Friday, December 29, 2006

كل سنه وانتوا طيبين

قرار رأفتانى غاشم
بالغاء عيد الاضحى والكريسماس وراس السنه واعياد الميلاد لهذا العام ودمجها جميعا مع عيدى الشرطه وعيد القمح
وكل عام وانت بصحه وخير

Monday, December 18, 2006

بين معارضه الاحزاب ومصداقيه التدوين

الاحزاب فى مصر مشروع حكومى فاشل. فأى مؤسسه نشأت بقانون حكومى فهى مؤسسه فاشله. واحزاب المعارضه المصريه ما هى الا خلفيه علشان الصوره تطلع حلوه فاحزاب المعارضه مثلها مثل غيرها من الاحزاب المصريه التى نشأت وتأسست على اساس قانون الاحزاب..والحزب اللى ما يقفش فى الصف ويضرب تعظيم سلام هيروح ورا الشمس حتى اسألوا ايمـن نور.. واهم انجازات قانون الاحزاب هو انشاء على حزب وداد قلبى وعلى حزب الريح ما يودى الريح الاحزاب المصريه فقدت المصداقيه.. ومن النادر تجد شباب متنور ومتحمس منضم الى اى من تلك الاحزاب.. وانا عن نفسى افضل الانضمام الى فريق الكشافه بتاع تامر حسنى عن الانضمام لاى حزب سياسى مصرى وفى اليد الاخرى تجد التدوين واصحابه.. تجد المعارضه الحقيقيه والشفافيه الواضحه .. تجد المعارضه من اجل الافضل.. والحق اقول ان احنا كمدونين لا نملك الحل السحرى لكل المشاكل.. ولكن نملك عرض المشكله على الراى العام سواء فى مصر او فى الخارج.. فالمدونون بدأو خطوه ومسيره مهمه فى سبيل وطنى ديموقراطى يحترم آدميه ابناؤه.. فالمدونون بدأو حملات كتيره اخرها حمله مقاطعه جرائد الحكومه الفاشله- تابع مدونه جرجس- والمدونون مشغلون بحريه الرأى والعقيده مثل قضيه كريم عامر وقضيه البهائيين وحبس طلبه الازهر وغيرها من القضايا المهمه المهم ان فى شعاع نور وممكن يبقى كشاف كبير لو اهتمينا بقضايانا واحترمنا ارائنا و الاراء المعارضه..فنحن اولى بتشجيع الرأى والرأى الاخر... حتى يظهر الله الحق ويبطل الباطل..فتحيه لكل مدون ومدونه ملحوظه: فتحيه = تحيه . فانا لم اقصد الست فتحيه بتاعه الخضار اللى فى سيدى بشر قبلى عن محطه القطار

Monday, December 04, 2006

وظــائـــــف خـــاليـــــــة

تعلن المملكه الرأفتــانيه البدأ فى قبـول الطلبات للوظائف التاليه وزاره الدكـــــــر مطلــوب وزيره حسنه المظهر تجيد القراءه والكتابه واعمال التريكو للعكننه على كل بنى آدم من الرجال وكل ما هو مذكــر من الانعام وذوات الابـــع وزاره التهييس والتعتيـــــم مطلــوب وزير منافق وكداب.. ويجيد اشتغاله الشعب الرأفتانى... حاصل على شهاده حورينى يا طيطه وزاره عشانا عليك يارب المتقدم لهذا المنصب التخطيطى الحساس يجب ان يجيد الاعمال الحسابيه وفك الخط علشان مزانيه البلد ما تروحش للشعب وزاره أبـــو قـردان صديــق الفلاح حاصل على شهاده سرطنه خضار وفاكـهه وما جستير سحب سوداء .. ودراسات عليا فى حريق قش الارز وتسميم مياه الشرب والاستحمام وزاره هـا..مين هنـاك على المتقدم لهذا المنصب الحصول على الحزام الاسـود فى الكاراتيه والمصارعه الرومانى.. اجاده ضرب النبله ونط الحبل والعقله والمضرب والسبع طوبات ورمى الجله وعبــور الترعه وزاره إكـــفى ع الخبر مجــور المتقدم لهذا المنصب الامنى لازم ولا بد ان يجيد العاب التخفى والتنكر والسبع ورقات ويكون متزوج على مراته او مراته متزوجه عليه من غير الطرف الاخــر ما يعرف لمده لا تقل عن 10 سـنــوات وزاره كشفت راسى واتجهت المتقدم لهذا المنصب لازم يكون من اهل الخطوه ومكــــشوف عنه الحجاب..يجيد الفتــاوى الحكوميه بكل الانـواع من اول تحــريم الحجاب لحد جواز عتريــس من فؤاده باطل وزاره القفـــــــا الغرض من هذه الوزاره هـو تطوير وتعريض القفا الشعـبى زى محور 6 اكتـوبر علشان يستحمل الضغط الحكـومى
تقدم الطلبــات باليد مع الاشــاره للواسطه بتاعتك والرشــوه تكــون بالدولار الرأفتـــانى

Friday, December 01, 2006

الحلول الرأفتانية للأزمة السياسية


واحد قارئ زكى بعت لى رساله كلها غضب. قال فيها ان معظم كتـابـاتى اسود من قرن الخروب ومليئه بالتشاؤم والسخريه.. وسألنى لماذا لا اكتب حلول رافتانيه للازمه السياسيه.. والحق اقول ان الحلول على قفا من يشيل بس فين النفس اللى تصرف.. وامامكم عشـــر حلــول حكـــايه علشــان الازمــه السيــاسيه
 الحل الاول عمل لجنه مضاده للجنه السياسات فى الحزب الوطنى وتكون هذه اللجنه متساويه فى الشكل والطعم واللون والاتجاه ويكون شعار هذه اللجنه : كـايده العُـزال انا من يومى..أيــوه آه

الحل التانى تغير اسم مجلس الشعب الى مجلس الامــه برئاسه احمد فتحى سرور تغير اسم مجلس الشورى الى مجلس الشـعب برئاسه احمد فتحى سرور تغير مجلس اتحاد الكـــوره ونادى السكه الحديد برئاسه احمد فتحى سرور الغاء كل المجالس اللى فوق دى وفتح دكــان صغير مكتـوب عليه..احمد فتحى سرور لرئاسه مجلس الامه والشعب والشورى واتحاد الكوره ونادى السكه الحديه

 الحل الثالث تعين تــامر حسنى وزيرا للدفـــاع والداخلــيه والحرببيه والكشـــافه والعيال الخشنــه اوى اوى

 الحل الرابع تعين المطرب الذواق بعــروره وزيرا للثقافــه والزراعه

 الحل الخامس تعين فاروق حسنى وزيرا للاوقاف والازهر وبابا للفا تيكان

 الحل السادس تعيين الدكتــور يــوسف والــى وزيرا للصحه والمواصــلات وجمعيه سلامه المواطنيــين والرفـق بالحيـوان

 الحل السابــع تغير نظـام اختيار رئيس الجمهــوريه لنظــام الاقتــراع وده مختــلف عن نظام الانتخابات والاستفتاء.. الاقتــراع جاى من القــرع العســلى

 الحل الثامــن تشجيـــــع نظام الاقطاع والسلب والنهــب والاصـــلاح الزراعــــى والعـــوده الى الملكــــــيه والبــشويه والبهويه و فــراخ الجمــعيه المخليه

 الحل التـاســع اعـــدام كــل المدونين والمدونـــات ما عدا الرافتانى علشان الرافتانى هيبقى المستشــار السيــاسى للدوله الرأفتـــــانيه

 الحل العــاشــر واستعيــــــنوا بالصبـــــــــــــــر والســــــــــــلوان ..واللى مش عاجبه ... يرمــى نفسه فى المـــالح.. قدام بيـــــر مسعود كده علشـــان الحته دى غويطه أو فى البيطاش فى العجمى- الميه اللى هناك وسخه

Thursday, November 30, 2006

الامين العام للجنه السياسات بالحزب الوطنى


سألنى صديق جاهـــل عن معنى ومخزى ( الامين العام للجنه السياسات بالحزب الوطنى). وكنت انا فى غايــه السعــاده للاجابـــه عــلى هذا السؤال العويص والمعضل فلجنه السياسات ما هى الا مجموعه من السياسات المتكامله للوصول والعبــور بسفينه الوطـــن الـى بـر الامــان والاستقــرار الاستــراتيــجى المتفاعــل مع المشروع القومــى لتطوير البنيه التحتيه والفوقيه لجامع سيدى المرسى ابو العباس وسيدى بشــر وسيدى جابــر ومركز شباب الانفوشى
.. ومن امثله هذه السياســات القاتله على سبيل المثال وليس الحصر
السياسه الداخليه لتطوير السياسه العامه للجنه السياسات بالحزب الوطنى السياسه الخارجيه لتطوير السياسه الداخليه لتطوير السياسه العامه للجنه السياسات بالحزب الوطنى السياسه القائمه السياسه القاعده السياسه النائمه السياسه النائمه على بطنها (لاحظ الفرق بين دى والسياسه اللى فوقها علطول السياسه النائمه على جنبها اليمين والشمال ( لاحظ الفرق ايضا بين السياسه دى والسياسه اللى فوقها السياسه الصاحيه السياسه المعتدله السياسه الملتويه السياسه الواضحه السياسه الغامقه السياسه المسموعه السياسه الملموسه السياسه المرئيه السياسه المخفيه السياسه اللى مستخبيه (لاحظ الفرق يبنها وبين السياسه المخفيه سياسه الموت علينا حق سياسه غطينى وصوتى سياسه صوتى ياللى ما انتش غرمانه (لاحظ الفرق بين الصويت اللى فوق والصويت ده سياسه رقصنى يا جدع على واحده ونص
سياسه يا ام المتطاهر رشى الملح سبع مرات سياسه ادلع يا رشيـــــدى سياسه سد الحنــــك سياسه سد اســوان ( لاحظ الفرق بين السد ده والسد اللى فوق سياسه السد العالى سياسه الكعب العالى ( لاحظ الفرق بين العالى اللى فوق والعالى اللى تحت سياسه هز الوسط سياسه وسط البلد ( لاحظ الفرق بين الوسطين واخيرا سياسه
......... ولقد اتبعت فى هذا التحليل السيــاسى سياسه البساطه والشفافيه والمصداقيـــه الخلابــــه لحب الله والوطــــن
مع تحيات الرأفتـــــانى السيـــــاســى

Tuesday, November 28, 2006

الحـــــــــرب بين الرجـــــل والمـــــــــــرأه


تنوعت اشكال الحروب بين الرجل والمرأه منذ قديم الازل فقد تفوق الرجل على المرأه من ناحيه الجسد والعضلات ولو أنّى أشك فى ذلك لأن معظم نزلاء قسم الكسور فى القصر العينى من الرجال ولقد تطور هذا العداء ..وبعد ان كانت الحرب بالايد والرجل والساطور والمطواه والجنزير, اصبحت الحرب اعلاميه من المقام الاول وفى الحرب الاعلاميه تفوقت النساء تفوق بالغ ومنقطع النظير بروبوجندا الرجال هى ان معظم النساء ما بيفكروش..وما بيستخدموش عقولهن...ويقال ان لو واحده منهم استخدمت عقلها وفكرت قبل ما تتكلم بتصاب بحاله اعياء وهرش وحساسيه شديده وبتروح للدكتور لمده اسبوع على الاقل وايضا انا اشك فى ذلك لأن معظم نزلاء السرايا الصفراء برده من الرجال المهم , بتطور العصور والقوانين والمحاكم والخلع وخلافه.. اصبحت الحرب بين الجنسين حرب منشورات وتسييح وتهييس على منوال الكلام ليكى يا جاره وخدوهم بالصوت لا يغلبوكم وايضا تفوقت النساء فى حرب المنشورات فمثلا فى الناحيه الرأسماليه حيث الشك فى قدره الرجل الماديه وان الجوازه طلعت فشنك ومقلب , نجد هذه المنشورات القيّمه التى تعطى عبره وموعظه لبنات الجيل الجديد اللى بيدورو على شباب النيولوك يا واخده القرد على ماله...يغور المال ويبقى القرد على حاله ايش ياخد الريح من البلاط يا جاريه اطبخى ....يا سيدى كلّف جبتك يا عبد المعين تعينى ....لقيتك يا عبد المعين عاوز تتعان وفى منشور بديع عن عدم الثقه وان الرجال كلهم واساخ ومعندهمش اصل ببصله يا مآمنه للرجال ....يا مآمنه للميه فى الغربال قصقصى ريش طيرك...قبل ما يلوف على غيرك من بره هالله هالله...ومن جوه يعلم الله ديل الكلب عمره مايتعدل ...ولو علقوا فيه قالب فى حزنهم مدعيه...وفى فرحهم منسيه
وفى منشور آخر عن الملل العاطفى وان الرجال دول ايدك منهم والارض وان الشنبات دى منظر فقط وان نص المرتب ضايع على الفياجرا والافيـــــــــــــــــون لولا جارتى ...كانت اتفقعت مرارتى يا قلبى يا ابو اكتاكت ... يا ماانت شايل وساكت بنا لى فى الخطوبه مسطبه....وفى الجواز بلحه معطبه لبست لك الاحمر والشفتشى... وانت زى البنات بتختشى
وعند سؤال الرجال عن هذا الضعف المهين ولماذا السكوت على هذا الوضع...نجد هذه المنشورات العبيطه
ما باليد ...حيله علشان الورد .... ينسقى العوليئ اللى يخاف من العفريت ..يطلع له العشره ما بتهونش ...غير على ابن الحرام اللى ليه ظهر ... ما ينضربش على بطنه اللى مش عايز وجهه النهارده.... بكره تحتاج لقفاه وعليه العوض ومنه العوض...وحسبـــــــــى الله فى النسوان جميعا
وعلى راى الراجل العبيط بتــاع مدونــــه مصر الجديده وشفافيـــه الحزب الوطنى: فهل بعد هذه الادله, ادله اخرى..عزيزى القارئ

