Monday, May 12, 2008

ولّى النعم

(1)
ولّى النعم :
صباحك شريف .. نهـــارك لطيف
يا حامى الحمى .. يا شهم وعـفيــــف
(2)
يا عايشين فى خيرك .. يا شقيان لغيرك
وع القــــــــــلب قاعد .. كأخّــف ضيــــف
(3)
يا نسمه عليله .. ومجـمعنا عيـــــــله
كضى القمر .. فى ليـــله خـــــريف
(4)
ده مين اللى ده يــستر .. يقولك بنشحت
وشعبك فى عهدك ..ما لاقى الرغيف
(5)
ولا شفنا مره .. عيال فى الشوارع
يشموا السبرتو... ونايمين ع الرصيف
(6)
عدالتك بتخَرس .. آلاف الالـــــوف
وعمرى فى عصرك .. ما حسيت بخوف
(7)
آلهى يطــّول إلينا .. فى حيــــاتك
ويرزق ولادك .. ويستر مراتك
وأجيلك أبارك .. وأعيّد وأهــنى
وع الكرسى قاعد .. ولد من ولادك
(8)
نزاهتك حكايه .. جميع الألســـنه
وشاهدها عليها .. 28 سنــــــه
تعيش بس إنت .. وفى داهيـــــه أنا
******
نيويورك فى مايو 2008

10 comments:

Anonymous said...

الله عليك يا بنى والله
تحيه
محمد البرلسى

ايه اخبارك؟

نيران said...

بجد بجد تحفة

مش عندي غير كدا

تحفة

و كل سنة و هو طيب :)

Raafatology®الأغانى للرأفتانى said...

محمد
متنكر ليه؟
برضه عليك فلوس شحن كروت التليفون وبيدور عليك. صح..


نيران
شكرا على اول زياره..
وشكرا تانى انها عجبتك

Anonymous said...

حلوة يا زعيم ابقي سلملي علي مصر وتعالي زورنا في باريس

عمر

Raafatology®الأغانى للرأفتانى said...

منال
وانت طيبه وبصحه.. شكرا يا جميل ربنا يخليكى

عمـــر
عامل ايه يا وريث فى بلاد الجن والملائكه.. اوعى باريس تعلمك الرومانسيه..
ان شاء الله هاجى ازورك فى اكتوبر

واحد مصرى
شاكر زيارتك وكلامتك الجميله
ربنا يكرمك

^ H@fSS@^ said...

لوووووووووووووووووووووول
اموت انا في ابداعاتك يا زعيم
و كلامك بيبقى في الجون
بجد انت لازم تجمع الحاجات دي في كتاب

تحياتي

zahra said...

فعلا تحفة
خلى بالك على نفسك بقى لأحسن الحيطان ليها ودان

Raafatology®الأغانى للرأفتانى said...

حفصه
الله يكرمك ..انت فين من زمان كده.. الفيس بوك واخد كل وقتك.هههههه
كتاب ايه بس وابداعات ايه..انت عاوزه تحبسينى رسمى..وهاجيب تمن الكتاب منين
ههههه
ليك وحشه ..تعالى زورينا بأه


زهره الياسمين
ماتخافيش من الحيطان ولا الودان ..أخوكى معاه حصانه
شكرا على الزياره وكلماتك الجميله

Raafatology®الأغانى للرأفتانى said...

طارق باشا
والله ده شرف انا ماانا قده
ربنا يخليك

عبدالعظيم كشك said...

جامده ...بس فيها شبه كبير من "مفيش" بتاعة احمد فؤاد نجم