الاغانى للرأفتانى- جزء تانى

الاغانى للرأفتانى – جزء تانى
بعد كتابه الجزء الاول من الاغانى للرأفتانى. جاءت تعليقات الساده القرّاء والمدونون ساخره لازعه ومليئه باقتراحات الاغانى الغراميه اللى محتاجه تفسير فمثلا حفصه وضحت عامل الوقت واعطت مثال باغنيه لعدويه واحمد شوكير عمل نفس الشيء واعطى مثل بأغنيه لعبد المطب اما شهروزه فلفتت نظرى لعوامل اقتصاديه تانيه نبدأ بعامل الوقت ودوره فى الحاله الغنائيه العاطفيه . فنجد عدويه يقول " الساعه الا ثلث ومعادى معاه 8 لا من السكه دى روحت ولا لاقى سكه ثانيه ...وكثير الناس كثير وانا عايز اركب واطير" عدويه ضرب هنا 100 عصفور بحجر واحد فقال ان "الساعه الاثلث وميعادى معاه 8" وهذا الاسلوب اشتهر به عدويه وهو انه يسيب خيال السامع يحوم فى بحر الخيال زى ابو فراس الحمدانى . عدويه مقلناش الساعه كام الا ثلث... اذكى السامعين هيقول ان الساعه 8 الا ثلث وعدويه عنده ثلث ساعه بحالها علشان بركب المترو اوياخد مشروع او لوكان صايع اوى هياخد تاكسى ويوصل لحبيبه فى ميعاده وهو الساعه 8. لكن عدويه كالسهل الممتنع قطع الطريق على خيال السامع وقال"كثير الناس كثير وانا عايز اركب واطير" يعنى ان الناس كثره والدنيا زحمه فمش نافع تاكس ولا مترو ولا ميكروباص ووسيله المواصلات الوحيده المتاحه لعدويه للوصول لحبيبه هى الطيران فقط. يا سلام ياابو محمد, نزيه والله طول عمرك زى ماكلكم عارفين ان عدويه ظهر فى اواخر السبعينات واوائل الثمانينات فكانت وسائل المواصلات كثيره والدقيقه لها ثمن. اما العبقرى محمد عبد المطلب ظهر فى جيل اسود من السواد لا احترام للوقت ولا اى شئ فقال" السبت فات والحد فات وميعاد حبيبى يوم التلات" الحاج عبده مقلناش هو النهارده ايه .. وبرده ماجبش سيره يوم الاثنين اللى هو المفروض يكون قبل يوم الثلاثاء.. ناس داخت وغلبت علشان تجيب تفسير لكن هيهات. فى ناس تانيه من علوم الفلك قالوا ان يوم الاثنين ما كنش موجود لسه على ايام عبد المطلب وان الناس بدأو يستخدموا يوم الاثنين بعد عبد المطلب بعشر سنين وهذا التحليل اقرب الى غيره من الصواب والله اعلم فى مطرب تانى بيقول" ياولاد بلدنا يوم الخميس هاكتب كتابى وابقى عريس... والدعوه عامه وهتبقى لمه" من سماع هذه الابيات تعرف ان المطرب ده كان عامل كمين لمصر. زى ماتقول كده كان بيتلكك. ازاى؟ اقولك. المطرب ماقلش الفرح يوم الخميس من شهر كام سنه كام؟ عايزك تبقى مستعد للفرح فى اي وقت وده اسمه فى الشعر العاطفى اسلوب الكوارث والاسلوب ده بتستخدمه الحكومه المصريه كثير. فى العبارات والقطارات وحريق المسارح. عايزك تبقى واقف على طراطيف صوابعك مستنى الفرح. ويقال ان المطرب ده كان ناوى يروح لناس معينه يعاتبهم على عدم حضورهم كتب الكتاب وان مش هيقبل العذربتاع احنا معرفناش اى خميس. وفى تفسير تانى يستاهل توضيحه وهو ان المطرب ده كان بخيل وجشع ولذلك وجه الدعوه عامه لكل شعب مصر علشان كل واحد يجيب معاه هديه يوم كتب الكتاب وبقارنه بسيطه للحب ايام زمان والحب اليومين دول هتجد العجب العجاب. ايام زمان كان فى رقه وكسوف فمثلا تجد الرقيقه شاديه تقول "مكسوفه مكسوفه منك مش قادره اقولك انى بأحبك" وتجد ام كلثوم تقول " بدى احكيلك ع للى فى قلبى....وعزه نفسى منعانى" الحب مدوّب الستين بس فى كسوف وعزه نفس . وتجد من غير خشى ولا حياء نانسى بتقول" معجبه مغرمه أنا بأه مش عأوزه الا هو.. حد يقول له أنى بحبه الحب ده كله" نانسى يا ساده مش عاوزه غير الشاب الحليوه ده ياهو يا بلاش يا هتعيط وكانها واحده رايحه الشواربى تشترى جوز شرابات احنا جيل محظوظ اوى ربنا كرمنا بوسائل عديده للاتصالات الغراميه. مثلا واحد عايش فى نيويورك عاوز يلاغى حبيبته فى مصر. ممكن يبعث ايميل رساله ع الموبايل ولو معاه رصيد يرن رنه. يعنى كل الوسائل متاحه مفيش حجه . ايام زمان بأه كانوا بيستخدموا وسائل اتصالات غراميه مختلفه خالص. فمثلا نجد مطرب بيقول " ياوابور الساعه 12 ياللى مقبّل ع الصعيد..خد منى سلام وتحيه وروح لحبيبى فى يوم العيد" شوف الفرق بين جيلنا المرّفه وبين هذا العاشق الغلبان. كل اللى هو عاوز يعمله ان يبعث كارت معايده لحبيبه فى يوم العيد. فلم يجد هذا العاشق سوى قطار الساعه 12 وكان هذا القطار قطار محافظات مش سريع لان المطرب ما لحقش قطار الجرايد بتاع الساعه 5 الصبح علشان يبعث معاه الرساله. ويحكى ان بعد القطار ما وصل لبيت المحبوبه لقاها اتجوزت وخلفت ولدين اسمهم التوتو بكر والأنّا ابو زيد وبتطور وسائل الاتصالات الغراميه نجد الرقيقه نجاه بتقول" وبعتنا مع الطير المسافرجواب وعتاب وتراب من ارض اجدادى وزهره م الوادى" ياسلام يا نوجه. استطاع هذا العصفور العملاق ان يحمل الرساله والوورد والعتاب وكمان تراب من ارض الاجداد. كنا نحن الشعب ظالمين الحكومه ومفكرين ان الحكومه سرقت ارض الاجداد لكن الحق ظهر واتضح ان عصفور نجاه هو اللى اخد ارض الاجداد علشان يوصلها للحبيب المهاجر واحب ان اختم كلامى باغنيه يأس جميع الناس من تفسيرها لان خيالها واسع اوى ولقد عجز الرأفتانى نفسه عن تفسير هذه الاغنيه . يقول مطرب الاسكان الشعبى والعوامل الجغرافيه الفنان محمد رشدى"كعب الغزال يا متحنى بدم الغزال..ما تبطل تمشى بحنيه لايقوم زلزال" فى البوست اللى فات رشدى عمله قلبه شارع وعماره علشان ازمه الاسكان. المره دى هو خايف من قيام الزلازل والحق اقول انا لسه امام عده اسئله محيره لتفسير هذه الدرّه الرائعه يا ترى رشدى حب وعشق هذا الغزال؟ ولا حب طعم اللحمه بتاعته؟ ولو حب وعشق الغزال ليه قتله وصمم انه يوسخ كعب الغزال بدمه؟ ناس بتقول رشدى ما كنش ليه فى اللحوم كان بياكل خضار بس وانه قتل الغزال علشان ياخد شويه دم يعمل بيهم عمل وحجاب لمحمد قنديل ومحرم فؤاد علشان كانوا واخدين منه كل الافراح وكان عاوز يوقف حالهم يا ترى ما نوع هذا الغزال المخيف اللى لومشى ع الارض بهدوء هيقوم زلزال؟ على علمى ان الغزال سريع وخفيف الحركه اسئله محيّره ولازم نلاقى ليها اجابه فى يوم لو مش الرأفتانى الكبير هيبقى الرأفتانى اللى بعده
انا رايح دلوقت اشوف شويه فيديو كليب من بتوع مروه واليسا والناس الحلوه دول يمكن الاقى حاجه تانيه تتكتب

21 comments:

الأغاني للرأفتاني said...

