Sunday, October 28, 2007

شمس النهار

(1)

شمس النهار زغدت ظلام الليل
وقالت قوم كفــــــــــــــــــــــــايه
جايبه الدفا ويّا الامــــــــــــــــان
والخيـــــــــــــــــــــــــر معــــايـا
*****
(2)
عطر الزهور من يمينى فى صف واقف
وغنى البلابل عن شمالى بصوته حالف
ما يخلى خلق من الخلايق قلبه خايف
*****
(3)
يالا بقى اصحى وقوم خلينى آخد مطرحى
وخُد معاك كل الهموم ويا دنيا قومى وصحصحى
*****
(4)
ونسيت اقول: تاخد شتاك ويّا الغـيــــــــــــــــوم
اصل النهارده يوم جميل والقلب مش محتاج هموم
*****
(5)
ياقلوب يا عاشقــــــــــــه ومغرمه من عمر عدى
قــــــطر السـنين عــــفّر ترابه وجِــــه وهدّى
اصـــــــــــــحوا لهواكم دا الظلام روّح وعدى
*****
حاله فريده
نيويورك فى 5 اغسطس 2007

22 Comment:

كرياكو said...

رافت باشا

اية التغير دة المرادى فى امل فى الحياة



ونسيت اقول: تاخد شتاك ويّا الغـيــــــــــــــــوم
اصل النهارده يوم جميل والقلب مش محتاج هموم
كلامك كلة سليم والله انا النهاردة مبسوط شويا ومش عوز اى شى يفسد السعدة الى انا فية دى عشان مش بالقيها كتير
متقلقشى هقولك انا مبسوط لية عشان اول كومينت فوزت بية
شوف بقا قمت السعادة الى انا فيها متتوصفش


مع تحياتى

محمد البرلسى said...

الله عليك يارافتانى يا متمكن
........................
فعلا حاله فريده ومزاج عالى
وشعر مش هيوفيها اى شىء قدر الجمال اللى عملته فى نفس كل انسان بيقر اه يا مان

.........................

ربنا يدمها عليك الر وح دى يا رافت
.........................

وفى الاخير يا عم رافت الدولا ر خلاص رحت عليه انا اتجهت لمنطقة اليورو
هههههههههههههه
ياض انا اللى بعتلك اخر رساله فى العيد وانت مش رديت ثانيا كل يوم افتح نت مش اشوفك
ثالثا
الكمبيوتر بتاعى مش بيبعت اميلات فيه عيب كنت عا وز ابعتلك اميل مش عرفت
ثالثا كل يوم ادخل مدونتك وكنت منتظرك تنزل موضوع جديد

................
وفى الاخير ربنا يديم عليك نعمه وعافيته ويصلح بالك وتكون بالف صحه كتير
وحسنه قليله تمنع بلا وى كتيره
هههههههههههههههههه
سلا م

رأفــــتلــوجيــا الرأفتـــانى said...

يا كرياكو
مش شرط كل حاجه تتكتب تكون محسوسه وخصوصا مع الشعرا ءوكتاب الغنوه ..لكهم كدابين
ههههههه
ربنا يبسطك دايما ويجعل ايامك كلها سعيده
===================================
محمد
ايه الاخبار
ياسلام ياعم
بعت رساله فى العيد امتى؟ انى عيد فيهم؟
المهم انك بخير وطمنتنا

Nani said...

السلام عليكم
في عصفورة جميلة قلتلي انك بتفهم في حجات الانترنت
وانك هتساعدني
السؤال هو الاتي
عاوزة اغاني احطها عندي في المدونة
والموقع الي اعرفه هوالسالميةاكمن الاغاني بتنتهي بصيغة
RAM
بس للاسف مفيهوش الا اغاني بالعربي
وانا عاوزة احط معزوفات وحجات تانية
ممكن تساعدني؟
شمرا

رأفــــتلــوجيــا الرأفتـــانى said...

نانى
طبعا ممكن اساعدك
انا تحت امرك

3ala asm masr said...

حلو اوى
ربنا يسعدك
تحياتى

Nani said...

السلام عليكم
جميل لكلام ده
بيبعث على التفؤل مع اني بحب الليل والشتا

ياسر شمس الدين said...

رافتانى
مع ان الكلام كلة تفاؤل بس انا حسيت فية انك مضايق مش عارف لية
وبالنسبة لحودة القط بتاع السمك انا اعرف حودة جوندول بتاع الازريطة هو جنب المجمع
عند الورش بتاعة الميكانيكية
لكن حوده القط ده حتى ما ينفعش يفتح محل سمك
قط وسمك مش راكبة ديه يا معلم رافتانى لكن لو عايزنى ابعتلك شوية بربون على صينية سبيط على شوية بورى مشوى بالزيت
انا فى الخدمة يا باشا اامر انت بس ويوصلوا فى اقرب طيارة
وعلى فكرة ده مش بق اسكندرانى

شـــــهــــروزة said...

