Tuesday, August 20, 2013

مِجاهد إتقتل

مجاهد إتقتل يا دكتور. كان غلبان وفقير ومقطوع من شجره. خلص الجهاديه وكان راجع ياخد الشهادة . كنا متكلمين له علي عواطف بنت عبد الباسط المزيّن و إتفقنا بعد زرعة الغله الجايه، هيشتري لها خلخال دهب وفي حصيدة الأرز هيجيب لها غوشتين قشره ويعقد عليها. أصل مجاهد كان أُجري علي باب الله وربنا بيفتحها عليه في مواسم الزراعة . وكان لما بيجي أجازه من الجهاديه، كان بيسرح في غيط جماعة المنجلي يعلف لهم البهايم وينظف تحتيهم. هم أكابر البلد وكان بيدو له بدل الطاق طاقين عشان يتيم
إمبارح جال لنا بيه كبير ، شكله حكمدار من الجهاديه قال لنا إن مجاهد بقي شهيد ! شهيد إزاي يا دكتور بس. مش النبي وأصحابه ماتوا وكانت الشهادة دي لما يحاربوا الكفار؟ إترجينا البيه الحكمدار يأخذنا نواحيه عشان نستفسروا بنفسنا ليكون غلطان، بس البيه الحكمدار قالنا إنه لازم يمشي عشان هيروح لأهالي ناس تانيه كده زي مجاهد وماكنش عاوز الدنيا تمسي عليه. مجاهد كان بيزرع ويقلع يا دكتور وما كنش بيعرف الألِفْ من كوز الذره. قولي كده انت يا متعلم إزاي عسكري فلاح زي مجاهد يبقي شهيد؟

0 Comment: