(1)
حريه مصنوعه فى مصر
م الكستور وبخيط ومقص
بالتفصيل على قد مقاسك
يالا تعالى وخش وبص
(2)
معمــوله بإيدين مصريه
أمن الدوله مع الداخلـيــــه
أنعم من ريش النعــــام
اوحتى هدومــك الداخليــه
وهتدلع فيهـا براحتــــك
فشر القفطـــان والجلابيــه
(3)
والتغليــف بأه آخر موضه
لو فيه غلطه مهيش مقصـــوده
لو مكســوف تقلع من نفســـك
بدل الزنزانــه فى أوضـــــه
(4)
قرّب شجّــع صُنع بلادك
وإعمل خير يقعد لولادك
منتج مشهـــور له بالجوده
من أيام ثورة أجـــدادك
(5)
ما تبصش لصناعة بره
دا احنا شعـــارنا مساجين حُره
دستور إيه وحقوق إنسان
راح تتلخبط ملـــيون مره
No comments:
Post a Comment