Saturday, November 08, 2008

رأس التين المحتــــــــــــــــــــله

خالد صاحبى اضطرته الظروف القهريه ان يسكن مؤقتا مع شاب مصرى اسمه اشـــرف . وشتان الفارق بين الاثنين . بغض النظر عن ان خالد سكندرى واشرف من بنهــــا
فخالد انسان مثقف جدا وقارئ جيد جدا من النيويورك تايمز و الوول ستريت جورنال - يو اس ايه توداى والفاينانشال تايمز . بالاضافه الى انه عاشق ودارس للتاريخ
اما اشرف فعمره ماقرأ اى كتاب غير امل وعمر برغم انه مدرس جغرافيا ثانوى فى مصر!!! ولكن علاقته بالعالم منقطعه .. كل اللى فى دماغه علامه دولار $$$ كبيره جدا . بيشتغل وينام ويدخل الحمام فقط
خالد مره سأله اذا كان عمره راح السينما ولا مسرح ولا اوبرا. طبعا اشرف جاوب بالنفى
اشرف عاش فى نيويورك اكثر من ثلاث سنين مايعرفش فين تمثال الحريه ولا ميدان التايمز
المهم اشرف دخل على خالد فى يوم الشقه بيسب ويلعن وخالد كان بيقرأ النيويورك تايمز تقريبا او كان بتفرج على السى ان ان
المهم سأل اشرف : مالك بتسب وتلعن ليه
اشرف قاله: روحت السفاره المصريه النهارده علشان اعمل توكيل بس السفاره كانت قافله وضاع يوم شغل على الفاضى
فخالد قاله: ان النهارده عيد ثوره يوليو والسفاره قافله بمناسبه الاحتفال
اشرف: قاله انا مختش بالى وقال لخالد انا عاوز اسألك سؤال
فخالد : قاله اسأل براحتك
فأشرف قاله: البلد اللى فى مصر اللى اسرائيل محتلاها دى اللى على الحدود مع اسرائيل . مصر هتخودها امتى؟ يعنى لسه هيكون فى حرب؟؟؟ ولا هنرجعها كده بالمفاوضات
خالد : ساب كل اللى فى إيديه وسأل اشرف وقاله : بلد ايه اللى اسرائيل محتلاها يابنى؟؟
فاشرف: قاله على الحدود مع اسرائيل وقعد يفكر شويه لانه ناسى اسمها
وبعد تفكير عميق اشرف قال لخالد: ايوه افتكرتها : البلد اسمها رأس التين
خالد ما رضش بكلمه واحده ولانى عارف ان خالد مؤدب كنت زمانى حلفت ميت يمين انه شخر له
قام خالد من مكانه ... فاشرف سأله رايح فين؟
خالد قاله : رايح اتصل باهلى فى اسكنديه اشوف هى اسرائيل احتلت قاعده راس التين امتى

7 Comment:

^ H@fSS@^ said...

looooooooooooooooool, ya 7abibi ya khaled, wallahi se3b 3allya, salim 3aleeh and tell him ma3lesh, this is the generation that nasser produced to us, ella3nah. really tell him hafsa says a big big hi.

الجحيم هو الحقيقه said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههه
ههههههههههههههههههههههههههههههههههههههه
هههههههههههههههههههههههههههههههههههههههههههه

Iskanderani said...

مساء الفل عليك أستاذ رأفت،
الأغـانى للرأفتـانى Raafatology ® ,

لو لم يكن أشرف هذا مدرس جغرافيا كان تبقي المقاطعة
-state-
المُحتلة هذه إسمها بقي أيييييييييه؟؟؟؟ أفتكر تكون القطاع الغربي في جبال محرم بك ؟؟؟!!!! مُش كده ولا أيييييه؟؟؟ مع الإعتذار للمرحوم فؤاد المهندس...

الحمد لله أنه -أشرف هذا - لم يقم بالتدريس وإلا لأصبحت جمهورية الحضرة الشعبية هي الدولة المفقودة منذ زمن بعييييد ....قصدي "أطلنطيس" وكان علينا كلنا أن نكون من حملة جنسية دولة سيرالانكا
سلم لي علي البطيخ في الجغرافيا السياسية

تحيات إسكندراني في بلاد الله الواسعة

® الأغانى للرأفتــــانى said...

حفصه
خالد بسلم عليكى كتير
فتح مدونه بس مش كاتب فيها حاجه

=========================
محمد
ربنا يزيدك ضحك يا مان
اشوفك قريبا ان شاء الله
=========================
استاذ ممدوح
والله يا استاذ اشرف ده فعلا كان بيدرس ثانويه عامه بس زيه زى اى مدرس فاشل فى مصر بيدر المنهج فقط يعنى اللى خلاه يفكر ان راس التين على حدود اسرائيل مش هيعرف ان الحضره القبليه دوله مستقله
هههه
انت عامل ايه يا راجل يا طيب

^ H@fSS@^ said...

give me his blog address, maybe i can convince him to start writing.

® الأغانى للرأفتــــانى said...

حفصه
http://khaledeibid.blogspot.com/

rema_almoraly said...

يا سلام
دا العلم نور والله
تصدق ان طول عمري فاكره ان راس التين دي في اسكندريه
واول مره اعرف انها على الحدود مع اسرائيل
وكمان محتله
يا نهار ابيض يا جدعان دا واضح ان اشرف دا نايم في العسل او مش من هنا
على العموم الحمد لله الذي لا يحمد على مكروه سواه
الحق انا اروح اطوع في الجيش يمكن اقدر احرر راس التين مع صلاح الدين
وعمااااااااااااااار يا مصر