دار الحبايب

دار الحبايب نورها طافى
واهلها هجروا المكان

اخدوا معاهم قلب دافى
وضحكه صافيه من زمان

وردالجنينه ضاع
عبيره وبهجته

والبلبل الفرحان سكت
والحزن اصبح سلوته

وقلب مشتاق من سنه
تاه عن سبيله وسكته

يوماتى اعدى من هنا
وحنينى لسه بيفتكركم
هتعودا امتى لحينا

ولا الجنينه ووردها هيروح لغيركم
عالم بحالنا ربنا
يردكم سالمين لداركم
نيويورك - نوفمبر 2008

البحــــــــــر

البحر المقصود فى العنوان هنا ليس بحر اسكندريه الجميل اللى كل من هب ودب بيروح يحكى له او يشكى له او يرمى فيه اعقاب سجاير وزباله وكوالح الدره وقشر البطاطا والترمس فى الصيف لما اسكندريه يتصبح محتله
البحر المقصود هنا هو صديقى ابراهيم . ولقب البحر ده له حكايه. فابراهيم اسمه الحقيقى ابراهيم غانم لكن محدش يعرفه غير بابراهيم البحر
ابراهيم ايام زمان كان بيروح كفر الدوار يطلع رحلات لبحر اسكنديه وكان باختصار بيلم الفلوس ويعمل تذاكر مضروبه وياخد الفلوس والناس تستنى الاتوبيس الصبح علشان يورحوا البحر .. لكن للاسف مفيش بحر
ومن هنا اخد ابراهيم لقب البحــــــــــر - نظرا للرحلات الوهميه الى بحر الاسكندر
البحر حظه فى التعليم لم يكن اعلى من المتوسط ولكنه مثقف لنوعا ما . وحريص على معرفه التاريخ بشكل مخيف . وفى وسط الكلام ممكن تلاقيه رمى جمله او كلمه كان بيستخدمهــــا ريتشارد قلب الاسد او صلاح الدين الايوبى وغيرهم من علامات التاريخ
بالاضافه الى هؤلاء المشاهير والزعماء البحر بيقوم باختراع جمل وكلمات من صنعه او على الاقل ضاف على الجمل والكلمات الاصليه اضافات من عنده

من اخر اقوال البحر لشرح وتحليل الحاله السياسيه فى مصر
احنا زى اللى واقفين فى آخر طابور العيش . مستنين نوصل فى اول الصف . ولما وصلنا بعد طول انتظار لاول الصف . الراجل صاحب الفرن ضحك ضحكه خبيثه وقال: العيش خلص خلاص مفيش
واحنا بكل عبط وبحسن نيه مزعلناش ولا قولنا ازاى ولا اليه والعيش راح فين
سألنا صاحب الفرن : يعنى لوجينا بكره بدرى شويه ووقفنا فى الصف م الاول ان شاء الله هنلاقى عيش
صاحب الفرن ضحك نفس الضحكه الخبيه وقال : طبعا طبعا بس ابقى تعالى بدرى
البحر اضاف
انا احلامى بسيطه : السباك يبقى سباك والكمسرى يبقى كمسرى والعجلاتى يبقى عجلاتى


I made history yesterday!


I was a part of the history yesterday when I voted for the first African-American president of the United States. I never saw the country so excited about an election before. Yesterday’s was different to any other elections in our history. Yesterday was history writing and I am so happy to be a word of it. I saw people getting up at 6:00am, standing online for hours waiting to vote with a smile on their faces I have friends who never vote, but yesterday, they made sure their voice will be heard Yesterday we voted for the change. We told the world that we are sick and tired of George W Bush and his ugly years. Yesterday we voted that we are not racists and color does not mean a thing! Yesterday I saw people driving their cars, waving the American flags from the windows and beeping their car horns The feeling yesterday was like “ We took our country back”
God knows when? But one day, I will tell my kids that I voted for Obama!

ولا عزاء لشهداء الدويقه

الشاب الحليوه اللى فى المقال المنشور فى الديلى نيويوز ده متهم بقتل القطه بتاعه الجيرل فريند بتاعته. ولو التهمه ثبتت عليه هيتحبس من سنتين لثلاث سنوات علشان القطه . يعنى لو المسؤلين بتوعنا اللى ايديهم متعاصه بدم شهداء الدويقه اتحاكم هنا ان اشاء الله ممكن كل واحد يتعدم فيهم بتاع 100 مره

هشام طلعب مصطفى فى النيويورك بوست

فى عدد النهارده 3 سبتمر 2008 كان فى مقال فى النيويورك بوست مكتوب بواسطه هديل الشلشى عن تفاصيل القبض على هشام طلعت مصطفى بتهمه التحريض على قتل سوزان تميم اضغط على الصوره لقراءه المقال كاملا

سنه - اولى

رحمك الله يا ابى واسكنك فسيح جناته. عن ابى هريره ان رسول الله قال: اذا مات ابن آدم انقطع عمله الا عن ثلاث: صدقه جاريه او علم ينتفع به او ولد صالح يدعو له. صدق رسول الله

