Friday, January 05, 2007

فى ذكــريات تحضير الشنط

الحاجه ام الرأفتانى.. اطيب من الطيبه.. وده يرجع لجذورها الريفيه الكريمه..فرغم زحمه المدن من اسكندريه والقاهره وحتى السفر لنيويورك..الا انها مازلت الست الطيبه اللى بتحب الناس كلها..والحاجه لما تفرح تعيط..ولما تزعل تعيط..لما اسافر واسيبها تعيط..لما ارجع م السفر تعيط...اخود البكالريوس تعيط..ماجستير تعيط..وده سبب خلانى افكر جادا انى اعمل الدكتوراه..يمكن تغلط وتزغرط
واتذكر مره واحنا فى نيويورك..كنا رايحين مطعم وكان فى ناس يهود..وقلت لها ان الراجل اللى قاعد ورانا ده..يهودى.. فالحاجه مصمصت على شفايفها... وقالت يا عينى..يا حول الله يا رب.. ما تقولش ان الراجل عنده جرب ولا حاجه
والحاجه طيبه اوى.. وفاتحه البيت بتاعنا وكاله..اللى الرايح واللى جاى يدخل ..ولازم تحلف ميت يمين انهم لازم يكلوا.. او يشربوا ..وفى اغلب الاحيان..لازم يكلوا ويشربوا.. ولو كان مسموح كانت تحميهم كمان.. وانا لما كنت بابعت حاجات من نيويورك هنا مع اصحاب لى نازلين مصر..كنت با حذرهم ..انهم مايكلوش يومين قبل مايروحوا للحاجه..علشان الحاجه لازم تطبخ لهم.. وبناء عليه كل اصحابى هرشوا الفيلم.. وبقوا يروحوا البيت عندنا واقعين من الجوع وبناء على طيبه قلب الحاجه.. كل اصحابى بنين وبنات حسوا بالاطمئنان لها وارتاحوا لها خالص ..فساعات اكون انا بره البيت ..وارجع متأخر..وادخل البيت الاقى واحد صاحبى حلوف نازل اكل ماتقولش انه فى موائد الرحمن..واسأله انت هنا من امتى.. يقول لى من فتره..عادى يعنى..قيمه طبقين رز وطبق بطاطس واحيانا اخرى ادخل البيت الاقى واحده صديقه قاعده مع الحاجه والاثنين نازلين سح سح سح.. خير يا جماعه.. كانت صديقتى دى بتشكيلها من خطيبها او جوزها او انها تعبانه فى شغلها
والحق اقول..انا لما انزل مصر اجازه..بأنزل فى فنادق..وباحجز للحاجه معايا علشان نتفادى اصدقائى من الحلاليف الجياع لمده معينه..بس بعد يومين بالكتير الحاجه بتحن للبيت لان الناس وحشوها والجيران.. وبناءا عليه نسيب الفندق وارجع البيت اتفرج على اصحابى وهما بيكلوا اويجوا يعيطوا من هجر الحبيب خلاص هانت..ان شاء الله.. هاشوف الحاجه..واللى مزنوق يبقى يقولى وانا
اخليها تدعى له

الدعوه بدولار

80 Comment:

الجحيم هو الحقيقه said...

حبيبى يا رافت

اولا ربنا يخلى الحا جه للغلابه اللى زينا انته عيل فقرى خلينها نا كل يا عم

ثا نيا
حسيت انك بتتكلم عن امى والله يخر ب بيت عقلك هههههه
ثا لثا تيجى با لسلا مه يا محترم

وانا عا زم نفس عندكم لحد متسا فر
ههههههه
وملكش دعوه انته الحا جه هتقوم با لو اجب خليك انته فى الفندق بتا عك

تيجى با لسلامه يا مان

ربنا معا ك

المٌهَــــاجِر المَصْـــــــرى said...

انت عارف ياجحيم..معظم اصحابى الفقر دول معاهم رقم المحمول بتاعى يعنى ممكن يتصلوا بى ..بس هم بيصيعوا يروحوا البيت..يسألوا فالحاجه تقولهم انى انا مش هنا..اتفضل اتفضل وتقوم شامطه اليمين..وما يصدقوا..ماهو فرح ومولد فشر مولد ابو الدردار

smraa alnil said...

راااااااافت انا جيالكم لما تيجي
عشان الحاجة تاكلني انا كمان
انت مش متخيل يا ابني انابقيت عاملة ازاي من قلة اكلي في بيتنا
عشان كدة تقريبا انت شايفني بلاستيك
:)
تعالي انت بس وانا هعمل نفسي عبيطة واروح اسال عنك عند الحاجة
ربنا يجيبك بالسلامة يا ريس
وعامة انا هظبط احتياطات الامن عشان توصل بدون مخاطر
وبرضه لا يمنع اني اجي ازورك في الفندق ومش هكون متغدية عشان ارغمك علي عزومة غدا
يلا اي خدمة بقي
توصل بالسلامة بقي
ومستنينك

aymen.farouk said...

