الحـــــــــرب بين الرجـــــل والمـــــــــــرأه


تنوعت اشكال الحروب بين الرجل والمرأه منذ قديم الازل فقد تفوق الرجل على المرأه من ناحيه الجسد والعضلات ولو أنّى أشك فى ذلك لأن معظم نزلاء قسم الكسور فى القصر العينى من الرجال ولقد تطور هذا العداء ..وبعد ان كانت الحرب بالايد والرجل والساطور والمطواه والجنزير, اصبحت الحرب اعلاميه من المقام الاول وفى الحرب الاعلاميه تفوقت النساء تفوق بالغ ومنقطع النظير بروبوجندا الرجال هى ان معظم النساء ما بيفكروش..وما بيستخدموش عقولهن...ويقال ان لو واحده منهم استخدمت عقلها وفكرت قبل ما تتكلم بتصاب بحاله اعياء وهرش وحساسيه شديده وبتروح للدكتور لمده اسبوع على الاقل وايضا انا اشك فى ذلك لأن معظم نزلاء السرايا الصفراء برده من الرجال المهم , بتطور العصور والقوانين والمحاكم والخلع وخلافه.. اصبحت الحرب بين الجنسين حرب منشورات وتسييح وتهييس على منوال الكلام ليكى يا جاره وخدوهم بالصوت لا يغلبوكم وايضا تفوقت النساء فى حرب المنشورات فمثلا فى الناحيه الرأسماليه حيث الشك فى قدره الرجل الماديه وان الجوازه طلعت فشنك ومقلب , نجد هذه المنشورات القيّمه التى تعطى عبره وموعظه لبنات الجيل الجديد اللى بيدورو على شباب النيولوك يا واخده القرد على ماله...يغور المال ويبقى القرد على حاله ايش ياخد الريح من البلاط يا جاريه اطبخى ....يا سيدى كلّف جبتك يا عبد المعين تعينى ....لقيتك يا عبد المعين عاوز تتعان وفى منشور بديع عن عدم الثقه وان الرجال كلهم واساخ ومعندهمش اصل ببصله يا مآمنه للرجال ....يا مآمنه للميه فى الغربال قصقصى ريش طيرك...قبل ما يلوف على غيرك من بره هالله هالله...ومن جوه يعلم الله ديل الكلب عمره مايتعدل ...ولو علقوا فيه قالب فى حزنهم مدعيه...وفى فرحهم منسيه
وفى منشور آخر عن الملل العاطفى وان الرجال دول ايدك منهم والارض وان الشنبات دى منظر فقط وان نص المرتب ضايع على الفياجرا والافيـــــــــــــــــون لولا جارتى ...كانت اتفقعت مرارتى يا قلبى يا ابو اكتاكت ... يا ماانت شايل وساكت بنا لى فى الخطوبه مسطبه....وفى الجواز بلحه معطبه لبست لك الاحمر والشفتشى... وانت زى البنات بتختشى
وعند سؤال الرجال عن هذا الضعف المهين ولماذا السكوت على هذا الوضع...نجد هذه المنشورات العبيطه
ما باليد ...حيله علشان الورد .... ينسقى العوليئ اللى يخاف من العفريت ..يطلع له العشره ما بتهونش ...غير على ابن الحرام اللى ليه ظهر ... ما ينضربش على بطنه اللى مش عايز وجهه النهارده.... بكره تحتاج لقفاه وعليه العوض ومنه العوض...وحسبـــــــــى الله فى النسوان جميعا
وعلى راى الراجل العبيط بتــاع مدونــــه مصر الجديده وشفافيـــه الحزب الوطنى: فهل بعد هذه الادله, ادله اخرى..عزيزى القارئ

45 comments:

عمر said...

صباحو... إيه رأيك في الكومنت اللي في الصباح الباكر دة؟

يا باشا طول عمر الرجالة غلبانين وواخدين علي دماغهم
:)

عايزين نعمل حركة "تمكين الراجل" ونقاوم المجتمع الأنثوي الحلزوني الإمبريالي

الأغاني للرأفتاني said...

صباح الفل يا عمر

حركه تمكين الراجل حل مش بطال..وممكن نعين يعض الحريم..المتمرد علشان يألفوا لنا شويه منشورات..
حلوه حكايه الحلزونى الامبريالى دى..
اخوك عربى لغه تانيه يا عمر

^ H@fSS@^ said...