اسمع اغنية عصفور طل مالشباك

حلوةأوى

الأمل موجود غصب عننا
حتى لو غمضنا عيوننا عنه
لكن بيرجع يفرض نفسه على الوجود

عموما
مبأحبش اشوفك متضايق كدة رغم مسحة الأمل فى كلامك

كله بيعدى

واحنا كمان نعديه
تحياتى

فريدة... said...

الله عليك

الصور والكلمات جميلة ومليانه حركة

بمعنى ادق مليانة

مقومة

تحببك فى الحياه الى فيها
فتفاجأ من كثر الحركة والقوة انها اثارت جواك الحب لكل عناصرها وابطلها لو كان لى ان اسميهم كذالك
ها انا افاجأ بحبي يتعدى حب شمس النهار وقولتها والدفاء والامان والخير وعطر الزهور وغنى البلابل ...
وكل ده

لا وكمان
حبيت ظلام الليل والقلب الى خايف وشتا الظلام والغيوم -ربنا يجعل كلمنا خفيف عليهم_
محسبتك بتخاف من الشتا


الحياه موجوده فى كل عناصر الصور

حقيقي راسم صورة قوية وجدها واضح يأثر فى الى يقراها او يسمعها

حقيقي اجدت

وحقيقي جزاك الله عنى كل خير

صعب اقولك قد ايه بس ثوابك كبير قوى ان شاء الله

Iskanderani said...

مساء الفل عليك عزيزي رأفت؛
أيه يابا الحلاوة دي؛ كان مستخبي فين ده كله؛...

تحيات إسكندراني في بلاد الله الواسعة

رأفــــتلــوجيــا الرأفتـــانى said...

على اسم مصر
ربنا كمان يسعدك
==============================
نانى
وانا كمان بحب الشتا جدا..اى اسكندرانى لازم يحب الشتا..بس النهار والشمس ليهم فرحه خاصه
================================
ياســــر
صح يا مان هو حوده جوندل ده
ههههههه
حوده القط ما ياكولش مع السمك
ايه اللى عرفك انى مضايق يا ابواسكندر
القلوب عند بعضها
بالنسبه اللبوربون
لما اجى هاتصل بيك ابقى ابعت لى رقمك فى ايميل
انا جيبت كذا مره وما شوفتكش عيب اوى
===============================
شهــــــــروزتى
الله يلعنك دايما كده عارفه اللى فيها
الامل طبعا موجود..ربنا يجلعه موجود علطول لانه لو اتقطع خلاص..مفيش حياه
الاغنيه بتاعه العصفور دى مين اللى بيغنيها علشان اسمعها
ابقى بوس لى ام شهروزه لحد ما اشوفها تانى..زمانها نسيتنى
=================================
فـــــريده
برغم حبى للشتا بس النهار والشمس والعصافير والدوشه هم رمز الحياه والنهار دايما بيبقى فيه خير

ربنا يسعد ايامك
================================
اسكندرانى
استاذ ممدوح
عامل ايه يا باشا
واخبار لندن على حسك..
يارب كله يكون تمام
هتنزل مصر امتى
ابقى قولى علشان نرازى الواد ياسر فى عشوه السمك دى

Monzer said...

بس منين جبت الأمل ده كله :)


كلمات غاية فى الروعة

تحياتى

Iskanderani said...

مساء الفل أستاذ رأفت؛

والله نفسي في أكلة سمك مشوي إسكندراني تعجبك وطالما الواد ياسر راح يقوم بالحساب ما ننساش القهوة المظبوط الُدُبل بعد السمك المشوي؛ بس عارف فين ناكله؟ في أبو قير علي البحر، أيه رأيك؟ أنا عندي النيه في زيارة الاسكندرية في نهاية شهر مارس القادم أو بداية شهر أبريل- أسبوعين - يعني في أجازات شم النسيم هنا؟ وراح أكون وحدي يعني عندي وقت! أيه رأيك ينفع؟ الجو في الوقت ده في الاسكندريه بيكون جميل جداً
والواد ياسر يكون حوش كويس وقبض الجمعية بتاعتة دبل الخطوبه ولسه عنده فاضل شوية فلوس لزوم أكل السمك.

تحيات إسكندراني في بلاد الله الواسعة

رأفــــتلــوجيــا الرأفتـــانى said...