Friday, November 24, 2006

تعددت الاسباب....والسجن قادم

ُجد والدتى كان راجل ثورجى..فى يوم خلع صوره الملك فاروق من على حيطه الدكان بتاعه وقعد يدوس عليها بالجزمه علشان عساكر قصر المنتزه اشتروا منه دقيق ومادفعوش. المهم انه اتقبض عليه واتحبس 21 يوم. جدى كان عارف التهمه بتاعته وهى العيب فى الذات الملكيه اليومين دول بأه انت ما تعرفش تهمتك ايه..ولو انت دكر بجد..تعرف انت محبوس ليه ولا انقبض عليك ازاى ممكن تكون ماشى على الكورنيش فى حالك ويطب عليك العسكر ويقبضوا عليك بتهمه التحرى
طاب يا جماعه تحرى ازاى وانا معايا بطاقه
صورتك مش واضحه فى البطاقه
ماهى الصوره واضحه زى الشمس اهى
صورتك وحشه ..اركب البوكس وفى حاله اخرى. تكون واخد المدام يوم الجمعه تصلى..وانت طالع من الصلاه..يتم القبض عليك ليه بس هو انا عملت ايه
فعل فاضح فى الطريق العام
فاضح ازاى بس. دا انا لسه طالع من الصلاه
هو كده..الصلاه فعل فاضح..اركب البوكس وبمناسبه الصلاه..مره امن الدوله ارسل لوادى وقالوا له ابنك فى امريكا من فتره طويله..هو هيرجع امتى؟ الحاج قال لهم..ده مش راجع..دا هو عايش هناك وبيجى اجازات فقط فالضابط سأل الحاج: ابنك بيصلى فى اى جامع فى نيويورك؟ الحاج صايع قديم..قال للضابط.. يصلى ايه بس يا فندم..دا الرافتانى خمورجى وحشاش وبتاع نسوان ولحد النهارده والدته غضبانه عليه ابتسم الضابط وقاله شكرا يا حاج,,, واسفين ع الازعاج وتعجز اى دوله فى العالم ان تنافس مصرالتى فى خاطرى فى خلق اسباب القبض والتلفيق..مفيش دوله زينا يا عم الحاج..احنا ملوك التلفيق والتناحه
خطر على الامن العام...اركب البوكس
خلق حاله من البلبله والفوضى...اركب البوكس
العيب فى الذات الحبيب عدليه والصفوت شريفيه والمباركيه...اركب البوكس
التجول فى منطقه ممنوع فيها حذر التجول....اركب البوكس
بتسأل كثير عن الدستور والانتخابات والكلام الفاضى ده...اركب البوكس
شكلك وحش...اركب البوكس
صاحبك اللى انت ماشى معاه شكله وحش...اركب البوكس
عدم الانضمام للحزب الوطنى وانشاء حزب جديد والتزوير فى اوراق الحزب الجديد...اركب البوكس
عدم تزويرك لشهاده الجيش وشهاده الجامعه...ما تركبش البوكس..روح غنى فى احتفالات حرب اكتوبر

Monday, November 20, 2006

الرأفتانى فى الزواج

هى: تصحو من النوم مفزوعه فى نصف الليل..تصرخ ..تصرخ..تصرخ..تصرخ هو: مفزوع من صراخها..خير يا رب..خير يارب.. اللهم اجعله خير..فى ايه هى: ماسكه مرآه فى ايديها... بٌص وفى وشى انت اتعميت ولا ايه.. بٌص كويس يا اعمى البصر هو:يدعك عنيه الاثنين.. ويبص فى وجها..لامش شايف حاجه ..خير ..خير..لدعتك عقربه ولا حد رشك بميه نار ولا ركبك عفريت هى: لا يا طور..فى فُسفسه فى خدى اليمين..شايفها؟ هو: لامش شايف الفسفسه يا حبيبتى..جايز تكون حسنه او وحمه اويمكن تكون لدغه برغوت او قمله هى : وحمه هاتطلع لى فى نص الليل يا عديم الاحساس..دى اكيد فٌسفسه قاتله هو: يا حبيبتى حتى لو فسفسه لا قدر الله.. نامى والصباح رباح هى : انام ازاى يا ابو قلب حجر والفسفسه دى على خدى.. لازم اروح للدكتور هو: دكتور ايه دلوقت دا احنا وش الفجر هى: طبعا وانت هيهمك جمالى فى ايه..الاسبوع اللى فات طلعت لى حبايه فى ضوفر رجلى الصغيّر ودلوقتى فسفسه فى خدى اليمين ويا عالم بكره هيكون ايه..وانت ولا على بالك هو: يفتح الباب ويرمى نفسه من بلكونه شقته فى الدور ال50 هى: طلعت البلكونه تصرخ..تصرخ.. وتقول ... مين اللى هيسوق العربيه للدكتور دلوقت يا عديم المسؤليه
هو: مرمى على الارض فى وسط بركه من الدماء.. يطلع مسدس من جيب البجامه ويضرب نفسه 10 طلقات
هى: تصرخ من البلكونه كده عورت نفسك.. خلاص مش مهم الدكتور دلوقت
هو: يطلع قنبله صغيره من الجيب التانى بتاع البجامه ويبلعها

Friday, November 17, 2006

الرافتانى فى الاغانى الوطنيه


لحد ما الواد


عمر
الرخم صاحبى يساعدنى تجميع كل الاغانى الفاشله. ها نناقش شويه اغانى وطنيه ... حاكم الاغانى الوطنيه دى هى سبب الخراب للى احنا فيه .. ايام الحرب نغنى.. ايام السلم نغنى .. لما ننضرب على قفانا.. نلبس اسود ونغنى.. لما نكسب ماتش كوره نغنى.. لما ا صبحنا احسن ناس نغنى على بعض

خد عندك دى من اغنيه اخترناه لا هيدينى ولا يغدينى ولا فى مصلحه بينو وبيينى غير لولادنا وحب بلادنا وعشان كده احنا اختارناه اخترناه.. اخترناه وفى لقائاته ببلدياته بينسى معاهم رسمياته واما يحاسب حد يعاتب. ما سمعناش عن حد اذاه وباقوله ورزفى على الله

ايووووووه ع الكذب يا جدعان.. ما سمعتوش عن حد اذاه خالص. ولا حتى واحد اتأذى... ياولاد الكذّابه.. احييييييييييييييييييييييييييييييييييييه

ودى من اغنيه يا جريد النخل العالى ميل وارمى السلام..اسمع الكلام

الراحه فيكى واحه.. مريحه وساحه خضرا قادره على السباحه .. لو حتى الموجه غادره

راحه ايه وساحه ايه وخضرا ايه.. الناس دى باين عليهم ساكنين فى الملاهى... ما سمعوش عن امن الدوله والله لو كنت حتى مولود فى بير مسعود.. ما ها تعرف تعوم ولا حتى ترفص برجليك.. انت غريق غريق

الحل الوحيد معاهم انك تحصل لك معجزه غراميه زى عبد الحليم وتصبح تتنفس تحت الماء... بس برده هتغرق

Wednesday, November 15, 2006

الرأفتانى فى الغرام

اخوكم فى ملاعب العواطف والغرام عامل زى الضيف احمد فى حلبات الملاكمه والمصارعه وزى هشام يكن فى ملاعب الكوره ومحمد رضا فى سباق 100 متر حواجز.. وعندما تأتى الى الحديث مع الصنف الناعم.. اخوكم بيحدف دبش عند الكلام فشر اطفال الانتفاضه او اولاد الحاره لما كانوا بيجروا وراء كلب جربان ففى احدى الصولات الغراميه..كانت فى بنت ايطاليه جميله ..صاروخ فشر صاروخ شهاب 2 الايرانى.. واخوكم نازل نظرات لمده شهر كافلاطون.. البنت اتخنقت منى وقالت ابوالهول ده هينطق امتى وجاءت فى يوم وقالت لى تحب تتعشى معاياه فقلت طبعا طبعا.. وفى اليوم الموعود اخوكم لبس على سنجه عشره وكبييت على نفسى جردل كولونيا واخدت زجاجه تانيه فى جيبى.. بأقيت ماشى فى الشارع كأنى محل عطور متنقل..وروحنا المطعم .. وكان مطعم يونانى هنا فى نيويورك.. المزيكا حلوه والنور هادئ.. وقمر قاعد على الناحيه التانيه من الترابيزه والعبد لله قاعد ما تقولش قالب طوب.. القمر يلاغى وويتكلم واخوكم قاعد فى نصف هدومه زى بنت بنوت.. ومنذ هذا اليوم اللعين وانا بطّلت اروح مطاعم هاديه تانى.. انا شكيت ان الجو الهادى ده هواللى سّبب سد الحنك وفى جوله غراميه تانيه ايام ما كنت فى مصر تقريبا فى اولى ثانوى..عملت فيها روميوبتاع العصر الجديد اللى مابيكتبش جوابات وروحت عامل شريط عاطفى.. ع الاقل فى نظرى انا كان عاطفى.. وارسلت الشريط للحبيب ..وعرفت بعدها بكذا يوم من واحد صاحبى ان( هناء) راحت المستشفى من القرف فى صولات تانيه مسخره.. بس خلى الطابق مستور

Sunday, November 12, 2006

الوالى والوزير




مره الوالى قال لوزيرُه

اخبار شعبى وبلدى ايه


رد وزيرٌه وقال له ياوالى

نام وارتاح قلقان من ايه


شعبك داير ويّا الساقيه

وانا بإديّه مغمى عنيه

قال له انا خايف شعبى يفكّر

ياخد الكرسى اللى بيحمينا


وابنى حبيبى خليفتى فى ملكى

هيتوه وسط الناس بعدينا

ها ها ها ها
قصدك يعنى مملوك عادى

يجى القصر ويحكم فينا


مملوك ايه اللى هيوصلك

وانت عساكرك تحت عنينا


كلمه حُر وكلمه حُره

مليا الشارع


شعبى بيحلم بالحريه

وزمنى شكله خلاص مش راجع


عسكر جيشى مش هتأثر

وشعبى هيرفض تانى يبايع

احنا الشعب بإيدنا نكسّر

ترس الساقيه اللى مغمينا


احنا شباب وبنات وشيوخ

اللى حاربنا علشان سينا


الماضى عدى بحلوه ومُره

وبكره بتاعنا وملك ايدينا



يالا تعالوا نشيلوا الوالى

ويّا وزيره


يالا تعالوا وبصوت عالى

نختار غيره

Saturday, November 11, 2006

الاغانى للرأفتانى- جزء تانى

الاغانى للرأفتانى – جزء تانى
بعد كتابه الجزء الاول من الاغانى للرأفتانى. جاءت تعليقات الساده القرّاء والمدونون ساخره لازعه ومليئه باقتراحات الاغانى الغراميه اللى محتاجه تفسير فمثلا حفصه وضحت عامل الوقت واعطت مثال باغنيه لعدويه واحمد شوكير عمل نفس الشيء واعطى مثل بأغنيه لعبد المطب اما شهروزه فلفتت نظرى لعوامل اقتصاديه تانيه نبدأ بعامل الوقت ودوره فى الحاله الغنائيه العاطفيه . فنجد عدويه يقول " الساعه الا ثلث ومعادى معاه 8 لا من السكه دى روحت ولا لاقى سكه ثانيه ...وكثير الناس كثير وانا عايز اركب واطير" عدويه ضرب هنا 100 عصفور بحجر واحد فقال ان "الساعه الاثلث وميعادى معاه 8" وهذا الاسلوب اشتهر به عدويه وهو انه يسيب خيال السامع يحوم فى بحر الخيال زى ابو فراس الحمدانى . عدويه مقلناش الساعه كام الا ثلث... اذكى السامعين هيقول ان الساعه 8 الا ثلث وعدويه عنده ثلث ساعه بحالها علشان بركب المترو اوياخد مشروع او لوكان صايع اوى هياخد تاكسى ويوصل لحبيبه فى ميعاده وهو الساعه 8. لكن عدويه كالسهل الممتنع قطع الطريق على خيال السامع وقال"كثير الناس كثير وانا عايز اركب واطير" يعنى ان الناس كثره والدنيا زحمه فمش نافع تاكس ولا مترو ولا ميكروباص ووسيله المواصلات الوحيده المتاحه لعدويه للوصول لحبيبه هى الطيران فقط. يا سلام ياابو محمد, نزيه والله طول عمرك زى ماكلكم عارفين ان عدويه ظهر فى اواخر السبعينات واوائل الثمانينات فكانت وسائل المواصلات كثيره والدقيقه لها ثمن. اما العبقرى محمد عبد المطلب ظهر فى جيل اسود من السواد لا احترام للوقت ولا اى شئ فقال" السبت فات والحد فات وميعاد حبيبى يوم التلات" الحاج عبده مقلناش هو النهارده ايه .. وبرده ماجبش سيره يوم الاثنين اللى هو المفروض يكون قبل يوم الثلاثاء.. ناس داخت وغلبت علشان تجيب تفسير لكن هيهات. فى ناس تانيه من علوم الفلك قالوا ان يوم الاثنين ما كنش موجود لسه على ايام عبد المطلب وان الناس بدأو يستخدموا يوم الاثنين بعد عبد المطلب بعشر سنين وهذا التحليل اقرب الى غيره من الصواب والله اعلم فى مطرب تانى بيقول" ياولاد بلدنا يوم الخميس هاكتب كتابى وابقى عريس... والدعوه عامه وهتبقى لمه" من سماع هذه الابيات تعرف ان المطرب ده كان عامل كمين لمصر. زى ماتقول كده كان بيتلكك. ازاى؟ اقولك. المطرب ماقلش الفرح يوم الخميس من شهر كام سنه كام؟ عايزك تبقى مستعد للفرح فى اي وقت وده اسمه فى الشعر العاطفى اسلوب الكوارث والاسلوب ده بتستخدمه الحكومه المصريه كثير. فى العبارات والقطارات وحريق المسارح. عايزك تبقى واقف على طراطيف صوابعك مستنى الفرح. ويقال ان المطرب ده كان ناوى يروح لناس معينه يعاتبهم على عدم حضورهم كتب الكتاب وان مش هيقبل العذربتاع احنا معرفناش اى خميس. وفى تفسير تانى يستاهل توضيحه وهو ان المطرب ده كان بخيل وجشع ولذلك وجه الدعوه عامه لكل شعب مصر علشان كل واحد يجيب معاه هديه يوم كتب الكتاب وبقارنه بسيطه للحب ايام زمان والحب اليومين دول هتجد العجب العجاب. ايام زمان كان فى رقه وكسوف فمثلا تجد الرقيقه شاديه تقول "مكسوفه مكسوفه منك مش قادره اقولك انى بأحبك" وتجد ام كلثوم تقول " بدى احكيلك ع للى فى قلبى....وعزه نفسى منعانى" الحب مدوّب الستين بس فى كسوف وعزه نفس . وتجد من غير خشى ولا حياء نانسى بتقول" معجبه مغرمه أنا بأه مش عأوزه الا هو.. حد يقول له أنى بحبه الحب ده كله" نانسى يا ساده مش عاوزه غير الشاب الحليوه ده ياهو يا بلاش يا هتعيط وكانها واحده رايحه الشواربى تشترى جوز شرابات احنا جيل محظوظ اوى ربنا كرمنا بوسائل عديده للاتصالات الغراميه. مثلا واحد عايش فى نيويورك عاوز يلاغى حبيبته فى مصر. ممكن يبعث ايميل رساله ع الموبايل ولو معاه رصيد يرن رنه. يعنى كل الوسائل متاحه مفيش حجه . ايام زمان بأه كانوا بيستخدموا وسائل اتصالات غراميه مختلفه خالص. فمثلا نجد مطرب بيقول " ياوابور الساعه 12 ياللى مقبّل ع الصعيد..خد منى سلام وتحيه وروح لحبيبى فى يوم العيد" شوف الفرق بين جيلنا المرّفه وبين هذا العاشق الغلبان. كل اللى هو عاوز يعمله ان يبعث كارت معايده لحبيبه فى يوم العيد. فلم يجد هذا العاشق سوى قطار الساعه 12 وكان هذا القطار قطار محافظات مش سريع لان المطرب ما لحقش قطار الجرايد بتاع الساعه 5 الصبح علشان يبعث معاه الرساله. ويحكى ان بعد القطار ما وصل لبيت المحبوبه لقاها اتجوزت وخلفت ولدين اسمهم التوتو بكر والأنّا ابو زيد وبتطور وسائل الاتصالات الغراميه نجد الرقيقه نجاه بتقول" وبعتنا مع الطير المسافرجواب وعتاب وتراب من ارض اجدادى وزهره م الوادى" ياسلام يا نوجه. استطاع هذا العصفور العملاق ان يحمل الرساله والوورد والعتاب وكمان تراب من ارض الاجداد. كنا نحن الشعب ظالمين الحكومه ومفكرين ان الحكومه سرقت ارض الاجداد لكن الحق ظهر واتضح ان عصفور نجاه هو اللى اخد ارض الاجداد علشان يوصلها للحبيب المهاجر واحب ان اختم كلامى باغنيه يأس جميع الناس من تفسيرها لان خيالها واسع اوى ولقد عجز الرأفتانى نفسه عن تفسير هذه الاغنيه . يقول مطرب الاسكان الشعبى والعوامل الجغرافيه الفنان محمد رشدى"كعب الغزال يا متحنى بدم الغزال..ما تبطل تمشى بحنيه لايقوم زلزال" فى البوست اللى فات رشدى عمله قلبه شارع وعماره علشان ازمه الاسكان. المره دى هو خايف من قيام الزلازل والحق اقول انا لسه امام عده اسئله محيره لتفسير هذه الدرّه الرائعه يا ترى رشدى حب وعشق هذا الغزال؟ ولا حب طعم اللحمه بتاعته؟ ولو حب وعشق الغزال ليه قتله وصمم انه يوسخ كعب الغزال بدمه؟ ناس بتقول رشدى ما كنش ليه فى اللحوم كان بياكل خضار بس وانه قتل الغزال علشان ياخد شويه دم يعمل بيهم عمل وحجاب لمحمد قنديل ومحرم فؤاد علشان كانوا واخدين منه كل الافراح وكان عاوز يوقف حالهم يا ترى ما نوع هذا الغزال المخيف اللى لومشى ع الارض بهدوء هيقوم زلزال؟ على علمى ان الغزال سريع وخفيف الحركه اسئله محيّره ولازم نلاقى ليها اجابه فى يوم لو مش الرأفتانى الكبير هيبقى الرأفتانى اللى بعده
انا رايح دلوقت اشوف شويه فيديو كليب من بتوع مروه واليسا والناس الحلوه دول يمكن الاقى حاجه تانيه تتكتب