يا سيدى ربنا يخليلك الحاجه
وعايزك توصلها سلامى وتقلها كل سنه وانتى طيبه يا امى
وانت كمان كل سنه وانت طيب

Rikka said...

كل سنة و انت طيب يا رأفت و طبعا كالعادة دايما مضحكني ... ربنا يخليلك الحاجة يا رب و يكرمها فيك .. و بجد هي ده عادة معظم الأمهات فعلا العياط عندهم خير وسيلة للتعبير عن مشاعرهم سواء في الفرح او الحزن ... انا عندي اقتراح ايه رايك عقبال ما انت تنزل مصر انا اعسكر عند الحاجة .. مش طمع في أكل او جوع لا سمح الله .. كل الحكياة بس أني أخد بالي منها مش أكثر :):):) عجبني جدا ردها لما قلتلها على اليهودي .. هما دول الناس الطيابا فعلا ..
توصل بالسلامة ان شاء الله و ربنا يجمعك معاها على خير و يجمع كل الناس المتفرقين قول آآآآآآآآآآميييين

أنـــا حـــــــــرة said...

واد يا رأفت
بوسلى الحاجة بقى جامد
بس ادينى العنوان الله يرضى عنك
اصل انا مش هستنى لحد ما تيجى و لا مؤاخذة و مش طمع فى أكل و النبى ما ليك عليا يمين يا ريس انا هروح أرغى مع طنط شوية و اخليها تحضننى يمكن اتدفى يا اخويا و للا الحاج يغير لو حضنتنى ؟

:)

ربنا يخليهالك و يخليلك الحاج المتستر على التزامك فى كفر نيويورك المحترم اوى

سمعنى سلام
ماما زمانها جاية

أنـــا حـــــــــرة said...

ايه جو
welcome
اللى عندك ده صحيح

شكلك عاملنا كمين باحترامك و ادبك ده

نهاز said...

ه خلي بالك يا رأفت ياسمينا شكلها عينها علي الحاج و بتتلكك بزيارة الحاجة

تيجي بالسلامة يا رأفت

علي فكرة كلكم بلا استثناء وحشتوني
كلكم كلكم

عمر said...

ربنا يخليلك الحاجة يا حج رأفت

معلش انا مقصر بس انا والله صحتي تعبانة جدا جالي دور برد اول ما رجعت امريكا قلب بالتهاب في الجيوب الأنفية وحالتي بعيد عن السامعين متأخرة

حكلمك أول ما اخف عشان صوتي رايح

سلام

عمر said...

معلش سؤال أخير

ايه علاقة ذكريات تحضير الشنط بالكلام اللي انت كاتبه في البوست؟

سلامة دماغك يا ريس..

albida said...

منك لله يا رأفت!!... أنا اتفزعت من بتاعت ال
welcome
اللى نطت فى وشى اول ما فتحت البلوج دى
:)

بجد ربنا يخليلك مامتك وما يحرمكش منها أبدا

يا بنى احمد ربنا.. أنا بقى على النقيض تماما.. يعنى أعمل حاجة غلط, ماما تزعقلى.. أعمل حاجة صح, تزعقلى.. أقولها عايز أخرج تزعقلى.. أقولها عايزة انام تزعقلى.. أنجح, برضه تزعقلى!! الظاهر العيب فيا أنا
:)

تخيل أنا لسه جاية أسألك على عمر؟!! كويس أنى لقيته
أزيك يا عمر؟ عامل ايه؟
شوفت؟.. أدى اخرة الفول والكبدة والسجق من عند أبو رامى
هههههههه
سلامتك يا باشا

manal

Ma-3lina said...

اولا العنوان علشان انا بموت فى الرز مع البطاطس و يا سلام باه لو معاه فراخ فى الصينية

ربنا يخليلنا الحاجة

لازم اول ما توصل بالسلامةان شاء الله لازم عزومة لكل المدونين عند الحاجة احتفالا بعودتك لارض الوطن

سلامتك يا اخ عمر كله من وقفتك على تلاجة الحاجة الساقعة فى البرد ده يالا الرزق يحب الخفية

cat_eyes(همس الليل) said...

تشرف اسكندريه يا معلم اهلا بيك
ومتنسناش فى عزومه عند الحاجه بئا
ربنا يخليهالك يارب
اصل كل موديل الاربعينات طيبين كدا ههههههههه
وماشى يا عم مع انى زعلانه على الحلاقه اللى عاملها معايا بس اوكى
ياريت لو فى حاجه بجد تقول وحنا اخوات على اى حال

Rasha said...