يعلم الله انى افعل ما بوسعى كى اكون هذا الولد الصالح

اليوم هو تمام السنه الاولى على رحيلك . الموت حق والجنه حق والنار حق . لكنه الفراق اللعين . لقد اطمآننت الى الدنيا حتى جاء مرضك ورحيلك السريع . لم افكر لحظه انك ستموت قبلى . استغفر الله هو العالم باى ارض نحيا وبأى ارض نموت

كنت دائما اشعر انى ساموت قبلك ولذلك لم احمل هم ولا غم

وها هى سنه تمر على فراقك ولكنى لازلت اهرب من هذا الواقع .. اتفادى النظر الى صورتك فى مدخل حافظتى .. اتفادى ان اجلس وحيدا أو أتذكر .. اتفادى النوم حتى لا احلم .. اتفادى كل شئ يقربنى من واقع رحيلك . وكأنى لازلت احلم بيوم عودتك

لم اجن شيئا فى السنه المنصرمه سوى شعره بيضاء هلت بدون استآذان او ترحيب من سواء شعرى المفحك وكأنها تذكره لمن ينسى

وكـأنهـــــا كلمه الحق المنتصره بسلاح الواقع على خيال وطمأنينه الدنيا الكاذبه الذائله


الشعره البيضاء تذداد بياضا وسوف تدعوا شعيرات اخريات ليسكنوا شعرى الاسود

ربما ابكى بعد عام قادم . ربما انظر الى صورتك فى حافظتى بعد عام آخر

ربما افتح الصندوق الذى يحتوى على متعلقاتك الشخصيه بعد عام آخر

ربما احتاج الى اعوام .. ولكنى سانتظر الشعيرات البيضاء

خصوصيه

هناك العديد من الاشياء التى تولد فى القلب وتسكنه وتموت بداخله ولا اسمح لاحد ان يشاركنى فيها
وهناك شيئان لا استطع القيام بهما دون صديق او جليس او ونيس
  • الاكل
  • والسينما

ادخلوها آمينين

الموضوع اللى ظهر اخيرا عن نسبه السيدات ضحايا التحرش فى مصر اصبح موضوع مثير للخجل والعار. 98% من السيدات الاجنبيات الاتى قمن بزياره مصر تم التحرش بهن و83% من السيدات المصريات يتم التحرش بهن يوميا. والشئ المؤسف ان الحكومه المعرصه كالعاده لم يقم لها قامه. والبوليس اللى كل همه يحجم حريه الشعب لم ولن يهتم بتلك الحوادث اللى زى ما بيقولوا حوادث فرديه و مش ظاهره. رقم ال %83 ده هو رقم السيدات اللى قدموا شكاوى عن موضوع التحرش. واكيد فى هناك العديد من السيدات اللاتى خجلن من تقديم الشكوى وبخلاف الموقف المؤسف من الدوله البولسيه . الرجاله والشباب اللى بيتحرشوا دول ليس بهم من الرجوله ما يذكر. ايام زمان كان فى نخوه وشهامه معروفه فى مصر. لكن للاسف الآن الكثير من انصاف الرجال من امثال توتو ولولو وهوهو وشباب علق كده لو فتحت دماغ اي واحد منهم هتلاقى بدل المخ واحده ست عريانه. كل اللى بيفكروا فيه لا مؤاخذه هو عضوهم الذكرى ده اذا كان موجود اصلا. واى واحد يلوم السيدات فى موضوع التحرش ده فهو ناكر للحق. فأى بنت واى ست فهى حره تلبس اللى تلبسه وتقلع اللى تقلعه. ده اختيارها هى. وانت مش من حقك تعاقبها بما لبست او قلعت لان موضوع القلع واللبس ده علاقه بينها وبين ربنا. ربنا للى بيحاسب مش انت. اذا كانت هى فى نظرك مش محترمه فخليك انت محترم والحق اقول لما اخجل يوما من كونى مصريا كخجلى يوم وجدت تحذير على الموقع بتاع وزاره الخارجيه لاحدى الدول الغربيه لرعاياها من السيدات من زياره مصر نظرا لزياده نسبه التحرش الجنسى
هكذا اصبحنا كالحيوانات فى نظر الدول الاخرى. حتى براميل البترول فى الخيلج اصبحوا ينظروا الى مصر كمرتع جنسى
الحل الآن اصبح فى يد السيدات والقله القليله من اصحاب النخوه والرجوله. اى واحد ست يتم التحرش بها المفروض تمسك الشخص اللى اتحرش بها وتطلع دين امه . طالما الحكومه مش فى دماغها