منال\albida
والله انت اسعدتينى جدا انك من عشاق عدويه والدلالات العلميه لحبه فوق وحبه تحت ان عدويه لما
ظهر كان ايام الانفتاح وظهور الطبقات فى المجتمع ناس اغنياء وناس فقراء وبما ان عدويه نشط من نشطاء المجتمع فتمرد على الطبقيه بأغنيه حبه فوق وحبه تحت
اى خدمه ياستى
هههههههههه

انحلت سيور العربه وسقط المهر من الاعياء said...

احمدك يا رب
اخير ا وصلت عن طريق الصاخير ا وصلت عن طريق الصدفه البحته
فيه اغنيه برضه للست منيره المهديه خا صه با لوقت مطلعها بيقول
بعد العشا يحلى الهز ار والفرفشه
مش عارف اشمعنه بعد العشا
بما تفسر يا رافتا نى
ههههههههههه

الأغاني للرأفتاني said...

الجحيم وايامه السواد
يا سلام يا واد يا ابوحميد ع السؤال
بتاعك ده. سؤال من زمن العصر الجميل لان لاغنيه دى بالزات حصل عليها حروب فشر الحروب الصليبيه. يحكى ان بعض الناس فسروا كلمه العشا بفتح العين وهو يعنى بعد تناول وجبه العشاء.
وده تفسير ليه احترامه لان فى مصر الهزار والفرفشه واللى بالى بالك دايما بيحصل بعد تناول وجبه العشا كل يوم خميس ليه مااعرفش

وفى تفسير تانى ان كلمه العشا بكسر العين يعنى بعد صلاه العشا وده تفسير قائم على قانون ساعه لقلبك وساعه لربك. يعنى الست منيره بعد ما تصلى بتورح بفرفش وده تفسير ضعيف

الأغاني للرأفتاني said...

شكرا يا منال
الجحيم يا ستى كان مشغول فى كام حريقه هنا وهناك علشان يجيب لقمه عيش امال هيقعد كده مثلا كافى خيره شره

^ H@fSS@^ said...

لا زعلتوني يا مهاجر انت و منال
بقي هو ده تفسيركوا لاغنية حبه فوق و حبه تحت؟؟
لا اسمحولي
"
البدر ساكن فوق
و انا اللي ساكن تحت
بصيت لفوق بشوق
مال قلبي و انجرحت
يا اهل الله ياللي فوق
ما تطلوا على اللي تحت
و لا خلاص اللي فوق
مش داري باللي تحت
طب حبة فوق
و حبة تحت
نظرة فوق
نظرة تحت
"
يعني يا جماعة ده قمة الغزل و كمان عفيف
يعني هو قلبه متشحتف عالبنية و اتلطع و هو واقف يبص عليها من تحت
ده فكرني بغزل الشعراء العرب من ايام الجاهلية لما الواحد فيهم كان يفضل يحب في حبيبته من غير مايشوفها
و لا الفرسان بتوع العصور الوسطى لما بردة كانوا بيحبوا الواحدة بالاسلكي

المهم معنى الاغنية غير ما انتوا فنسرتوه بتاتا

شكلي حضطر الف كتاب ارد بيه عليك يا رافتاني و اسمه التحف الحفصية في تفسير الاغاني المنسية

تحياتي

الأغاني للرأفتاني said...

يا حفصه
لا اختلاف على النقطه العاطفيه هنا. لكن ليه عدويه اختار الكلام بسبب الطبقيه حبيته من اللى فوق وهو من عامه الشعب. وبالنسبه لموضوع الطريقه الحفصيه للاغانى المنسيه. فعلا هذا الموضوع عاوزر اشبال صغيره زيك علشان تاخد على عاتقها عبئ التفسير. فمرحى بشباب وشابات مفسرين ومفسرات..
ايوووووووه

Anonymous said...

