الحزب الوطنى ..إوعى وشك .. لا البرادعى يهمنا دا احنا معانا ربنا

 

الحزب الوطنى نال إعجابى وإحترامى كرجل تسويق . الحمله المنظمه لسلخ الدكتور البرادعى والشرشحه له فى كل زقاق وعلى ناصية كل حاره ما هى إلا دليل واضح على أن الناس دى ما بتلعبش ومبدأها اللى يرشنى بالمياه ارشه بالدم واللى له شوق فى حاجه الميدان واسع وفارس لفارس

بدايه بشيخ الاوقاف حمدى زقزوق الذى تعهد بمنع البرادعى من الدعاية وممارسه السياسه فى المساجد. واللى يسمع الدكتور زقزوق يفكر أن البرادعى ضارب قفطان قصير مكتوب على ظهره انا البرادعى يا حمدى وقاعد يلف فى جوامع مصر

وعندما سُئل زقزوق عن قضيه خالد سعيد،قال انه يعرف وزير الداخليه معرفة شخصيه وانه (أى وزير الداخليه ) لا يرضى بحدوث تجاوزات وحوادث تعذيب من قبل الشرطه

وانا هنا اصدق كلام الدكتور زقزوق لانه يقصد وزير داخلية السويد او ديزنى لاند وليس وزير داخلية مصر التى فى خاطرى

ثانيا :دكتـور هلال صاحب الصفر الشهير والخيبه القويه فى ملف إستضافة كأس العالم قال ان طلبات البرادعى بالتغير طلبات غير منطقيه ولو البرادعى جمع مليون توقيع تطالب بالتغير هنرد عليه بخمسه مليون ..ولا كدب ولا فسخره واحنا اللى فى صدرنا يهمنا.. واضاف بلغه عربيه جميله فشر المتنبى أو أحمد شوقى . قال هلال : “ ده بيلقح جتته !! هو حد كان قاله تعالى انضم للوطنى علشان يرفض” ونعم التعبير من رجل وزير

منتصر الزيات قال أن البرادعى صناعه غربيه !! بس لم يوضح اذا كان تصينع أصلى ولا صينى؟

الحمله المنظمه للحزب الوطنى تستحق عشره على عشره لانها من الجهه التسويقيه حمله منظمه ومن جميع الاطراف والجهات لكن من ناحية النتائح فهذه الحمله سوف تأخذ صفر كبير زى بتاع هلال فى كاس العالم كده لأن الجمهور اللى الحزب بيبيع له هذه الكوميديا غير قابل للتفاعل او قبول هذه المهاترات.

الحرب عمل زى شركه سياحه خمس نجوم رايحه تبيع شاليهات ورحلات سياحيه لشاطئ الريفيرا فى منطقة امبابه او سيدى بشر قبلى