احــــــــــزان

(1)
حزينه المدينه والشوارع والبيوت
حتى شمس الصبح غابت
وبحرى ساكت مش سامع له صوت

****
(2)
حزن قلبى جرحـــه اكبــــر م الدموع
دا اللى راح مش جاى تانى مفيش رجوع

****
(3)
جوه قلبى الحزن ساكن نفسه يطلع
وعينى جفّت نفسى اغلط مره وادمع
بأبكى ساكت وبرده خايف حد يسمع

***
(4)
م النهارده مش هأكون زى اللى فات
م النهارده هأعيش واموت ع الذكريات
م النهارده ايام تعدى وفرحى مــــات

****
(5)
تسوى ايه الدنيا بعدك..مش هتسوى
فرح..حزن..عذاب.. دموع ولا قسوه
مش هاخاف من برد ليلها ووحدته
ومش هاحس بنور نهارها وزهوته
زى ريشه فى الهوى مش لاقيه مرسى

****
(6)
آه ياويلى م اللى راح وم اللى جاى
تاه دليلى دا اللى غاب ملهوش زى
حالى اصبح كالعيون ملهومش ضى
****
(7)
هاخسر ايه فى الدنيا تانــــى
ايه هيحصل لوكرهت فى يوم زمانى
او اكون انسان كويس او وحش
وانتهازى واكــــــــــــــون انانى؟؟

****



الاسكندريه فى 19 اغسطس 2007

7 comments:

مجهول said...

لو مقدرتش تضحك ... متدمعش ... ولا تبكيش
و إن مفضلش معاك غير قلبك .. أوعي تخاف .. مش هتموت .. هتعيش
و إن سألوك الناس عن ضي جوه عيونك ... مبيلمعش .. متخبيش
مسير الضي لوحده هيلمع .. مسير الضحك لوحده هيطلع
مابيجرحش .. و لا يأذيش
..................
مش عارف اقولك حاجة تانيه يا رأفت
إحساسك صعب ومؤلم لكنها الحياة

فإصبر و احتسب وكن من المبشرين بما وعد الحق
..............
رائعة كلماتك متناغمة حزينة
لا اراها شعرا
بل رسما ترسم بها داخلك وقلبك
فخرجت منك وسكنت في قلوب غيرك


اعانك الله دوما واعلم ان هناك دائما يوم جديد
..............
هاخسر ايه فى الدنيا تانــــى
ايه هيحصل لوكرهت فى يوم زمانى
او اكون انسان كويس او وحش
وانتهازى واكــــــــــــــون انانى؟؟


تخسر نفسك لو سلمت

انحلت سيور العربه وسقط المهر من الاعياء said...

السلام عليكم

احساس مرير

ياصديق ربنا يتغمده بالرحمه ويلهمكم الصبر والسلوان

فريدة... said...

اسال الله العظيم ان يرحمه وجميع موت المسلمين

وان يرزقكم الصبر والثواب

اخي احتسب اجرك عند الله

وانا مع مجهول اقول لك

تخسر نفسك لو سلمت

الأغاني للرأفتاني said...

مجهـول
شكرا على تواصلك الدائم..طلبت منك الايميل فى تلعيق سابق ولكنك ترغب فى ان تكون صاحب اليد العليا فى السؤال عنى دائما
لو خسرت نفسى ايه يعنى اللى هيحصل ولا حاجه..ما انا من زمان وانا كسبان نفسى وناس كثير..اخدت ايه ؟؟ ولا حاجه برده

=================
محمــد
آمين
انت عامل ايه
================
فــريده
اخبارك ايه
خساره خساره..مش هتفرق حاجه..
كل سنه وانت طيبه

Iskanderani said...

عزيزي رأفت؛

انالله وانا له لراجعون
تقبل عزائي وربنا يرحمه ويصبرك انت والعائلة الكريمة

تحيات إسكندراني في بلاد الله الواسعة

Anonymous said...

ya Raafat,

Rabbena ye2awik we yesabarak. Enta hena wala fi Alexandria?

Tameni 3alek.

Omar

الأغاني للرأفتاني said...

استاذ ممدوح
الله يخليك

عمر
فى برشلونه طريقى لنيويورك