Thursday, November 09, 2006

الاغانى للرأفتانى









العوامل الجغرافيه لها دور كبير فى العشق والحب وخلافه فمثلا الحاج محمد عبد المطلب قال (ساكن فى حى السيده وحبيبى ساكن فى الحسين وعشان انول كل الرضا يوماتى اروحله مرتين) وعلى ايام الحاج محمد الظاهر ماكنش فى موصلات لان المسافه من السيده للحسين مش محتاجه العويل واللطم دا كله. امال لو كان هوه ساكن فى الهرم وحبيبه فى مدينه نصر مثلا كان عمل ايه

والعبقرى احمد عدويه خطى على نفس الخطى الجغرافيه حيث قال( سعيده يا حلوه سعيده..موصلاتك بعيده .. أؤمرى وانا اجيلك ماشى ..لما لمصر الجديده) وذكاء عدويه انه مقلناش انه هيمشى لمصر الجديده منين بالضبط. فترك تحديد نقطه الانطلاقه لخيال السامع ودى نقطه ذكيه جدا من عدويه علشان يخلى كل واحد يحط نقطه الانطلاقه الخاصه بيه ولو انى اشك ان اى احد من عشاق عدويه يعرف اى حد ساكن فى مصر الجديده

ومن الناحيه الاقتصاديه مثلا نجد المطريه مروه اللى واخده الدنيا بصدرها تقول فى احد اغانيها ( فيها ايه لو اكلم صاحبك .. ليه تخلى الغيره تصاحبك) وهو دليل اقتصادى قيّم للتوفير. فالست مروه عايزه تخدم حبيبها وصاحبه فى نفس الوقت وهى بذلك تكون وفرّت طاقه فتاه اخرى للقيام بنفس المهمه الاقتصاديه المقدسه.
وقد حذى على حذو مروه مطربات كثيرات ذوات عقليه افتصاديه فزّه فشر اتخنها عالم فى الاقتصاد والتوفير. فمنهن نجلا ونانسى وهيفاء واليسا ورغم اختلاف الشكل وحجم الشفايف والاعضاء والقطع البلاستيك المزروعه الا انهم اجتمعوا على الاقتصاد والتوفير فى حجم الملابس المستخدمه. فكلهن اجمعوا ووافقوا انهن يعروّا اجسادهن فى سبيل توفير الخامات الضروريه لصناعه الملابس للمساكين والمحتاجين

وفى نظريه اقتصاديه اخرى للخبير محمد رشدى حيث حمل على كتفيه المشكله السكانيه وخطى خطوات جريئه لم يخطوها خبير التخطيط كمال الجنزورى ففى احدى اغانى رشدى الاقتصاديه قال ( قلبى يا قلبى يابو الحياره.. والله لاعملك شارع وحاره .. واحط نخله م الورد الاخضر وحبه حبه تصبح عماره) يا سلام يا رشدى. مش هيبنى اى عماره جوه قلبه الواسع اوى. دى الشارع اللى هتبقى فيه العماره , هيكون فيه شجر وورد وخضره و ممكن كمان يجيب تصريح من الحى ويعمل نافوره فشر نافوره قصر المنتزه

والى لقاء اخر من الاغانى للرأفتانى مع الاعتذار للأصفهانى الكبير

Monday, November 06, 2006

بصراحه كسلان اكتب



مفيش حاجه ينكتب عنها. الشغل زحمه ومذاكره الماجستير أرخم من كمال الشاذلى واحمد فتحى سرور.بمناسبه احمد فتحى سرور. بكره ان شاء الله نوفمبر 7 الانتخابات التشريعيه هنا فى امريكا. كونجرس وخلافه وعقبال عندكم لما صوتكم يبقى له قيمه اخوكم رايح ينتخب بكره واتذكر اول مره انتخبت فيها وكانت انتخابات العمده هنا فى نيويورك ولما الناس المشرفين على لجنه الانتخابات عرفوا انها اول مره لى قعدوا يصفقوا ويهنونى بممارسه اول حق ديمقراطى يكفله لى الدستور الامريكى وسلم لى ع الماده 76 ومعدلات الماده 76

Monday, October 30, 2006

الحزب الوطنى وغسيل المخ

مره وانا فى الاعدادى الناظر سأل علىّ والفرّاش جه اخدنى من قفاى لحضور اجتماع حضره الناظر وطول ما انا ماشى قاعد افكر ايه اللى حصل ويا ترى الناظر عيزنى ليه انا كنت امين الفصل. جايز علشان الاذاعه المدرسيه لا طاب علشان جماعه الرحلات بس انا مليش دعوه بالحاجات دى واخيرا قلت يبقى الناظر هرش انا احنا بنشرب سجاير فى الحمام وان الفراش بلغ عننا وهتبقى فضيحه قلت لا لو كده كان الناظر طلب كل الشله الضايعه اللى قاعده جانبى. قلت جايز عصام بتاع الكبده اللى ع القمه قاله ان احنا سألناه على طريق ام عصام بتاعه التوسيفان وعصام عمل فيه الشاب المخلص وبلغ عنا برده الموضوع مش راكب خصوصا ان كل العصابه قاعده فى الفصل. المهم دخلت لحضره الناظر ووجدت كل امناء الفصول واعضاء اتحاد الطلبه قلت تمام كده مفيش مشاكل. وكان موجود جنب حضره الناظر واحد قالوا لنا انه من الحزب الوطنى الحاكم وكان الكلام ده فى اواخر الثمانينات- اوائل التسعينات وكنا على ابواب انتخابات مجلس الشعب. وايامها كانت جماعه الاخوان المسلمين بتعلن عن المرشح بتاعها بعباره "الاسلام هو الحل" والاستاذ ممثل الحزب الحاكم كان موجود علشان يوضح لنا من هم جماعه الاخوان المسلمين دول. وقعد ا خينا ده يوضح لنا ان احنا مسلمين امال احنا ايه وان الجماعات دول ما هم الا قتله بدليل قتل السادات وغيرها من الحوادث الارهابيه اللى ورونا صورها وقعد يخوف فينا والحق اقول ان فى بعض الزملاء بطلوا يصلو من يومها. وان احنا عشنا فتره الاعدادى والثانوى معتقدين تمام الاعتقاد ان الجماعه دول شياطين والعياز بالله وان الحزب الوطنى الوديع ما هو الا رمز للعفه والطهاره وفضلنا ع الحاله دى لحد ما بطلنا نقرا الاهرام والاخبار والجمهوريه. واتضح لنا بعد ما كبرنا وبدانا نفكر ان الاخ مندوب الحزب الوطنى كان فى مهمه رسميه لجميع مدارس المدن الكبرى لعمل غسيل مخ لجميع الطلبه والحق اقول انه نجح نجاح باهر فى ارهابنا وتخوفينا من جماعه الاخوان

Tuesday, October 24, 2006

صلاح جاهين


الحاج صلاح جاهين قال

أنا قلبي كورة و الفراودة أكــــــــــم

ياما اتنطح و انشاط و ياما اتعكـــــم

و اقول له كله ح ينتهي في المعـــاد

يقول بساعتك ؟ و الا بساعة الحكم ؟

عجبي !!!




والشاعر الغلبان قال

انا وسط صحبه من الحبايب من كل شكل وصنف

فيهم اللى حاضر وللى غايب يتعدوا ميه والف

منهم نسيبى وكمان قريبى من غير م اقول واحلف

دوّرت بين الشوش على وش شبه الوصف

Monday, October 23, 2006

كل سنه وانتوا طيبين

عيد مبارك
وجمال مبارك
وسوزان مبارك
وعلاء مبارك
وانا وانتا
وسمعنى سلام ليه يا حبايب حلى ذادى ومررتوه

Tuesday, October 17, 2006

الوقت لا يعنى شئ

فى بلاد الهجره هنا فى مميزات كتيره وطبعا فى عيوب. العيوب ممكن تتفادها لو انت مشيت فى طريقك عدل. والمثل بيقول امشى فى طريقك عدل يحتار عدوك فيك. لكن المميزات كتيره. و من اهم خصائص المجتمع الامريكى هو احترام المواعيد. ومواعيد الدكتور ممكن تكون 5:15 او 8:10 وكذلك مواعيد القطارات والافلام وهكذا. والمهاجرين المصرين منهم اللى يبتعود ع النظام ده ومنهم اللى لسه ماشى على نظام يا اهل المحبه ادونى حبه. فمثلا فى نوعيه من المصريين لايزال عمل بنظام بعد الظهر وبعد العصر. يعنى يديك ميعاد ويقولك اشوفك بعد العصر. وبعد العصر دى معناها من الساعه 4 لحد اذان المغرب ومعال ربنا اتلطع لك اربع او خمس ساعات. الاحساس بالوقت معدوم. فمثلا واحد يقولك انا رايح مشوار قيمه ساعه. وقيمه الساعه دى المفروض انها 60 دقيقه مع اى حد فى الدينا الا نوعيه معينه من المصرين. قيمه ساعه يعنى ست سبع ساعات. واى صاحب محل مصرى هنا فى نيويورك بيفتح المحل بعد الظهر الفتره الصباحيه مش موجوده او اتلغت من دفتر المواعيد ويفضل فاتح لنصف الليل لما الشوارع بتكون فاضيه تماما. وفى اخر السنه بيشتكوا انهم بيعملوش فلوس. طاب ازاى تعمل فلوس وانت فاتح والناس نايمه وقافل والناس صاحيه. الحق اقول ان فى ناس كثيره اتعودت ع النظام ونجحوا نجاح كبير فى مختلف المجالات