صباح الخير يا رافت
شوف هو زي ما في رجالة عاوزة الخنق في كمان ستات عاوزة الحرق
بس مينفعش تعمم حكاية الحلزونية الامبريالية دي عالكل
و لا ايه بالظبط؟

الأغاني للرأفتاني said...

اهلا حفصه
انت بجد فهمتى الحلزونيه الامبرياليه بتاعه عمر دى؟
والله ما انا فاهم يعنى ايه..
هو عمر كده بيجى يعكر القعده ويمشى..

لا فى تعمبم ولا حاجه..فى نسوان عاوزه الولعه بجاز وسخ..وفى رجاله عاوزين الحرق بورق لحمه

عمر said...

أنا مش فاهم انتو ليه مصرين علي التفريق؟

ليه الرجالة عايزة الخنق والستات الحرق؟ وليه الستات جاز والرجالة ورق لحمة؟ عشان تعرفه ان عندي حق اقول انه حقا مجتمع تعسفي متقوقع

الأغاني للرأفتاني said...

ولاه يا عمر..ماتجيش هنا تانى
انت ايه ظروفك معايا بالظبط..
شويه تقولى حلزونى امبريالى..ودلوقت تقولى قوقعى تعسفى...
انت تجنيت بابنى ولا ايه..
انت مفكر نفسك فى الاوبرا ولا برنامج امانى واغانـــــــــى

باقولك عربـى لغه تانيه يا عم الحاج

عمر said...

ماشي يا عم جيمس.. انت حتعملي فيها أمريكاني ياض؟ أحييييه! خد بالك أنا عندي عرق اسكندراني برده.. وشيلوه من فوقي لأموته

عمر said...

لا مؤاخذة.. قصدي شيلوه من فوقي لنموتووووه

:)

الأغاني للرأفتاني said...

اتلزق بأه فى اسكندريـه
كل واحد اكلمه يقول لى انا عم خال جد ابو والد خطبيب جوز مرات ابويا من اسكندريه..

ولا جيمس ولا نيله... يعنى بزمتك انت امبريالى قوقعى تعسفى حلزونى دى عربــى

انحلت سيور العربه وسقط المهر من الاعياء said...

ههههههههههه
رائع كا لعا ده يخرب بيت عقلك
انته اتعلمت الكلام ده فين؟
فيه كما ن مثل عن العلاقه الوثيقه بين توجها ت البنت الحلزونيه الامبريا ليه الر اسما ليه والست ولدتها يقو ل المثل
اقلب الكدره على فو مها تتطلع البنت لامها
تحيا تى
يا نسينى

عمر said...

شوف.. اهه عمك جحيم قاللك امبريالي رأسمالي اهه.. عشان تعرف ان دي لغة دارجة.. يا متقوقع

الأغاني للرأفتاني said...

جحيم..
دلوقت احنا بأه عندنا
حلزونى امبريالى قوقعى تعسفى راسمالى.. علشان انت وعمر ترتاحوا

حلو المنشــور بتاع القدره ده...
ده برده رد ضعبف من ردود الرجاله

انحلت سيور العربه وسقط المهر من الاعياء said...

انا متفق مع عمر فى عمل جبهه ضد الطغيا ن النسوى الر اسما لى منزوع الدسم والعو اطف الذين لايؤمنون غير بالر اجل ابو جيب مليا ن
ويرفعون منشور عنو انه
لو معا ك فلوس خش واسلم
ولو معكش فلوس اقعد على السلم
اه رليك فى المنشو ر ده
يا ض

عمر said...

أنا حاقترح أول شعار لحملة تمكين الراجل

لا للمخدة.. لا للمقشة
حقعد قالقهوة.. وحبيض في العشة

إية رأيكو؟ حلوة؟

الأغاني للرأفتاني said...

تسلم ياعمر
اهو دا الكــــــــــــلام والا بلاش

لا للمخده...
يا سلام....والله انا عنيه كانت هتدمع م الفرحه

احه بجد

الأغاني للرأفتاني said...

Epitaph
yes it is MEN's emancipation
and as you see from the Women Manshoorat, it is very clear that all men are innocent
مكســوريـن الجناح

^ H@fSS@^ said...

والله انتوا صعبانيين عليا

ليه متعملوش مدونة و تسموها صوته او صوتنا اتنبح و احنا برضة نساعدكم فيها و نشهد انكوا رجالة كويسة؟

Ma 3lina said...

loooooool

حلو شعار المخدة و القهوة دة بس ده قديم اوى ما انتم قاعدين طول النهار فى القهوة و مريحنا قصدى اقول ان........

