تعددت الاسباب....والسجن قادم

ُجد والدتى كان راجل ثورجى..فى يوم خلع صوره الملك فاروق من على حيطه الدكان بتاعه وقعد يدوس عليها بالجزمه علشان عساكر قصر المنتزه اشتروا منه دقيق ومادفعوش. المهم انه اتقبض عليه واتحبس 21 يوم. جدى كان عارف التهمه بتاعته وهى العيب فى الذات الملكيه اليومين دول بأه انت ما تعرفش تهمتك ايه..ولو انت دكر بجد..تعرف انت محبوس ليه ولا انقبض عليك ازاى ممكن تكون ماشى على الكورنيش فى حالك ويطب عليك العسكر ويقبضوا عليك بتهمه التحرى
طاب يا جماعه تحرى ازاى وانا معايا بطاقه
صورتك مش واضحه فى البطاقه
ماهى الصوره واضحه زى الشمس اهى
صورتك وحشه ..اركب البوكس وفى حاله اخرى. تكون واخد المدام يوم الجمعه تصلى..وانت طالع من الصلاه..يتم القبض عليك ليه بس هو انا عملت ايه
فعل فاضح فى الطريق العام
فاضح ازاى بس. دا انا لسه طالع من الصلاه
هو كده..الصلاه فعل فاضح..اركب البوكس وبمناسبه الصلاه..مره امن الدوله ارسل لوادى وقالوا له ابنك فى امريكا من فتره طويله..هو هيرجع امتى؟ الحاج قال لهم..ده مش راجع..دا هو عايش هناك وبيجى اجازات فقط فالضابط سأل الحاج: ابنك بيصلى فى اى جامع فى نيويورك؟ الحاج صايع قديم..قال للضابط.. يصلى ايه بس يا فندم..دا الرافتانى خمورجى وحشاش وبتاع نسوان ولحد النهارده والدته غضبانه عليه ابتسم الضابط وقاله شكرا يا حاج,,, واسفين ع الازعاج وتعجز اى دوله فى العالم ان تنافس مصرالتى فى خاطرى فى خلق اسباب القبض والتلفيق..مفيش دوله زينا يا عم الحاج..احنا ملوك التلفيق والتناحه
خطر على الامن العام...اركب البوكس
خلق حاله من البلبله والفوضى...اركب البوكس
العيب فى الذات الحبيب عدليه والصفوت شريفيه والمباركيه...اركب البوكس
التجول فى منطقه ممنوع فيها حذر التجول....اركب البوكس
بتسأل كثير عن الدستور والانتخابات والكلام الفاضى ده...اركب البوكس
شكلك وحش...اركب البوكس
صاحبك اللى انت ماشى معاه شكله وحش...اركب البوكس
عدم الانضمام للحزب الوطنى وانشاء حزب جديد والتزوير فى اوراق الحزب الجديد...اركب البوكس
عدم تزويرك لشهاده الجيش وشهاده الجامعه...ما تركبش البوكس..روح غنى فى احتفالات حرب اكتوبر

39 comments:

Anonymous said...

LOOOOOOOOOOOOOOOOOOL

باقولك ايه
مش ممكن كدة
لا انت ماشاء الله دمك خفيف
وعشان كدة
اركب البوكس


اه يا بلد

صحيح موضوع ان الامن سأل عليك هنا في مصر؟؟

انت ارهابي و لا ايه

LOL

الأغاني للرأفتاني said...

ايبيتاف
توفى من يؤقك ياختى..ارهابى ايه وهباب ايه بس..هههههههههههههه
والله منوره المطرح..انا روحت عملت تعليق عندك فى الكمين بتاع نزار قبانى..
شفتى الجهل بتاعنا قد ايه..

Anonymous said...