كلام جرايد

قرأت فى جريده الوفد المصريه ان هناك 5 ملايين مصرى بالخارج محرمون من حق الانتخاب ومت على نفسى من الضحك لان فى مصر اكثر من 60 مليون محرومون من حق الانتخاب برده فى جريده المصريون الاحرار الاكترونيه قررت مؤسسة ساويرس الاجتماعية، والتي ترأسها السيدة لوزة ساويرس والدة رجل الأعمال نجيب ساويرس، التبرع بـ 10 مليون دولار لصالح المسيحيين في جنوبي السودان؛ وذلك في صورة مساعدات عينية، كما تقرر فتح حساب للتبرع لهم في ظل ما يعانونه من أوضاع معيشية سيئة ياللاه اى خدمه يا جدعان معلون مصر واللى فيها فى جريده المصريون الاحرار الاكترونيه وصف الرئيس الإيراني محمود أحمدي نجاد نظيره الأمريكي جورج بوش بأنه "يتلقى الوحي من الشيطان". وقال أحمدي نجاد أمام حشد من مناصريه إنه يتلقى هو الوحي من الله، وإن الله يظهر المعجزات لمن يؤمن حقا به. ونقل الإعلام الإيراني عن أحمدي نجاد قوله أن بوش "أيضا يتلقى الوحي، لكن من الشيطان ايوه يا عم نجادى مهى العمليه ناقصه هبل والعيب مش عليك العيب على العبط اللى قعدول يهيصوا لك اعترفت سميرة الطيب وكيل الوزارة ووكيل مديرية التربية والتعليم بمحافظة القاهرة، بوجود نسبة كبيرة من الطلاب بالمرحلة الابتدائية لا يعرفون القراءة ولا الكتابة أقطع دراعى لو كانوا المدرسين بيعرفوا يقروا هما كمان شعبان عبد الرحيم يستعد لتسجيل اغنيه للرد على بابا الفاتيكان معلش يا شعبولا احنا متقلين عليك شويه انت مش عارف تلاقيها منين ولامنين دنمارك واسرائيل البابا. بجد يعنى حسك معانا لحد ما نلاقى راجل تانى جنبك

Friday, October 13, 2006

مروه.. بيرم.. احمد شوقى باشا













فى البدايه ارجو المعذره من كل واحد هيقرأ الكلام ده لان الصوره الموجوده مع المقال تعتبر اكثر الصور احتراما للمطربه مروه. يعنى م الاخر لم اجد اى صوره ثانيه عليها هدوم اكثر من كده امبارح واحنا بنفطر فى مطعم مصرى فى نيويورك كان فى اغنيه شغاله فى الكاسيت لمطربه اسمها مروه وكان اسم الاغنيه (اهدى يا واد) و كانت اغنيه اخر مسخره والحقيقه مروه اللى كانت المفروض تهدى شويه وما تتعبناش معاها. كلمات الاغنيه لها ايحاءات حنسيه بحته ولا علاقه لها بالطرب. ولما سمعت كلما ت الاغنيه خصوصا ان انا انسان باحب الشعر العربى تذكرت بيرم التونسى اللى قالوا عنه انه ملك العاميه. بيرم التونسى هو اللى كتب اغانى انا فى انتظارك والحب كده و الهوا غلاب وكل الاحبه لام كلثوم. ولما كتب الاغانى دى واخذها زكريا احمد علشا ن يلحنها وام كلثوم غنتها زعل امير الشعراء احمد شوقى وقال كلمه شهيره:( والله انى اخاف على اللغه العربيه من عاميه بيرم). احمد شوقى يا ساده كان خايف على اللغه العربيه من اغنيه انا فى انتظارك مليت. ربنا رحمه انه مات من زمان لان لو احمد شوقى باشا سمع اغنيه اهدى يا واد وبلاش تنطيط كان زمانه ضرب نفسه بمطوه قرن غزال صناعه حلوان و مسك مروه دى وفرقع لها البلونات الهوائيه اللى عملاهم دول

Thursday, October 12, 2006

القائد


قائد الطلعه الجويه
قائد المسيره الاقتصاديه والاصلاح السياسى
رائد الملحمه الوطنيه لاستعاد تراب طابا
الضربه الجويه اساس نصر اكتوبر
اول من نادى لانتخابات رئاسيه حره ونزيهه
حق وتراب الوطن لا نساوم عليه
الجيش المصرى ليس للمساومه انما للدفاع عن الوطن
والله ان مش عارف من غير الراجل ده كنا عملنا ايه. شعب جاهل مش عارف مصلحته

Wednesday, October 11, 2006

خالد صاحبى واحمد عدويه

خالد صاحبى المثقف اياه بتاع الثوره البرتقاليه زعلان اوى ان انا باسمع احمد عدويه وخالد قالى فى مره:( انا مش عارف ازاى انسان مثقف زيك ومتعلم فى امريكا بيسمع احمد عدويه). والحق اقول ان احمد عدويه هو احد اربع مطربين عرب باسمع لهم فقط. فانا اسمع لمحمد منير و حنان ماضى وحميد الشاعرى واحمد عدويه فقط لاغير. واذا قارنت هؤلاء المطربون سوف تجد ان معظمهم فيه ميزه معينه وهى ان مفيش مطرب تانى يقدر يغنى اغانيهم. فعندما تسمع منير مثلا تعرف ان الاغنيه اللى بيغنيها لا تصلح الا لمحمد منير فقط وكذلك حنان والرومى وعدويه فهم مميزون فى المجال بتاعهم لابعد الحدود. لو بصيت مثلا لاى اغنيه لعمر دياب ستجد ان الاغنيه اللى بيغيها ينفع انك تسمعها بصوت مصطفى قمر او محمد محى او اى مطرب اخر انا بدأت اسمع عدويه من وانا صغير واللى عرفنى على عدويه واحد صاحبى اسمه حماده كفته وطبعا هاتسأل ايه اللى خلى واحد زى يعرف واحد اسمه كفته لكن ده موضوع عايز شرح ومش وقتهعدويه بالنسبه لى بيمثل تاريخ وفتره مهمه من فترات تاريخ مصر الحديث وهى فتره الانفتاح وبدايه حكم السادات بعد حرب اكتوبر. عدويه كان ملك الطرب و كان بيعبر عن فئات مهمه جدا من المجتمع المصرى. عدويه يا ساده ماضى وتاريخ وعلى راى المثل من فات قديمه تاه ويا اخونا ياللى فوف ما تبوصوا على اللى تحت وللا اللى ساكن فوق ما يبصش ع اللى تحت وحبه فوق وحبه تحت

Tuesday, October 10, 2006

احتفالات اكتوبر

ابشروا ياشباب لقد تم بحمد الله احتفاليه اكتوبر بسلام وقد حضر الحفل نخبه من الوزراء واعضاء السلك الدبلوماسى ولفيف من نجوم المجتمع كما نقلت الخبر جريده الاهرام . و مع انى فخور كل الفخر بهذا النصر الكبير الا انى اوّد ان اسال عن المصاريف اللى اندفعت لاقامه هذا الحفل الشيّق اللىملوش اى لازمه كان احد نجومه تامر حسنى اللى هرب من الخدمه العسكريه وكأنه يا عينى حاسس بالذنب من عملته وقال لنفسه اهى اعنيه فى احتفال اكتوبر كأنى حاربت بالضبط. المصاريف اللى اتصرفت دى مش كان اولها نوزعها على ارامل ويتامى شهداء هذه الحرب واقطع دراعى لو كان اى مسؤل يعرف اى شئ عن هؤلاء اليتامى والارامل

السفاره فى المغاره


امبارح عملت فيها الشاب الوطنى الهمام وقررت انى اجدد جواز سفرى المصرى. كل مره انزل مصر بانزل بالبسبور الامريكى لكنى قررت ان انزل بالبسبور المصرى المره اللى جايه. اخذت اجازه من الشغل وروحت اتصورت ومليت الورق وصحيت من النجمه علشان اروح القنصليه المصريه اجدد البسبور. كنت واقف امام السفاره من الساعه 9 صباحا. الباب كان مقفول انا قلت لسه البهوات ما وصلوش وفضلت واقف لحد ما عامل نظافه ظهر وقالى ان مستنى السفاره فرضيت عليه نعم فقالى السفار مغلقه النهارده للاحتفال بيوم كولمبس. قلت للراجل كولمبس ماله ومال السفاره المصريه ياعم الحاج, قال لى ان السفاره بتقفل دايما فى هذا اليوم. واتضح لى ان البهوات بتوع السفاره بيقفلوا فى الاعياد المصريه والامريكيه واعياد المسلمين والمسحيين. يعنى يدوب بيفتوح اسبوعين فى السنه والمواعيد من الساعه 10 صباحا للساع 2 ظهرا فشر السجل المدنى بتاع مينا البصل فى اسكندريه. واقسم لكم ان نصف العاملين فى السفاره ما يعرفوش مين هو كولمبس ده اصلا بس اهو فرح اجازات والله يرحم لما الواحد منهم كان يدوب ياخد اجازه مولد المرسى ابوالعباس او عيد تحرير سيناء بالعافيه

Monday, October 02, 2006

قرأت فى جريده الاسبوع عن جريده الاهرام

فى العدد 497 للسنه العاشره المؤرخ الاثنين 2 اكتوبر لسنه 2006 , كتبت جريده الاسبوع ان هناك اتجاه لتحويل 8 مسؤلين من اداره الاهرام السابقه والحاليه للتحقيق بتهمه الفساد والاضرار بالمال العام. وده مش المهم لان الاضرار بالمال العام فى كل مكان وعلى عينك يا تاجر اللى لفت انتباهى هو الدرجات الرفيعه فى السلم الوظيفى لهؤلاء البشر 'إبراهيم نافع' رئيس مجلس الإدارة ورئيس تحرير 'الأهرام' السابق و'علي غنيم' نائب رئيس مجلس الإدارة، مدير عام مؤسسة 'الأهرام' السابق و'محمد محمود حمدي' الشهير 'بحسن حمدي' المدير العام المشرف علي قطاعات الاعلانات ووكالة الأهرام للاعلان و'محمد منصور' مدير عام وكالة الاهرام للاعلان و'محمد علي محمدين' مدير عام الادارة المركزية لحسابات الاعلانات والوكالة و'هدي عوض الله' مدير عام الادارة المركزية لحسابات الاعلانات والوكالة و'فتحي فهمي عبدالموجود' مدير عام الادارة المركزية لتحصيل الاعلانات و'محمد يوسف حبيب' مدير عام الاعلانات المبوبة يعنى اللهم صلى ع النبى كده جريده الاهرام دى فيها كام مدير وكام رئيس مجلس اداره وكام هيئه مركزيه وكام وكاله. كل هذه المناصب و جريده الاهرام عاجزه على نشر خبر واحد صحيح أمال لو كانت جريده من اللى بجد كنا متنا بأه علشا ن نوفر رواتب المديرين المناصب اللى مكتوبه دى مش موجوده فى مايكروسفت ولا فى النيويورك تايمز. عليه العوض و منه العوض و صوتى ياللى مش غرمانه

Wednesday, September 27, 2006

جمال بيه النووى

الفرقعه النوويه بتاعه جمال مبارك فى مؤتمر الحزب الوطنى عمله زى فرقعه البمب الفشنك اللى يدوب بيطلع ريحه. عم جمال بيه بيسمع كلام عمو اسامه الباز اللى شاغل نفسه ليل نهار علشاي يخلى الشعب يحب جمال بيه. لكن الشعب عمره ما هيحب جمال بيه لان جمال بيه عمره ما عاش زى اى واحد من الشعب. فعمو اسامه قال له علشا ن الشعب يحبك لازم تبقى بطل فى عين شعب وعلشاي يبقى بطل لم يجد غير عمليه الطاقه النوويه العبيطه. اولا مصر مش زى ايران او باكستان. مصر فيها حكومه من نوع موافقه وكله نفسى وملعون ابو الشعب. فحكومه من النوع ده مستحيل انها تكون بتعمل لوجهه الله والوطن. والشئ العجيب الان ان كل عضو من اعضاء الحكومه بيعمل جاهدا لتحسين صوره جمال بيه علشان موضع التوريث اياه. والحكومه الفاشله المفروض تقول لجمال بيه ان اقرب واسهل طريقه لقلوب الشعب ان جمال بيه يكون واحد من الشعب نفسه يعيش عيشته ويجرب. جيمى بيه المفروض يشأل نفسه هل كل مواطن مصرى فى سنه عنده 40 سنه من حقه يبقى رئيس زيه؟ هل شباب مصر اللى عندهم 40 سنه ولسه لم يتزوجوا هل من حقهم ان يكونوا رئيس لجنه السياسات فى الحزب الحاكم ورئيس جمعيه رجال الاعمال المصريين الامريكيين؟ جيمى بيه لازم يحس بالشعب علشان الشعب يحس بيه. والحق اقول ان الايام القادمه هتكون سواد على حكومه الظل لان الشعب طفح والشباب مش زى ايام زمان مش هتفرق اعتقال او سجن كله زى بعضه وبره زى جوه ولما نشوف جمال بيه هيعمل ايه

Thursday, September 21, 2006

فى موضوع الحزب الوطنى

اى حاجه بخصوص الحزب الوطنى بتعكر الدم وبترفع الضغط والسكر والمراره والقولون والاعصاب والمفاصل وكل جميع الامراض الموجوده فى الشعب المصرى الغلبان
فى ختام مؤتمر الحزب الوطنى, جميع الكوادر شكروا الشعب المصرى على ثقته فى الحزب وانتخاب اعضائه الافاضل لجميع المناصب كما عاهد كوادر الحزب الوطنى الشعب المصرى على مواصله المسيره. وكلمه مواصله المسيره دى بالذات بتعكر الدم اكثر واكثر من غيرها من الكلمات. فكلمه مواصله معناها ان هناك بدايه ونهايه و ان هناك صله بين الاثنين. ونحن كشعب لم نرى البدايه و لا نعشم فى النهايه. فما هى المسيره المقصوده هنا. الاصلاحات الوهميه والخياليه اللى كلهم مصممين عليها ما هيش فارقه معاناه طالما البشوات ضباط الشرطه وغيرهم مازالوا بيستعبدوا الشعب. فى هذا المؤتمر البائس سمعت كلمات من صفوه الحزب عن الاصلاح الاقتصادى والسياسى والدستورى وغيرها من الكلمات اللى الشعب نساها ولما بسمعها معدته بتقوم عليه. ياناس الرحمه شويه الشعب مش غبى اوى كده. كل المطلوب هو رغيف العيش

Monday, September 18, 2006

البابا

موضوع البابا كبر وكلام البابا يدل على جهل كبير لأعلى سلطه كنسيه فى العالم. يا اما البابا اهبل ومش عارف هو عمل ايه بالضبط يا اما كان عامل دماغ و الناس اللى حواليه كبروها فى دماغه وسخنوه. وفى كلتا الحالتين هو غلط وخلاص. رد الفعل الغاضب بتاع المسلمين فى كل مكان صحيح. والتظاهر لازم يكون تظاهر سلمى والعنف لا مقام له. لان العنف سوف يؤكد كلام هذا البابا وكما قلنا سابقا ان عمر العنف ما حل مشكله و اعطى تعاطف او شد انتباه لقضيه ما. والحق اقول ان اللى شجّع هذا البابا على هذا الكلام هو معرفته مسبقا ان الحكام العرب ايديك منهم والبلاط. كل واحد منهم مشغول بأمور الدينا من تزوير انتخابات لاعتقال مواطنين لتأمين مستقبل اولاده والحاشيه وغيرها من الامور. لو كان هذا البابا يعلم ان الحكام العرب هيطرودا سفير الفاتيكان او على الاقل يوبخوه ما كان له من هذا القول حتى لو كان عامل دماغ كلّه او بنزين زى دماغ التوتو بكر. ويرجع مرجوعنا دائما الى نقطه مهمه وهى ضعف الدبلوماسيه العربيه والاعلام العربى اللى من نوع الاهرام والاخبار وحزب البعث وجريده الزحف الاخضر بتاعه معمر القذافى. واسأل نفسك لو كان هذا البابا قد قال نفس الكلام عن اى ديانه اخرى ماذا سيكون رد الفعل العالمى؟ أدعو كل مواطن ان يتظاهر سلميا وان يدعو الله ليل نهار ان يفك الغمه والهم عن الاسلام وهذا الحديث هو التفسير الامثل لما نحن فيه الان عن ثوبان رضي الله عنه قال : قال رسول الله صلى الله عليه وسلم "يوشك الامم أن تداعى عليكم كما تداعى الأكلة الى قصعتها فقال قائل أو من قلة نحن يومئذ قال بل أنتم يومئذ كثير ولكنكم كغثاء السيل ، ولينزعن الله من صدور عدوكم المهابة منكم ، وليقذفن الله في قلوبكم الوهن . فقال قائل يارسول الله وما الوهن ؟ قال حب الدنيا وكراهية الموت. صدق رسول الله

Friday, September 15, 2006

مغاره جحا .. إقف فى الطابور يا سيّد

ذكرنا فى احدى المقالات السابقه ان التمثل الدبلوماسى لاى دوله مهم جدا وان السفراء واعضاء السلك الدبلوماسى لاى دوله لابد ان يكونوا على مستوى المسؤليه لانهم واجهه البلد فى الغربه القنصليه المصريه فى نيويورك اشبه بمغاره جحا ومعظم العالمين بها ليس لهم اى خبره وعلاقتهم بالدبلوماسيه الدوليه كعلاقه ام ربيع بتاعه التوسفان بالكمياء. فأم ربيع بتاعه التوسفان الكائنه فى حجر النواتيه فى اسكندريه الحبيبه تعرف كيف تبيع جميع انواع الادويه المخدره للطلبه . لكنها لاتعرف تركيبه اى دواء من هذه الادويه. كذلك حال موظفى القنصليه المصريه فى نيويورك. فأى سفاره تعتبر الامن والامان لمواطنى هذه الدوله. وتعتبر البيت البعيد عن البيت. لكن القنصليه بتاعتنا فى نيويورك بتتفنن فى تعكير دمك واستفزازك لابعد حد ممكن. فمثلا اجراءات اسخراج شهاده ميلاد او تجديد جواز السفر اشبه بالولاده القيصريه المتعثره وانت وحظك لو الاستاذ فلان مزاجه رايق يبقى 100% ولو مزاجه متعكر يبقى اعمل حسابك تضّيع لك يومين شغل فى الهواء لانك هتنتظر الاستاذ فلان لحد ما يظهر منين الله اعلم. والقنصليه بتاعتنا دايما ما عندهمش فكه. فمثلا لو شهاده الميلاد بتتكلف 15$ وانت دفعت 20$ الموظف هيقول لك ان مفيش فكه وطبعا علشان تخلص وترجع لشغلك هتقول له مش مهم بس خلصنى بما انك تعيش فى نيويورك تعتقد ان المعيشه فى هذه المدينه المتقدمه مدنيا سوف تغير تفكير عقول هؤلاء البشر لكن هيهات هيهات.. كأنك داخل اى سجل مدنى فى مصر المحروسه . وهذا سبب واضح و اكيد عى انقطاع الصله بين المهاجرين وبين الوطن الام. لانهم بيقرفوك فى مصر لحد متهاجر وبعد متهاجر بيقرفوك هنا لحد ما تضرب نفسك بسكينه او تبلع عشره كيلو برشام وحسبى الله ونعم الوكيل

Wednesday, September 13, 2006

شفت فى لندن

متظاهر اسمه براين هو. ناصب خيمه امام حديقه البرلمان البريطانى من سنه 2001. براين بدأ اعتراضه وتظاهره على الاوضاع الاقتصاديه فى بريطانيا بعد احتلال العراق. نظره براين بدات تتغير وبدأ يتظاهر اعتراضا على قتل الابرياء فى العراق وافغانستان الدنيا هاجت وعم براين انشهر والصحافه فى كل انحاء الدنيا استضافته الا الصحافه المصريه طبعا والناس من كل الدول بدأو يرسلول رسائل شكر وتشجيع واليافطه الواحده اللى براين بدأ بها إعتصامه اصبحت 100 يافطه والصوره الواحده اصبحت 1000 صوره والموضوع كبر على الاخر. بعض اعضاء البرلمان من المعارضه اصبحوا من المؤيدين لبراين الحكومه البريطانيه حاولت بشتى الطرق انها تهد الخيمه بتاعه براين وتشيل الافتات والصور لكن هيهات براين راسه والف بلغه قديمه ان ده حقه الدستورى كمواطن بريطانى فى اكتوبر 2002 الحكومه البريطانيه رفعت قضيه على براين علشان يمشى من الميدان ويشيل الخيمه لكن المحكمه البريطانيه حكمت لصالح براين ان ده حق التظاهر مكفول للجميع فى سنه 2005 الحكومه البريطانيه فصّلت قانون جديد يمنع التظاهر امام البرلمان فى مسافه اقل من كيلو متر فى شهر اغسطس 2005 المحكمه البريطانيه العليا حكمت لصالح براين لان القانون جاء بعد براين ما اتظاهر ولذلك يبقى الوضع على ما هو عليه الحكومه استأنفت الحكم فى محكمه اعلى و بعد تدخل الحكومه حكمت المحكمه ان براين لازم يشيل الاف الافتات من امام البرلمان فى الساعه 3 صباحا يوم 23/5/ 2006 جهز البوليس البريطانى عمليه اجلاء من بتوع حبيب العادلى وراحو لبراين علشان يشيلو الافتات والصور اللى الحكومه البريطانيه قالت عليها ان مخجله للحكومه امام العالم وفعلا شال البوليس كل الافتات الا الافته الاصليه اللى براين بدأ اعتصامه بيها من 5 سنوات اقرأ المزيد عن براين هنا: http://www.parliament-square.org.uk/

Wednesday, August 30, 2006

الثوره البرتقاليه وخالد القبطان

خالد صاحبى إنسان مثقف وقارئ جيد ودارس تاريخ ورمانسى أحيانا ودى الصفه الجديده اللى أكتشفتها فيه إمبارح لما قالى أمتى الشعب يفوق وعمل ثوره. أنا قلت ثوره زى ثوره يوليو والثوره الفرنسيه ولا ثوره الجزائر ولا حتى ثوره تجار الفراخ. لكن خالد قال لى ثوره برتقاليه ولو واحد غيرى يبسمع خالد كان فكر انها ثوره برتقال وسفندى. لكن خالد قصده إن الشعب بكل فئاته وطوائفه يحمل اعلام برتقاليه ويمشى بها فى الشوارع تعبيرا عن الغضب وعدم الرضا عن الاوضاع. مش بـأقول لكم انه رومانسى. اولا الشعب معهوش ثمن القماش والخشب اللى هيعملوا بيه الاعلام. ثانيا حتى لو كل عشره اشخاص عملوا جمعيه ووفروا ثمن القماش والخشب مفيش ولا واحد منهم هينزل الشارع بعلم الا يوم ماتش الاهلى والزمالك. الحل؟ هو التفاعل مع الواقع المرير وترك السلبيه اللى احنا عايشين فيها من ايام احمس الاول. لابد ان ننسى كلمه وانا مالى. لابد ان نحترم أدميتنا علشان رجال الشرطه والداخليه يحترمونا. إرفض انك تدفع رشوه لما تروح تطلع بطاقه شخصيه أو مستخرج شهاده ميلاد. قول لجيرانك ان فلان اللى شغّال فى المكان الفلانى مرتشى. أرفع قضيه على ضابط شرطه ظالم. أطلب حقك وارفع صوتك فلا يضيع حق وراؤه مطالب. لا بد ان نشارك فى الانتخابات حتى لو عرفنا النتائج مسبقا. ارفض الظلم مهما كان. شارك فى النقابات واتفاعل معاها. أيّد وارفض. مارس حريتك اللى ربنا خلقك بيها. مارس الدمقراطيه فى بيتك علشان اولادك يعرفوا يعنى ايه حريه. تذكر ان كلمه حق عند سلطان جائر تسوى كنوز الارض. فى مثل مصرى بيقول: يا فرعون إيه فرعنك قال ما لقتش حد يلمنى. وهو ده حال الشرطه المصريه فراعنه لم يجدوا من يقول لا. لابد ولا مفر من التعامل مع الواقع بعقلانيه وحكمه .وتذكر أن عمرالعنف و القنابل ما حلومشاكل

تغير وزارى إيه يا عم الحاج

لن يثق الشعب المصرى فى حكومه إبن الذوات أحمد بك نظيف طالما ظل هو متمسك بغطرسثه والسخريه من الشعب. المصريون لا يرغبون فى ركوب المرسيدس والمصيف فى باريس والتسوّق فى هارودز فى لندن كما يفعل انناء الصفوه من الوزراء والمسؤلين. كل ما يرغب فيه الشعب هو العيش الكريم. والمقصود بالعيش الكريم ليس المادى فقط وأنما المعنوى وطالما ظلّ ضباط الشرطه ووزاره الداخليه يحتقرون المواطن ويمسحوا بكرامته الارض فى كل زمان ومكان سوف يظل المواطن المصرى فى حاله غضب وغليان حتى يقضى الله امرا كان مفعولا. التغير الاول لكسب ودّ الشعب الضائع هو تغير وزير الداخليه الجبار الذى حلل الظلم على نفسه وقد حرمه الله على الجميع العدل هو اساس الحكم وطالما غاب العدل ظهر الظلم والارهاب

Monday, August 28, 2006

هتوحشنا يا سولم


تم تعين المحافظ المحبوب عبد السلام المحجوب وزبرا للتنميه.على الرغم من حزنى الشديد ان اللواء المحجوب ترك الاسكندريه بعد جهوده الرائعه لتطوير اسكندريه الا أنى سعيد أيضا لان اللواء المحجوب رجل شريف ومش بتاع شيلنى واشيلك. المحجوب عمل فى اسكندريه حاجات جميله جدا وشجّع كل الاسكندرانيه ان هم يخدموا مدينتهم بنفسهم. ولذلك وجدنا رجال أعمال اسكندرانيه وغيرهم تبرعوا باشياء كثيره جدا لتطوير المدينه الجميله
أرجو ان المحافظ الجديد يكون على مستوى المسئوليه وما يرجعناش لايام الجوسقى الكريهه. لأن احنا اتخنقنا على الاخر. كما أرجو ان اللواء المحجوب يقوم ببطوير وزاره التنميه كما طوّر الاسكندريه. المحجوب سوف يواجه صعوبات كثيره فى قاهره المعز. لان هناك حرب كبيره ومجلس الوزراء مش زى مجلس المحافظه واعداء النجاح هناك على عينك يا تاجر وللى ما يشترى يتفرج. الوزراء هناك بيقلعوا الجزم لبعض وبيقولوا طظ فشر احمد عز وطلعت السادات. والكل هيبقى خايف من المحجوب لانه مش بتاع رشاوى ووسايط. ربنا يسترها ويوفق كل شريف وينتقم من كل واحد ما عندوش ضمير من بتوع قطار القليوبيه والبحيره وعباره السلام وقصر ثقافه بنى سويف ولحد أخر اللسته اللى انتو حافظينها

Wednesday, August 23, 2006

قطار قليوب.. كلاكيت تانى مره

إستخدام الموصلات العامه فى مصر يعتبر مغامره وأنت وحظك. كل يوم وأنت خارج من البيت المفروض تودع أهلك لان الله وحده أعلم إذا كنت هتشوفهم تانى ولا لأ. حوادث القطارات فى مصر مروّعه وضحاياها هم الغلابه الذى لا حول لهم ولاقوه. وكالعاده الغلطه هتكون غلطه عامل التحويله الغلبان. فلم نسمع عن التحقيق مع وزير المواصلات أو إستقاله رئيس الوزراء اللى دايما بيسخر من الشعب المصرى كأنه على راسه ريشه وإحنا ولاد كلب
سمعت خبر هذا القطار وأنا فى لندن والخبر كان فى جميع الصحف وفى الصفحه الاولى كمان والواحد مش عارف يقول إيه أو يعمل إيه سوى حسبى الله ونعم الوكيل. الحكومه تعمل ما وسعها علشان تموتك. لو مش هتموت من المياه الملوسه يبقى هتموت من الفواكه المهرمنه من أيام يوسف والى دا أصلا لو قدرت على سعر الفواكه. وأن لم تمت من هذا أو ذاك هتموت فى عباره أو مركز ثقافى. وإذا ربنا نجاك مندا كله الحكومه ستقوم بتوفير أى حاجه أنت عاوزها علشان تنتحر وتخلص أحمد بيه نظيف من أرفك

Friday, August 18, 2006

بين شقه أولمرت وقصور إبراهيم نافع وسمير رجب

بشرت جريده الاهرام المصريه خبر عن قرب إستجواب رئيس الوزراء الإسرائيلى بتهمه شراء شقه بسعر مخفض. والحق أقول أنا مش عارف إزاى خبر زى ده ينشر فى الاهرام بدون أعتراضات من الناس اللى مش بتشترى فقط بسعر مخفض لأ دا بلاش وبالنصب على الغلابه اللى كل حلمهم فى الحياه أربع جدران يلموهم مع بنت الحلال وسمعنى سلام قصور إبراهيم نافع وسمير رجب فى القاهره وأسكندريه و شرم الشيخ والماريوطيه ولندن وباريس ومينا القمح ومينا البصل و مينا المحطه ومينكم لله ياللى فى بالى إقرأ تفاصيل الخبر فى الاهرام هنا http://www.ahram.org.eg/Index.asp?CurFN=FRON6.HTM&DID=8947