عمــــــــر وسلمى

ذهبت لمحل دى فى دى عربى- نظرا لحاله الحنين لمصر التى تنتابنى غالبا فى الصيف- لشراء افلام عربيه. والمضحك انى باشترى نفس الافلام ! لانى باسلفها لصحابى وعمرهم ما رجعوها . اشتريت البرئ والكيف . وانا بادور على الافلام لقيت فيلم ع الرف اسمه عمــر وسلمى. والحق اقول انى عمرى ما كرهت حد فى حياتى قد تامر حسنى ونادى الزمالك ومفيد وفوزى وزاهى حواس

مكتوب على ظهر الدى فى دى نبذه عن قصه الفيلم

عمر الشاب الجرئ الذى يدخل فى العديد من العلاقات الغراميه . ولكن لاعلاقه تستمر نظرا لحبه للتغير وشعوره بالملل . حتى يقابل سلمى التى تغير حياته. وتستمر الاحداث

وقبل ما اكمل نطق حرف الثاء فى كلمه الاحداث .. اطلقت شخره عصماء فشر التوتو بكر فى عز مجده لما كان بيزلزل حجر النواتيه وجيل نعسه ومينا البصل

احداث ايه اللى هتستمر وعمر ايه وسلمى ايه اللى هتغير حياته . والنبى لما تقرأ النبذه دى عن الفيلم ما تحسش كده ان الفيلم ده اتمثل الف مره قبل كده؟؟ انا نفسى كل واحد يخليه فى شغله وبس. يعنى المكوجى يفضل مكوجى والحلاق حلاق والمهندس مهندس وتامر حسنى يفضل تامر حسنى

احتفال كالفورنيا بعيد 23 يوليو

ده صوره الخطاب اللى بعته حاكم ولايه كالفورنيا ارنولد شوارزنجر للسفاره المصريه بمناسبه الاحتفال بيوم مصر فى كالفورنيا

الحمد لله

لما تيجى تشكر انسان قدم لك خدمة معينة او صديق عمل معاك واجب او معروف او رئيس لك فى العمل او اى انسان مهما كان صلتك به بستخدم احدى او بعض كلمات الشكر الاتية
الف الف الف شكر
انا مش عارف من غيرك كنت اعمل ايه
ربنا يقدرنا على رد جمايلك
انت انقذتنى من الورطه دى
ربنا يديم المعروف
انا مش عارف اشكرك ازاى
وغيرها وغيرها من الكلمات الاخرى. وفى ناس بتألف قصايد شكر ومدح. وفى انسان ابلغ من انسان. والانسان البليغ فى اللغه بتكون كلمات الشكر بتاعته معبره عن الانسان الغير بليغ فى اللغه
لكن لما تيجى تشكر ربنا بتقول
الحمد لله
بس هى دى. ربنا عملها سهله وبسيطه مش محتاجه بلاغه فى اللغه ولا براعه فى النحو
من خواطرالشعرواوي

تعريص كرم جابر والفمه الاتحاد من اجل المتوسط

كتب كرم جابر فى روز اليوسف
ذهب مبارك إلى القمةالاوربيه عالي القامة مستندا على دور دولته الضاربة الجذور في الحضارة والوعي والتي تواصل دورها من أجل رفاهية شعبها وإعادة مد الجسر الذي يقود إلى المستقبل وأن تصبح مصر دولة حديثة على الطراز الأوروبي: الحلم ليس مستحيلا واقترب منه محمد علي، ومصر تشهد في السنوات الأخيرة عودة روح البناء والتحديث والتطوير وانهضة الاقتصادية التي يمكن أن تفرش الطريق إلى المستقبل بشرط أن نثق في أنفسنا ولا نشكك في قدراتنا.مبارك أمام قمة الاتحاد من أجل المتوسط كان مستحضرا لتجارب الماضي ومتعايشا انجازات الحاضر ومحددا رؤيته بالنسبة للمستقبل الذي يحلم به لبلاده ولخص ذلك بسؤال ضروري ومهم: كيف يكون الحال في جنوب المتوسط عام 2030 و2050؟ معنى سؤال الرئيس أن مصر ليست غافلة عن التحديات والصعوبات الكبيرة التي يجب أن تستعد لها من الآن حتى تقلل الفجوة من الشركاء الأوروبيين، وتأتي إلينا الأمواج القادمة من أوروبا بالخير وليس الغدر.الهدف في النهاية هو الإنسان ونهضة مصر هي أن يتواصل عطاؤها وأن يبرز من بين أبنائها المهندس والطبيب والعالم والصانع والحرفي الماهر، الذي تحتاجه مصر وأيضا تطلبه أوروبا، الذي شعاره 'أنا المصري كريم العنصرين
والله هذا ما كتبه كرم جابر- وكنت عاوز اشخر واضحك واعمل شكلبظات فى الهوا وحاجات ياما كده. انا عاوز اعرف معنى الحاجات دى
عالى القامه
دور دولته الضارب فى جذور الحضاره والوعى
مصر فى الفتره الاخيره تشهد عوده روح التطوير والتحديث والنهضه الاقتصاديه
مبارك كان مستحضر تجارب الماضى متعايشا مع انجازات الحاضر
تأتى الينا الامواج القادمه من اروبا بالخير
كرم جابر ده يا بيضرب بانجو على سبرته معاهم 3 برشمات صليبه وزجاجه توسيفان يا اما واكل ام الهبل. يا اما والله اعلم عايش فى القاهره اللى فى باريس. بيقولك ان احنا لازم نستعد لتحديات 2030 و2050 يعنى ولى النعم لسه هيفضل معانا ل 2030؟
ارحمنا يا عم جابر الله يرحم امك بأه. تحديات ايه ومستقبل ايه . هو انت وامثالك خليتوا فيها حاجه. دا انتو كرهتنوا فى الكلام والحروف والحبر والورق والقلم. والمصرى كريم العنصرى انت خليتوه المصرى اللى متمرط من اوسخ اصناف البشر

الحكومه دى والحكومه التانيه

الحكومه التى تأتى بها الدوله
تعمل ما بوسعها لخدمه الدوله على حساب الشعب
والحكومه التى يأتى بها الشعب
تعمل ما بوسعها لخدمه الشعب على حساب الدوله



الفيلم الايرانى - اعدام الفرعون

موضوع الفيلم الايرانى - اعدام الفرعون - دليل اخر على هبل وعبط وهرتله الحكومه الايرانيه اللى عماله تلوش فى الجميع. غرب وشرق شمال وجنوب عرب واجانب. الفيلم الايرانى فيلم وثائقى عن اغتيال السادات وبيحكى انه كان عميل وخاين وان اللى اغتالوه ماهم الاابطال
النقطه هنا مش عن السادات اذا كان بطل ولا فرده كوتش . ولا كان خاين او صدوق. النقطه المهمه هنا ان حكومه العمم الايرانيه حكمت على حاكم مصرى بالخيانه وانه سبب البلاوى اللى احنا فيها دلوقت. وبرغم اختلاف وجهات النظر عن السادات من محبيه او معارضيه . ايران ملهاش انها تحشر مناخيرها وتقول اذا كانت السادات عميل ولا مش عميل . لان الحمد لله مصر مليانه عقول تقدر تحكم على حكامنا وتاريخهم اذا كان اسود ولا ابيض
والحق اقول ان لو الفيلم ده كان اتعمل على ولى النعم - مبارك - برده كنت هاسخن واتنطط كده. لان ايران المفروض تعرف ان اللى بيته من زجاج ما يحدفش الناس بالطوب . ولا تلاقى الملل والعمم اللى هناك حرموا الامثله ومنعوها من التداول
وزاره الخارجيه المعرصه بتاعه احمد ابو الغيط اعترضت . تقوم الحكومه الايرانيه تقول دى حريه . آه والله ايران بتقول حريه . الحكومه الايرانيه اضافت ان اللى انتج الفيلم افراد وليست الحكومه الايرانيه. ما حدش يسمعنى شخره. ايران بتتكلم عن حريه لافراد. من امتى ان شاء الله
الحكومه الايرانيه العبيطه هتفقد اى تعاطف مصرى معاها . ونجادى الحنجورى ده واخد الدنيا بصدره زى هيفاء وهبى كده مع اختلاف جمال الصدر وكميه السليكون اللى فيه

الثلاثى العبيط

من تعاسه جيلنا وسوء حظه ... انا ربنا سبحانه وتعالى ابتلانا بهذا الثلاثى العبيط ده وده و ده
ايام زمان كان ربنا بيبتليك بواحد اهبل بس قصاده ممكن تلاقى واحد يعنى عنده لسه شويه. بس احنا الجيل بتاعنا ده ضايع من كله. شوفنا العجب. كل اللى ناقصنا هو حرب عالميه كمان ونبقى كده تمام

وكان يوماً لسب الدين

خرج هانى من مسكنه فى المدينه الجامعيه لملاقه حبيبته الرقيقه إيمــان .. وإيمان فعلا كانت رقيقه كزهره الياسمين. وفى طريقه للقائها وجد صديقه محمد درويش واقف مع صاحبته مروى بيتخانقوا وكل اللى سمعه هانى وهو معدى
درويش كان بيقول لمروى: اصل انتى بنت دين كلب
اصابت هانى صاعقه .. مهما كان وجه الخلاف - ما يصحش ان درويش ييسب الدين لمروى كده- هانى كان يعلم ان درويش عصبى بس مش للدرجه دى
واصل هانى طريقه حتى لا يتأخر على حبيبه القلب إيمان . وعند صعوده الطابق الاول من الكليه وجد على درجات السلم صديق اخر اسمه اشرف الصفتى طابق فى رقبه صاحبته رباب وبيقولها يا بنت دين الكلب! يابنت دين الكلب!يا بنت دين الكلب! ذُهــــل هانى من موضوع سب الدين الشائع بين اصدقاءه فى هذا اليوم الغريب

اسرع هانى من خطواته حتى لا يتأخر عن لقاء إيمــــــــان. وجدها تجلس فى نفس المكان المعتاد وتلقاه بنفس الابتسامه الجميله . سملت عليه وقالت له: صباح الخير يا حبيبى

