القنصليه العامه فى نيويورك

القنصليه العامه لجمهوريه مصر العربيه فى نيويورك لا يوجد بها مكنه تصوير للمستندات. او بمعنى آخر اللى موجوده هناك عطلانه والاستاذ محمد لسه بيحاول يصلحها. يعنى اى واحد عاوز يقضى اى مصلحه يصور ورقه معاه قبل ما يروح. طاب ايه هو الورق المطلوب تصويره؟ ماحدش يعرف. لازم تروح تخبط المشوار الاول وتسأل وبعد كده تنزل الشارع تدور على مكنه تصوير وبعد ما تصور الورق ترجع تانى للقنصليه تاخد دورك وطبعا الورق هيكون ناقص؟ فهيقوللك كمل الاوراق وتعالى ؟ طاب ليه ماقولتليش من الاول وانا نازل اصور ان الاوراق ناقصه؟ ولما تجيب الاوراق الناقصه وتصور المتسندات المطلوبه وتروح تدفع هيقولولك معهمش فكه؟ طاب بتاخدوا كريدت كارد؟ لا كاش بس؟ تنزل الشارع تانى تروح اى محل تدور على فكه؟
ولما تطلع لهم فوق بالفكه علشان تستلم ورقك تلاقيهم قفلوا وروحوا
ايوه ما هو فى رمضان بيشتغلوا 4 ساعات بس
وفى منتهى الاسى بتحس انك لسه عايش فى سجل مدنى السياله رغم انك عايش فى نيويورك
وبتفوق ونجاح منقطع النظير استطاعوا انهم يخلوك تسب الدين وتلعن التمثيل الدبلوماسى وتحس فعلا بمصريتك

4 comments:

Iskanderani said...

صباح الفل ياصاحبي الغالي رأفت؛

سجل مدني السيالة؟؟؟؟ وانا كنت فاكر انهم تطوروا علشان كلمة "الثور" راح نكتبها من هنا ورايح "الطور" ياعم رأفت.. أبويا الله يرحمة قال لي :"اللي شاب علي شئ بيفضل - يبقي- عليه حتي الموت" الي هنا ينتهي تكرار اللي قاله .. أنا عندي فكرة والله تريح كل المحتاجيين للخدمات القنصلية إنهم يطلعوا الزكاة هذا العام في صورة "زكاة جارية" ويشتروا للقنصلية المصرية في اماكن معيشتهم
Scanner
هنا لايتعدي ثمنة ال €100
وياريت كمان لزوم التثور - قصدي التطور - والتعديل
Lapop or Notebook
ويدفعوا كمان الكورس للتعليم وبكدة يقدر احفادكم التمتع بالخدمة القنصلية المتطورة - قصدي المُترهلة كالعجوز الشمطاء المُتصابيية جارتي العجوزة- وأهو كله بثوابه ورمضان كريم ويالا بينا علي باتا دا عنده جزم متانة وخياطة علشان ماتنهراش لم نضربهم بها علي ادمغتهم

شر البلية مايُضحك ياخويا يا رأفت
معلهش طولت عليك انا آسف
وتحيات إسكندراني في بلاد الله الواسعة

الأغاني للرأفتاني said...

استاذ ممدوح
والله فعلا شر البليه ما يضحك
فى سفاره مافيهاش ماكينه تصوير فى الدنيا؟؟
لما تدخل السفاره كانك رجعت خمسين سنه ورا
وتحس بخنقه نفس وضيق فى الشعب الهوائيه وتفضل تصرخ طلعونى للعالم الخارجى
هههههههههههه

^ H@fSS@^ said...

لا زعلت منك يا رافت
امال المصري يفضل مصري ازاي؟؟
امال ازاي انت عاوز تحس انك رجعت مصر لما تروحلهم
اصلهم لو جابوا سكانر او فوتوكوبي و حسنوا خدماتهم و تيجي انت تروح بعد كده مش حتلاقي الروح المصرية الاصيلة في جو المكان
و الفايدة التانية انهم بكده بيفكروك باللي انت حتقابله في مصرنا العزيزة و ترجع تعيد النظر في قرارك قبل ما تحجز و تسافر
يعني اديهم بيساعدونا يا عمنا

الصراحة مشكورين على جهودهم

تحياتي

الأغاني للرأفتاني said...

حفصه
والله انا بازعل لما باشوف الناس دى..مش عوجان لا قدر الله..بس انا عاوز اعرف ايه الفرق بينا وبين اى سفاره تانيه يعنى..ليه الناس بتاخد التخلف والروتين بتاعهم معاهم..الناس دى المفروض تتنور وتتعلم من المجتمع اللى هم عايشين فيه..بس لا لسه زى ماهم
ياشيخه
دا جايبين معاهم سجاير سوبر من مصر
احا جدا