الاسعار عندنا وعندهم.. والسكر غلى وانا احلى بإيه

فى عدد ١٦ ابريل صفحه ٦ من جريده الديلى نيوز التى تصدر يوميا فى نيويورك تقرير عن اسعار السلع الغذائيه فى امريكا سنه ١٩٩١ مقاربه باسعار اليوم 2008
شمل هذا التقرير مقارنه بين اسعار السلع الضروريه مثل اللبن والعيش واللحوم وغيرها. وبمناسبه الغلاء الفاحش فى مصر حاولت اعمل مقارنه بسيطه بين نسب زيارده الاسعار هنا فى امريكا ومصر.
مع ملاحظه هامه لابد من وضعها فى الاعتبار ألا وهى : الدولار بالنسبه لنا هنا كالجنيه فى مصر يعنى ماتقارنش فارق العمله حاول تفكر فى الدولار على انه وحده صرف زى الجنيه ماهو وحده الصرف فى مصر. برده وحده الوزن هنا فى امريكا هى الرطل. pound برضه ما تفكرش بين الفرق بين الوحدتين
سعـــر الفراخ سنه ١٩٩١ كان0.90$ دولار والسعر السنه دى 2008 وصل 0.99$ يعنى الزياده 9 سنت. بالنسبه لنا المفروض تكون 9قروش
السكر كان بـ 0.44$ فى سنه 1991 والنهارده سعره وصل 2.99$ بزياده قدره 75 سنت يعنى بالنسبه لنا المفروض تكون 75 قرشا
اللحمه كانت بــ 1.63$ والنهارده السعر اصبح 2.99$ بزياده قدرها 1.36$ يعنى برضه بالنسبه لنا جنيه و36 قرشا
العيش كان بــ 0.73$ والنهارده اصبح بـ 2.19$ يعنى الزياده قدرها 1.46$ .
مش هاتكلم عن اسعار الفاكهه والشيكولاته والمكسرات لانها بالنسبه لنا من الرفاهيات.. علشان الحكومه ترتاح
لاحظ ان فى الــ17 سنه اللى فاتوا مفيش سلعه زاد سعرها الضعف غير العيش.. مع الوضع فى الاعتبار ان المرتبات زادت والحد الادنى للاجور كان 5.5$ فى الساعه من عشر سنين والنهارده الحد الادنى للاجور 7.15$ فى الساعه
بالنسبه لمصر.. على ما اعتقد ان سعر اللحمه من عشر سنين مثلا كان 20 جنيه.. دلوقت اللحمه بحوالى 50 جنيه لو مش لحمه حمير. يعنى السعر زاد تقريبا مره ونصف فى عشر سنين مش 17 سنه.
زجاجه الزيت فى مصر اصبحت بــ13 جنيه وكانت من عشر سنين مثلا بــ3 جنيه يعنى السعر زاد 400%. نفس الزياده الجنونيه بالنسبه للسكر واللبين..اما العيش فهو مشكله تانيه خالص.. لان العيش فى مصر اصبح له شهداء زى شهداء حرب اكتوبر وحرب الاستنزاف
ببساطه: متوسط نسب زياده الاسعار فى امريكا خلال الــ17 سنه اللى فاتت كانت مابين 3%-7% تقريبا.. وهذه الزياده كان معاها زياده فى المرتبات والحد الادنى للاجور وشبه ثبات فى الضرايب.. حتى السنه دى 2008 علشان الاقتصاد تعبان شويه هنا.. قررت الحكومه الامريكيه صرف مساعدات لجميع المواطنين.. كل اسره هيوصلها شيك فى البريد.. قيمه الشيك هتكون على حسب عدد افراد الاسره والاطفال ..الخ
فى مصر متوسط زياده الاسعار خلال الــ10 سنين اللى فاتوا كانت حوالى 300% مع ثبات الاجور والمرتبات ان لم تقل
خاتمه: من غير فذلكه اقتصاديه ومن غير ما الدكتور نظيف عظّم الله اجره ما يلعب فى شنبه.. زياده الاسعار فى مصر لما يقابلها اى زياده فى المرتبات والاجور زى ما بيحصل فى جميع دول العالم حتى جزر القمر.. يعنى لسه المدرس بياخد 100 حنيه فى الشهر وفى ناس لسه بتاخد 400 جنيه فى الشهر.. بالاضافه الى التدهور الرهيب فى نظام التأمين الصحى والمستشفيات وعلاء اسعار الدواء
يعنى لو حبيبت تعمل عمليه جراحيه مش هتقل عن 10 الاف جنيه مثلا ده لو حبيت تطلع بكل اعضاء جسمك اللى دخلت بيهم
المستقبل كاحل السواد.. و الحاضر اسود من قرن الخروب وده يجعلنا فى اشد الحاجه الى النظريه الاقتصاديه الشهيره.. ما اشربش الشاى اشرب ازوزه انا مع تعديل بسيط جدا عليها الا وهو تعديل السكر غلى وانا احلى بأيه
واحا جدا يا حكومه

4 comments:

tota said...

يا استاذ لخبطنى فى الحسابات
راجع سعر السكر انت كاتب رقم محتاج تعديل مش زيادة 75 سنت
احنا حننصب علشان انت فى امريكا ومحدش شايفك

طبعا الزيادة الفظيعة التى تتناسب تناسب عكسى مع المرتبات ( مش عكسى برده زى الفيزياء ما بتقول )مش سببها بس الحكومة وسببها كمان جشع الافراد اللى عايز يكسب فى الحاجة اضعاف مضاعفة علشان يتخم جيبه
الشعب فى مصر عايش كل واحد فيه حاطط ايده فى جيب التانى بيفرغه اول باول

ده طبعا مش دفاع عن الحكومة لان مفيش رقابة و لا رادع ولا مساعدة بطريقة ايجابية وكله كلام حنجورى عن تحسين الدخل والدعم والرسوب الوظيفى وكادرات الموظفين وحاجات كتير مفيش حاجة منها على ارض الواقع غير ان ظهر الموظفين انحنا

بس قرن الخروب فاتح شوية سوف حاجة اسود من كده علشان توصف بيها الحال
والله سلامات يا استاذ

الأغاني للرأفتاني said...

توتا
ان بأه روحت جيبتى آله حاسبه وقعدتى تراجعى وراى الارقام..صحيح انت خنقه..
هههههه
ايوووووه يعنى يا فالحه هى جات على الكام سنت دول..ماهى خربانه خربان..ضربوا الاعور على عينه قال فواكهه فواكهههههههههههههه
فعلا الحكومه بتسرق من ناس وفى ناس تانيه بتسرق من ناس تانيه والعمليه متكعبله خالص..

بس يعنى ايه كادر وظيفى ده؟؟؟؟

الأغاني للرأفتاني said...

اللول
ايه آدم سميث ومارى انطونيت دول يا منوول؟ شكلك بتقرى حاجات جديده ههههه
وبالنسبه للعريس للى جايب يخطب..ياترى يجيب الزيت زيت تموين ولا زيت حار؟؟؟

الكادرالوظيفى ده طلع له قيمه..داالواحد كان غشيم..
انت عامله ايه؟

الأغاني للرأفتاني said...

ايووووووه
فين ايام كابتن حتاته وام نسمه..منك لله فكرتين بالحبايب وايام كويسه والله ضحكتينى
والله كبرتى وهتبقى موظفه وهتضربى اعتراضا على الدرجه والترقيه
ربنا يوفقك يارب