هوه ايه حكاية المجتمع الأنثوي الحلزوني الإمبريالي

طيب امبريالى و تقريبا عارفاها بس اشمعنى يعنى حلزونى دونا عن بقية الاشكال الهندسية؟؟

حلوة تجميعة الامثال الشعبية ديه بس ديه وصلتلك ازاى امريكا ولا نقشتها من على نتايج السنة الجديدة ؟؟؟

الأغاني للرأفتاني said...

ما علينا
شكرا ع الزياره وشكرا على سؤالك على موضوع الحلزونى ده..لان انا اصلا مش فاهمه..بس عمر ضاحبى ده بيجى يرمى بلاه من بوسطــن عندى فى نيويورك ويلخبط القراء بكلام معوج زيه كده..

الامثال الشعبيه دى موجوده فى امريكا برده..بس شاحه شويه ..اينعم الواحد بحث ودور شويه لحد ما وجدتهم

الأغاني للرأفتاني said...

حفــصه
ما يصعبش عليكى غالى يا ختى..انت جايه تسخرى من الشباب المكافح ده..وعاوزه تدبسينا فى مدونه للرجاله وهووووب تبيعونا كلكم ببلاش

احنا خطوه خطوه كده مع عمر و جحيم لحد ما نشوف اخرتها ايه

ان شاء الله اسود من قرن الخروب

عمر said...

ربنا يكرمك يا حفصة يا أختي... ربنا ما يغلبلك راجل... واهو برده اللي ييجي عالرجالة ما يكسبش

يا لااااااااااااهوي

الأغاني للرأفتاني said...

إمســــح دموعـــــــك يا عمــــر
ههههههههههههههههه
تصدق انت راجل مسخره

الأغاني للرأفتاني said...

اهلا اهلا يا منـــال
عاش من شافك..انا يا ستى فى امريكا المحطه..وبعديــن ايــه العيب انـى اعرف وافهـــم جذورى..

وحلو اوى موضوع المشــروطى والانبعجاجى والاستــرقاء والكلام الفاضى بتاعك انت وعمر ده

على النعمه الكلام ده ما هو عربــى وانا عندى قاموس عربـى فى البيـت..وهاروح ابحث عن الهجص اللى انتو كاتبينه ده..
شكلكم بتشتغلونــى

عمر said...

ما علينا ورأفت

يخوانا مفهوم الحلزونية واضح زي الشمس.. دي إشارة رمزية إلي سلم الخدم اللي الراجل بيتسلقه يوميا علشان يرمي الزبالة، وعادة يتخذ الشكل الحلزوني، ولذلك فهو كناية عن تحكم المرأة وتعسفها

وإذا كانت هناك سلالم مستطيلة أو مربعة مثلا.. فانا بقي ماليش دعوة

الزعيـمة said...

الاخ المجاهد مهاجر مصري

حساك وانت بتكتب البوست دا جايب ازازة زيت من بتاع التموين وحاطط ايدك على خدك ومولع سجارة وجنبك تل من شكاوي الرجال على ظلم المراة والاضطهاد والفوقية والفصل التعسفي

الحقيقة ان مجتمعنا بيعيش ثقافة ذكورية مزدوجه متدنية على الاخر

انت كنت شجاع لما اعترفت بنجاح المراة فى كل الحروب القامت بينها وبين الرجل لاثبات نظرية البقاء للاقوي

ثم بعد ذلك تجد المرأة ورغم فوزها تجعل الرجل يعيش معها ويربي اولادها ويعكنن على حياتها ويتأمر ويتكلم وياخد وضع جامد اوى رغم انهزامة الكلى والجزئي

دا تفسرة باية ؟

هو ملوش بصراحه غير تفسير واحد بس وهو ان المرأة انسانة اصيلة وحكيمة تدرك ان من مكارم الاخلاق العفو عند المقدرة

دا حتى المراة وصلت شهامتها لحد ان فى اصعب لحظات خيانة الرجل لها ممكن تغفر وتسامح اما هو لو مجرد شك يقلب الدنيا راس على عقب

بجد المرأة ارقي مخلوق فى البشرية وتستحق اعتلاء عرش الانسانية

ربنا برضة بيجازي كل واحد على اد نيتة وضميرة

الأغاني للرأفتاني said...