هههههههههه
سكرر التفسيرات دى
تصدق؟
ولا كان بيخطر فى بالى انى افسر اى سونجاية كدة
بس انا بقا بعد الرأفاتيات بتاعتك دى ما ظهرت
عاوزاك تفسرلى كويس الاتى
اغنية العنب
اغنية المولد
اغنية اديك تقول مخدتش
اغنية الصراحة راحة يا عينى
وحياة الغوالى يا شيخ
حققلى فى الطفرة اللى حصلت دى
-----
اصلك مش واخد بالك
اذا كان دة تحليلك لاغانى محترمة وبنت ناس كدة يا حبة عينى
اوماال فى الاغانى دى حتعمل ايييييييييية؟؟
ومش عاوزة اقول لفظ اسكندرانى كد ابيح شوية احسن عيب
حابقا اوشوشك بيه على انفراد

تحياتى

عمر said...

هاهاها! هايل البوست ويا ريت يكون فيه أجزاء تانية

أنا عن نفسي بستغرب جدا حالة التردد والتذبذب في الرأي عند المطربين... يعني مثلا يكون المطرب بيقطع في روحه علشان أمونة بعتلها جواب.. أمونة ولا سألت فيه.. وبعدين يقولها "انشالله ما رديتي عليا..." طبعا واضح جدا التشوش في الأفكار وعدم وضوح الأهداف

كذلك عبد المطلب حين قرر ان "لكل واحد كاس..." ثم يستعجب لأن الناس "شربوا سوا مالكاس" طيب يعني هو كل واحد عنده كاس ولا هوة كاس واحد بيخمسوا فيه؟؟

نرجو الإفادة من السيد الخبير

الأغاني للرأفتاني said...

يا عمر
يا سلام على الذكاء والاسئله القاتله دى.. زى ما بيقولوا انت سابق زمايلك وسابق جيلك
عبد المطلب كان بيّرمى على واحد صاحبه قاعد معاه على نفس الترابيزه فى خمّاره طول عمرى عايش لوحدى اللى فى عماد الدين. عند المطلب وصاحبه كان معاهم جوز حريم حكايه وكل واحد فيهم طلب كاس .. صحبه كان دنى شويه... كان نفسه فى الست اللى كانت قاعده مع عبد المطلب.. فالحاح عبده زعل لانه ما ببحبش الشركه لا فى الحريم ولا فى الكاس.. فقال لى صحبه معرفش ليه الناس شربوا سوا من الكاس.. مع ان كل واحد فيهم معاه الكاس بتاعه ومعاه الحرمه التمام.. بس دناوه بعيد عندك

اما بالنسبه لشفيق جلال وموضوع ان امونه ماردتش عليه وبعد كده قالها ان شاء الله مارديتى.. فيحكى ان شفيق ماكنش عنده كرامه فى موضوع الحريم.. نفسه حلوه.. اى واحده ماشى.. فبعت لامونه جواب واثنين ومافيش فايده..صوره شفبق اصبحت زى الزفت امام الجميع.. فأخيرا اقتنع بكلام اصحابه انه يقول امونه ان شاء الله مارديتى عليه.. ويحكى ان الرقابه شالت المقطع الاخير من الاغنيه لان شفيق سبّ لامونه الدين وشرد لها ع الاخر

عمر said...

شكرا للسادة المسئولين لإزالة أسباب شكاوي السادة المستمعين

والعلم نورن برضه يا ولاد

الأغاني للرأفتاني said...