قال لها هانى : صباح الخير يابنت دين الكلب

نطت ايمان من مجلسها وقالت له انت بتقول ايه

قال لها : اصل الدفعه كلها بتسب الدين لبعض .. وانا فكرت ان دى لغه العشاق النهارده

تعليقات المدونات ورحله البحث عن المجهول

انه لحدث اعظم من الفتوحات والغزوات ان يوفقك الله وان تسطيع ان تترك تعليق فى مدونه ما. فاليوم معظم المدونات يطلبون منك من المطالب ما تنوء به العصبه اولى القوى. بعد قراءه بوست اعجبك او لم يعجبك وتود ان تبدى رأيك فى هذا البوست تذهب لمكان ترك التعليقات وهنا تبدأ رحله العذاب والبحث عن المجهول . فى الايام الخوالى- كان المطلوب منك هو فقط وضع اسم المستخدم الخاص بجوجل وكلمه المرور وممكن ان تترك التعليق كمجهول- اما الآن فلابد من وضع الآتـــى
  • اسمك
  • عنوان مدونتك
  • ايميلك
  • Word Verification
  • Math Question

وكان ناقص يقولك تاريخ ميلادك ورقمك القومى والحاله الاجتماعيه والفيش والتشبيه بتاعك

يعنى من الاخر .. لو كنت ناوى تسيب تعليق - خد اجازه يوم من الشغل وودى العيال وامهم عند نسايبك

ده بالاضافه الى رساله موجهه من صاحب المدونه عن نوعيه التعليق الذى يرغب فيه
يعنى مدون يقولك .. هذه مدونه نظيفه وواحد يقولك هذه مدونه بيضاء واخرى سوداء واخر يقولك انا لن اسمح بنشر هذا النوع من التعليق الذى يسيئ الى هذا او ذاك. وآخر عاوز تعليق باسـتك من فوق بس من غير تلبيسه
ومدونات اخرى لابد ان يقرأ صاحب المدونه التعليق اولا قبل نشره فشر ممتاز القط وجماعات الامر بالمعروف
لنفرض مثلا ان شخص ما.. علق تعليق خادش للحياء -هههههه- فباستطاعه صاحب المدونه ان يمسح التعليق فى ثانيه
ولنفرض مثلا ان شخص ما.. ترك تعليق غبى ينم عن جهل عميق .. المفروض صاحب المدونه ان يترك التعليق الغبى حتى يعرف الناس غباء كاتبه
ولنفرض ان شخص ما شتمك تحت اسم مجهول- فهذا يدل على ضعف الشخصيه وتفاهه الهدف
نحن نرغب فى الحريه فى مجالات عده - ولكننا لا نستحقها ما دمنا لا نقبل الرأى الاخر مهما كان غباؤه وجهله

سببوا احمد عز فى حاله

اصبح احمد عز بقدره قادر وبغير نذير السبب الرئيسى للفوضى والفساد فى مصر المحروسه ... وتوالت الاقلام والبرامج التلفزيونيه فى مهاجمه احمد عز .. وببساطه شديده اصبح احمد عز هو مشكله مصر الاولى . وهو امر مضحك زى المثل المصرى القائل - ماقدرش على الحمار بينط على البردعه
نسى الجميع من وراء احمد عز وكيف صعد احمد عز من هو شريك احمد عز ومن يدافع عن احمد عز ؟ نسى الجميع كل هذا ومسكوا فى احمد عز
واقسم باغلظ الايمان لو احمد عز اختفى غدا هيطلع لنا محمود عز ومحمد عز وعلى عز وحماده عز وتوتو عز وسيد عز وابو العز وغيرهم من الاعزاز
احمد عز ياساده ماهوالا ورقه فى صفحات كتاب فاسد وما هو الا مؤدى يقوم بدوره باتقان ولا يخرج عن نص السيناريوا المكتوب يانامل مخرج عظيم حالف يطلع دين ابونا

المجلس الموًقـــــــر


(1)
المجلس المــوّقــــــــر
مفيش اخـــوه ياهــــــوه
لا فـــكّــر يـــوم يفـكـــــــر
ولا يســـأل ليــــه جابــــوه
 (2)
سبــــوبه آخــــر حلاوه
يا احـــــــلى م البغاشه
تفويت وقــانون طوارئ
كــــــــله بثمنه ياباشـــا
(3)
قاعدين على الكراسى
ياتنابله الحكـــــــومــــــه
مابين مسطــــــول وناسى
وعويل ما قامت له قومه
(4)
اول ما صاحبنا يســــــــــأل
ســــــــــؤال فى الميكروفـــون
بــهــدوء مـــن غير منـــــاقشه
ومعارضه ويحــــــــــزنـــــون
الكل يرفع ايديه ويقولوا موافقون
ما بلدى هانت عليهـــــــــــــــــــــم
اشمعنا انا مش هـاهـــــــــــــــــــون **************
نيويورك فى 16 يونيو 2008

