قُلت :
بُص حواليك. هتلاقى الناس دى كلها ضدك. جايز ما بيقولوش بصراحة إنهم ضدك، بس كل أفعالهم ضدك! العملية مش صراع بين جيل وجيل، القضية كلها إن فى ناس حتى من جيلك ما تعرفش تستخدم علامات الإستفهام والتعجب!
قالت:
القهر أسهل من إنك تعترض وتستفهم وتستعجب. الإعتراض بيعوز مجهود وأدوات تستخدمها عشان تعترض بيها. إنما القهر مفيش أسهل منه! بُص حواليك أنت هتلاقى الناس اللى إنت مفكرهم ضدك، مقهورين. كلهم مقهورين. يعنى الرجل العجوز اللى قاعد هناك مقهور. إزاى رجل فى سنة ده لسه لازم يشتغل عشان ياكل! الست اللى معاها 3 عيال دى وبقالها نص ساعة مش عارفه تعدى الشارع، برضه مقهوره. والبنت الجميلة اللى هناك دى اللى إتحكم عليها تلبس 20 متر قماش عشان الواد اللى قاعد يعكاسها هناك ده يخلى عنده دم، كلهم مقهورين.
إنت عارف إيه عيب القهر؟ إنه للأسف مش ديمقراطى! عندك الموت مثلاً، ديمقراطى ولازم الكل يدوقه. إنما القهر، له ناسه!
No comments:
Post a Comment