انا وابن عمى



لى ابن عم فى سنى..وكان دايما معى فى نفس الفصل ونفس المدرسه لحد اول ثانوى عام كده لما انا سافرت
خالد ابن عمى كان مهمل شويه.. يعنى مفيش كتب مفيش كراسه مفيش قلم.. عادى يعنى.. كان بيجى الفصل اثبات حاله وكأنه بيعمل جميل فى وزاره التربيه والتعليم
وكان لنا مدرس رسم اسمه الاستاذ حافظ.. وكان الاستاذ حافظ مفكر نفسه بيكاسوا .. وكان بيصدعنا بالفن والفنانين ولوحات .. ومتاحف وغيرها من الحاجات اللى بتخنق.. وكان نص الفصل يا اما بيذاكر ماده تانيه مهمه.. يا اما بيشربوا سجاير ورا
المهم ان فى احدى الحصص.. الاستاذ حافظ زعل ان خالد ابن عمى ماجبش كراسه الرسم ولا الالوان بتاعته.. والاستاذ حافظ وقف خالد فى وسط الفصل وقاله

انت ليه مش زى ابن عمك الرأفتانى ملتزم وبتجيب اداوات الرسم معاك
وأنا قاعد جنب خالد والاستاذ حافظ قاعد يهزأه وخالد ابن عمى اتخنق منه ع الاخر

والاستاذ حافظ قالى يا رأفتانى.. انا احترت مع ابن عمك ومش عارف اعمل ايه معاه.. ياريت تخليه يلتزم زيك

انا كان لازم انقذ الموقف لان خالد كان على شفا انه يطلع المطواه ويخبط الاستاذ حافظ سن ويريح المدرسه والمنطقه التعليميه من قرفه

اقوم انا اعمل ايه؟
اقوم اقلع الجزمه وافقع خالد ابن عمى جزمتين على دماغه
واقوله : كده يا ابن الكلب... كده
جايب لنا الكلام من اللى يسوه واللى ما يسواش

خالد ابن عمى نام ع الارض من الضحك
وانا شغال ضرب بالاقلام والجزمه وهيصه ما تقولش عركه فى سوق زنانيرى

الاستاذ حافظ قعد يسلك فينا ويقولى خلاص ... الكلام ده فى البيت مش هنا... خلاص كده كفايه
وانا اقول .. لا يا استاذ حافظ .. لا انت مش عارف الولد ده بقله التزامه عامل ايه فى والده؟ دا عمى خلاص غلب معاه وقرب يموت

وصممت ان اخد خالد واروحه البيت علشان اكمل العلقه هناك ويكون ابوه حاضر المعركه

ووافق الاستاذ حافظ.. ما هو عاوز يخلص مننا... وطلعت انا وخالد طيران على قهوه عم حسنى نستنى مدرسه البنات لما تطلع

58 comments:

Anonymous said...

الله يخرب بيت دماغك

انا قاعد في المكتبة عمال اضحك زي العبيط

بوظطوا سمعت مصر في الخارج الله يخرب بيوتكم

smraa alnil said...

هههههههههههههههههههههههههه

الله يخرب عقلك يا رافت
دة انا صحيت ابويا من كتر الضحك

طول عمرك مثال للالتزام ياريس

بس بذمتك الادوات اللي كنت بتجيبها دي بتاعتك ولا شاحتها من الواد اللي جنبك
هيييييييييه ايام فكرتني بايام المدرسة
وبعدين صحيح ايه حكاية السجاير دي

مسكين يا استاذ حافظ عشان بس مخدوع فيك ومش عارف اللي فيها
ههههههههههههه

Racha Khoury said...

موتني من الضحك
والي بالشغل معايا مش عارفين مالي افتكروني اتجننت

ههههههههه


عسل يا رأفت

الأغاني للرأفتاني said...

منـــال
انتى كنت مفكرين فى مدرسه لغات ولا ايه..ولا تكونيش فاكرانى بأقول بابى ومامى..
با بنتى ده الناظر كفر..
على ما اسمع دلوقت ان الاستاذ حافط اتجنن ربنا يحفظنا

الأغاني للرأفتاني said...