والله خايفة اقولك بوستك حلو ودمه خفيف ينط لى واحد هنا يقوللى انتى بتنافقى الجدع وعندك حمى رياء

ما علينا
بس برضة حو ودمه خفيف
وللاسف صحيح
بلدى اللى انت عارفها
واحد طيب نازل يصلى الفجر اتعكش وهو راجل كوبارة كدة 75 سنة
واترمى فى البوكس واتلفقت له قضية ولسة ولاده بيجروا وراه لحد دلوقتى
بقا كل اللى بيروح يصلى الفجر عندى هنا بيتعكش من الشارع
رغم ان يا اخى المسجد على اخر الشارع
حاجة غريبة


وبتوع المليارات المتهربة محدش شاف وش نفر منهم فى صفحة الحوادث
ولا الجماعة بتوع التهرب الضريبى
ولا بتوع انتهاكات اقسام الشرطة

بلد ماشية على حل وسطها

إيمــــان ســعد said...

ههههههههههههههه
جامدة موووت

صراحة كلها اسباب وجيهة لركوب البوكس

فكرتني بواحد اعرفه كان بيكلم واحد صاحبه فى الموبايل و فجأة لاقيته بيقول
**
يا باشا ده فلان الفلان صاحبي من زمان و له فى النشاط السياسى و مشترك في كذا و كذا

فقولتله انت قلت كده ليه

ضحك و قاللى عشان اسهل على بشوات امن الدولة المهمة

:)

تحياتي

^ H@fSS@^ said...

loooooooooooooooooooooooool, the best part was the last line, mawtini min elde7k ya man, akhbarak?

shahrouza 7abibti, enta wa7da fi qemet elnaqa2, ana shoft elta3lee2at 3and sooosa, ma3lesh
enti elli fehom ya gameel
salam

MAKSOFA said...

بصراحه
انا عاجبني قوي حكايه ان الحاج والدك صايع قديم دي
هلكت من الضحك علي وصفك ليه وعلي رده علي الأسئله

Racha Khoury said...

ايها المهاجر المصري تحليلاتك دمها خفيف جدا سخريه من واقع نعيشه باسلوب بسيط وقوي

زمن انقلبت فيه الاحوال
والله الواحد مش عارف يبقى ايه
حتى يقدر يعيش مرتاح

تحياتي دائما بتكتب حاجات حلوه

tota said...

المهاجر المصرى

تركب البوكس ده علشان قانون الطوارئ اللى ماسك فينا ومش عايز يسبنا ابدا
المشكلة مش فى البوكس المشكلة ماذا بعد البوكس
تا تا تا تااتا ااااااا

هنا يكمن القلق لوسألك كام سؤال وعديت يبقى كان الحاج والحاجة دعينلك
اما بقى اذا تطورت فى الكلام واعترضت وابديت بعض التمرد
يبقى ولا اى دعى هينفعك ولا حتى دعاء سبعين مليون مواطن
وهنا يكمن الخطر وتبدأ لحظات الرعب ويكون اهوانها هو ركوب البوكس كأنك كنت فى رحلة فى فلوكة على النيل وانتهى بك المأل طعما لاسماك النيل الجائعة الشرسة الشاذة بصراحة ولو انها مش من صفات السمك بس معلش مشيها سمك

واسفى على القوانين الوضعية الرجعية القمعية فى بلد مقهورة متردية

تحياتى

Yasmine Adel Fouad said...

طب أنا راضيه زمتك البوكس مش هيوفرلك أجرة الميكروباص
غير ان البوكس هيشيل مين و للا مين
المفرض يعملولنا بوكس دورين بقى


----------

البوست تحفة
بس خد بالك بقى يابطل
احسن حد يستناك بالبوكس فى المطار لما تيجى أجازة
احسن احنا حكومة مفترية و مابتغلبش

عمر said...

انت عميل يا كابتن ولا إيه؟ قاعد حضرتك في نيو يورك وبتنتقد مهد الحضارة وواحة الديمقراطية؟ بعدين مين قاللك ان احنا مش بنحب نركب البوكس؟ المواطنة العزيزة انا حرة بتفكر تعمل بوكس بدورين، وكمان سكان المعادي الجديدة قدموا شكوي للمحافظة لعدم وجود بوكسات في المنطقة تكفي احتياجات المواطنين، دة يا ابني اسمه التفاف الشعب حول الحكومة والوحدة الوطنية اللي ما يفهمهاش اللابوكسيين النيويوركيين من أمثالك

الأغاني للرأفتاني said...