ولّى النعم

(1)
ولّى النعم :
صباحك شريف .. نهـــارك لطيف
يا حامى الحمى .. يا شهم وعـفيــــف
(2)
يا عايشين فى خيرك .. يا شقيان لغيرك
وع القــــــــــلب قاعد .. كأخّــف ضيــــف
(3)
يا نسمه عليله .. ومجـمعنا عيـــــــله
كضى القمر .. فى ليـــله خـــــريف
(4)
ده مين اللى ده يــستر .. يقولك بنشحت
وشعبك فى عهدك ..ما لاقى الرغيف
(5)
ولا شفنا مره .. عيال فى الشوارع
يشموا السبرتو... ونايمين ع الرصيف
(6)
عدالتك بتخَرس .. آلاف الالـــــوف
وعمرى فى عصرك .. ما حسيت بخوف
(7)
آلهى يطــّول إلينا .. فى حيــــاتك
ويرزق ولادك .. ويستر مراتك
وأجيلك أبارك .. وأعيّد وأهــنى
وع الكرسى قاعد .. ولد من ولادك
(8)
نزاهتك حكايه .. جميع الألســـنه
وشاهدها عليها .. 28 سنــــــه
تعيش بس إنت .. وفى داهيـــــه أنا
******
نيويورك فى مايو 2008

الغاز المصرى فى اسرائيل

الغاز المصرى يبعث الطمئنينه والدفأ فى اســرائيل
عقبال ما يوصل دوله اسيــــوط الشقيقه

الدنيا ولعت

بعد الغلاء الاخير لاسعار الوقود والسجاير.. هناك افتراح بصرف السجاير على البطاقه التمونيه.. لكل اسره كرتونه سجاير
والناس اللى مش متجوزه لهم عشره سجاير كيلوبترا فرط او خمسه سوبر او حجر معسل

معترض احمد معترض- شم النسيم

صديقى معترض احمد معترض - دائم الاعترض
يعنى تقوله صباح الخير
يقولك : خير؟ هو هيجى منين الخير
تسأله عن احواله؟
يقولك حال ايه واحوال ايه

اتصلت به فى شم النسيم لاهنئه بعيد الربيع وقولت له كل سنه وانت طيب
ولم اسمع فى التليفون سوى شخره جهوره من صوت رخيم
قال لى: انت فى نيويورك ولا فى عزبه الحاج ابوصلاح
احه احه.. شم نسيم ايه يا بنى؟ انت اهبل
الناس بتحجز تذاكر رحلات الفضاء والقمر .. واحنا لسه بنلون البيض بقشر البصل
احه
وقفل السكه

الهوى البلدى

الهـــوى البلدى هف
ع الملايه اللف
خلى عقلى خف
******

قمه قله الادب يا عدويه
من اغانى خالد الذكــر احمد عدويه

اسراء طلعت من السجن الخمس نجوم

الحمد لله السجن طلع كويس ومريج
هو سجن زى اى سجن بس مش زى ما انا كنت متخليه
مفيش معنى الاهانه اللى هما متخيلينه بره
لما هما بيعاملونى كويس؟ امال ماسكنى ليه؟
احلى اكل ... احلى شرب.. ونيمونى احسن نومه..عيشه زى اى عيشه
.........
باحب اشكر السيد الرئيس والسيد وزير الداخليه استجابه لندائنا
........
ماحدش يسمعنى شخره؟
........
شوف الفديو هنا
........
امال هو الشرقاوى والناس التانيه بتحبسوا فى السجن الوحش ليه؟
ليه ما بيختاروش السجون المريحه دى؟
--------------
على اى حال حمد لله على السلامه