شكــرا يا عمـــــــــــــر
على تفســـير الموضوع الحلزونــى اللى انت دبستنا فيه..وهو فعلا تفسير قيم جدا
والله انا ما انا عارف احنا من غيرك كنا عملنا ايه

الأغاني للرأفتاني said...

الزعيــــــــــــــــمه
ايه حكايه مجهاد دى يا ختى..وانا زعلتك فى حاجه..
موتينى م الضحك على موضوع زيت التموين السيجاره دى..

وايه حكايه الفصل التعسفى والاضطهاد الطبفى...

انا مش عارف اذا كنت انت بتهزرى ولا بتتكلمى بجد..الظاهر انك ماقريتش البوست..

ع العمــوم انت نورتــى المهجر كالعاده

Anonymous said...

ههههههههههههه
الله يخرب عقلك
الأمثولات اللى انت قلتها بروليتاريا طحن
يعنى من بتوع ستى وستك والناس اللى تحت

انت بجد فى المهجر يا رأفت ولا بتشتغلنا؟
نياااااهااااااا

=======

شوف يا أفت يا ابنى
لا الراجل يقدر يستغنى عن الست
ولا الست تقدر تستغنى عن ضوفر الراجل
يا ابنى أنا واحدة صاحبة مبدأ رغم تفوقنا الملحوظ على لارجل فى كل حاجة ودة مش محتاج مناقشة ولا مؤاخذة يعنى

مبدأى هو
الرجالة نعمة
واللى يكرهها يعمى

اصلى بينى وبينك كدة باموا فى صنف حنفى دة

نيااااهااااااا

الأغاني للرأفتاني said...

اهـــلا يا شهـــروزه
ايه الاخبار..
ما انا قلت لكم ان انا فى امريــكا المحطه..
بس ايه رأيك فى شويه الامثال دول...تمام

وبعدين سيبك من الكلام الناعم بتاع ان الرجاله ما تقدرش تستغنى عن الحريم..
لأ يا ختى
احنا بعــون الله نستغنى عن الهوا كمان واللى ليه شوق فى حاجه يجى يورينا والميدان واسع وفارس لفارس

Yasmine Adel Fouad said...

رأفت حالتك صعبة جدا بس ماتخافش مالهاش علاج

نفسى اعرف انت ساكن فى بولاق نيويورك و للا ايه العامية بتاعتك بتتطور و انت بره ده المصرى جامد قوى ياجدعان

وانت فرحان ان عمر بيقول هيبيض فى العشة ياعينى يا زمن


بس انت نسيت مثل مهم جدا يا برنس برة جوة فرشتلك وانت مايل و ايه يعدلك و عجبى

بس لو ع الكلام بج فى رجالة بتجيبة لنفسها و الراجل اللى يقبل يبقى هفية من مراته و تقفله بالمقشة يستاهل لان لا دول ستات و لا دول رجالة و رقصنى يا جدع

الأغاني للرأفتاني said...

انـا حره(ياسمين)
والله العظيم انا شهر 8 اللى فات انا ما كنت اعرف نص الكلام العربى ده..بس بأه اصحاب السوء والاغانى الهابطه..

المثل اللى انتى قولتيه..كمالته بتاعه ديل الكلب المعوج اللى انا كاتبه يا اختى..

وتصدقى بالله انا مت على نفس م الضحك لما قريت ورقصنى يا جدع..

الناس اللى معايا فى الشغل افتكرنى اتهبلت..

عمر said...

قامت الزميلة أنا حرة بالاعتراض علي شعارنا السلمي الانتاجي الخاص بالبيض في العشة وأمام هذه الهجمة الشرسة قررنا نحن الحركة الشعبية لتمكين الراجل ("مكانش العشم") العمل علي رد هذا الهجوم عن طريق تغيير الشعار فورا وإليكم الشعار الجديد

كلا كلا.. لغسل الحلة
ومسح الأرض.. وكسر القلة

باي باي يا فلة

MAKSOFA said...