منال
فينك يا ست الكل..والله ليكى وحشه رغم طوله لسانك..هههههههه
وامسكى نفسك عندنا ناس غرب بلاش موضوع السيحان ده..لا صاروخ ايطالى ولا نيله..وبعيدين طول ما انتو صحابى متخافيش..البوكس قريب قريب قريب يا ولدى

الأغاني للرأفتاني said...

شهروزه يا غاليه
ولا يهمك..كل اللى انت عاوزه تقوليه قوليه..واللى مش عاجبه يضرب دماغه فى الحيط..ههههههه
انت عارفه الراجل اللى عنده 75 سنه اتقبض عليه ليه؟ علشان لما الضابط سأله عن سنوه ما قالوش 76 ولكن قال 75 وكانت التهمه هى عدم مؤازؤه التغيرات الدستوريه و من ضمنها الماده 76
-----------------------------------
حفصه
ايه الاخبار..انا تمام الحمد لله

الأغاني للرأفتاني said...

بنت سعد
ازيك وازاى عم الحاج سعد؟ والله انا كنت ناوى ازور الاول حتى اسألى شهروزه..بس انت كده سبّاقه بعمل الواجب..
صاحبك اللى بيقر على صحابه ده خاين اوى
-----------------------------------
مكسوفه
ازيك يا باشا..عجبك ان الحاج صايع قديم.. ربنا يستر وما يدخلش هنا بالغلط تبفى مصيبه..
انا سيبت لك تعليق على موضوع زيزى صاحبتك..ههههههه

الأغاني للرأفتاني said...

رشا
ازيك يا جميل..ايه لاخبار؟
ربنا يكرمك كده زى ما انت ماجبتيش سيره البوكسات فى التعليق بتاعك

الأغاني للرأفتاني said...

توتا
ايه الاخبار...
انا ان شاء الله ناوى اعمل بطاقه مصريه..فى ناس صحابى فى مصر وعدونى انهم يساعدونى ..بس شكلهم باعونى..ههههههه
متشغليش بالك السجن للرجاله..
-----------------------------------
انا حره
ما تفوليش بس فى موضوع المطار ده..
ان شاء الله هاجى متنكر..

الأغاني للرأفتاني said...

عمر
ايه الاخبار يا شقيق..سبت لك فويس ميل بس انت مطنش..يارب تكون المذاكره ماشيه تمام..
انا بأه نيويوركى ومش فاهم.. توفير سبل المواصلات بتاعه البوكسات فى العالم التالت..بس اى حاجه احنا عاوزين نعرفها عن العالم التالت ممكن بسأل

منال
مش كده يا منال..؟ههههههه
ولو شفت اى بوكس.. كل واحد مع نفسه يا ختى والله ما عرفك..

Anonymous said...

Hafsa
اشكرك يا عزيزتى على رفع المعنويات
والله جات فى وقتها

اعذرينى لو كان فيه سؤ تفاهم منى
أحيانا بتكون السحب مغيمة على القلب قبل العقل

أشكرك تانى


رأفت
تسلم يا رب يا غالى
كلك زوق كالعادة
ومبروك توسيع مدونتك
كنت اتمنى اشوف فعلا الناس اللى بتعلق دى هنا جنب اصدقاءك الطيبين دول
ابيتاف وتوتا وسوسة وكلبوزة والناس الجميلة دى

ان شاء الله تاخد مكان كبير وواضح أوى أوى فى التدوين



طيب تصدق؟؟
والنعمة سبب منطقى جدا جدا للقبض عليه
طيب أنا حاوقف عداد عمرى من دلوقتى على 76
كويس كدة؟؟

الزعيـمة said...

لما موضوع ركوب البوكس سهل وبسيط كدا امال الناس بتشتكي من ازمة المواصلات لية؟

طب ادى البوكس بيوصلك لاقرب قسم شرطة فى المنطقة وببلاش كمان

شوف الناس المش بيعجبها العجب

مبروك سؤال الامن عنك يا رافت انت دخلت التاريخ من اوسع ابوابة

Anonymous said...