ربنا يخليلك الحاجه ويخليك ليها يا رب هي ست طيبة جدا ومن غير ما تكتب عنها باين من تربيتها ليك

توصل مصر بالسلامة بس المرة الجاية قولي عشان انزل انا كمان مصر واتعرف على الحاجه

بوسهالي كتيير

:)

أنـــا حـــــــــرة said...

عمر

الف سلامة عليك
دى شكلها لعنة الفراعنه
بخصوص العنوان فانا معاك
اصلا رافت مش متظبط و مش موجود
شكله فى مصحة لعلاج الادمان

__________________

نهاذ

و الله يابنتى الحاج بركة
بس الحاجة برضه اخلاق و كريمة
فناخد مصلحتنا الاول و بعدين نشوف

___________

منال

ههههههههه
العيب اكيد فيكى طبعا
الظاهر انك شكلك بيحفز طنط انها تتعصب
بس ده م العشم

أنـــا حـــــــــرة said...

اعتقد ان عندى تفسير للعنوان
الظاهر ان رأفت و عو بيحضر الشنط علشان لما يسافر كمان شهر
شكله بيحضرها على مهله
راح افتكر الذكريات دى خير اللهم اجعله خير
فربط فى عقله الباطن بين الذكريات و تحضير الشنط

ودنك منين يا جحا

نهاز said...

ياسمينا هو بس يجي عسان نجبره يعزمنا عند الجحش و عند ابو رامي

انا مجوعة نفسي من دلوقت

المٌهَــــاجِر المَصْـــــــرى said...

سمـــــــــرا
ان شاء الله لما تتجوزى واللى ما يتسماش يزعلك..هتعرفى عنوان الحاجه كويس....وتقعدوا تعيطوا يمين وشمال...

-----------------------------------

المحترم\ أيمـــــــن فاروق

ربنا يكرم اصلك يا مان..سلامك هيوصل وكل سنه وانت والاسره الكريمه بخير
----------------------------------

ريكــــــــــــا ريكــا
انت كمان شكلك من نادى الجياع..كلكم بتقولوا كده فى الاولِ...اروح اطمئن ع الحاجه واشوفها عايزها حاجه..وبقدره قادر الاقيكم عارفين مكان الثلاجه احسن منى..
----------------------------------
انــــــــا حره
انت بالذات ما ينفعش تروحى عند الحاجه ...
لسانك اطول منك..وهتعملى لنا مشاكل..
----------------------------------


منــــال
معلش انك اتخضيتى ..لى واحد صاحبى خميره كمبيوتر..هو اللى قاعد يلعب ....
عمــر بخير ..انا كلمته فى التليفون ..عنده برد..مخلى صوته فشر المطرب بعروره...
----------------------------------
نهـــــــــــار
انت داخله متنكره ليه..؟؟؟
الحاج امور اوى ...شبه عمر الشريف...خده معايا الجامعه هنا..من فضل ربنا ان الانجليزى بتاعه مش جامد اوى..كان زمان انا والحاجه فى محكمه الاسره

----------------------------------
عمـــــــــــــر
يعنى اللى شغلك من البوست العنوان..احه جدا
فى مثل بيقول..
واحد راح لابوه وقال له علمنى الخيابه..قالوا تعالى فى الهايفه واتصدر
----------------------------------

ما عليـــــــنا
انت شكلك خنافس لا بتاعه رز ولا بطاطس..انت عاوز ماكدونالز وبيتزا هت...يا ام لسان طويل
--------------------------------

همـس الليـــــــــــل

احنا لنا بيت يلمنا يا جميل..لما نيجى اسكندريه نتحاسب..ولا عاوزنى اسيح لك قدام الناس بتوع القاهره ويقولوا علينا قله..لما نيجى نتحاسب..
--------------------------------
رشــــــــــــا
الله يسلم لك ياجميل..انا نازل قريب اوى..ياريت انت كمان تيجى..
بس انت عايشه فين ..انا مفكرك عايشه فى مصر..
المهم تيجى بالسلامه ان شاء الله..
كل سنه وانت طيبه

---------------------------------
ياسمين..نهاز...منـــال
اتلموا ...انتوا الثلاثه..انا عارف ان لسانك عاوز قصه..سبوا الحاج والعنوان فى حاله..

tota said...

العزيز رأفت
اظن بالبوست ده الحاجة ربنا يكرمها اخدت دعوة من كل معلق ما شاء الله ربنا يتقبل منهم جمعيا
وامام كل هذه الدعاوى اللى من قلوب فى اجساد قتلها الجوع لا تملك انت او الحاجة ادامها الله زخرا للبلاد وللمدونين ان تستقبل فى بيتها العامر هذه الوفود الغائرة من المدونين التتار ليقضوا على الاخضر واليابس

وبما ان صعب عليه اروح اسكندرية اقترح عليك عمل يوم للحاجة فى القاهرة من باب التغيير والهروب من المدونين السكندرين لتقع فى براثن المدونين القاهريين
وربنا يجعله عامر

وعلينا احنا العزومة دى بس تيجى بالسلامة
والعزومة بأسبقية الحجز
تحياتى

واحـــد مـــــن الـنـــاس said...
This comment has been removed by a blog administrator.
واحـــد مـــــن الـنـــاس said...

رأفت بيه حبيب الملايين
كل سنة وانت طيب يا زعيم الاحرار

بقولك ايه يا رأفت اول ما ترجع مصر بالسلامة ان شاء الله اتصل عليا واعزمني عند الحاجة
عشان في الاجازة بتمرمط ومش باكل نهائي

انا غلباااااااااان
حسنة قليلة تمنع بلاوي كتيرة يابيه
وهنيالك يا فاعل الخير والثواب


بس بجد يا رأفت ربنا يخليلك الحاجة
اللي زيها قليل الايام دي

يعني مثلا اصحابي يوم مبروحلهم بيوتهم

امهاتهم بيجرو ورانا بالجزم وتبقى
عملت فيك جميلة كبيرة اوي ولازم تبوس رجليها لو جابتلك كباية مية

يالا تقول ايه
منهم لله

Ironcobra said...

بالسلامة يا باشا و رحلة سعيدة و ربنا يخليلك الحاجة و الحاج , كنت عايز أسألك هو عنوانكم أية في أسكندرية عشان أما أنزل مصر و أروح أزور سيدي المرسي ( الأجازة اللي فاتت من حوالي أربع سنين كنت مرتب أروح أسكندرية أنا و المدام 5 أيام و كان في حجوزات و كل حاجة بس جالي خراج في ضرس من ضروسي و أضرريت أقضي أخر 10 أيام من الأجازة بتعالج منة و دكتور السنان ربنا يسامحة بأة رمالي مسلح , ولما رجعت جالي severe infection و أضطريت أعمل root canal ).
المهم عايز أبطل العادة المعفنة دي اللي لما أكون باتكلم في موضوع أسرح و أخرم على موضوع تاني , المهم منظرها كدة يا باشا مافيش نزول تاني قبل سنة على الأقل و يمكن سنة و نص كمان .
المهم زي ماقلتلك قبل كدة رحلة سعيدة و أهم حاجة أنك تنبسط .

بنـت ســعد said...

توصل باسلامة يا باشا انت و الحاجة

و بصراحة الحاجة والدتك بجد فكرتنى بنساء كتير اعرفهم فيهم كده تحس

البركة و الخير ماليهم

عوامل الزمن لم تؤثر فيهم الحمد لله

ربنا يخليهالك


تحياتي

أنـــا حـــــــــرة said...

ايه يا عم رأفت و عمال تقولنا ابو الكرم و بتسيب اصحابك ياكلوا فى بيتكم
وانا اقولك العنوان تقول لا
اديك ظهرت على حقيقتك
منك لله
سديت نفسى
و طلعت اوحش من امتحانات الشفوى و دكاترة الاسنان

أنـــا حـــــــــرة said...

نهاز

هو بس ييجى و هيرجع سالف فلوس التذكرة
احنا هنخربله جيبه
بس ينورنا و ييجى

:)

المٌهَــــاجِر المَصْـــــــرى said...

تـــــوتـــا
الحاجه هتيجى معايا القاهره ان شاء الله..اصل عمتى عايشه فى القاهره..والصراحه..ان معظم اصحابى من القاهره..
شكرا ع العزومه...مقدما...
----------------------------------------------------------------------

واحد من الناس
مرحبا بيك واحد من اصحابى الجياع..والله ما بأهزر يامان..
ابعت لى ايميل بتليفونك..وهاتصل بيك لما اجى علشان ترم عضمك...
دا انت تشرف وتنور وتأنس
----------------------------------------------------------------------

المٌهَــــاجِر المَصْـــــــرى said...

الكــــــــــــــوبرا
ماينفعش انت تروح للحاجه لواحدك يا سمسم..لازم اكون انا هناك علشان اديها التوجيهات بتاعه الاكل بتاعك...
راجل زيك خريج زيزو نتانه وعبده دولار ..لازم الحاجه تطوصى بيك شويه..ان شاء الله رحله من الرحلات اللى جايه.. نروح سوى باذن الله
---------------------------------------------------------------------
بنت سعـــــــد
الله يسلمك يا دكتوره..
فيكى الخير..