عــــــمر
ازيك يا صديق..اخبار المذاكره ايه؟؟
انا ربطت للك مع الناس هنا والجميع فى انتظار زيارتكم المباركه لنيويرك
باقولك
انت جبت معاك كارت تليفون مصر ولا ايه ظروفك؟؟؟ لو ماجبتش قولى علشان فى واحد جاى قريب وانا ممكن اخليها يجيب لى واحد

الأغاني للرأفتاني said...

سمرا
الادوات دى كنت باشحتها من فصل تانى يكون لسه مخلصين حصه الرسم..

الاستاذ حافظ ربنا يشفيه كان واخد فى قلم ابن كلب..

الأغاني للرأفتاني said...

رشـــــــا
ازيك يا قمـــر
يارب تعيشى كده وتضحكى علطول
انا روحت عندك ثلاث مرات بس لسه الشعر اللى هناك عويص على شويه..
ع العموم فى انتظار حاجه جديده

الأغاني للرأفتاني said...

والنبى يا كــوبرا يا اخويا
كنت تمشى فى الحوش تلاقى سرنجات مرميه وعلب توسيفان فاضيه
بس الزمن اتغير...الخير ضاع يا مان
العيال دى بتاكل هوهوز وبتفطر مربه الصبح
حاجه تكسف

الأغاني للرأفتاني said...

طبعا يامان..هو كان فى احلى من الايام دى..بمناسبه الرفد..انا لى ابن عمى اكبر منى فى السن وكان اسمه حســن وكنت دايما اخده معايا فى المواقف دى اللى تحتاج ولى امــر..لان لو الحاج كان عرف كان زمانى فى المعتقل..

وبمناسبه الصواريخ وخلافه
والله يا سممسم فى يوم كده والطابور الصباحى شغال..اقوم الاقى وكيل المدرسه الاستاذ عبد الله..وكان شبه الشايب بتاع الكوتشينه

المهم لاقيت الاستاذ عبد الله بيجرى وواد اسمه حمامه فليفل بيجرى وراه بمسدس..هههههههه
على النعمه مسدس يا مان..
الدنيا اتقلبت

الأغاني للرأفتاني said...

ههههههههههههههههه
الحمد لله ان الحاج عندك كان متفاهم..
الحاج عندى كان متفاهم برضه بس الحاجه ام الرأفتانى كانت دائمه التسخين فيه من ناحيتى بخصوص التعليم والدين..لانها كانت معتقده انى علشان بآجى هنا وانا صغير انى هاصيع ..
لكن الحمد لله...الناس دى بركه وهم السبب فى الخير اللى احنا فيه

الأغاني للرأفتاني said...

اللهم ارحمه واغفر له يا رب
ويشفى لك الحاجه ويخفف عنه
اللهم آمــين
-----------------------
الواد عمر جاى لى يوم 27 الشهر ده..
ان شاء الله..

الأغاني للرأفتاني said...

امان يا مان
زى ما قلت لك ..ان شاء الله مافيش مشاكل من جيرسى سيتى لنيويورك 20 دقيقه يامان
وياريت تيجى..هتشوف اشكال فشر الازهر ودير الملاك والسيده زينب

Ma 3lina said...

حمش من يومك يا رورو

انا كنت شاكة انك دخلت مدارس قبل كده بس اهو ممكن نسال ابن عمك

بس حلوة التمثيلية اللى عملتوها دية

ايه اخبارك فى الرسم باه ؟؟؟؟؟ سيريالى و لا ايه

مدرسة البنااااااات ماشى يا عم ربنا يسهلك

الأغاني للرأفتاني said...

وعلى النعمه يا منال الواد فليفل
كان بيجرى ورا الاستاذ عبدالله بمسدس..والطابور الصباحى شغال

وبعد هذه الموقعه الحاج قرر قرار ان الرأفتانى يتعلم فى امريكا..ومن يومها

الأغاني للرأفتاني said...