العزيزه منوله
اغنيه العنب للمطرب العظيم بعروره للاسف لسه ماوصلتش نيويورك. وارجو اى مستمع مثقف انه يبعتها لى ع لايميل علشان التحليل. دى مش اول مره يتغنى فيها للعنب. ففى مطربه شعبيه اسمها شفيقه غنت وقالت " جاب لى العنب عناقيد والحبه ملو الايد" وشفيقه كانت بتلقّح الكلام على يوسف والى وبتقوله ان حبه العنب بقه تملى الايد وده مش من البركه ولكن من الهرمونات المسرطنه.. اما الاخ بعروره بعد الكشف عن الفيش والتشبيه بتاعه اتضح ان العنب هنا ليه مخزى عاطفى لان بعروره سوابق آداب .. فبعروره يقصد بالعنب اصناف البنات الجميله.. حمره وشقرا وصفرا..ايام زمان محمد فوزى قال" حاكم الزهور زى الستات لكل لون معنى ومخزى" لكن بعروره اخد العنب لعده اسباب منها توافر السعر واختلاف الانواع .. عنب بناتى وفيومى وغيره وان الورد اليومين دول غالى

Anonymous said...

أية يامهاجر أنت مابتسمعش نجوم FM ولا أية و بعدين يا أخي موقع طرب موفر كل الأغاني و مش حارم حد من حاجة .

Anonymous said...

بصوا بقى أنا في أيام شبابي كان ليا شلة فقر نقعد نسمع الأغاني و نفسرها تفسير على جوة if U know what I mean نركب على الأغاني كلمات من عندنا بس الواحد كبر و مركزة الوظيفي و الأجتماعي مابيسمحلوش يتكلم بالطريقة دي ألا في حدود ضيقة جدا لكن الموضوع دة فكرني بكل الحاجات دي تاني .
يعني مثلا محمد منير و أنا من أكبر معجبي فنة من ضمن أكتر المغنيين اللي كلمات أغنية لو أنت عقلك متركب على تحت ممكن بسهولة جدا تتفسر على جوة .
مثال :
أغنية: "بقينا لبعض" كيف تفسر مقولتة: "خلاص تجيلي و باروحلك و اللي في خيالك مسموح لك" .

Anonymous said...

مثال أخر في أغنية في عشق البنات :"جالتلي باريدك يا ولد عمي تعا دوج العسل سايل على فمي".
طبعا الأيحاء الجنسي و اضح جدا هنا بس أية معنى العسل سايل على فمي هي هبلة و بريالة مثلا .

الأغاني للرأفتاني said...

Ironcobra40
انت فين يا عم الحاج وله علشان نين نيويورك وكالفورنيا 3 ساعات..
انت عارف فى مصر اى كلمه لها مدلول جنسى ولو ملهاش الناس بتعمل ليها مدلول. عارف ليه.. علشان دى منطقه ممنوعه.. وهى دى الطريقه الوحيده اللى الناس تقدر تتكلم عن الجنس فيها.. الايحاءات.. حتى شوف اعلانات القناوات الفضائيه العربيه كلها ايحاءات .. لان المنظقه دى منطقه شائكه ممنوعه.. احنا عندناهنا زى ما انت عارف.. انا مش عارف انت حضرت الثانويه العامه بتعاتك هنا فى امريكا ولا فى مصر.. هنا بأه فى الهاى سكول كانول بيكلومنا عن الحنس كثقافه.. ما هى انواع والوقايه واشكالها.. الخ الخ علشان كده ربنا مجعلناش من المتحرشين.

وبعدين منير يغنى اللى هو عاوزه.. عمرى ما هالغبط معاه..ههههههههههه

عمر said...

الأستاذ الجليل الأصفهاني

لو ما فيهاش رزالة يعني، ممكن توضح لنا ضعف القدرة علي القيام بالعمليات المنطقية الأساسية عند بعض المطربين؟

يعني مثل الأخ الفاضل عمرو دياب قال "قمرين دول ولا عنيك، قلبي بيسألني عليك، أتاريني بفكر فيك" والمعني المراد توصيله هنا ان عمرو اكتشف انه بيفكر في حبيبه لما قلبه سأله عن عينيه. طبعا معروف ان لا يكمن أن يكتشف شخص انه يفكر لأن التفكير والاكتشاف كليهما عمليات عقلية واعية، فمش ممكن الواحد يفكر وهو مش واخد باله، إلا إذا كان بيفكر بالكلي أو الطحال مثلا

وفي واقعة مشابهة قال السيد/ محمد فؤاد ان حبيبه "كداب مغرور قال مش بيحبنا".. ثم ختم حديثه قائلا "وانا عارف انه ما حبش حد قبلي" وطبعا كون حبيبه ما حبش حد قبله لا يعني بالضرورة إنه ما حبش حد بعده، وبالتالي تكون النتائج التي وصل إليها الزميل فؤش بكون حبيبه "غرقان في بحر هواهم يابا" نتائج عارية من المنطق

الأغاني للرأفتاني said...

