الدروس المستفاده من مباراه مصر والجزائر

الفريق المصرى فريق اكثر تدينا من الفريق الجزائرى . لو قرأت اى حديث صحفى لاى لاعب او مدرب مصرى هتلاقيهم بيسألوا الجمهور المصرى التضرع لله بالدعاء . على عكس الفريق الجزائر اللى ما جبش سيره ربنا فى اى حوار صحفى

اتضح ان الاخاء العربى والقوميه والملوخيه وغيرها من المصطلحات بتاعه تعيشى يا بلدى يا بلدى تعيشى . ما هى الا كلام فى الهجايص

تضح ان جمال عبد الناصر مازال قادرا على تعكير دمنا فهو صاحب تظريه القوميه وتحرير الجزائر بلدالمليون شهيد ولولاه كانت باريس هى عاصمه الجزائر

الخسران الوحيد فى الفيلم كله هو مختار الجزائرى الحلاق اللى بنحلق عنده هنا فى نيويورك- كل المصرين قاطعوه

يا حكــــــــــــــومه


يا حكومه

(1)

ياحكومه يا حلوه يا مظلومه

الشعب الجبار هيجنــّك

وانت يا مسكينه يا مهـضومه

كل الحاسدين عينهم منك

(2)

ايشـى حزب معارض بيعارض

وايشـى جرنال اصفر غاوى همك

لو بعتـى النيل والله ما اعارض

يعنـى انا هاعرف اكثر منك

(3)

دا كفايه رئيسك وبشاشته

فى التليفزيون نوّر شاشته

لامم ملاطيشه وتحبيشته

يدافع عنــــــــــــــــــــــك

(4)

كلمات الشكر ماتكفيكى

دا ميزان العدل قايم بيكى

فى حد بيهرب من قدره

وانتى اللى بلانا الله بيكى
نيويورك - اغسطس 2008

يمكن أعود تانى لحضنك

(1)
يمكــن اعود تانى لحضنك
واكتب فى حبك اغنيــــــه
دا مهما كان انا برضه ابنك
حبك بيتحكـــّم فــــــــىّ
(2)
بأبعد وأقول مش هارجع لك
تضحك دموعى وتسمـــع لك
وحنينى ليكى بيشفـــــــع لك
انسى القسى يا بلدى علــــــىّ
(3)
البلبل الفرحان غنى
وقالى احلم واتمنى
دى بلادنا حته من الجنه
بس الغريب واكل خيرنا
(4)
يا شمس بلدى ليلك طول
وحبى عُمـــــره ما يتحول
فى صفوف حبايبك انا الاول
وشاهــــد ادانك ع المدنـــــه
نيويورك - يونيو 2008

الاكل .. هو سبب كل المشاكل

اتضح ان الاكل هو سبب كل مشاكل الانسان العصرى . واحسن شعور للبنى آدم وهو جائع . وان العقل بيعمل فى احسن حالته لما البطن بتكون شبه فاضيه

فى الايام الخوالى لما الانسان كان بياكل من ورق الشجر والخضار والمكسرات كان الانسان فى احسن صحه وعندما تطورنا وانفتحنا على التقليه والزيت والسمنه البلدى والسكر والمسبك والملبك بدأنا نشوف الضغط والسكر والكليسترول وامراض القلب وغيرها واصيب العقل بحالات غيبوبه فجائيه

ومع تنوع انواع الفول تنوعت اشكال غياب العقل والفكر فمع الفول ابو زيت حار توجد الغيبوبه والتتنيح المؤقت . الفول ابو طحينه وتوم وصلصله يوجد توهان وشبه فقدان للذاكره. درجه نظافه زيت الفلال مرتبطه ارتباط وثيق بعمل خلايا الذكاء فى المخ

وقس على ذلك الكوارع ولحمه الراس والممبار وغيرها من الاكلات التى لها صله ورد فعل دائم مع العقل والذاكره والتتنيح بكافه درجاته

البيت المصرى عامه بيت كريم فنحن من الشعوب القلائل اللى بتقدم المكرونه والبطاطس والارز والعيش مع بعض فى وجبه واحده برغم ان فايدتها الغذائيه واحده

وبعد الاكل بنحلى وبعد الحلوى بناكل فاكهه وبعد الفاكهه بنشرب حاجه ساقعه وبعدها شاى يا قهوه. ومع الشاى والقهوه يا سيجاره يا معسل . وبعد السجاير والمعسل ممكن شويه لب او سودانى

لو واحد اجنبى صديق لك عزمك فى بيته مثلا وسألك تشرب ايه وانت قولت له ماء بس. عادى جدا هيجيب لك الماء وهيعرف انه مشروبك المفضل

لكن لو كان اللى عازمك مصرى وقولت هاشرب ماء بس. هيموت على نفسه من الضحك و هيفتكرك بتشتغله . فلابد ان تأكل اى حاجه وتشرب اى حاجه

واتذكر مره عزمت صديق اجنبى فى البيت والوالده كانت طابخه اكل يكفى محافظه اسكندريه والبحيره مع بعض. وجلسنا على المائده وراحت الوالده مقدمه لصاحبى طاجن ارز معمر اقسم بالله يوكل عيله " وقالت له : ده منابك لازم تخلصه"