ما عليــــــنا
ايه رورو دى؟؟؟؟؟ انا كنت مدرسه عسكريه ....لا تكونى مفكرانى زيك خنافس باكل هوووز وافطر مربه الصبح..
ههههههه
وعلاقتى بالرسم كعلاقه ام على بتاعه الجرايد بالكمياء النوويه..
لا افقه الرسم ولا احبه
وافتكر اول مره روحت فيها متحف اللوفر فى باريس ..الناس كانوا مقطعين بعض علشان بتفرجوا ع الموناليزا..واخوكى راح
3 دقايق..وضربت كف على كف ع الناس العبيطه

Ma 3lina said...

مدرسة عسكرية؟؟؟؟؟

شكلك مدخلتش مدارس اصلا و واخد محو امية اخرك

بقيت تعرف الهوهوز و المربى كمان الله يرحم ايام زمان و لا بلاش

طبعا محو الامية امثالك ميقدروش الفن الرفيع

بس استنى روحت متحف ايه يا رورو هتهجس علينا طب امريكا و عدينا بمزاجنا بس باريس طلعت منك
out

الأغاني للرأفتاني said...

ما عليـــــــنا
اخص الله يلعنك ويلعن لسانك اللى عاوز قطعه

على النعمه لاصور البسبور واوريكى ختم دخول فرنسا..
حاكم احنا الامريكان ملناش فيزا زى دول العالم الثالث
هههههههههههههههه
محو اميه يا عره
على النعمه اثنين بكالريوس ودراسات عليا..وماجستير
بس هو الحظ اللى مخلينا اكلم ناس زيكم

الأغاني للرأفتاني said...

يامنال
التعليم عندنا سهل وحلو وجميل
مفيش لا حفظ ولا هباب
يعنى مشاريع ابحاث مناقشات وحاجات حلوه كده فعلشان كده اخوكى فلح فى التعليم..

وشكرا على تحليل الموناليزا اللى انت خنقتينا بيه
مفيش اخبار عن العنب

انحلت سيور العربه وسقط المهر من الاعياء said...

يخرب بيت ام النت


المهم يعنى انتا يا عم الريس خدعتنا

عا ملت امير والاخر كنت عا وز تزوغ
؟؟؟؟ظ

مش عا وز اشتم عشا ن الضيوف
يا ريس
سلا م

tota said...

رأفت
هههههههه حلوة فعلا انت بدأت الانحراف بدرى قوى

هو الحمد لله انها جت على ضرب خالد وحافظ ربنا رحمه من ايدك ما هو الخنقة جابت الاخر

مدرسة البنات من يومك وانت اخصائى

سجاير ؟ امال لو مش مدرسة عسكرية كنتم عملتم ايه
ودى كانت البدايات التباشير يعنى
يا ترى امريكا كانت تهذيب واصلاح ولا استكمال للمسيرة
طمنى

الأغاني للرأفتاني said...

جحيـــــــم
خد راحتك يامان...الناس اللى هنا من اننا وعلينا ..يعنى مش فارقه ...
----------------------------------
---------------------------------
تــــوتا
التعليم هنا مختلف وسهل وحلو زى ما قلت لمنال
بس اتذكر ان اول محاضره لى هنا..
اتزنقت فى سيجاره..وهنا ممنوع التدخين فى اى اماكن مغلفه..يعنى التدخين يا اما فى الشارع او السكن الشخصى بتاعك..
المهم وانا فى المحاضره..عاوز اشرب سيجاره..عملت فيها الشاب المفتح
وروحت رايح للحمام اللى فى الدور ال13
وقفلت الباب وهات يا سجاير..والحق اقول انى ماكنتش اعرف انى كل دور فيها
سموك الارم( الجهاز اللى هو بيكشف عن الدخان)

وبقدره قادر الدنيا اتقلبت..صفافير فى المبنى كله..والبوليس جه والمطافى

واخلو المبنى لانه مفكرين فى حريقه
وانانزلت تحت مع الناس عادى ولا كأنى عملت حاجه

وكله قاعد يسب وبلعن اللى بيشرب سجاير فى الحمام

Wild Cat said...