مُنذر
ايه ياعم انت جاى تنُق فى شويه الامل
هههههه
الله يكرمك
=================================
اسكندرانى
استاذ ممدوح
انا كنت ناوى انزل فى نفس الوقت ده بس فى ظروف هتخلينى اجل شهر او حاجه
لسه ع العموم الامور ما استقرتش
بس ان شاء الله انا ناوى انزل فى الصيف او فى الوقت بتاعك
بالنسبه لياسر
ملناش دعوه
يبيع دبل الخطوبه يفسخ الجوازه من اساسها..مش مشكلتنا
احنا كل اللى لنا كله السمك

عدى النهار said...

ربنا يجعل أيامك وأيامنا كلها خير

ياترى عندك أخبار عن جدو؟ له فترة طويلة غايب لعله بخير

رأفــــتلــوجيــا الرأفتـــانى said...

عدى النهار
آمين يارب
انا اتصلت بجدوا وسيبت له رساله فى الشغل وعلى الموبايل
ان شاء الله خير
اليومين دول زحمه فى الشغل هنا الله حايز هو مشغول بس ان شاء الله هيرد على التعليقات قريبا

ياسر شمس الدين said...

ايه يا جدعان ايه يا عم اسكندرانى ايه رافتانى انا بعزم عزومه بلموطى ادبس كده
طيب والله لو ربنا ادانا العمر وعيشنا وقابلنا بعض لاعزمكم عزومة فى ابو قير على البحر
جامده جدا وانا بشوف بيعه للدبل بتاعه الخطوبة من دولوقتى
رافتانى كلمة ليك انت بجدعايز اقولهالك
انا اول حاجة شدتينى زمان للمدونة بتاعتك انك كنت ساخر جدا وكنت حاسس انك معنوياتك مرتفعة وماشاء الله كنت حاسس انك سعيد ايه اللى حصلك بقالك فترة طويلة جدا
الدنيا مخبطة معاك
ولا ايه يا حاج
كله بيعدى والله يا رافتانى حاول تنسى
وترجع للمود بتاعك الحلو ده يا رافتانى

رأفــــتلــوجيــا الرأفتـــانى said...

ياسر
اسكندرانى (استاذ ممدوح
هينزل فى شهر 3 وانا كنت ناوى انزل معاه
بس هاخر شويه
فانت تعزمه ولما انا اجى تبقى تعزمنى
كل عزومه بدبله يا معلم
ايه رايك
بالنسبه للمود
هى فعلا متكعبله على الاخر معايا
وبقيت افكر فى حاجات عمرى ما كنت بافكر فيها
وزى ما تقول الواحد كبر فى السن ميت سنه فى اسبوع
بس انت ادعى لى وربنا هيسهلها ان شاءالله..واوعى تبيع الدبل
انا اللى هاعزمك
هههه

islam said...

المهاجر المصرى
السلام عليكم ورحمة الله وبركاته

يااااه من زمان وأنا عايز أعدى على مدونة حضرتك ؟

عرفتها من أيام ما كنت تترك تعليقاتك على مدونة توتا

أيااااام

*************

جميلة قوى كلماتك حسها عالى ودمها خفيف

ودى ومحبتى

السلام عليكم ورحمة الله وبركاته

islam said...

رأفتانى
السلام عليكم ورحمة الله وبركاته

أنت مدعوا لمشاركتنا فى الإتحاد العالمى للمدونين wub
إن لم تكون سمعت بالإتحاد من قبل يمكنك زيارته على هذا الرايط
http://worldub.blogspot.com/

الهدف الأساسى من الإتحاد هو نشر المحبة والسلام والإحترام بين مختلف الأفراد من لغات وأجناس وشعوب وديانات ودول مختلفة
لذا فغى حالة موافقتك على الإنضمام لذلك الإتحاد والذى يعد مدونة عالمية تجمع مدونين من مختلف شعوب العالم
يمكنك إرسال إيميل على ذلك العنوان
know_how_2love@yahoo.com
متضمنا عمرك ، اسم دولتك ، عنوان مدونتك ، والأسم الحركى الخاص nick name بك
رجاءا قراءة القواعد قبل البدء فى التدوين

تحياتى

إسلام
وسيط الشرق الأوسط للإتحاد العالمى للمدونين

السلام عليكم ورحمة الله وبركاته

رأفــــتلــوجيــا الرأفتـــانى said...

اسلام
ازيك ..عامل ايه
الحمد لله على كل حال
سعيد بتواصلك..اجمل حاجه هى الذكريات يا صديق
ربنا يبارك لك ويكرمك