صديقى كان هيموت مش من الاكل لكن من منظر الطاجن

دين الفتـــاوى


لماذا لا يبقى الدين فى النفوس والقلوب والمساجد والكنائس والمعابد. لماذا تتلاطم الفتاوى كامواج فى بحر مظلم
الحلال بيّن والحرام بيّن
فطره الانسان السوىّ تهديه الى الخير وتنفرُه من الاثم . فالصدق لا يحتاج فتوى وعدم النفاق لا يحتاج فتوى . فكم من كافر صادق وكم من مؤمن منافق
لماذا لا تحاكم الحكومه شيوخ الفتاوى بإثاره البلبله وتكدير الصفو العام كما حوكم بعض الصحفيين من قبل
اقسم باغلظ الأيمان ان الدوله تشجّع هؤلاء الشيوخ على كل ما هو قبيح ولو شعرت الحكومه بخطوره واحد فيهم لاغلقت جميع القنوات الدينيه

التدين والفضيله ليست بلحيه نطلقها او حجاب نرتديه او صليب يتدلى من العنق

اننا لا نستحق الحريه التى ينعم بها بعض الانعام لاننا نحاكم غيرنا الف مره قبل ان يسأل انفسنا سؤال واحد
ابسط من نرمى به من اختلف معنا فى الرأى هو الكفر والنفاق

مجــدى كُـــــسبر

مجدى كُسبر كان لحّــام حديد .. مدخن وحشاش من الطراز الاول. فى اول يوم رمضان ذهب مجدى الى الحلاق علشان يحلق راسه وذقنه . فرصه ان يضيع نهار اول يوم رمضان فى الحلاقه

جلس مجدى على الكرسى وبدأ الحلاق فى مهامه. وبما انه اول يوم رمضان زاد الحلاق من النزعه الدنييه حبيتين وضع الفوطه على مجدى وبدأ الحلاق قائلا مع كل قصه مقص

بسم الله .. الله اكبر .. يا مسهل يارب

لا حول ولا قوه الا بالله

يا فتاح يا عليم .. اللهم بلغنا رمضان

اعوذ بالله .. اعوذ بالله .. اعوذ بالله

استر يا رب .. سلم يارب سلم

وهب مجدى من على الكرسى ثائرا وخلع الفوطه من عليه قائلا للحلاق

ايه يا عم فى ايه وانت بتحلق للشيطان!!!!!!!! وسب الدين للحلاق ومشى مقتنعا ان لا يخرج من بيته فى نهار رمضان

اسكنــدريه

عندما يرادونى الحنين لشوارع نيويورك وانا اتسكع فى شوارع بحرى بالاسكندريه واجلس على بعد خطوات من قهوه فاروق
اذن انا مهاجر حتى النخاع
البسبور الامريكى لم يصبح وثيقه سفر كالامس ولكنه اصبح هويه!
.. سالت نفس الف سؤال
وقولت لنفسى اكيد فى حاجه غلط
لكن الاسكندريه اصبحت نفسها غريبه واصبح هناك الف اسكندريه داخل الاسكندريه
الشوارع الجميله ذات المبنى المعمارى الراقى كسرت والفيلات القديمه اصبحت مهجوره والخطوه القادمه اصبحت معروفه .. برج سكنى ضحم على اطلال التاريخ
اصبحت الاسكندريه نفسها ذكرى غير سعيده لمن عاصرو ايامها الحلوه

عاصفه درويش

عاصفه ثلجيه على مشارف نيويورك . السماء مليئه  بالغيوم  ولا يوجد دليل واحد على ان الشمس تعيش فى عالمنا

استيقظ من النوم فى الواحده بعد الظهر لا يوجد اى معالم لطلوع النهار .. طننت انى استيقظت فى منتصف الليل

انظر فى الساعه

سالت نفسى كيف نمت كل هذا الوقت

تذكرت صديق لى فى الجامعه اسمه محمد درويش  كان يشاركنى سكنا يوما ما

وتذكرت عندما نام درويش ثلاث ايام متواصله

تركته نائما على جانيه الايمن فى يوم خميس  ورجعت لاجده على نفس الجانب الايمن صباح يوم الاحد

صحيته من النوم قائلا

اصحى يا درويش النهار طلع

بعض صور رحله العمرةالاولى

42 02 04 05 06 07 08 13 15 16 17 19 20 21 22 23 25 26 27 28 29 30 31 32 33 34 35 36 37 38 41
دول بعض صور من حوالى 250 صوره اخدتهم وانا باعمل عمره الشهر اللى فات . ان شاء الله مش هتكون الاخيره

غزه والجزمه

تذكرت الاحتفالات بيوم الجزمه العالمى وتذكرت كلمات المدح لللبطل- الذى لا اذكر اسمه- الذى قذف جزمته فى وجه بوش اللعين . تذكرت هذا وانا اتصفح وجوه اطفال غزه وتذكرت
كيف اعادت الجزمه الكرامه العربيه الضائعه وكيف ان الجزمه حررت العراق والقدس وجميع البلاد العربيه من ظلم حكامها تذكرت كل هذا فى يوم الجزمه. اقتنعت تماما اننا ليس فى حاجه الى جيش قوى وسلاح متطور او ومنظمه اعلاميه تعادل ما يمتكله العدو الصهيونى . كل الذى نحتاجه هو جزمه

وانا اتطلع وجوه شهداء غزه كتبت مطلع اغنيه لن اكملها حيث انى لا اعرف النهايه بعد


هى هتيجى عليكى يا غزه
قبلك ضاعت منا النخوه وتاهت العزه