المٌهَــــاجِر المَصْـــــــرى said...

انـــــــا حره
ما ينفعش تروحى انت يا دكتوره..انا ان شاء الله هاخلى الحاجه تزورك؟؟؟
ايه رايك كده..

وبعدين تذكره ايه اللى هاستلف تمنها يا عره... وهو فى هن سلف

جاتكم نيله مليتوا البلد

Rikka said...

ههههههههههههههههههههههههههههههههههههههههههههههههههههههههههه

ضحكتني أوي بجد في أخر اليوم ... و سبحان الله زي ما تكون قاعد على باب البلوج انا لسه منزلة البوست حالا و بعدين حرام عليك يا رأفت ليه كده بس .. ده انا غلبانة و منكسرة ... و كمان ما كلام الاغنية محبط برده .. الواحد لازم يكون عنده إرادة ... و لا هي جت على ده و هنكون غلسين يعني مش قادرة أفهمك ..
على العموم اتمنالك جولة سعيدة في البلوج عندي و طبعا طبعا دايما هتشرفني زيارتك و هضحكني تعليقتك و على فكرة انا مش من الجياع ... أنا بس كنت بعرض خدماتي و على العموم انت اللي خسران :):):)

الزعيـمة said...

ربنا يخليلك طنط يا رافت
ويا رب ما تنحرم منها ومن دعواتها

الناس دي بصراحه هي الخير والبركة
والمخلية البلد لها طعم بجد

امهاتنا الرغم علمهم وقدراتهم على قياده الجميع بحنية وطيبة
الا ان الجديد والغريب فى كل شئ لم يفقدهن هذه العذوبة والمحبة

سلملنا عليها وخليها تدعيلنا

أنـــا حـــــــــرة said...

يعنى ايه الحاجه هى اللى تيجى
طب تصدق بايه عيب بقى
و اله اديك كف يا واد
عيب يعنى نمشور طنط كده
هات انت مفتاح الشقه و انا هروح هعملهالها مفاجآة

__________________

ثم التذكرة اللى هتستلف تمنها هى تذكرة العودة لما تيجى و ناخد كل اللى حيلتك
شيبسى و شيكولاتات

بقى انا تقولى عرة كده
يا رأفت فى بيتك
طب مش هجيلك تانى غير لما تبعتلى عنوان بيتكم
واروح اشتكيك لطنط
و اخليها ترنك علقه لما تيجى
ياكده ا انت مش شايف وشى تانى بقى

سلام

المٌهَــــاجِر المَصْـــــــرى said...

انــــــا حره
هو لا كده عاجب ولا كده عاجب..باقولك الحاجه هتروح تزوركم فى البيت..
خلاص لو مش عاوزه

روحى اسكندريه ..ميامى.. اسألى عن الست اللى بتوكل الناس..واقفى فى الصف

المٌهَــــاجِر المَصْـــــــرى said...

الزعـــــــيمه
ربنا يكرمك ويخليكى ..هاخلى الحاجه تدعى ليك ان شاء الله..

نهاز said...

ياسمينا يا عبيطة بيقولك الحاجة هتزورك
افهمي بقي
يعني خلاص هو وافق يجوزك باباه

اعملي هادية بقي و لسانك ينقط عسل من هنا و رايح

عبيطة مش عارفة مصلحتك

المٌهَــــاجِر المَصْـــــــرى said...

والنبى كلك زكاوه يا نهــاز
بسم الله ماشاء الله ربنا يجملك بعقلك اكثر واكثر

whyme said...

الحاجه دى امنا كلنا متخافش انا مش قصدى ان احنا هناممها بي انا قصدى انها شبه كل امهاتننا الى لسه عايشين على اخلاق و خير زمان و الى قدروا بطبيعتهم يوصلوا للى احنا مش عارفين نوصله قدروا يحبوا الانسانيه كلها بصرف النظر عن العرق و المواقف فالاساس عندهم الحب و الباقى استثناء
ربنا يخليهالك و يخلينا كل امهاتنا

المٌهَــــاجِر المَصْـــــــرى said...

whyme
كلامك واضح ومفهوم..ربنا يخلى امهاتنا كلهم..هن الخير والبركه

شاكر جدا على زيارتك

albida said...

يا نهار أبيض!! صوت عمر بقى عامل زى بعرور؟!! ده كده ممكن يبقى مغنى مشهور
هههههههه

على العموم سلملى عليه كتير علشان أنا كل ما أروحه عنده البلوج الاقيه مهجور والعناكب ماشية على الحيطة
:)

قولوا كمان لو عايز فول ممكن ابعتلوا قدرة كبيرة مع
FedEx

manal

المٌهَــــاجِر المَصْـــــــرى said...

