Monday, August 28, 2006

هتوحشنا يا سولم


تم تعين المحافظ المحبوب عبد السلام المحجوب وزبرا للتنميه.على الرغم من حزنى الشديد ان اللواء المحجوب ترك الاسكندريه بعد جهوده الرائعه لتطوير اسكندريه الا أنى سعيد أيضا لان اللواء المحجوب رجل شريف ومش بتاع شيلنى واشيلك. المحجوب عمل فى اسكندريه حاجات جميله جدا وشجّع كل الاسكندرانيه ان هم يخدموا مدينتهم بنفسهم. ولذلك وجدنا رجال أعمال اسكندرانيه وغيرهم تبرعوا باشياء كثيره جدا لتطوير المدينه الجميله
أرجو ان المحافظ الجديد يكون على مستوى المسئوليه وما يرجعناش لايام الجوسقى الكريهه. لأن احنا اتخنقنا على الاخر. كما أرجو ان اللواء المحجوب يقوم ببطوير وزاره التنميه كما طوّر الاسكندريه. المحجوب سوف يواجه صعوبات كثيره فى قاهره المعز. لان هناك حرب كبيره ومجلس الوزراء مش زى مجلس المحافظه واعداء النجاح هناك على عينك يا تاجر وللى ما يشترى يتفرج. الوزراء هناك بيقلعوا الجزم لبعض وبيقولوا طظ فشر احمد عز وطلعت السادات. والكل هيبقى خايف من المحجوب لانه مش بتاع رشاوى ووسايط. ربنا يسترها ويوفق كل شريف وينتقم من كل واحد ما عندوش ضمير من بتوع قطار القليوبيه والبحيره وعباره السلام وقصر ثقافه بنى سويف ولحد أخر اللسته اللى انتو حافظينها
Enhanced by Zemanta

4 Comment:

Geddo Iskandar said...

ممم
بص يا عم المهاجر
أنا أتفق معاك في تلتين كلامك و لي تحفظات على التلت التالت
الراجل ده فعلا إيده نضيفة و مش حرامي زي اللي قبله - بس هوة كان شغال مع رجال الأعمال بنظام شيلني و أشيلك
يعني عاوز رخصة ب أربع أدوار زيادة في عمارة عالكورنيش - أوكى بس تجمل ميدان في المقابل - يعني كان بيقنن الرشوة طالما كدة كدة حتدفع - خليها تدفع للبلد!!

وجه نظر تحترم برضه بس كان لازم يكون ليها "ديد لاين" بعد كدة نحاول تدريجيا نسيطر أكتر و نقلل التجاوزات (عمرها ما حتنتهي) لكن نقللها

بس

:)
----------
بوست جميل أحييك عليه

2 R said...

يا جيدو
ماهو الجوسقى كان بياخد الرشاوى من غير ما يعمل اى حاجه.أنا وجهه نظرى ان الممحجوب ان شاء الله هينضف شويه فى الوزاره الوسخه

Geddo Iskandar said...

يا رب

لا نملك غير اننا ندعيله إن طريقته اللي أدار بيها اسكندرية يعرف يدير بيها المحليات

:)

2 R said...

انت عارف يا جدو أن المحليات دى اوسخ حاجه فى مصر. اساس الفساد فى مصر كله المحليات. وانا مش عارف لها اى فايده. انت عارف ان انا لحد النهارده لا املك بطاقه شخصيه مصريه