبح وبامسي بس.

رأفــــتلــوجيــا الرأفتـــانى said...

كــــــرياكو
ايه اخبارك يا ريس..يارب تكون بخير
شاكر زيارتك
===============================
فـريده
كله تمام يا غاليه..انت عامله ايه
==============================
سمسم
يا صباح الفل ياباش..سيبت لك رساله من كام يوم..
يارب تكون بخير

Memo said...

كل سنة وانت طيب ياأستذ رأفت
اية الحلاوة دي عودة قوية فعلا ابيات اكتر من رائعة
تحياتي

rema_almoraly said...

بجد انت رائع وارائك جريئه وبتقول كتير من اللي جوانا
كأنك صوتنا المخنوق جوانا وخايف يطلع احسن ندخل احنا اماكن مش هانطلع منها:)
اسكندريه بتسلم عليك بشوق وحنين
وكل ناسها الطيبين
اللي لسه بيضحكوا رغم السنين
رغم الهموم , رغم الجراح ,رغم الانين
رغم ظلم الظالمين
رغم برد معشش في القلوب
ويّا خوف مرسوم في الدروب
لسه برضه في امل ...
لسه عند اسكندريه حاجات كتير
طول ماانت من ولادها....
عارفه هيا ان لسه في فــ الدنيا خير


تقبل احترامي وتحياتي

qwert anime said...

مدونتك رائعة انا اول مرة ازورها
بس كلمة قلم فاضى
و جعتنى قوى

رأفــــتلــوجيــا الرأفتـــانى said...

ميمو
كل سنه وانت طيبه وبخير..ربنا يخليك
=================================
ريمـــــا
ربنا يخليك..انت اللى كلامتك دى جميله ومجاملتك مشكوره
اسكندريه فعلا وحشانى خصوصا فى الشتا بعيد عن غلاسه المصيفين..
سلامى لكل شبر فى اسكندريه..
وما تقطعيش الزياره
وسلمى على خالد
(وش واحد بيغمز)
=================================
qwert anime
شكرا على كلامتك الجميله..
قلم فاضى كان تعبير كويس عن عدم وجود اى حلول تانيه
بس الحبر ما ضعش ع الفاضى..لانه بقى فكره وصرخه

تحياتى
وشاكر زيارتك

rema_almoraly said...

والله يا استاذ رأفت دي مش مجامله
انت بالفعل كلامك جميل واحساسك عالى انا بحب اوي ادخل المدونه بتاعتك واقعد اقرا
بحس بمتعه وكأنك دخلت جوايا قريت مشاعري وافكاري واللي واجعني من اللي شايفاه حواليا
انت بجد صوت جيل بحاله وشاهد على ازمة بلد
اما بقى بالنسبه لاسكندريه سلامك وصل لكل شبر فيها
امبارح نزلت مخصوص وقفت قدام البحر وقلت له ابن اسكندريه ابن شطك يا بحر
بيسلم عليك
والرد جاني مع موجه عاليه غرقتني ميه وانا قاعده دلوقتي في البيت عندي انفلونزا بس ولا يهمك
وخالد كمان بيسلم عليك
وبيقولك ان شاء الله الزياره الجايه لاسكندريه تحضر فرحنا وتنورنا
في النهايه يا فنان
بشكرك على زيارتك للمدونه بتاعتي واتمنى ماتحرمنيش ارائك الجميله
ولك حضن كبير من كل شبر في اسكندريه واجدع سلام اسكندراني
:)

rema_almoraly said...
This comment has been removed by the author.
حدوتة مصرية--ياسر شمس الدين said...

ايه يا رافت فينك وبطلت تدون ليه يا باشا ان شاء الله يكون خير

رأفــــتلــوجيــا الرأفتـــانى said...

ريما
ايه يا ستى الكلام ده كله..ربنا يكرمك ويرفع من معنوياتك زى ماانتى كده رافعه من معنوياتى..هههه
بلغ تحياتى لخالد وان شاء الله هاحضر الفرح..يارب يكون فى الصيف
ان شاء الله هاشوفك على خير
سلامى لاسكندريه تانى..دايما كده فكريها بى
ههههه
==============================
ياســـــــــر
عامله يا ابواسكندر
مشاغل يا مان..انت عارف بأه الانتخابات الامريكيه على الابواب وانا ناوى اترشح حزب وطنى مستقل فئات
ههههههههههههههه

والله ظروف يا ياسر..دعواتك يامان
ابقى ابعت لى تليفونك فى ايميل يا مان

سلام

rema_almoraly said...

مش مسألة حزن والله يا استاذ رأفت
لكن مجرد مشاعر او حاله بحس يها وبعيشها ومش شرط تكون خاصه ممكن تكون نتيجه لاني اتأثرت بأي حد قابلته او سمعته او اتكلمت معاه وحسيت بحاجه صادقه طالعه من جواه
الحمد لله انا عايشه اجمل قصة حب في العالم
وان شاء الله تشرفنا في الفرح
هايكون في الصيف بإذن الله في شهر يوليو
يسعدني انا وخالد ان سفير اسكندريه في البلاد الاجنبيه يشرفنا
يا رافع راس اسكندريه ومشرفها دايما
اسكندريه بتقولك وحشتها ومفي انتظارك بكل جزء فيها رمل وشط وموج وناس وشوارع كل شبر منها في انتظارك عشان يضمك ويقولك حمدالله على السلامه من الغربه ونورت بلدك وبيتك
مع تحياتي وتحيات اسكندريه

الجحيم هو الحقيقه said...

يا عم رافت عامل ايه وتليفونك مش بيرد ليه؟

انا هارتك رنات ومسجات بس تقريبا انت غيرت الخط؟

المهم عبرنا يا عم

سلام

raspoutine said...

رأفت انت فنان

كرياكو said...

فينك يازعيم

انت معتكف ولا اية
عوزين نطمن عليا

فريدة... said...

ازيك يا رافت؟

فينك
اخبارك يا اخى

يااااااارب تطمننا بقى

يارب قريب

رأفــــتلــوجيــا الرأفتـــانى said...

ريما
ان شاء الله انا هاكون فى مصر بس جايز قبل الفرج بشويه..ع العموم انا هابعت لك ايميل قبل ما اجى

الجحيم
ايه ياعم..مش انا قلت لك ان رقم مصر مش شغال..معرفش ليه..بس الرقم الامريكانى زى ماهوه شغال زى الفل..انا هاتصل بيك
ان شاء الله هاشوفك قريب جدا

راسبوتين
انت اللى فنان يا مان..لك وحشه والله

كرياكو
عامل ايه..يا رب تكون بخير..
شاكر سؤالك .هى ظروف فقط
اشوفك قريبا بخير ان شاء الله

فريده
عامله ايه
وحشانى كتير
انا تمام..هاطمنك قريب