الاسعار عندنا وعندهم.. والسكر غلى وانا احلى بإيه

فى عدد ١٦ ابريل صفحه ٦ من جريده الديلى نيوز التى تصدر يوميا فى نيويورك تقرير عن اسعار السلع الغذائيه فى امريكا سنه ١٩٩١ مقاربه باسعار اليوم 2008
شمل هذا التقرير مقارنه بين اسعار السلع الضروريه مثل اللبن والعيش واللحوم وغيرها. وبمناسبه الغلاء الفاحش فى مصر حاولت اعمل مقارنه بسيطه بين نسب زيارده الاسعار هنا فى امريكا ومصر.
مع ملاحظه هامه لابد من وضعها فى الاعتبار ألا وهى : الدولار بالنسبه لنا هنا كالجنيه فى مصر يعنى ماتقارنش فارق العمله حاول تفكر فى الدولار على انه وحده صرف زى الجنيه ماهو وحده الصرف فى مصر. برده وحده الوزن هنا فى امريكا هى الرطل. pound برضه ما تفكرش بين الفرق بين الوحدتين
سعـــر الفراخ سنه ١٩٩١ كان0.90$ دولار والسعر السنه دى 2008 وصل 0.99$ يعنى الزياده 9 سنت. بالنسبه لنا المفروض تكون 9قروش
السكر كان بـ 0.44$ فى سنه 1991 والنهارده سعره وصل 2.99$ بزياده قدره 75 سنت يعنى بالنسبه لنا المفروض تكون 75 قرشا
اللحمه كانت بــ 1.63$ والنهارده السعر اصبح 2.99$ بزياده قدرها 1.36$ يعنى برضه بالنسبه لنا جنيه و36 قرشا
العيش كان بــ 0.73$ والنهارده اصبح بـ 2.19$ يعنى الزياده قدرها 1.46$ .
مش هاتكلم عن اسعار الفاكهه والشيكولاته والمكسرات لانها بالنسبه لنا من الرفاهيات.. علشان الحكومه ترتاح
لاحظ ان فى الــ17 سنه اللى فاتوا مفيش سلعه زاد سعرها الضعف غير العيش.. مع الوضع فى الاعتبار ان المرتبات زادت والحد الادنى للاجور كان 5.5$ فى الساعه من عشر سنين والنهارده الحد الادنى للاجور 7.15$ فى الساعه
بالنسبه لمصر.. على ما اعتقد ان سعر اللحمه من عشر سنين مثلا كان 20 جنيه.. دلوقت اللحمه بحوالى 50 جنيه لو مش لحمه حمير. يعنى السعر زاد تقريبا مره ونصف فى عشر سنين مش 17 سنه.
زجاجه الزيت فى مصر اصبحت بــ13 جنيه وكانت من عشر سنين مثلا بــ3 جنيه يعنى السعر زاد 400%. نفس الزياده الجنونيه بالنسبه للسكر واللبين..اما العيش فهو مشكله تانيه خالص.. لان العيش فى مصر اصبح له شهداء زى شهداء حرب اكتوبر وحرب الاستنزاف
ببساطه: متوسط نسب زياده الاسعار فى امريكا خلال الــ17 سنه اللى فاتت كانت مابين 3%-7% تقريبا.. وهذه الزياده كان معاها زياده فى المرتبات والحد الادنى للاجور وشبه ثبات فى الضرايب.. حتى السنه دى 2008 علشان الاقتصاد تعبان شويه هنا.. قررت الحكومه الامريكيه صرف مساعدات لجميع المواطنين.. كل اسره هيوصلها شيك فى البريد.. قيمه الشيك هتكون على حسب عدد افراد الاسره والاطفال ..الخ
فى مصر متوسط زياده الاسعار خلال الــ10 سنين اللى فاتوا كانت حوالى 300% مع ثبات الاجور والمرتبات ان لم تقل
خاتمه: من غير فذلكه اقتصاديه ومن غير ما الدكتور نظيف عظّم الله اجره ما يلعب فى شنبه.. زياده الاسعار فى مصر لما يقابلها اى زياده فى المرتبات والاجور زى ما بيحصل فى جميع دول العالم حتى جزر القمر.. يعنى لسه المدرس بياخد 100 حنيه فى الشهر وفى ناس لسه بتاخد 400 جنيه فى الشهر.. بالاضافه الى التدهور الرهيب فى نظام التأمين الصحى والمستشفيات وعلاء اسعار الدواء
يعنى لو حبيبت تعمل عمليه جراحيه مش هتقل عن 10 الاف جنيه مثلا ده لو حبيت تطلع بكل اعضاء جسمك اللى دخلت بيهم
المستقبل كاحل السواد.. و الحاضر اسود من قرن الخروب وده يجعلنا فى اشد الحاجه الى النظريه الاقتصاديه الشهيره.. ما اشربش الشاى اشرب ازوزه انا مع تعديل بسيط جدا عليها الا وهو تعديل السكر غلى وانا احلى بأيه
واحا جدا يا حكومه

جيمى هود علم الواشنطن بوست السرقه

جلس جيمى مع اقرانه فى مجله الواشنطن بوست. فهو مدون مصرى والمدونون المصريون هنا لهم شنه ورنه حيث انهم فى نظر الامريكان رمزا لمقاومه الاستعمار الداخلى وبلطجه امن الدوله وغيرها من مؤسسات الدوله التى لانعمل ماهيه واجبتهم غير مصادره الكتب واعتقال الابرياء ووضع العصى فى مؤخرات الوطن. جلس جيمى مع اصحابه فى الواشنطن بوست يشرح لهم كيفيه تحميل اى برنامج فى العالم من غير دفع مليم احمر. شرح لهم كيفيه الحصول على الكود الخاص بأى سى دى للفوتوشوب وادوبى وغيرها من البرامج الغير رخيصه. باختصار جيمى شرح لهم كيفيه سرقه اى برنامح!!!!! وحيث ان قانون حقوق الملكيه الفكريه هنا ذو شأن عظيم اصبحت الوجوه شاحبه والنفوس مليئه بأسئله عديده. نظر جيمى الى الوجوه الخائفه قائلا: نحن شعب فقير ولانستطع شراء برامج ب500 او حتى 100 دولار. وهذه البرامج ضروريه لنا كمدونين. فنحن نستخدمها فى تصميم شعار مظاهره او تصميم بانر للمطالبه بالافراج عن سجين للرأى او الحريه. تغيرت نظرات المحيطين بجيمى الى اعجاب وامتلأت الغرفه بالتصفيق الحاد نسى الجميع ان لو مايكروسوفت علم بوجود جيمى فى الواشنطن بوست لامر بحرق الجريده بما تحوى.