هاسلم لك على عمر يا منال
هو عيان اوى..الظاهر التلوث اللى فى القاهره قلب على مناخيره..
فى هو فى فتره نقاهه..بعيد عن الفول والحاجات اللى تموت دى

عمر said...

بتشخرلي وانا عيان يا رأفت يابن الرافتاني؟ اما انك عيل اسكندراني صحيح

المٌهَــــاجِر المَصْـــــــرى said...

احه جدا يا عمــــــــــر
شخرت لك امتى يا بنى ..انت عاوز تلبسنى تهمه ولا ايه..

yasser shams aldien said...

ربنا يخليلك الحاجه وابقى قولى هترجع امتى عشان اجى اتغدى واتعشى ويا ريت يكون يوم ممكن اتسحر فيه كمان
انا عارف ايام الرجوع من السفر ديه يا رافتانى بتبقى مليانه بط ووز وحمام محشى ومحمر وعصبان ( العصبان ديه لغير الاسكندرانيه تساوى ممبار
عشان فرق اللغه بس
اوعا تنسانى يا ريسنا
وتيجى بالسلامه

المٌهَــــاجِر المَصْـــــــرى said...

يخرب بيتك يا ياســــــــــر
انت شرحت ليه كلمه العصبان
كانوا الناس بتوع القاهره هيدوخوا على ما يعرفوا معناها........
وبعدين انت تشرف يا ابن شمس الدين..انت محلى..يعنى خطوه..لميامى..انت هتكون ساكن فين يعنى..

أنـــا حـــــــــرة said...

نهاز

لو كده يبقى يامرحب بطنط عندنا
و هكلم بابا علشان يقرا فاتحتى ع الحاج

:)

ربنا يخليهوملك يا رأفت بيه
و يرضوا عنك

أنـــا حـــــــــرة said...

رأفت باشا

انا بس ماكنتش عايزة اتعب الحاجة مش أكتر ثم انا حرة يعجبنى اللى يجبنى و ما يعجبنيش اللى يعجبنى
:)
محدش شريكى يا أخى

____________________

ياريت تقول لطنط انى اكلتى المفضله
فراخ بانيه
ارز بالكبد و الاوانص
و مكرونة بالبشاميل


بوسلى الحاجه لما تشوفها بقى
و خليها تدعيلنا
بالخير

أنـــا حـــــــــرة said...

عمر

اخص عليك نسيت السحابة السوداء
و خلاص صحتك ما بقيتش تيجى على غوغاء القاهرة

ياريت تسعنا اى طرب كده بقى
بما ان ربنا اداك موهبة

يللا
هوبا
تيتو
مامبوا

المٌهَــــاجِر المَصْـــــــرى said...

كبده وقوانص يا عره..
هى دى اكلتك الفضله يا خنافس..
فراخ بانيه ايه وهباب ايه..
مالها الفته ولحمه الراس...
موتوا عمر...منكم لله..انا قلت له..ياخد معاه انابيب اكسجين بس هو اللى عمل لى فيها وطنى

نهاز said...

علي خيرة الله

واضح يا رأفت ان ياسمينا خلاص بتعاملك من دلوقت معاملة مرات الاب
وانت بتعاملها معاملة ابن الجوز

خير يا اولاد

بالراحة علي الست ياسمين دي في مقام طنط يعني يا رأفت يا ابني

كمان اهو بتوفرلكوا في الاكل
سيبها تاكل قوانص و خد انت باقي الفرخة

خليك ناصح

Malk Almasria said...

بدايه اقدم سلامى على اغلى طبق من ذهب الى امىىىىىى الغالية :

ثانيا : سلامى الى المهاجر المصرى وادعو ان يطيل الله فى عمر امنا الغالية ويفضل البيت مفتوح دايما على حسها

ملك المصرية

المٌهَــــاجِر المَصْـــــــرى said...

ياسلام يا مـــــــــــلك
على كلامك الجميل
ربنا يخليكى ويكرمك كده يارب


نهــــــاز
خلاص انت وياسمين سرقتوا الراجل...
يارب الحاجه ما تقرأ الكلام ده..حتطكم فى البلاك لست

Ma-3lina said...

انا خنافس عييييب عليك جامد
انا اينعم روشة طحن و من جيل
spiky & gel & dirty jeans

بس برده حاسب دا انا مخرجة الليلة دى كلها و ممكن اشيل دورك كصاحب القهوة و اضيع مستقبلك و مش بعيد اوقفك على تلاجة الببس علشان عمر تعبان

سلامتك يا عمووووور ان شا الله الوحشين

المٌهَــــاجِر المَصْـــــــرى said...

