Sunday, October 28, 2007

شمس النهار

(1)

شمس النهار زغدت ظلام الليل
وقالت قوم كفــــــــــــــــــــــــايه
جايبه الدفا ويّا الامــــــــــــــــان
والخيـــــــــــــــــــــــــر معــــايـا
*****
(2)
عطر الزهور من يمينى فى صف واقف
وغنى البلابل عن شمالى بصوته حالف
ما يخلى خلق من الخلايق قلبه خايف
*****
(3)
يالا بقى اصحى وقوم خلينى آخد مطرحى
وخُد معاك كل الهموم ويا دنيا قومى وصحصحى
*****
(4)
ونسيت اقول: تاخد شتاك ويّا الغـيــــــــــــــــوم
اصل النهارده يوم جميل والقلب مش محتاج هموم
*****
(5)
ياقلوب يا عاشقــــــــــــه ومغرمه من عمر عدى
قــــــطر السـنين عــــفّر ترابه وجِــــه وهدّى
اصـــــــــــــحوا لهواكم دا الظلام روّح وعدى
*****
حاله فريده
نيويورك فى 5 اغسطس 2007

Saturday, October 20, 2007

بــأمر الدكتــــور

ممنوع السجاير

ممنوع القهوه

ممنوع الشاى

ضحكت بداخلى وسخرت من علمه وشهاداته

فتلك هى هواياتى فكيف اعزف عنها

سألت سؤال خبيث وقولت له يا دكتور اشرب عصير ليمون وبرتقال

قالى آه ده يبقى كويس خالص

شكرته ومشيت بسرعه لا يقولى ابقى اشرب عسل نحل ولبن دافى

Wednesday, October 17, 2007

ريحه الحبايـــب

(1)
هفت علىّ ريحه من ريحه الحبايب
رسمت شفايفى ابتسامه قلب دايب
قعدت افكر فى اللى قلبى حبهم
وسألت نفسى عن اللى راح
وعلى اللى غـــــــــايب
*****
(2)
لمسه ايدين..ضحـــكه عنين
بترجعك عشــــــــــــرين سنه
بنت الجيران ..صُحبه زمان
وأيــام بريئه ملــــــــــــــــــونه
*****
(3)
ايه اللى غير كل حاجه فى يوم وليله
فرحه سنينا اصبحت ايام قليله
وبقينا كالطير فى السما مابيده حيله
غير زى مالريح يؤمره يرتاح له ليله
*****
نيويورك فى 1 اكتوبر 2007

Tuesday, October 16, 2007

يارب البحر ينشف

يارب
بقدرتك ياقادر
تنشف بحر اسكندريه وتخليه صحراء جرداء لازرع فيها ولاماع
علشان ترحمنا من الدخلاء اللى بيحتلوا البلد كل صيف وبيملوا كل رصيف
دول دلوقتى اتعلموا يحبوا البحر فى الشتا زينا
يعنى لا طايلنها صيف ولا شتى
انك على كل شئ قدير
االهم آمين

Thursday, October 11, 2007

كــــل سنه وانت طيبين




وحى الكلمات

طول عمرى وانا اكره الاذاعه المدرسيه وطابور الصباح وموتى وسمى لما المدرس يقولى قوم اقرا قصيده او نشيد فى الفصل. وعلى رغم من تعلقى بالموسيقى الغربيه فى ايام ثانوى الا انى كنت اعشق الشعر العربى وكنت دايما اجيب درجات عاليه فى اللغه العربيه. كنت شغوف باحمد رامى وبيرم التونسى وسيد درويش واكره عبد الوهاب واحمد شوقى. بيرم التونسى خلانى احب الزجل وكتابه الاغنيه. وشوقى كرهنى فى شعر الفصحى وقوافيه. بدأت اكتب اغانى بسيطه واروح اقارنها باغانى بيرم وعاميه احمد رامى واموت على نفسى من الضحك. وقريت مره ان احمد شوقى زعل من احمد رامى لما بدأ يكتب لام كلثوم اغانى بالعاميه. وشوقى قال والله انى لاخاف على اللغه العربيه من عاميه رامى. قولت لنفسى تعالى يا عم شوقى وانا اجيب لك ازمه قلبيه. وفى احدى الايام اعلنت المدرسه عن مسابقه للزجل وللشعر. روحت وسألت الاستاذ عن شروط مسابقه الزجل واذا كان المتسابق هيقرأ ما كتبه اما م جمع من الناس؟ ام هيقدم كتاباته فى ورقه؟ اجاب الاستاذ المتسابق هيقدم كتاباته للجنه الادب بالمدرسه وان الاغنيه اللى هتفوز سوف تمثل المدرسه فى مسابقه الاداره التعليميه. حمدت ربنا لانى مستحيل اقرأ اى شئ امام حد ولو ولعونى بجاز مش هاقف اقرا اغنيه انا كاتبها امام لجنه. تقدمت للمسابقه باغنيه اسمها لو شوفتوا اسكندريه ده مطلعها

لوشوفتوا اسكندريه وجمال اسكندريه
والشمس ياناس بتحضن هواها المغربيه
هتقولوا عندى حق ادوب واعشق وارق
ماهو اصل اسكندريه ام المدن بحق