Thursday, August 17, 2006

الرئيس بشار السخن

ألقى الرئيس بشار الأسد كلمه بمناسبه إفتتاح أعمال المؤتمر الرابع لإتحاد الصحفيين وكانت كلمه ساخنه إتهم بين سطورها الحكام العرب بالخيانه والعماله وكان الكلام لمصر والسعوديه والاردن وكان نظام الرساله زى نظام الكلام لك يا جاره. و الكلمه مثال أخر على الفشل العربى والفرقعه الاعلاميه السخيفه علشان شويه الحضور يصفقوا ويصفروا. واللى يسمع كلام الرئيس المغوار عن الحرب والمقاومه والسلام الاستراتيجى يفكر أن الواد يعنى لافف وداير. عند سماعك الكلمه تشعر أن أبو الابشار حارب أكثر من ألف مره و أتنفى و حضر مؤتمرات وندوات وكمان ألف كتب عن الحرب والسلام وإن الله يكون فى عونه شايل الامه العربيه على أعناقه. أبو ألابشار نسى أو تناسى أن كل مؤهلاته السياسيه إنه أبن الراحل الرئيس حافظ الاسد وأن أبو الابشار لا يملك سوى بكالريوس طب الاسنان ودعاء الوالدين وطيبه الشعب السورى الشقيق

Monday, August 14, 2006

الاعلام العربى لغسيل ومكوه المخ العربى

كما قلنا من قبل إن الاعلام العربى مازال موجه لمخاطبه الشعوب العربيه وليس الغرب.فالاعلام العربى يعمل بلا ملل لتنويم أى حركه وطنيه وسياسيه. فلم أجد قناه إخباريه عربيه جيده وجاده موجهه باللغه الإنجليزيه.فقناه النيل الإخباريه هى ترجمه للاخبار العربيه ولذلك لا يشاهدها أى مواطن عربى لأنها بالانجليزيه ولا يشاهدها أى مواطن غربى لانها كذب فى كذب. الاعلام فى الغرب بيزنس. إدفع مبلغ معين وخذ مساحه إعلاميه فى أجدعها قناه حتى ال س إن إن. إمبارح فى التليفزيون الامريكى شاهدت برنامجين وموضع البرماجين بيوضح حقيقه الحرب الاعلاميه بين العرب وإسرائيل. وبيوبضح أيضا إختلاف العقول فالبرنامج العربى كان عن دوله البحرين وكان على قناه ال ن بى س وهى قناه عريقه فى نيويورك. المهم إن دوله البحرين إشترت حوالى 7 ساعات من إرسال القناه وأنا مش عاوز أقول كام مليون دولار لكن كلكم ممكن تخمنوا. المهم موضوع دوله البحرين كان موضوع إقتصادى. كانوا بيعرضوا مميزات الاستثمار فى البحريين وكانوا بيدعوا المستثمرين الامريكين إنهم يروحوا البحرين كى يعملوا مشاريع هناك وطول السبع ساعات وهم عمالين يستضيفوا فى أمراء ورزراء وشيوح علشان يعرفو المستثمر الامريكى الجنه البحرانيه. أقطع دراعى لو مشاهد واحد ساب القناه دى لمده 3 دقائق لان الاشكال اللى كانت بتعلن وتبيع السوق البحرينى كانت أشكال وحشه وتخوّف ولا علاقه لها بفن التسويق الضائع فى العالم العربى والبرنامج الاسرائيلى كان 5 دقائق فقط على قناه ال س إن إن الشهيره وكان البرنامج عباره عن إعلان بسيط لصوره طفل إسرائيلى مسكين بيبكى من وراه صوره المفروص إنها تكون لوحش عربى وعلى الشاشه مكتوب لو إسرائيل مش هتوّقف حزب الله مين اللى هيوقفه شوف الفرق وإحكم. أحنا بنعمل مظاهرات لنا وإعلانات ويفط لنا برده لكن الناس المفروض يعرفوا عنا الحقيقه إحنا سايبنهم يسمعوا ويقرأو عنا مش منا فوقوا يا بشر الحرب مش مدافع وقنابل فقط .. الحرب الجديده حرب إعلاميه عابرين تضحكوا شوّيه.. زورا موقغ جريده الرحف الاخضر الليبيه هنا وسمعنى سلام الموت علينا حق http://www.azzahfalakhder.com/

إنت فين يا شقى

منذ أن هاجرت وأنا لا أعرف أخر أخبار الساحر الساخر محمود السعدنى وسألت ناس كنير لكن محدش عارف دخلت على كذا موقع يمكن أعرف أخر أخباره لكن للأسف لم أعرف. أدعو الله أن يكون بخير فهو مثال للكاتب الساخر من كل شئ حتى نفسه وكان أتخنها شنب بيعمله حساب. أتذكر مره كنت مسافر جزر هاواى وكنت بأقرأ كتابه وداعا للطواجن وفى إحدى الفقرات إنتابتنى حاله من الضحك الشديد حتى إن إحدى المضيفات فكرّت إنى سكران والعياز بالله و قالت لباقى الطاقم ممنوع أى مشروبات توصل لى الحقيقه سبب كتابه هذا المقال هو إنى قرأت بالغلط مؤخرا جريده الاهرام وقرأت صفحه إسمها الساخر وقرأت مقال ليوسف معاطى و أخر لجيلان الجمل وأخر لمحمد هزاع. والحق أقول أن هؤلاء الكتاب لا علاقه لهم بالسخريه إلا منا نحن كشعب. فلا مجال للمقارنه بين هؤلاء وبين محمود السعدنى أو صلاح جاهين. كلامهم خايب وخايف يقول كلمه حق. شويه يألسو على هيفاء وهبى و شويه على كوفى أنان ونسوا الخيبه اللى إحنا فيها. وأنا مش عارف الاهرام فاتحه صفحه خايبه زى دى ليه. أه علشان يستوردوا أحبار وأقلام وأوراق من الشركه بتاعه إبن إبراهيم نافع مفيش كاتت همام منهم سخر من حاكم من اللى بالى بالك ولا من زياده الاسعار أو المواصلات وإزاى يفكروا فى الحاجات دى والمحروسه جيلان الجمل كاتبه مقالها عن عامل الامن اللى كشف على العربيه بتاعتها وهى داخله جراش الاهرام. وعم يوسف معاطى مولعها نار من أفلام عادل إمام وسلم لى على الغلابه والمظاهرات

الأخ العقيد والكتاب البمبى


نقلا عن جريده العرب تايم

Thursday, August 10, 2006

التخلف السياسى العربى


مما لاشك فيه وجود تخلف سياسى عربى واضح وصريح على كافه المستويات. لأن برغم إختلافنا وأرائنا عن السياسه إلا أنها موجوده و يجب أن نتعلم فنونها إذا كنا نرغب فى العيش فى هذا العالم. و الحق أقول أننا نعانى من تخلف سياسى على مر العصور فالدبلوماسيه فن وعلم ونحن لا نجيد هذا الفن لأسباب عديده ومختلفه. الواجه الدبلوماسيه العربيه كلها تجيد فنون الجعجعه وخدوهم بالصوت لا يغلبوكم ويا قوى ويا بركه دعاء الوالدين. ولا أحد يجيد فن الحوار والذى يوجد عنه فن الحوار والدبلوماسيه لا يوجد عنده واسطه كى يعمل فى السلك الدبلوماسى. ولذلك تجد بعض السفراء العرب لا يجيدون التحدث بأى لغه سوى العربيه. الجميع يعرف أن هناك طلبه الاقتصاد والعلوم السياسيه ومن هؤلاء الطلبه من هو موهوب بالفطره ويستحق العمل فى السلك الدبلوماسى لكن للأسف هؤلاء الموهوبون غلابه ولا يوجد عندهم الواسطه المطلوبه فتجد معظمهم يعمل فى سلك الكهرباء أو سلك السكه الحديد. سبب أخر للتخلف السياسى العربى هو البحث عن السلطه والمنظر والجاه ولان مفيش عندنا عدل تجد إن السفير إبن سفير إبن سفير وهكذا. تسأله ليه أصبحت سفير يقول بابا عاوز كده. ومنصب السفير ووزير الخارجيه من أهم المناصب لأنه بيمثل الواجه للبلد فإما أن يكون واجهه مشرفه يا إما من نظام نحن نؤيد ونطالب ونستنكر وندين
والإعلام العربى واحه أخرى من واحات التخلف حيث ان هذا الاعلام هو إعلام الدوله فتجد أنه موجه للضحك على الدقون وتنويم الغلابه. الاعلام العربى موجه للعرب وليس للعالم ولذلك كل العالم لا يعلم عننا أى شئ سوى أننا متخلفين ورعاه جمال وحمير. وسوف نظل على هذا الحال حتى يعمل كل منا فى مجاله وهذا لن يتحقق إلا بوجود عدل. لان مش كل إبن وزير ينفع يكون وزير. وهذا الظلم الواضح أدّى إلى هجره كل العقول المنيره للغرب. فكلكم تعرفون أحمد زويل لكن الذى لاتعرفونه إن فى أكثر من 10000 أحمد زويل فى الولايات المتحده فقظ. أنا رئيس الجامعه بتاعتى هنا فى نيويورك مصرى ولما عرفت كده دخلت على معظم الجامعات هنا ووجدت آلاف من العباقره العرب. مش برده جحا أولى بلحم طوره
يعنى بالذمه دا شكل واحد دبلوماسى

Wednesday, August 09, 2006

أبو مازن متفائل بعقد قمه عربيه طارئه

هذا ما قرأته فى الصفحه الاولى لجريده القدس التى تصدر فى الاراضى المحتله. إقرأ التفاصيل هنا http://pdf.alquds.com/ وأول ماقرأت الخبر ده سألت نفسى إذا كان أبو مازن أهبل ولا عبيط والعياذ بلله قمه عربيه إيه وطارئه إزاى يا عم الحاج هو إنت لسه بتدور على قمه. وألف مره أقول إن كلمه طارئ يعنى من غير ميعاد لكن عندنا لازم يكون لها ميعاد. وزين العابدين ايه اللى أنت رايح تكلمه وتعمل معاه مباحاثات. والله انا قربت أنسى أن فى مسؤل إسمه زين العابدين يا عم الحاج ابو مازن ارجع بلدك و طلع الناس اللى أنت حاطتهم فى السجون علشان يروحوا يحاربوا ويقاوموا. أنت بقالك 56 سنه فى قمم أخذت إيه ولا هى مصاريف على الفاضى. وايش ياخد الريح من البلاط. بعد القمه هيعملوا إيه اصحاب القمه غير الاستنكار والتنديد والمطالبه. سمعت عن شعبان عبد الرحيم. جاتكم نيله و انتم شبه بعض

أغنيه الحمار للفنان/شعبان عبد الرحيم


مش قولت لكم ان الاستاذ شعبان هو المناضل الوحيد فى البلد
انا بحب الحمار
بجد مش هزار
عشان تعبان معانابالليل وبالنهار
بنشوف حمير كتيربيمشوا في الطريق
لا حمار عنده غيره ولا بيظلم بري
بيمشي في المكسر ولا عمره في مرة قصر
وبيسمع الكلامومن شدة اللجام
ويقصر المشوارانا بحب الحمار
لا شفت حمار يخون
ولا شكت فيه ظنون
قدم له الوجبة فول
عمره وياك يطول
عشان كده بقول انا بحب الحمار

Tuesday, August 08, 2006

زياره جمال باشا مبارك للبنان

زياره الوفد المصرى رفيع المستوى للقاء الرئيس اللبنانى ما هى الا حركه قرعه من حركات حاورينى يا طيطه هذه الزياره كانت ممكن تدخل علينا لو تمت وقت العدوان مباشره مش بعد خراب مالطه. والصوره العبيطه اللى نشرتها جريده الاهرام ما هى الا دعايه خايبه لدوله المفروض انها تكون اكبر من الحركات العريانه دى لكن الظاهر ان اسامه باشا الباز مستشار الرئيس السياسى عجّز هو كمان ومش عارف يلعبها صح. مفكر ان نشر صوره زى دى هتهدى الغضب المصرى ونسى ان الحركات دى كنا بناكل منها ايام زمان. الشعب المصرى شعب كبير من زمان وكل واحد بيدى على قد مكانته. و احنا اصبحت مكانتنا صوره حلوه وخلاص.لكى الله ثم شعبان عبد الرحيم يا مصر وسمعنى سلام اللى اتظلم واللى اتخدع واللى بلاش انباع ..مع الاعتذار لصاحب الغنوه

شعبان المناضل


الى الاخ المناضل/ شعبان عبد الرحيم تحيه طيبه و بعد.. مقدمه لسيادتكم مواطن مصرى من جيل قانون الطوارئ الذى يبحث عن فرحه او امل. فبعد حرب اكتوبر1973 لم يفرح او يفخر جيلى باى شئ سوى لحظات معدوده. فمثلا عند الفوز بكاس الامم الافريقيه عام 1986 ثم عشنا فى نفس الخيبه حتى كاس العالم 1990 عندما تعادلنا مع هولندا و من يومها ايها الاخ المناضل و احنا متبهدلين على الاخر من اقذر بلاد الارض الا ان ظهرت انت على الساحه الغنائيه فقد كنت اول من غنى للانتفاضه الفلسطينيه و كنت سببا رئيسيا فى نقل عمرو موسى لجامعه الدول الميته و قتل مستقبله السياسى بعد اغنيتك الشهيره بحب عمرو موسى وكنت ايضا ايها المناضل اول من تحرك و غنى ضد الدنمارك و كنت انت لهيب وروح المقاطعه الشهيره. و تمر الايام يا ايها المناضل و يستمر العدوان وتستمر الهزائم ولا نجد غيرك كى تعبر عنا كشعب بعد ان تفرغ حكامنا الى المطالبه و الاستنكار والتنديد و الدعم المعنوى و الصراخ والعويل و التحضير للقمم العربيه الفاشله فقد استمعت مؤخرا لاغنيتك للبنان وشعرت بالفخر كالعاده عند سماع اغانيك الوطنيه لقد اصبحت رمزا من رموز الحركه الوطنيه بعد ضياع القياده السياسيه فسر فى طريقك يا بطل و اللعنه لكل حاكم جبان خايف على ماله وعياله ونسى اولادنا فى لبنان