مش بأقولك خنافس..وشاكله بتفطرى مربه وزبادى...
لو انت المخرجه فانا المنتج ياختى ..يعنى انا الفلوس..بعون الله اشيلك واجيب ايناس الدغيدى بكره...

عمر خلاص خف..وزى القرد كمان

Ma-3lina said...

يا سلام طب جيب ايناس كده
علشان الرقابة تشيلك النصبة بتلاجة الببس بتاع عمر بالبيردو على مدونتك كمان

و الراى العام هيثور عليك كمان

خليك معايا نطسب على ابو شادى فى جيبى القدمانى و مصرحلى بكل حاجة

متلعبش بالنار يا رافت

المٌهَــــاجِر المَصْـــــــرى said...

انا العب بالنار والجاز والبنزين الوسخ كمان..لو انت نار انا ميه..
وايناس الدغيدى حبيبه الشباب الغلبان اللى ما شفش اللحمه من زمان..
وشكلك انت اللى بتعلبى البخت فى عداد عمرك

Ma-3lina said...

بقى انت ميه خلاص بلاش تلاجة الحاجة الساقعة
امسك انت نصبة الشاى الكشرى اه غيرتلك اهوه

ايناس ديه مظبطاهم سراحة

متخشش فيا جامد كده لرووح للحاجة اشتكيلها و تملصلك ودانك

ده احنا اللى دهنا الهوا دوكو

Epitaph said...

والنبي يا شيخ احجزلي ميعاد مع الحاجة
اهو نرغي شوية و ملكش انت دعوة بس

ربنا يخلياهلك يا رب و هي تفرح بيك قادر يا كريم

معلهش
انا مش باحب الرز بلبن..ممكن مهلبية؟

:)) توصل بالسلامة ان شاء الله

المٌهَــــاجِر المَصْـــــــرى said...

ما عليــــــــــنا
خلاص..قصرى ولمى الدور بأه ...
بدل لا تطولى كشرى ولا حتى مش

--------------------------------
ايبى

ايه الاخبار ياباشا
انت تشرفى البيت فى اى وقت..ماهو مفتوح ولا وكاله البلح..هى جت عليكى..دا انت حتى غاليه

Ma-3lina said...

يااااااى على
attitude

انا اتكلم براحتى و بعدين مش عاوزة منك حاجة انت بعد ما تمشى من مصر بالسلامة ححروح للحاجة

على فكرة باة باكل دلوقتى على ال
keyboard
مكرونة بالبشاميل
خليلك انت الكشرى

المٌهَــــاجِر المَصْـــــــرى said...

مكرونه بشمل ايه ياخنافس
انا بأفطر ظلط...وابقى دورى ع اللى هيديكى عنوان الحاجه او التليفون

Ma-3lina said...

انت متاكد انك فى امريكا شكلك كده فى الكفر و بتشتغلنا

و بعدين امريكا مفهاش زلط جايبو معاك من الكفر علشان ابلغ عنك هناك

Ma-3lina said...

lol fina min 7arakat el delete we el klam dah mashy ya mohager

المٌهَــــاجِر المَصْـــــــرى said...

هههههههههههههه
الله ينتقم منك

عمر said...

مساء الخير علي الناس الكويسة

اولا نحب نهني السيد الزعيم بانتهاء اعمال الفحر والترميم والسفلتة.. ايه الجمال دة يا ريس؟ والنبي اجدع من نفق العروبة

ثانيا نشكر السيد أيرون كوبرا علي السؤال.. ما تقلقش يا معلم عمر الشقي بقي واللي كل من سجق مصر ما تقدرش عليه فيروسات أمريكا

ما علينا: يا سلاااااااام يا هدي... بقي بعد العمر دة كله لسة باقية علي تلاجة الحاجة الساقعة.. شوفوا الوفاء يا جدعان.. بجد حاجة تقطع القلب والقوانص

عمر said...

علي فكرة يا ريس انا اتخنقت من المهرجان اللي انت عامله في المدونة دة.. ايه يا عم كل مادخل الاقي دايرة زرقة عمالة تلف تقولش داخل دريم بارك

الرحمة حلوة برده

tazart said...

لدي اقتراح لمادا لا تبحث للحاجة عن حاج ليلهيها عن الطبخ و هكدا لن يجد الجياع ما يسد الرمق و هكدا سيسدل الستار عن المسرحية

المٌهَــــاجِر المَصْـــــــرى said...

