Thursday, May 05, 2011

إحنا آسفين يا شرطه

الشرطه المصريه لسه شايله فى نفسها ومعبيه من يوم ما الثوار خلوهم يجروا أمامهم زى الفئران فى جميع أنحاء مصر. إقتحام مبانى أمن الدوله كان فعل خيالى لا يستطع ان يتخيله شخص بخيال نجيب محفوظ نفسه. بالبلدى كده جهاز الشرطه فى مصر مكسور الجناح والدنيا غدرت بيه على رأى العبقرى أحمد عدويه. جهاز الشرطه عامل اليومين دول زى واحد صايع مفيش فى جيبه ولا مليم وعايش فى بيت ابوه اللى بيصرف عليه لحد ما بقى شحط قد درفة الباب وكل يوم يغضب على الاكل وامه تروح تتحايل عليه علشان ياكل. هو ده حال الشرطه فى مصر..عاوزينا نتحايلو عليهم ونقولولهم احنا آسفين يا شرطه .. بس بكل فخر وعوجان وتناكه احب اقولك " إحنا مش آسفين يا شرطه" ولو رجع الزمان بينا تانى هنعمل نفس اللى عملناه واكثر شويتين

هذا الجهاز كان من اكبر الاجهزه فسادا وأكثرها منفعه من نظام مبارك المستبد ولذلك فهم فى صدمة وزهول وغير مصدقين لما يحدث الآن

جهاز الشرطه واعضاؤه امامهم فرصه ذهبيه للعمل فى خدمه مصر وخلق صفحه جديده فى العلاقات بين الشعب وهذا الجهاز البغيض. على الشرطه ان تعمل جاهده كل الجهد حتى تكتسب ثقه الشعب الذى كره كل بدله عليها نجم ونسر ودبوره

الشعب المصرى لن يقبل بالاهانه مره اخرى وزمن حبيب العدلى ولّي ولن يعود.. فإعملوا من أجل مصر ومن اجل أنفسكم

3 Comment:

د/دودى said...

يعنى هو احنا يا اما نرجع نعتذر ونبوس الايادى يا اما نتساب للحراميه و البلطجيه يتسلوا علينا ؟؟ هى وزراه الدخليه دى مش ليها وزير و وزير الداخليه ده مش ليه رئيس وزراء يبقى لما لغايه دلوقتى الشرطه سيبانا فى الصحرا تبقى غلطه عصام شرف الملهم الذى لا يخطئ ابدا...

Raafatology®الأغانى للرأفتانى said...

اصلا تقريبا كده عصام شرف ملوش كلمه مع الناس دى.. وحتى تقريبا وزير الداخليه ملوش قيمه م الاساس.. وزارة الداخليه اصبحت فى عهد العادلى مافيه ودوله داخل الدوله..والتغير مش هيتم لما نغير وزير او رئيس وزراء..لازم افراد الشرطه يعرفوا من نفسيهم ان زمن الهبل ضاع وولى..وان خلاص ما هيقدروا يطيحوا فى البلد زى ماكانوا بيعملوا ايام العادلى

د/دودى said...

يعنى هنغير طاقم الشرطه كله اسهل ولا نغير الوزير اللى مش قادر عليهم اسهل؟؟ الوزير اللى مش عارف يحكم على رجلته قعدته فى بيته احسن