نجيب محفوظ بالدولار

فى أخر زياره لى لمصر اهدتنى اعز الاصدقاء مجموعه كتب لنجيب محفوظ بعد ان شكوت لها اننى قد قرأت معظم كتب نجيب محفوظ بالانجليزيه ولم اقرأ اى كتاب له بالعربيه. قرأت اول كتاب وشعرت بالفرق بين كتابه نجيب محفوظ بالعربيه وبين ماقرأته بالانجليزيه ووجدت نفسى االتهم كتابا تلو الاخر وقبل ان انتهى من قراءه آخر كتاب ذهبت لمكتب الاهرام فى نيويورك لشراء مزيد من كتب نجيب محفوظ باللغه العربيه. ودخلت المكتب المعود .قضيت به اكثر من ساعتين واختارت العديد من الكتب. وعند ذهابى لدفع ثمن الكتب وجدت ان مجموع اسعار الكتب وصل حوالى اكثر من 300 دولار. تعجبت ومسكت احد الكتب ووجدت ان سعر اغلى كتاب فى الكتب كان عشره جنيهات!!! فسألت الموظفه كيف وصل السعر ل 300 وان معظم اسعار الكتب ما بين خمسه الى عشره جنيهات فقالت لى فرق الشحن وفرق العمله!!!! وضربت كفا على كف وقلت لها ان فارق العمله المفروض يكون لصالح الدولار وليس العكس فلم ترد على باجابه مقنعه
دفعت ثمن الكتب وخرجت من المكتب اسب الدين لنجيب محفوظ ولاولاد حارتنا ولللاهرام والاخبار والجمهوريه واليوم اللى اتعلمت فيه القراء والكتابه و العن صديقتى التى قدمت لى نجيب باللغه العربيه فقد كنت راضيا سعيدا بما اقرأ من كتب بالانجليزيه

بــــــركـــــان ســـــخطــ

(١)
بركــــــــــــــــان سخـــــــــط .. حـــــــــط وهبــــــطً
على الحــرامى اللى اتظلم .. وعلى الفقير اللى اتربط

(٢)
أصــــــــل الحكـــــــــــــــــــايه مـــــــن البدايـــــــــه
إن الحــــــــــــرامـــــى ماهــــــوش حــــــــــــــــرامــى
ولا الفقيـــــــــــــــــــــر كــــان يـــوم فقير اوكان عصامى

(٣)
فى بلـــــدى عـــايش فرقتين مختلفتيـــــــــــــــــــــــــن
فــــريق وعايش فى السمـــــــــــــــــــــــــــــــــــــــــــا
احـــــــــــــلامه اوامـــــــــــــــــــــــــــر ملزمــــــــــــــه
وفـــــريق بياكـــــــــــــــل م التــــــــــــــــــــــــــــــراب
عشمــــــــــان فى طقه تشبعه مش طقتيـــــــــــــــــن

(٤)
بدأ الفقير يسأل سؤال عارف جوابه مـــــن سنين
هيــــــــــــــــروح لميــــــــــــن ويجـــيب منيــــــــــــن
وإجـــــــــــــــــــــــابتــــه كــــانت من عيونه دمعتين

(٥)
أدى الفقير اللى اتحكم عليه فى يوم يكون فقيــــــــر
ما طلبش قصر من الدهب ولا جنه ناعمه من الحرير
ولا قـــــــــالش نفسى وعـزهــــا ولا كـــــان انــــانى
إحنا اللى سمينــــاه كــــده انســـــــــــان عصامى

(٦)
أما الحرامى فقال لنفسه مفيش امل وحلـــــــــــول امامى
ياأكون فقير يا أكون فى عين المجتمع انســــــان حـــرامى
حقى اللى منهــــــــــــــوب من سنين هاخده بإيديــــــــــــه
والدنيا والناس والزمــــــــان شـــــاهدين عليًـــــــــــــــــــــه

(٧)
كــــــــــــــــــــــــــــــل اللى ســــــــرقه رغيف وملـــــــــــــــــح
طــــــــــول عمـــــــــــــــــره عايش فى العذاب ولا داقش فرح

(٨)
أدى الحكـــــــــــــــــــــــــــــايه من البدايــــــــه للنهـــــــــــايــــه
فقيـــــــــــــــر بيحلم بالامــــــــــان وحرامى مستنى البدايـــــــه
احنا اللى بنظــــــــــــــلم بعضنـــــــــــــا ياناس كفــــــــــــــايه

*********************


نيويورك
٨ ابريل 2008