عمـــــــــــــــــــر
انا نفسى اتخنقت من البتاعه الزرقاء دى..بس ما باليد حيله..واحد صاحبى ماجستير كمبيوتر هو اللى قاعد يلعب
حمد لله على سلامتك على اى حال


tazart
ايه ياعم اخبار الوطن الموبؤ..كل سنه وانت طيب

شــهــروزة said...

أنا مستينة العزومة
مش حاعزم نفسى يا عم
احسن انت مسيح لأصحابك اللى عزموا روحهم ومجرسهم عندك
يبقا نتلم أحسن ونستنا العزومة
عشان لو سيحتلى
حأدب صوابعى فى عينك ولا مؤاخذة

نياااهااااهااااااا


ازيك كدة؟؟
ونازل امتا؟؟

ماشى يا عم
من لاقى احبابه نسى اصحااابه بقا
يلااااا

المٌهَــــاجِر المَصْـــــــرى said...

شهـــــــــــــــــــروزه
انت برده عاوزه عزومه يا عبيطه..دا انتى اللى هتساعدى الحاجه فى المطبخ علشان توكلوا الجياع
وبعدين..انتى الوحيده اللى عارفه انا نازل امتى..
دا انتى الغاليه

Ma-3lina said...

عمر:
-----

انا اقدر انسى برده..الا الحاجة الساقعة زكريااات باه

رورو:
----

الوان الطيف اللى فالمدونة دى عمتنى قولنا
خلى عم الماجيستير يغيلر الالوان
على راى عمر دريم بارك دى

المٌهَــــاجِر المَصْـــــــرى said...

ما عليــــــنا
ما انا شيلت اليافطه الاولانيه اهوووه
عاوزينى اغير الوان ايه تانى

ماولعلكمش فى نفسى احسن

Ma-3lina said...

لا مش لازم حكاية الولعة ديه مش ناقصين سحابة سوداء

كمان علشان عزومة الحاجة امتى ان شاء الله علشان احضر معدتى

المٌهَــــاجِر المَصْـــــــرى said...

لما ميعاد العزومه يجى ..هاقولك..
وبعدين معده ايه يا حسره اللى هتحضريها..دا انتى خنافس واخرك صباع محشى ورق عنب مش كرنب كمان..

دا انتوا جيل اسود..
جاتكم نيله مليتوا البلد

frozen love said...

يا سلام..يا بلاش ..والنبي كم دعوة كده..ربنا يخليهالك...بتفكرني بكتير من الامهات اللي بيمثلةا سر نجاحنا في اي مجال

المٌهَــــاجِر المَصْـــــــرى said...

Frozen Love
ان شاء الله هاخلى الحاجه تدعى لك يمكن الحب المتجمد يفك

وجع دماغ said...

يا عم ربنا يخليهالك
أحساس جميل بالبركة أستمتعت به وأنا أقرأ التدوينة الجميلة
بس يعنى لو ممكن.....
ممكن العنوان بس عشان لما الواحد يتزنق فى عشوة ولا حاجة

المٌهَــــاجِر المَصْـــــــرى said...

وجـــــــــع دماغ
الحاجه ساكنه جانبك يا مان...ميامى
45 مش عاوز اوضح اكتر بدل ما اروح الاقى صف واقف قدام الباب
تشرف وتنور فى اى وقت

Anonymous said...

السلام عليكم كلنا يسمع عن مايتعرض له اخوانا في العراق من قتل وابادةو لانستطيع ان نفعل لهم شئ غير ان تدمي قلوبنا لهم وعليهم فليس اقل من محاولة اظهار ولو قدر ضئيل من معانتهم لذلك نرجوا الاطلاع لمعرفة حقيقة وضع اخواننا العراقيين و نشر عنوان هذه المدونة لعلها تكون محاولة بسيطة في دعمهم ونصرتهم ولو باضعف الايمان http://iraqsawt.blogspot.com/ _____وجزاكم الله خيرا

المٌهَــــاجِر المَصْـــــــرى said...

Anonymous
ربنا قادر سبحانه وتعالى يخفف عنهم..
ويرفع غضبه عن الجميع
آمين

Memo said...

امال ايه الي مصبرنا على الدنيا و الي فيها و ربنا سترها معانا ليه عشان النوعيه بتاعت اهلينا دي و انت اصلا ماشي بدعاها باين عليك كده
ربنا يديهم الصحه و طولت العمر
استمر

hebaz said...

ربنا بجد يخليهالك
حسها موجود دايما فى الدنيا :)
حسيت بحنانها و دفئها حوطنى كدة من كلامك و كمان فكرنى كلامك أوى بماما
ربنا يخلى كل الأمهات
عارف مهما كان فى حياتى مشاكل لما أروح أترمى فى حضنها بنسى الدنيا
تحياتى:)