كلامك حلو ... والأح ... (لمؤاخذة الزغطة مبهدلاني ) الأحلى من كده .. انهم كل ما يمسكوا حد عمل جريمة تلاقية مسجل خطر - مسجل سرقات - مسجل نشل - مسجل شرايط - مسجل في الشهر العقاري !!! ولما هو ياخويا الشعب كله مسجل عندهم سايبينهم في الشارع يعملوا الجرايم ويمسكوا الغلابة اللي ماشيين جنب الحيط ليييييييييييييييييييييه؟؟
ودقي يا مزيكا ..حزايني
تحياتي

الأغاني للرأفتاني said...

شهروزه
والنبى انت اللى ذوق..اركبى البوكس
وكله من خيرك يا جميل
هههههه

الأغاني للرأفتاني said...

الزعيمه.
منوره وماليه المطرح كالعاده
وان شاء الله مع اول قفى..هنقر عليكى..مش انت الزعيمه..
اركبى البوكس

الأغاني للرأفتاني said...

Barracuda
تصدق انت راجل مسخره وشكلك هتعمر
معانا هنا وتبقى صاحبنا
حلوه حكايه المسجلات دى
ههههههههههههههه

Yasmine Adel Fouad said...

انا بطالب من هذا المزنق
ببوكس لكل مواطن
علشان نبقى دولة متحضرة و بتراعى مصالح ولادها
وعظيمة يا مصر يا أرض الجزم" أحيانا "

عمر said...

عدم تزويرك لشهاده الجيش وشهاده الجامعه...ما تركبش البوكس..روح غنى فى احتفالات حرب اكتوبر

طب أنا ما زورتش... ممكن أروح أغني؟ المفروض ان القاعدة اللي فوق دي عشان تامر حسني يعني يا رأفتاني؟ ولا عكس تامر حسني؟ ولا قلشت منك كالعادة؟

:)

Anonymous said...

بص يا فلاتي يا خمورجي يا حشاش يا بتاع النسوان

(بشهادة الحاج ذات نفسه)

شوف يا صايع البحر والجو والفضاء الافتراضي

انت بس تيجي مصر وهنعكشك يا حلو في البوكس من أول ما توصل
وخد يا حلو بذات اليمين وذات اليسار وفين يوجعك لحد ما يبان لك اصحاب
وعلى الإمبراطورية على طول
عند الأخ العقيد عمر باشا القناوي
وده يا حلو ما يعرفش أبوه
يعني لما تصرخ من هنا للصبح
معلش يا باشا الله يكرمك يا باشا مافيش يا امة ارحميني
وعصيان مقشات
وقراطيس كرتون
وكلام وحش أوي
انت بس المهم

هات معاك خرطوشتين تلاتة سجاير إل إم زرقا لسيادة العقيد عمر باشا وسيب الباقي عليا
وكله بثوابه

إنت بتروح جامع إيه ياض انت ياض في نيو يورك؟؟
إوعى يكون الجامع اللي انا برضه كنت باروحه أيام ما كنت هناك
يااااااااه
شوف الدنيا صغيرة ازاي
صحيح كروية كروية
بس ممكن تلفها كلها كدة على بعضها.... في سجارتين

هههههههههههههههههه

We2am said...

ana 7'ayfa 22ol comment fa arkab el box :S
:D
damk sokkar aslan..7aseb l trkb el box 3la r2y epi :D

الأغاني للرأفتاني said...

جرجس المثير للجدل(الحاج جرجس)
انا عامل حسابى يابه
اول مايسألونى بتروح جامع ايه..هاقولهم الجامع اللى جرجس بيروحه..علشان تبقى لمه..هههههههههههه
والحاج العقيد اللواء عمر القناوى..ده اطيب قلب يا عم..طالما فيها ال ام يبقى احنا كده تمام
والله يا جرجس انا ابتديت اعد الايام لحد ميعاد السفر ما يجى علشان اشوفك واشوف الناس كلها

المهجر نور ياريس

الأغاني للرأفتاني said...

وئام
شكرا على ذوقك يا باشا
وعلى اى حال انتى هتركبى البوكس لانك متأخره النهارده

المهم انتى عامله ايه

انحلت سيور العربه وسقط المهر من الاعياء said...