Friday, August 04, 2006

جمهوريه فنزويلا العربيه




سحبت فنزويلا العربيه المتحده سفيرها من اسرائيل
يالا اى خدمه. على حد علمى ان فنزويلا تقع على الحدود الشماليه الجنوبيه الشرقيه الغرييه لاسرائيل. و فنزويلا من اعمده الشرق الاوسط فهى عضو مؤسس فى جامعه الدول العربيه و عضو عامل فى رابطه الدول الاسلاميه والاتحاد الافريقي و نادى غزل المحله
وسلم لى على اصحاب الفخامه والجلاله والمعالى والسمو







مظاهره الابطال الاطفال

امبارح بعد الشغل روحت اللبيت و فتحت قناه الس ن ن. والحق اقول ان لغه الاعلام الامريكى عن الحرب اتغيرت زى ما تقول ان الشعب اتخنق والمواطن العادى فى قمه الغضب من المستنقع اللى الحكومه وضعتهم فيه المهم ان على التليفزيون شفت مظاهره لاطفال فى مناطق عربيه مختلفه وعلى الرغم من الحزن الشديد من مشاهد الدمار فى لبنان الا انى كنت فرحان جدا لما شفت هؤلاء الاطفال بل قل هؤلاء الرجال و فى عيونهم نظره ثقه مش موجوده عند اطخنها حاكم من اصحاب الكروش هؤلاء البطال كانوا اكبر من سنهم. كانوا عارفين ان الكاميرا بتصورهم لكن كانوا ماشين فى الطابور ولا اجدعها عسكرى فى البحريه البريطانيه. اسرائيل فتحت على نفسها باب جهنم. الجيل الجديد كله اللى حكامنا بيسموه جيل السلام هيطلع شايل فى قلبه و معبى على الاخر و اكيد واحد من الاطفال دول هيكون من سلاله صلاح الدين. والطفل الموعود هيكون عنده كرامه من بتاعه ايام زمان . والله الخير قادم لا محاله ويا ويله يا سواد ليله اللى هيقف امام الطفل الموعود

اضحك على الخيبة

نفلا عن جريده عرب تايم
شكرا خاص

Tuesday, August 01, 2006

خمسين سنه ذ ل و 6 ايام كرامه



بقالنا اكتر من خمسين سنه فى الذ ل الا الاسبوعين بتوع حرب اكتوبر. خمسين سنه واحنا بنقول بكره احلى من النهارده على رائ شادية. خمسين سنه نستنكر وندين و نطالب. خمسين سنه فى اجتماعات ومؤتمرات ولقاءات وندوات. اجتماع طارئ واجتماع على مستوى القمه واجتماع تحضيرى للاجتماع الطارئ واجتماع على مستوى وزراء الخارجيه واجتماع لتعميم الفكر القومى واحتماع للمطلابه بوقف العدوان واجتماع لمناصره الشعب الفلسطينى واجتماع لتائيد المقاومه. خمسين سنه على الحاله دى نطلع من اجتماع نقع فى ندوه
لحد ما اصبحنا ملوك الندوات والمؤتمرات والله حتى بعد كل المؤتمرات دى ما احنا عارفين ننظم حاجه عليها الطلا اى مؤتمر عربى تلاقى ناس بتجرى ورى بعض والكاميرا على واحد نايم او بيلعب فى مناخيره

كلنا نعلم ان الحرب خراب ودمار ومفيش حد بيحارب بلطجه ولا لوى دراع الا دوله معينه كلنا عارفينها. كل حكمانا الافاضل بيقولو الكلام ده ودائما يرددوا انهم لن يسمحوا بالحرب لانها خراب ودمار وانهم لن يفرطوا فى مواردنا الاقتصاديه التى سوف تلتهمها عجله الحرب. كلام جميل جدا بس احنا عاملين زى المعلق فى الهوى لا طال السما لا لمس الارض يعنى احنا لا حاربنا ولا شوفنا ثروه اقتصاديه يعنى لو مثلا مفيش بطاله وكل الشباب متجوز كنا نقول ماشى اتتو عاوزين تخربوها. لكن دا مفيش حاجه خالص. عسكرنا الغلابه ماتوا فى سينا وطابا وعادى ايه يعنى دول من الفلاحين قطرين يولعوا اوكى خدوا الشر وراحوا عباره فى الميه وماله ماهى تيتانك عملته من قبلنا.مفيش اى منظر يشرح القلب الدنيا اتغيرت وللصبر حدود على راي ام كلثوم. يعنى بالامانه كده كل اللي نستاهله 6 ايام كرامه بس؟



Monday, July 31, 2006

فى بهو الفندق ..ملعون ابو السياسه ياعم



فى احدى فنادق نيويورك الشهيره قابلت دكتور فى السياسه الدوليه
هدا الدكتور من مواليد شبرا ـ القاهره. وكان هدا الدكتور المحنك بيشتغل مستشار سياسى لامير احدى الدول العربيه
وكان الدكتور كبير فى السن وهادئ الطباع واواضح عليه انه ابن ناس
المهم ان ايام زياره الدكتور كانت نفس الايام اللى اعلن فيها الرئيس مبارك ان انتخابات الرئاسه سوف تكون بالاقتراع المباشر مع تعديل الماده76 من الدستور
وانا قلت اعمل حوار مع الدكتور ورحت سائله عن رائيه فى تعديل الماده وعن الانتخابات وكان الدكتور جالس فى بهو الفندق ومعه شنطه اوراق صغيره فى يده
وزى ما اتقول ان عقرب لدغ هدا الدكتور او انى والعياز بالله سبيت امه
رمى الدكتور الشنطه على الارض واصابته حاله من الهياج والتشنج وقالى انتخابات ..انتخابات ياخى ها ها وخرج الدكتور عن وقاره وبدأ يشتم فشر اجدعها عربجى فى موقف الكارو.. انتخابات ايه ياابنى انت لسه صغير ماانتش عارف دى بلد بيحكمها العسكر من سنه 1952
انتخابات قال هاها..الدكتور صوته اصبح عالى والناس بدإت تلاحظ وانا كنت عاوز اضرب نفسى ميت جزمه بلاستيك ماركه الكلب لانى سالته عن الانتخابات
اتضح ان هدا الدكتور هاجر بعد ثوره يوليو وكان ايامها فى اولى جامعه وكان شايل فى قلبه ومخبى لحد انامانكشته
لم يتوقف الدكتور عن السب الا بعد وصول امن الفندق والامن الخاص به وكنت انا هالبس اسود لولا انه شرح للامن انه بيناقشنى فى موضوع وانى لم اسبب له اى ضيق
شكرا عرب تايمز على الصوره

Friday, July 28, 2006

هو فين الجيش اللبنانى



سؤال برئ والله ولا اقصد به شئ. هو فين الجيش اللبنان
ولا حزب الله هو الجيش اللبنانى . انا اقصد هل يوجد مصدر اخر للمقاومه بجانب حزب الله ماهو مش معقول تكون دوله لبنان معندهاش طياره واحده تقوم تعمل اى منظر
ماهو لو عشمانين ان اى حد تانى هيدافع عنهم تبقى مصيبه كبيره
احنا كمواطنيين غلابه على باب الله مفيش فى ايدنا غير التبرعات او المظاهرات او المدونات لان الحكام بتوعنا الله يكون فى عونهم لسه بحضروا للقمه الطارئه .ما انا ياجدعان ها اتجن مفيش اى منظر من اى حد دا حتى المظاهرات ممنوعه والسعوديه منزله فتوى بتحريم مساعده حزب الله
يعنى فى اى حل بخلاف ان احنا نضرب دماغنا فى الحيطه

عناوين الاخبار

ـ شعبان عبدالرحيم يسجل اغنيه للبنان ـ حسناوات يتنافسن فى شرم الشيخ للفوز بملكه جمال العرب ـ فتاوى سعوديه تحرم مسانده حزب الله ـ ارتفاع اسعار البنزيين فى مصر ـ جمال مبارك: الاستفاده بالزياده فى الاسعار لدعم الخبز والمدارس والصحه ـ المصرى اليوم: تسميه ميدان رمسيس بميدان مبارك ـ الفياجرا المصريه فى الاسواق ـ فشل مجلس الامن باءدانه قصف اسرائيل لليونيفيل هده عناوين الاخبار فى الصحف العربيه غطينى وصوتى يامه

Thursday, July 27, 2006

فيلم البرئ..اعداء الوطن

فيلم البرئ..اعداء الوطن رائعه من روائع عاطف الطيب حول سيناريو وحيد حامد لقطعه فنيه نادره وجسد الشخصيه المرحوم احمد زكى الفيلم ده بيجسد حال الشرطه المصريه بالضبط.اعداء الوطن يعنى المتظاهرين السياسين وافراد الامن المركزى غلابه على باب الله بينفدوا الاوامر بعد عمليه غسيل المخ..اضرب يضرب.. بطل يبطل الانسان اللى فى قلبه شويه نور بيندم كل الندم عند عمل المعصيه او عمل اى شئ غلط.فى ساعات انسان لا يستطع النوم من التفكير فى كلمه قالها وجرحت شعور انسان اخر السؤال الان كيف لضابط شرطه النوم بعد اعطاء الاوامر بالضرب والتعديب كيف النوم او حتى العيش بعد اعطاء الاوامر بالتحرش الجنسى باحدى النساء. لو كان يرضى هدا لامه او اخته او زوجته فالمفروض انه يروح يبحث عن قلب تانى لان شعاع النور والامل اللى فاضل ضاع وربنا حكم عليه بالهلاك ان الله يمهل ولا يهمل ملحوظه: الصوره المنشوره هنا ماخوده من موقع حركه كفايه ولهم الشكر

فشل مؤتمر روما في وقف إطلاق النار بلبنان

زياره رايس للمنطقه عند قيام العدوان الاسرائيلى الخاشم على لبنان الحبيبه هرع الجميع بمطالبه وزيره الخارجيه كوندى رايس لزياره المنطقه لوقف اطلاق النار. لم يستمع احد للندائات العربيه الضعيفه. اخيرا تم عقد مؤتمر روما بحضور اكثر من 15 دوله بالاضافه للامم المتحده وطبعا المؤتمر فشل فى وقف العدوان على لبنان. وطبعا نتائج المؤتمر ده كانت معروفه للجميع ولكن كان الغرض منه اعطاء اسرائيل وقت اكبر لقتل المزيد السؤال المحير اما أن الوقت لنتعلم من الماضى اما ان الوقت لنعلم ان قرارات الامم المتحده ليس لها اى قيمه سوى محاربه العرب اما أن الوقت لنتحد ونسترجع الحق اللى ضايع يا حكام العرب مادا تريدون من هدا الدنيا كلكم ميتون ولا يبقى الا الدكرى والعمل الصالح. لاكرسى نافع ولا لقب دائم العيش فى فقر وعزه وكرامه خير من الغنى والدنيا وما فيها لبنان لن يضيع والقدس لن يضيع وفى رب اسمه القهار وما يدرى جند ربك الا هو اقرأ هنا تفاصيل المؤتمر الخايب 

Monday, July 24, 2006

Paradise Now الجنة الأن

لقد قرات كثيرا عن فيلم الجنه الان ولقد حاولت مشاهدته اكثر من خصوصا بعد ترشيحه لجائزه الاوسكار وفوزه ببعض الجوائز الاخري الفيلم يحكى قصه شابين فلسطنيين ينويان القيام بعمليه استشهاديه بسبب ما احاط بهما من ظروف مختلفه. واحد منهم اسمه سعيد ابوه كان عميل اسرائيلى وكان عايش فى العار بتاع ابوه لحد ما الموساد قام باغتيال الوالد الخائن والشاب التانى اسمه خالد وكان لسه مطرود من ورشه الميكانيكا التى كان يعمل بها باختصار الدنيا اسودت فى عيني الشابان وقررا القيام بالعمليه الفيلم بيناقش هل فعلا العمليات دى هى الحل الوحيد لترجيع الحق لان فى الفيلم وجهه نظر سعيد اللى مصمم على العمليه ووجهه نظر بنت احد شهداء المقاومه التى اقنعت خالد بالعدول عن العمليه وان هناك طرق اخرى للمقاومه الفيلم جميل وقصته تجعلك تفكر وهو احسن من بوحه وغيره من المأسي اللى ماليه السينما العربيه

احنا احسن ناس تغنى

فى الافراح نغنى فى الاحزان نغنى فى النجاح نغنى فى الفشل نغنى حتى بعد ماتشات الكره بنغنى ولا ادرى مين العبقرى اللى اخترع الحكايه دى لكن انظر للتاريخ بتاعنا وسوف تجد اغنيه لكل موقف ومصيبه بعد طرد الملك وقيام ثوره يوليو غنى عبد الحليم حافظ اكتر من خمسين اغنيه للثوره ودا مش عبد الحليم فقط لكن كل ابناء جيله غنوا للثوره وابطالها وعندما قومنا ببناء السد العالى تالق عبد الحليم كالعاده وغنى قولنا ها نبنى وادى احنا بنينا السد العالى ولما كان تأميم قناه السويس سبب اساسى فى العدوان الثلاثى على مصر تالق جميع المطربيين العرب وتسارعوا بالغناء لبورسعيد وغيرها من المدن المصريه المضاره بالعدوان واصبحنا على هدا الحال العجيب حتى حرب 67 وانقطعت الاغانى لفتره كانت الحاله النفسيه لمعظم المطربيين سيئه ويحكى ان عبدالناصر كان يجتمع بام كلثوم وعبدالوهاب وعبدالحليم وكان يطلب منهم الغناء لتحميس الشعب وبدأ الجميع يتألق من جديد وكان كل استعدادنا للحرب هو الاغانى الملتهبه مات عبدالناصر وحزنت الامه العربيه وغنى عبدالحليم يا جمال يا حبييب الملايين. برده حتى الموت له اغنيه انتقلت السلطه للسادات وانتصرنا فى حرب اكتوبر والاغانى ولعت نار عبدالحليم ام كلثوم شاديه صباح وغيرهم وغيرهم مولد غنى وملوش صاحب فى العصر الحديث شويه الاغانى اصبحت اكثر نفاقا والمأ خصوصا لمخلصين هدا الوطن واصبحت الاغانى كل مانقدر عليه وهى ايضا صوره اخرى من صور العجز العربى المفضوح انتفاضه القدس قامت والشهداء فى كل مكان واحنا بنغنى اوبريت القدس العربي ومحمد الدره وابوه بيموتوا بالرصاص امام الجميع لبس المطربون اسود وغنوا ولو كل مطرب اتبرع بعشره دولار لكن افضل من الاغانى الخايبه اللى بتفكرنا بمدى العجز بتاعنا يا ساده الحق مش راجع بالغنى ولا بدمع العين احنا الامه الوحيده اللى بتحارب بالاغانى. اليابان لم تبني نفسها بعد الحرب العالميه بالاغانى والغول الصينى الدى سوف يحكم العالم قريبا لم يبنى الامبراطوريه الاقتصاديه بالاغانى وخلينا كده .. امجاد يا عرب امجاد

