المصريين بالخارج وحقهم فى التصويت

أول مره انتخب فيها فى حياتى كانت هنا فى نيويورك . ولما الست المتطوعه اللى فى اللجنه عرفت كده قالت للناس كلها ان ده اول مره ينتخب والناس اللى فى اللجنه كلها قعدوا يصقفوا. فى أمريكا لو انت من ارباب السوابق علشان يعقبوك بيمنعوك من الانتخاب! فعلاُ اخد صوتك منك هو عقاب ليك لانك بدون صوت ملكش قيمه. وده اللى عمله معانا نظام مبارك فى الثلاثين سنه اللى فاتت بالرغم اننا مش من ارباب السوابق. اخد اصواتنا زى ما اخد حقوق كتيره من حقوقنا. النظام المخلوع جعل المصرى يشعر ان صوته ملوش قيمه ولذلك اصبح معظم الناس سلبين بالنسبه للانتخابات. مفيش حد منهم بينزل من بيته اصلا. لكن دلوقت وبعد الثوره، كثر الكلام عن الانتخابات الرئاسيه والتعديلات الدستوريه لكن للاسف محدش جاب سيرة الملايين من المصريين بالخارج. يا ترى هيكون لهم الحق فى الانتخابات؟ وعلى هيفضل الوضع المباركى كما هو عليه؟ مبارك كانت حجته خايبه زيه لكن دلوقت مفيش حجج واعذار. المصريين فى الخارج ما يقلوش وطنيه عن اخوانهم داخل مصر ومن حقهم أن يختارو من يمثلهم الاخوه القائمين على التعديلات الدستوريه لا تنسو حق المصريين فى الخارج كما نساهم مبارك ولما يتذكر غير 1.8 مليار دولار من التحويلات السنويه مبارك وعصابته سرقوا كل شئ جميل من مصر. آن الآوان لعودة كل ما هو جميل