Sunday, September 23, 2007

مطار القاهره و مصر للطيران والحمّام بتاع مطار برشلونه

مطار القاهره الدولى اشبه بالوسيه او العزبه اللى ملهاش صاحب. وفى مواسم السفر والاجازات بيكون مثل حديقه الحيوانات او مولد المرسى ابو العباس. اللافتات اللى فى المطار معموله علشان تلخبط الناس واللى رحلته فى المطار القديم هيلاقيها طالعه من المطار الجديد واللى رحلته طالعه من المطار الجديد هيلاقيها طالعه من برج العرب او السلوم. ولا ادرى الحكمه فى مطار قديم ومطار جديد وازاى مطار عاصمه دوله فى 80 مليون بنى آدم يكون بالطريقه دى. ما عليك من التناحه بتاعه العاملين فى المطار وكل امين شرطه منهم مفكر نفسه زكى بدر او الزينى بركات. ولا ادرى ما الحكمه فى ان امناء الشرطه وضباط الجوازات كلهم بيلبسوا زى عسكرى اسود يثير الرعب فى قلب كل مسافر. وعلاقه امناء الشرطه وضباط الجوزات باللغه الانجليزيه عامله كعلاقه ام على بتاعه الجرايد بالكمياء النوويه وابحاث الفضاء. فضايح..تلاقى الشحط من دول قاعد فى الكشك الزجاج وقاعد يشوح بايده للسياح والمسافرين زى الصم والبكم فى برنامج القلوب
الرحيمه

لو حظك اسود تكون حاجز على خطوط مصر للطيران اللى عامله زى اتوبيس غرب الدلتا . وبرده المضيفات والمضيفين معوجين عواجان لا مثيل له وكلهم طبعا شغالين بواسطه فى العزبه. اتذكر ان فى احدى الرحلات التعيسه على خطوط مصر للطيران اتلطعنا فى ممر الاقلاع بتاع ساعه وفى واحده ست كبيره فى السن عاوزه شويه ميه علشان تاخد برشامه السكر فسألت شحط من المضيفين فقالها انه ممنوع اى مشروبات لحد الاقلاع . والست الكبيره مفرهده على الاخر وجالها كرشه نفس. فراح واحد من الركاب ساخن على المضيف الشحط وقام هذا الراكب وراح بنفسه جاب للست الميه علشان تاخد البرشامه

وفى احدى الرحلات السعيده فى طريقى لالمانيا على خطوط لوفتهانزا كان فى طفل قاعد جنبى هو وامه. وطلب الطفل من المضيفه الالمانيه قطعه شيكولاته كانوا بيوزعوها دايما على الخطوط الالمانيه وبعد دقائق رجعت المضيفه وكلها أسف تعتذر لهذا الطفل عن عدم وجود الشيكولاته اللى هو طلبها واحضرت له بتاع 15 نوع آخر من الشيكولاته واللعب والكتب. وبعد عشر دقايق حضرت كبيره المضيفات تعتذر للطفل عن عدم وجود نوع الشيكولاته المطلوب. وكل عشر دقايق مضيف او مضيفه يجى يسأل الطفل لو محتاج حاجه تانيه. وبعد وصولنا لفرانكفورت الكابتن بتاع الطياره استنى الطفل على باب الخروج واعتذر له وعرض على الطفل انه يجى يلعب فى كبينه الطيار شويه. وفرح الطفل ودخل الكبينه وامه قعدت تصور فيه. شوفتوا الخدمه عامله ازاى يا بهايم مصر للطيران

المهم فى الرحله الاخيره بعد معاناتى فى مطار القاهره وصلت برشلونه اسبانيا واجراءات دخولى برشلونه ما اخدتش اكثر من 5 دقايق ولما دخلت الحمام فى المطار عنيه كانت هتدمع من الفرحه من نظافه الحمام اللى كان عامل زى مدخل وزاره الخارجيه فى مصر. والحمام كان فاضى مفيهوش واحد واقف على الباب عاوز بقشيش. طلعت من الحمام احمد ربنا واشكره على اختراع الطياره اللى خلانى اشوف مطارات تانيه غير مطار القاهره القديم والجديد والمايل والمعدول

Sunday, September 16, 2007

خليك سيئ الظن

لى صديق يقول لى دائما - خليك سيئ الظن


اقوله ازاى يعنى


..قال لى مش فى القانون بيقولو ان المتهم برئ حتى تثبت ادانته؟


قولت له ايوه


قالى خلى مبدأك ان الجميع مذنبون حتى يثبتوا العكس. بالطريقه دى عمرك ما هاتزعل لما تلاقى واحد واطى لكنك هتفرح لما تلاقى واحد مش واطى


وفى ا مريكا احنا هنا دايما بنقولو


have low expectations


يعنى ما تتعشمش قوى علشان لو العمليه طلعت على فاشوش تكون انت مستعد مسبقا

Wednesday, September 12, 2007

اهـــــــلا بالرذيله

بعد سنوات من الفضيله ومحاوله مسايره الركب السوى.. تتغير الروح وتسعى الى كل ماهو ممنوع . الان اصبح مرغوب ومطلوب
خمور..مخدرات.. نساء من كل صنف ولون ..انه الانتحار من غير كلمه انتحار.. انه الهروب ممن كان يحب من غير الاختفاء والالتواء . فلقد . جربت الروح الرقى و الايمان والسكن فى الصروح والآن آن الوقت للعيش فى الواقع ومضاجعه الحقيقه..فالكل سواء وغدا سوف يكون على شابه الامس

Thursday, September 06, 2007

احــــــــــزان

(1)
حزينه المدينه والشوارع والبيوت
حتى شمس الصبح غابت
وبحرى ساكت مش سامع له صوت

****
(2)
حزن قلبى جرحـــه اكبــــر م الدموع
دا اللى راح مش جاى تانى مفيش رجوع

****
(3)
جوه قلبى الحزن ساكن نفسه يطلع
وعينى جفّت نفسى اغلط مره وادمع
بأبكى ساكت وبرده خايف حد يسمع

***
(4)
م النهارده مش هأكون زى اللى فات
م النهارده هأعيش واموت ع الذكريات
م النهارده ايام تعدى وفرحى مــــات

****
(5)
تسوى ايه الدنيا بعدك..مش هتسوى
فرح..حزن..عذاب.. دموع ولا قسوه
مش هاخاف من برد ليلها ووحدته
ومش هاحس بنور نهارها وزهوته
زى ريشه فى الهوى مش لاقيه مرسى

****
(6)
آه ياويلى م اللى راح وم اللى جاى
تاه دليلى دا اللى غاب ملهوش زى
حالى اصبح كالعيون ملهومش ضى
****
(7)
هاخسر ايه فى الدنيا تانــــى
ايه هيحصل لوكرهت فى يوم زمانى
او اكون انسان كويس او وحش
وانتهازى واكــــــــــــــون انانى؟؟

****



الاسكندريه فى 19 اغسطس 2007