Monday, October 30, 2006

الحزب الوطنى وغسيل المخ


مره وانا فى الاعدادى الناظر سأل علىّ والفرّاش جه اخدنى من قفاى لحضور اجتماع حضره الناظر وطول ما انا ماشى قاعد افكر ايه اللى حصل ويا ترى الناظر عيزنى ليه انا كنت امين الفصل. جايز علشان الاذاعه المدرسيه لا طاب علشان جماعه الرحلات بس انا مليش دعوه بالحاجات دى واخيرا قلت يبقى الناظر هرش انا احنا بنشرب سجاير فى الحمام وان الفراش بلغ عننا وهتبقى فضيحه قلت لا لو كده كان الناظر طلب كل الشله الضايعه اللى قاعده جانبى. قلت جايز عصام بتاع الكبده اللى ع القمه قاله ان احنا سألناه على طريق ام عصام بتاعه التوسيفان وعصام عمل فيه الشاب المخلص وبلغ عنا برده الموضوع مش راكب خصوصا ان كل العصابه قاعده فى الفصل. المهم دخلت لحضره الناظر ووجدت كل امناء الفصول واعضاء اتحاد الطلبه قلت تمام كده مفيش مشاكل. وكان موجود جنب حضره الناظر واحد قالوا لنا انه من الحزب الوطنى الحاكم وكان الكلام ده فى اواخر الثمانينات- اوائل التسعينات وكنا على ابواب انتخابات مجلس الشعب. وايامها كانت جماعه الاخوان المسلمين بتعلن عن المرشح بتاعها بعباره "الاسلام هو الحل" والاستاذ ممثل الحزب الحاكم كان موجود علشان يوضح لنا من هم جماعه الاخوان المسلمين دول. وقعد ا خينا ده يوضح لنا ان احنا مسلمين امال احنا ايه وان الجماعات دول ما هم الا قتله بدليل قتل السادات وغيرها من الحوادث الارهابيه اللى ورونا صورها وقعد يخوف فينا والحق اقول ان فى بعض الزملاء بطلوا يصلو من يومها. وان احنا عشنا فتره الاعدادى والثانوى معتقدين تمام الاعتقاد ان الجماعه دول شياطين والعياز بالله وان الحزب الوطنى الوديع ما هو الا رمز للعفه والطهاره وفضلنا ع الحاله دى لحد ما بطلنا نقرا الاهرام والاخبار والجمهوريه. واتضح لنا بعد ما كبرنا وبدانا نفكر ان الاخ مندوب الحزب الوطنى كان فى مهمه رسميه لجميع مدارس المدن الكبرى لعمل غسيل مخ لجميع الطلبه والحق اقول انه نجح نجاح باهر فى ارهابنا وتخوفينا من جماعه الاخوان

8 Comment:

ادم المصري said...

هههههههههه
برافو

مختار العزيزي said...

ده كان غسيل ومكواة بقي. الناس دي عبيطة ولا واكلة مستهبلة ؟

Anonymous said...

يا مختار
دى فى العن من كده. والناس دى لا عبيطه ولا واكله مستهبله الناس دى كانوا عارفين هما بيعملو ايه كويس

شــهــروزة said...

هههههههههههههه
انت كمان؟؟
واد يا رامى
شكلنا انا وانت نفس الدفعة
انا كمان حصللى كدة
بس كنت بقا مشاغبة شويتين
اللى يقول عليه اى واحد من الحكومة تلاقينى اعمل عكسه طوالى
كان عندى اجرام مبكر ولا مؤاخذة يعنى
تعرف لية؟؟


لانى شفتهم وانا صغيرة بيقبضوا على شاب جارنا
كان مثال للبراءة والاخلاق
وعذبوه فى الكراكون
لحد ما مات فى ايديهم من الضرب
ورموه من اخر دور
وقالوا انه انتحر
من وقتها
وانا مستحيل اصدق اى حد منهم
حتى لو قاللى ان الشمس بتطلع من الشرق
يبقا بتطلع من الغرب دلوقتى

محد مغسول مخه يا رامى
احنا اللى عاملين فيها عبط وهبل
وبنمشى جوة الحيط
مش جنب الحيط
تحياتى

2 R said...

شهروزه
عاش من شافك ياستى. صاحبى اللى بياخد 183 جنيه فى الشهر لسه زعلان منى.
العلميه مش عمليه ان حنا عبط او سايقين الهبل العلميه انا احنا ملخومين فى الحياه ومشاكلها والنبى لما واحد ياحد 183 فى الشهر هيروح يتظاهر ازاى وفين

Hafsa said...

ما اسخم من ستي الا سيدي يا مهاجر
من الاخوان المسلمين للحزب الوطني يا قلبي لا تحزن

لا دولا فعالين و لا دولا وطنيين
تحياتي

عمر said...

لا مؤاخذة بقي يا عم المهاجر... هي اسمها "أم عصام" بتاعة التوسيفان ولا "أم ربيع" بتاعة التوسيفان؟؟؟؟

لأ بقي خلي بالك... احنا مركزين معاك قوي

:)

المٌهَــــاجِر المَصْـــــــرى said...

عمر
اسمها ام ربيع ياض
انت من حجر النواتيه فى اسكندريه ولا ايه..
شكلك فوت على ام ربيع يا معلم..
ام ربيع صديقه الطلبه