السلا م على من اتبع الهدى


الله عليك يا ض يا رافت ملك الكتا به السا خر ه والكوميكان الذى يخر جنى من حا لة الاحبا ط العا م الى افا ق اكثر رحا به مشحونه بالابتسامه مع تبنيه لقضا يا تشغل با لنا با سلوب ممتع

نبا يعك يا رافت الى يوم القيا مه العصر
اها لى طنطا

عنهم

الحا ج محمد البر لسى
الله ير حمه

الأغاني للرأفتاني said...

جحيم
منور المهجر يا مان
وشكرا ع الكلام الجميل
بمناسبه المبايعه..علقتوا اليفط والاعلام..؟

متناسش الحلاوه الشعر يا حمام..

انحلت سيور العربه وسقط المهر من الاعياء said...

انا مستنى ابر اهيم ينز ل عشا ن متبوظش ومتقلقش
دى اكتر حا جه فى طنطا وسعرها فى متنا ول معدومى الدخل اللى زى حا لتى
ههههههههههههههه

nour said...

ما احنا هنركبه كلنا قريبا ان شاء الله
حلو اوىىىىى

الأغاني للرأفتاني said...

ليه بس كده يا نـــــــــــــــــــور
ما احناكويسين اهو من غير بوكس

شرفتى المطرح

علاء السادس عشر said...

عزيزى رأفت
الحياة فى مصر هى حالة قلق مزمن فليس من الضرورى أن يحدث لك شىء مما ذكرته أنت فى التدوينة ولكن لا يوجد ضمان أن لا يحدث لك شىء مما ذكرته فى التدوينة ,بذلك فالمقيم فى مصر فى حالة قلق يحاول أن يخفيها خلف الضوضاء والسلبية و ...والمقيم فى الخارج يشعر بالقلق ماذا يمكن أن يحدث لأهله وأحبائه فى هذه البلد أو يحدث له إذا عاد لهذا الوطن , هكذا نجح حكام مصر فى الخمسين عام الأخيرة فى سلب مشاعر الأمان من كل مصرى.
تدوينة فى قالب ظريف ولكنها تحمل جرح عميق وحى فى نفس كل مصرى وأنت المسئول إذا ركبونى البوكس بسبب هذا التعليق
تحياتى

الأغاني للرأفتاني said...

ياعلاء
والله من قلبى بجد..نيويورك نورت..وان شاء الله المانيا كمان تكون منوره بيك

احنا كده يا علاء.شعب مكسور الجناج..كل اللى يقدر عليه النكته..
بس الوضع بدأ يتحسن..ان شاء الله فى يوم هنكون زى المانيا ونيويورك
تتكلم براحتك وتمشى براحتك وتلبس براحتك..
بس اللى احنا فيه ده تجربه تعليميه بحته..لان بينى وبينك..احنا كشعب لسه مش مستعدين للحريه اللى زى وزيك مارسها خارج حدود الوطن..
احنا الحريه اللى بنمارسها دلوقت هو الاعتداء على الرآى الاخر بالسبت والقذف والتجريح..

جرجس صاحبى مره علق على موضوع الحجاب عند مدونه اخرى.. والدنيا اتقلبت على جرجس علشان هو مسيحى..مع انه ماقلش حاجه غلط..

بس اليوم الموعود جاى يا مان

نورت المهجر

علاء السادس عشر said...

عزيزى رأفت
عنوانى البريدى كالتالى:
houtos5@web.de
أتمنى دوام التواصل
تحياتى

الأغاني للرأفتاني said...

انا بعت لك ايميل يا علاء
المفروض يكون وصلك..انا عارف ان من نيويورك لالمانيا بعيد شويه بس المفروض يكون وصل

عمر said...

انت كدة حتزعليني منك يا منال... مفيش حد غيرك إزاي يعني؟ أمال أنا بعمل إيه؟؟؟

رأفت: يا عم انت مطنشني ليه كدة؟ تكونش منطهضني؟

الأغاني للرأفتاني said...

منال
ما تقلقيش ياختى ..زى ما الرخم قالك..ما هو قاعد على قلبى زى قالب الطوب..وقاعد يسيح لى فى جميع الدول ومش فارقه معاه عالم اول او تالت
بس فعلا انت واحشنى..انا قلت انك عندك امتحانات

عمر
انت رخم اوى..
وخنقنى ع الاخر فشر احمد نظيف