Friday, July 21, 2006

محمد حسنين هيكل

اولا انا لا امتلك اى مقومات صحفيه كى انقد الاستاد الكبير هيكل لكن بحكم ما قرات له من كتب ومقالات وجب على كتابه هده الكلمات ايام زمان كان الاستاد هيكل كاتب عظيم ومؤرخ امين تتعلم منه اجيال وكنت اصدق اى كلمه يكتبها هيكل وكنت اقرأ اى كتاب او مصدر يدكره الاستاد فى اى مقال او كتاب له. وكان معظم الصحفيين الشبان يتسابقوا لحضور ندواته كان هدا هيكل حتى وقت ليس ببعيد. الان اصبح الاستاد هيكل الجورنلجى العظيم، اصبح مديع لامع وضيف دائم على قناه الجزيره وبغض النظر عن العائد المادى الرهيب مقابل حلقات قناه الجزيره الا ان مضمون هده الحلقات لا يليق بهيكل هيكل اخد يحلل فتره الثلاثينات وماقبلها واخد يتحدث عن البشوات والبهوات والحق اقول انى ومعظم ابناء جيلى التائه لا نعير اى اهتمام للبشوات والبهوات بتوع زمان احنا عايزين نعرف احنا فين ونفهم اللى بيحصل حوالينا الاستاد هيكل نقد كل الناس اسلاميين وشيوعيين و ناصريين كله ولم يترك احد، وعلى راى وائل عباس من جريده الوعى المصرى لما قال ان هيكل بيلعب البخت فى تاريخ مصر احنا عايزين هيكل الصحفى والكاتب مش هيكل ضيف القنوات الفضائيه عاوزين نعرف الحقيقه يا استاد لو انت خايف تقول الحق يبقى عليه العوض ومنه العوض والافضل انك تنسحب بهدؤ قبل ما تضيع تاريخك

Tuesday, July 11, 2006

عماره يعقوبيان

اولا حيث انى اعيش فى المهجر فلم استطع مشاهده الفيلم ثانيا العالم كله يعرف ان عادل امام له معامله خاصه من الرقابه على المصنفات الفنيه خلاصه الكلام ان 12 عضو من اعضاء مجلس الشعب تقدموا بطلب احاطه لسحب الفيلم من دور العرض. والحق اقول ان 12 عضوا دا عدد مهول وتقدم غير مسبوق لاعضاء مجلس الشعب. اتدكر ايام زلزال 91 وغرق عباره السلام وحريق مركز ثقافه بنى سويف وانقلاب قطارات البحيره والشرقيه لم يستطع المجلس الموقر من جمع 5 توقيعات مجلس الشعب متاكد ان هدا الفليم اخطر من البطاله والارهاب والسكن لدللك تسابقوا على الفضائيات للتنديد بالفيلم وخطوره على المجتمع انا لو من عادل امام وعماد اديب اسحب الفليم من دور العرض واشوف الساده الاعضاء هيعملوا ايه لما يجدواان المجتمع هيفضل زى ما هو مش حريه التعبير والابداع حق للجميع ؟؟! ولو الفيلم مش عاجبك قاطعه وقاطع كل اعمال عادل امام لكن فرض الراى على اختيارات الناس ده عمل مش مقبول. يعنى لا كده عاجب ولا كده .عاجب وعلى راي سعد باشا زغلول.. مفيش فايده وعلى راى محمد باشا هنيدى..جاتكم نيله مليتوا البلد

ديمقراطيه عماد... ونبيل الي ضاع



بعد 3 شهور من وصولى لنيويورك قررت ان اكمل دراستى هنا حيث انى لم احصل على اى شهادة من مصر الحبيبه سوى الثانويه العامه وسنتين فى كليه السياحه والفنادق. وفعلا اتقبلت فى جامعه نيويورك
المهم كنا فى يوم فى محاضرة تسويق دولي وكان يجلس بجوارى زميل لبنانى اسمه عماد.وهو لا يزال صديقى حتى هده الحظه
عم عماد دخل فى نقاش وجدال وحوار ومناظره مع الدكتور حول اهميه التسويق فى العالم الثالث
عماد مصمم..والدكتور كبرت فى دماغه وكل واحد عاوز يقنع التانى بوجهة نظره وانا قاعد اشد عماد من البنطلون واقوله اقعد الله يخرب بيتك هتترفد ولكن مافيش فائده
عماد راسه والف سيف ان التسويق فى العالم الثالث لازم يكون مبنى على اشياء ملموسه مثل اعلانات التليفزيون والدكتور مصمم ان ده تسويق رخيص وضحك على الدقون. وانا قاعد ومتأكدانى مش ها اشوف عماد تانى
السكشن كله متابعا لحوار بااهتمام بالغ وانا سرحت لورا لايام الدراسه الابتدائيه فى مصر المحروسه وفى حصه من حصص الجغرافيا المدرس قال ان طوكيو عاصمه الصين...ورد عليه تلميد جانبي اسمه نبيل وقال للمدرس بكل برائه لا يا استاد طوكيو عاصمه اليابان. وقبل عم نبيل ما ينطق حرف النون فى كلمه اليابان كان المدرس منقض على نبيل وهات يا ضرب ويقول انت عاوز تعلمنى يا ابن الكلب ومن يومها انقطع نبيل عن الدراسه ولا حاول اي واحد فينا يصحح اى غلطه للمدرس حتى لو كانت اسماؤنا
ومن هدا اليوم الفصل كله اتعلم يقول اللى تشوفه حرضرتك و كلامك اوامر وكل كلمات الخضوع
رجعت تانى لعماد والدكتور وا خيرا عماد اقتنع بوجهه نظر الدكتور
وبعد المحاضره عماد قال لى ان حريه الراى والتعبير حق يكفله الدستور اتارى عم عماد مولود فى نيويورك وعمره ما درس جغرافيا فى مصر

Friday, July 07, 2006

اعلان هام... وظائف خاليه



مطلوب افراد امن فى مجلس الشعب لمكافحه شغب الاعضاء
يرجى من المتقدمين على الحصول على بكالريوس تخصص" جزم غاليه
ودراسات عليا فى كل الكلام الخارج وخصوصا كلمه "طظ

تقدم الطلبات باليد مع الاشاره للواسطه بتعاتك

المصرى الناقم.. لسه بيحب مصر!

كنت مره فى مطعم سمك فى منطقه استوريا بنيويورك وكان يجلس بجوارى انا وصديقى مجموعه من المصريين لكنهم كانوا كبار فى الس
وكان الواضح من كلامهم ان فى شخص فيهم لسه راجع من زياره لمصر الحبيبه وهدا الشخص كان ناقم جدا على الاوضاع فى مصر وكل ما واحد يساله الناس فى مصر عاملين ايه, يبدأ يلعن الحال و الاحوال.. مصاريف الاولاد..الادويه..المواصلات..واخونا الناقم سود الدنيا على الاخر ومن يومها كل مااشوف اخونا الناقم احاول افهمه ان مصر بخير وان احنا الجاليه الوحيده التى تحافظ على التواصل بالبلد الام. ولكن لا فاءيده كان كل مره يقول لى ياابني انت لسه صغيرومش فاهم البلد وبينى وبينكم انا اصبحت خايف اكون ناقم جديد مع مرور السنين المهم كل مره اشوف اخونا الناقم افضل اخنقهه بالاسئله لحد انه اصبح يهرب منى لما يشوفنى ماشى فى الشارع وفى يوم نهائى كأس الامم الافريقه.. معظم الناس لم تدهب للعمل وانا واحد منهم. دهبت لقهوه ليالى الحلميه فى استوريا واخدت كرسى وجلست فى اخر صف.. وانا جالس فوجئت باخونا الناقم جالس فى اول صف امام التليفزيون مباشره. وانا كنت متأكد انه هيشجع ساحل العاج ولكنه كان بيدخن الشيشه بشراهه والحق اقول انه شرب حوالى 3 كيلو معسل فى اول ربع ساعه من المباراه لحد القهوجى ما اتخنق منه من كثره طلبه للولعه اخونا الناقم كان على اعصابه من صفاره البدايه حتى النهايه وكان دائما السباب للحكم وكان يقسم دائما بالطلاق ان الكوره مش فاول او مش اوت مع ان الاعاده واضحه ان الحكم كان صح ولكن هيهات اخونا الناقم مصمم ان الحكم حمار وفى نهايه المباراه وبعد الفوز المصرى.. رأيت اخونا الناقم نازل رقص فى وسط القهوه فشر سهير زكى فى عزهاوكمان قاعد يصرخ "مصر..مصر" والقهوه كلها بتهتف وراه. انا كنت فى غايه السعاده مش لان مصر فازت بس ولكن لان اخونا الناقم كان بيبكى من حب مصر. وبعد الناس ما بداؤ يغادروا القهوه جلست بجوار الناقم وقلت له مبروك لمصر قالى مبروك للغلابه قلت له يالا ندور علي شيخ نساله على ال50 يمين طلاق اللى انت حلفتهم لان الحكم كان صح.. ضحك الناقم وقال لى حتى يوم الفرحه جاى تخنقنى

Thursday, July 06, 2006

كاس العالم والخيبه القويه



انا عايز اعرف ازاى دوله زى مصرفيها 70 مليون نسمه عاجزه عن انجاب 11 لاعب للوصول بل للفوز بكاءس العالم
كل المصريين هنا فى نيويورك تابعو المبارايات وكل زملاءنا فى العمل يسالوا فين الفريق المصرى وبكل حسره نرداننا لم نصل
اعتقدان المشكله فى مصر مش مشكله مواهب لان بالتاكيد السبعين مليون فيهم 11 موهوب. المشكله فى مصر مشكله اداريه بحته والدليل على كده فضيحه الصفر الكبير عندما تقدمنا بطلب استضافه كاس العالم لسنه 2010 اللى كان بطلها السياجى
علشان نفوز باستضافه حدث كبير زى ده لازم نعمل حمله دعايه قويه
والمفروض الى يقوم بالحمله دى ناس متخصصه فى الدعايه والتسويق
السباجى ليس خريج كليه اعلام
فكانت النتيجه العادله هى الصفر الكبير
والمشكله الاداريه عامه وفى كل المؤسسات وخصوصا الرياضيه
ياساده مش كل لاعب كوره مكن يكون ادارى او مدرب ناجح والدليل على كده ان عتاوله التدريب الايطالى لم يلعبو الكره
لو نظرنا لمجالس ادارات المؤسسات الرياضه سوف نجد ان معظمهم لعيبه كوره ولا علاقه لهم بفنون الاداره والاءستثناء الوحيد للنظريه دى هو المرحوم صالح سليم. انا مره قرات مقاله للساخر الكبير محمود السعدنى قال فيها ان حل الازمه الكرويه فى يد صالح سليم لو قبل وافق ان يراس اتحاد الكوره لكن صالح فضل ان الاهلى يكون المثل الواضح على النجاح الادارى
انا بس عايز اعرف خريجى التسويق والاعلام واداره الاعمال بيروحوا فين. الموضوع ده غايظنى جدا لانى خريج اداره اعمال و باعمل دراسات عليا فى التسويق الدولى
انا قرات ان بطوله كاس الامم الافريقيه اللى احنا فزنا بيها بفضل دعاء الملايين وطيبه قلب حسن شحاته كلفت مصر ملايين الجنيهات
والمعروف فى كل الدول ان البطولات دى بتدر ربح مادى كبير على الدوله المضيفه
الاحتراف فى معظم الدول معناه انك تحترف العبه يعنى المهنه بتاعتك فى جواز السفر تكون لاعب كوره الا فى مصر فتجد الاعب الدكتور والمهندس والموظف فى شركه المقاولون العرب

Wednesday, July 05, 2006

انا من مواليد قانون الطوارئ




انا من مواليد قانون الطوارئ. ماعرفش قانون غيره علشان يوحشنى و اقول فين ايامه. وفى جيل كامل زى كده اسمه جيل المتلخبطين
انا نشات فى بيت ناصري %100
صور عبد الناصر فى كل الغرف و اغانى عبدالحليم الوطنيه شغاله علطول. فابالتالى نشات احب عبدالناصرمن غير اي اسئله
لما كبرت ورحت المدرسه وقرات عن اكتوبر والسادات, حبيت السادات كمان ومين ما يقدرش يحب الراجل اللى رجع الارض وعبداحلبم غناله عاش الى قال للرجال عدوالقنال! و فضلت احبهم الاتنين لحد ما قرات خريف الغضب لمحمد حسنين هيكل وخريف الغضب جاب بعده اغتيال رئيس ثم البحث عن الزات وغيره وغيره لحد مقالات انيس منصور. وطبعا مابين كل الكتب والمقالات كان فى قنوات فضائيه من ضمنها الجزيره اللى ضيوفها دايما يتخانقوا مع بعض. كل ده واللخبطه عمالها تزيد
والجيل بتاعى لحد النهارده بيحاول يعرف الحقيقه. وعلى راءى الشحروره صباح" محتاره اشيل مين ولا اشيل مين جوه "عيونى

الشيخ صالح كامل ماطلعش صالح ولا كامل



الشيخ صالح كامل ماطلعش صالح ولا كامل. ده خسر كل المصرين مش ال6 مليون اللى شتمهم و بس. د/ هاله سرحان المفروض باءة نشوف الهمه وتقوليله يا زوج الحراميه. مش صفاء ابو السعود برده من مصر. عجبى على الزمن اللى خلى الشيخ فاسد ناقص يقول على مصرحراميه. فوق يا شيخ بكره تعرف مصر بجد