وفازت اغيتى بالمركز الاول على المدرسه والاداره التعليميه. وكانت مفاجأه للجميع خصوصا مدرس العربى بتاعى اللى كان دايما يقولى يا خواجه نظرا لكثره سماعى الاغانى الغربيه. بعد الفوز بهذه المسابقه اتشجعت للكتابه ودخلت مسابقات تانيه كتير باغانى مختلفه على حسب نوع المسابقه . والسنه الوحيده اللى قضتها فى الجامعه فى مصر كنت باكتب اغانى لكورال الجامعه. وفى الايام دى بس حسيت واتعلمت فعلا ان فى حاجه فى الشعر اسمها الهام. وانا دايما كنت اسخر من اللى بيقول لما الوحى ينزل عليه والكلام الفاضى ده. فى اغانى الكورال كان مدير الكورال يجى يقولى عوزين نكتب اغنيه عن كذا كذا وياريت تكون جاهزه بكره او بعد بكره. والحق اقول ان اكتب المطلع
ومستحيل الاغنيه اللى هو طالبها تخلص..الكلام بيطير. وفى اغانى انا كاتب مطلعها من 7 سنين وخلاص مش راضيه تتكمل واغانى تانيه بتنكتب فى 10 دقايق لما الوحى اللى انا كنت باسخر منه يكون موجود. اعتقد ان وحى الكتابه فعلا موجود وان كتابه الاغنيه او كتابه اى شئ ما هى الا حاله بتستفزك للتعبير عن هذه الحاله بكلمات وحروف

Sunday, October 07, 2007

زاهى محتاس



فى حوار له مع مجله كوندى ناست ترافلر المتخصصه فى السياحه والسفر زاهى حواس جه يكحلها عماها. زاهى حواس هو رئيس المجلس الاعلى للاثار فى مصر ويعتبر اشهر واحد فى علم دراسه المصريات بعد العالم الانجليزى هاورد كارتر. المهم ان عم حواس فى رده على بعض الاسئله لخبط الدنيا خالص واتهم وزاره السياحه انها مش فاهمه قيمه مصر السياحيه ولو انى اتفق معاه فى هذه النقطه. الاجابه اللى زعلت منه الناس هو رده على السؤال ان مصر استقبلت السنه اللى فاتت 9 مليون سايح وده رقم قياسى؟ عمك زاهى قال ايه

قال : انه كان يتمنى ان مصر تستقبل 4.5 مليون سايح اغنياء!!! وطلب من وزاره السياحه انها تغلى اسعار الفنادق والمتاحف واضاف ان فى بعض المجموعات السياحيه بتصرف فقط الف دولار فى الرحله وهذه النوعيه من السياح المفروض يقعدوا فى بلادهم وما يجوش مصر.!!!! هو ده اللى قاله الراجل اللى قاعد على اعلى كرسى للأثار فى مصر. شوف قمه الجهل.!! المهم ان القراء بتوع المجله ما عجبهمش كلام عم زاهى محتاس مع ان كوندى ناست بتخاطب اغنى طبقه سياحيه فى امريكا يعنى معظم قرائها اغنياء ولكنهم لم يعجبهم عنصريه حواس الماديه. وانهالت الخطابات على المحرر اللى عمل الحوار مخاطبه عم زاهى محتاس ومعظم الخطابات كان مضمونها اشبع بمصر بتاعتك احنا هنعمل زى انت ما قولت وهنقعد فى بلادنا ولو عوزنا نزور مكان فى افريقيا هنزور المغرب
زاهى حواس ممكن يكون عالم فى الاثار الفرعونيه لكنه جاهل فى التسويق والدعايه والاعلان وغلط جدا انه يكون واجه السياحه فى مصر وللاسف هو ده الواقع. كل ما افتح قناه ه فى التليفزيون الاقى عم حواس قاعد يبح وحزق من زوره كأنه هيولد!! وشكله يخوف الناس والانجليزى بتاعه يفضح ويموت م الضحك
فى احدى شطحاته ونطحاته عم حواس قال ان توت عنخ امون مش من افريقيا ما هواش اسود وان المصريين لا هم عرب ولا افارقه!!! كسبنا صلاه النبى احسن. لا طولنا نكون افارقه ولا عرب . امال احنا ايه يا عم محتاس

Tuesday, October 02, 2007

القنصليه العامه فى نيويورك

القنصليه العامه لجمهوريه مصر العربيه فى نيويورك لا يوجد بها مكنه تصوير للمستندات. او بمعنى آخر اللى موجوده هناك عطلانه والاستاذ محمد لسه بيحاول يصلحها. يعنى اى واحد عاوز يقضى اى مصلحه يصور ورقه معاه قبل ما يروح. طاب ايه هو الورق المطلوب تصويره؟ ماحدش يعرف. لازم تروح تخبط المشوار الاول وتسأل وبعد كده تنزل الشارع تدور على مكنه تصوير وبعد ما تصور الورق ترجع تانى للقنصليه تاخد دورك وطبعا الورق هيكون ناقص؟ فهيقوللك كمل الاوراق وتعالى ؟ طاب ليه ماقولتليش من الاول وانا نازل اصور ان الاوراق ناقصه؟ ولما تجيب الاوراق الناقصه وتصور المتسندات المطلوبه وتروح تدفع هيقولولك معهمش فكه؟ طاب بتاخدوا كريدت كارد؟ لا كاش بس؟ تنزل الشارع تانى تروح اى محل تدور على فكه؟
ولما تطلع لهم فوق بالفكه علشان تستلم ورقك تلاقيهم قفلوا وروحوا
ايوه ما هو فى رمضان بيشتغلوا 4 ساعات بس
وفى منتهى الاسى بتحس انك لسه عايش فى سجل مدنى السياله رغم انك عايش فى نيويورك
وبتفوق ونجاح منقطع النظير استطاعوا انهم يخلوك تسب الدين وتلعن التمثيل الدبلوماسى وتحس فعلا بمصريتك