ا غنيه العنب العنب
منال بعتت اللينك اللى تحت
وحسبى الله فبكى يا منال يا بنت حوا وادم ربنا يورينى فيكى يوم زى ما جرحتى مسامعى المرهفه بهذا الفكاهانى المفترى
ياساده المطلع بتاع الاغنيه بيقول" اكل العسل حلو..بس النحل بيقرّص" "شرب الحشيش مزاجه عالى والراجل اللى هيجيى ويكرس" دى اغنيه زى دى عايزها لها بلوج لوحه

ايويويويويويويويويويويوه
رحم الله احمد رامى اللى كان خايف يكتب اغنيه لام كلثوم علشان كانت بالعاميه
رفض رامى الكتابه لكذا شهر مش مقتنغ ان فى كلام ممكن بتغنى غير الفصحه..
تعالى بأه يارامى وشوف الفكهانى اللى زارع حشيش فى المزرعه بتاعه العنب بتاعه

الأغاني للرأفتاني said...

يا عمر
عمرو كان طالع من عركه ومضروب فى عينه لذلك كان عنده زغلله فى عنيه ماكنش شايف. ويقال ان من قوه اللكمه اللى خاتها فى عينيه اتخيل ان عيون حبيبته قمرين كبار.. مع انها كانت لابسه نظاره شمس

بالنسبه لفؤش.. ففى الاغنيه اللى انت ذكرتهافؤاد قال غرقان فى بحر هوانا يابا وعيونه حلوه وكدابه.. لان فؤاد كان ماسك عليها زله ذى ما تقول كانت واخده منه التليفون المحمول بتاعه تتمنظر بيه مع صحباتها وكانت ناويه تضرب عليه.. لكن الفؤش الصايع بتاع عين شمش كان ممضيها على وصل امانه

Anonymous said...

لا واللة ياباشا أنا واخد الثانوية العامة قديمة(1986) من مصر بس أنا متثاف تثئيف ذاتي ربنا يخليلنا مجلة طبيبك الخاص و المختار من ريدرز دايجيست و هووهي

عمر said...

أحب أضيف ان مسألة اهتمام المطرب المصري بالقضايا العامة هي مسألة غير جديدة علي حياتنا الفنية، فكما كان الفنان محمد رشدي مهموما بقضايا العشوائيات وإسكان الشباب، فقد كرست الفنانة القديرة نادية مصطفي جزءا كبيرا من تاريخها لصالح قضايا السفر والجوازات والهجرة

فبعد رائعتها الخالدة "سلامات سلامات سلامات.. يا واحشنا يا بلديات" تسائلت نادية في حيرة "جي في ايه وسافرت في إيه.. وماريحتش عندنا ليه؟" طبعا غير واضح إذا كان البلديات بتاع "سلامات سلامات" هو نفسه الجدع إلي نفضلها فيما بعد، بس لو طلع هو يبقي بصراحة راجل واطي ومعندوش ريحة الدم

الأغاني للرأفتاني said...

عمر
ربنا ينتقم منك زى ما انت قاعد تفحفر فى اغانى عفا عليها الزمن...
يا عم.. ناديه مصطفى كانت شغاله فى سجل مدنى السياله.. ولذلك كان لها اهتمامات بالسفر والبطايق والبسبورتات.. ويقال انها كانت متجوزه على جوزها.. وبعد ما مارحبت بالزوج الاول بسلامات سلامات..طب عليهم الزوج التانى اللى هو المفروض بيشتغل فى لبيا.. ولذلك قالت له انت لحقت تيجى