كده برضه يامهاجر الله يسامحك

اولا قد يكون الرجل اقوي من المرأه جسديا بالعضلات فقط لكن العلم بيقول أنها الأقوي بالهرمونات التي تجعلها تحبل وتلد وتتحمل الام الولاده التي لايمكن ان يتحملها الرجل

وأخيرا المرأه أيضا تستعمل عضلاتها وتضرب الرجال
وتقتلهم وتعبيهم في اكياس سوداء
وحقوق النشر محفوظه للمرأه المصريه السباقه في هذا المجال

وبعدين علميا ايضا ان مخ الرجل والمرأه متساويان في الحجم اذن لافرق بينهما
وعلي العكس مما تقول فالمراه أكثر كاء ودهاء عن الرجل بدليل أن الله سبحانه
وتعالي قال


كيدهن لعظيم

واذا كانت مستشفي المجانين معظمها من الرجال
فده من اعمالهم سلط عليهم
وبدليل برضه ان مخهم لاسع


اما بعد ان طغت الماده علي العصر لم يعد الحب فقط هو الذي بسيطر علي العلاقات بين الجنسين وحكايه الواد الوسيم الفقير دي معدتش تناسب العصر
وماتأكلش عيش
لأن مراته المغرمه بيه
حاتشوفه قرد بجد لما ماتلاقيش تاكل
والقرد لم يعد قردا في عصر تطور جراحات التجميل
واللي معاه فلوس ممكن يتحول من قرد الي قمر 14




اما بقي كلهم اوساخ
واندال ده وراد جدا

وحكايه قصصي ريشه
بيعملها رجل هذا العصر اللي عايش عاله علي مراته
وبيعتبرها دفتر الشيكات بتاعته

ومع تحياتي يامهاجر

الأغاني للرأفتاني said...

مكســــــــــــــــوفه
ايـــوووووه...دا انتى قلبك اسود بشكل..انت شردتى لنا تشريد ماحصلش..

يعنى م الاخر كده كل حاجه بتحصل للرجاله , دى حاجه منظقيه...

ماشى يا مكسوفه احنا وانتم الزمن طويل

نورتى المهجر

Yasmine Adel Fouad said...

انت هتقولى
المصرى لو معملش واجب مع صاحبه المصرى المتغرب يبقى عيبة فى حقه
و اديك مش ناقصك حاجة
و بتعوض كل اللى بيفوتك و انت متغرب يا ولداه

و بخصوص بقى زمايلك فى الشغل
قولهم بننظم عملية ارهابية كوميدية

Yasmine Adel Fouad said...

عمر باشا

انا حرة يابابا و من حقى اعترض اعتراض صميم ميم ميم براحتشى يعنى

عموما احنا هنعمل هجمة مرتدة و نخللى شعارها

لو كنت ناسى أفكرك
انت نسيت أصلك يا حلاوة
ده انت حفيت علشان تتجوز
و بعد العمر ده جاى تقولى
كلا كلا لغسل الحلة
طيب يللا بقى ورينى
ياما تنضف كل الشقة
ياما بعقلك تطلع برة


الله عليا
شكل ليا مستقبل

الأغاني للرأفتاني said...

ياللا يا عم عمـــر
انت فتحت على نفسك طاقه جهنــــم
انا حره طلعت دكتــوره من المدبح

Yasmine Adel Fouad said...

انت بتعايب على بتوع المدبح
دول احسن ناس
دول بياكلوا لحمة كل يوم يا عم
دول هيجيلهم نقرش
انت عندك زيه

عمر said...

تقرر تجميد نشاط حركة تطوير الدكر لأجل غير مسمي

الأغاني للرأفتاني said...

قــرار صائب يا عمــر
احنا مش قد الناس دى

إيمــــان ســعد said...

ايه النظام السلطوي الشمولي في الحكم ده

قال يعني الحملان الوديعة و احنا

الساحرات الشريرات

:)

الا بما انى صيدلانية محدش جابلى سيرة الاسهال و الهرش اللى بيجيي للستات اللى بيفكروا

عشان بس نقدر نفيد

و نستفيد برضه

:)

تحياتي

الأغاني للرأفتاني said...

خلاص يا بنت سعـــــــــد
حصل خيـــر
عمر اعترف بخطأه وكفينا ع الخير مجور

احنا صنف الرجاله ده دون وما بيفهمش

الزعيـمة said...

بالعكس يا مهاجر انا قريتة كويس جدا

بس كنت بهزر بس

We2am said...

dah kalam kber awe 3aleko ya gd3an..la7zo en elmdwnat malyana mozz..opps..7arem..opps..neswan ya3nii :D w hay2t3oko..dah 3'er en el7agat deh bte7sal 3ady gedan :D

الأغاني للرأفتاني said...

خلاص يا وئــــــــــام
احنا اعترفنا بالهزيمه فى موضوع الحريم ده.. وكفينا عليه ماجور
ومفيش داعى لفتح الجراح
وتكبى جاز وسخ على النار