انت دايما فضحنا كده قدام الاجانب

مهم امثالك اللى مبوظين صورة مصر فى عيون الاجانب و انا بحملك المسؤلية عن اى اختلافات بين البلدين الشقيقين

Ma 3lina said...

sorry last reply is mine but i forgot to sign out from my frnd's account

Yasmine Adel Fouad said...

هههههههههههههههههههههههههههههههههههههههههههههههههههههههههههههه

فضحتنى ربنا يبسطك ياراجل
ايه ده لا قدوة فعلا
يالهوى ع الدماغ
انت بس اتجوز و خلف و هفضحك عند عيالك زى ما فضحتنى وانا بضحك زى المسطولة

Yasmine Adel Fouad said...

هقولك نكتة ياواد لسه سامعاها امبارح


واحد أمريكى وواحد مصرى فى الحرب
فالمصرى بيقول للأمريكى هم بيدوك كام فى الحرب ؟
الأمريكى قاله باخد مرتبى الأساسى 3000 دولار
و 300 دولار بدل سفر
و 300 دولار بدل أكل
و 300 دولار بدل شرب
و 300 دولار بدل حر ......
فالأمريكى سأل المصرى قاله وانتوا بتاخدوا كام بقى ؟
المصرى قاله بناخد 3 جنيه
الأمريكى قاله ده بدل ايه ده ؟
المصرى قاله بدل ما نسبّلهم

Yasmine Adel Fouad said...

صحيح هو الاستاذ سابك تقول على خليفة بيكاسو اللى ما يسواش
بكرة حافظ يتشهر و تقول ياريت اللى جرى ما كان

:(

Yasmine Adel Fouad said...

اه كمان معلش هى دى غلطة المدرس انه عايزكم تتعلموا الفن و بيكلمكم عن الفنانيين اما انتو مش وش نعمة و بتتبطروا صحيح


فكرنى ارنك علقه بقى قدام الحاج
:)

Memo said...

انا عمري ما ضحكت من مدونه اول مره في حياتي اضحك كده انا تقريبا قريت المدونه كلها
رائع ارجوك استمر

smraa alnil said...

يا جماعة الواد رأفت دة والله فنجري بق
ولا ليه لا في الطور ولا في الطحين
هو بس بيحب يعمل مناظر كدة وحركات
باريس ايه يابو باريس اللي بتروحها
الله يرحم امواتك
خليني ساكتة بقي
مسدس ايه طب خليك صريح وقول ان المسدس اللي كان مع الواد دة مسدس مايا
وبعدين الحاج قرر انك تسافر برة تكمل تعليمك مش خوفا علي مستقبلك
لا دة خوفا علي مستقبل الشعب
عشان انت اللي كنت هتفسدوا
الحاج رجل وطني من الدرجة الاولي

وايه حكاية اتنين بكالوريوس ودرسات عليا وماجيستير دي
احنا هنفشر بقي
طب خليك واقعي
قول واحدة وواحدة
تبقي كدة مبلوعه
تعالي انت بس وانا افضحك فضيحة المطاهر للطلوع علي المعاش وشوف انا هعمل ايه
ههههههههههه

الأغاني للرأفتاني said...

سمسم
لسه ما سمعتش الاغنيه دى يامان...هاروح اسمعها..انت عامل ايه..واخبار البرد؟؟؟
----------------------------------------------------------------------

منــــال
والله انا كمان كنت فاكر انك مستمتعه بالدراسه بتاعتك..ما انتى نازله فينا خنق ..ايشى تحليل شاعرى وايشى روسومات..
انا قلت بحد..انك غاويه الهم ده؟؟؟
اتاريه ياولداه تنسيق الثانويه العامه
والنبى ابقى ابعتى لى صوره بعروره...عمرى ما شفته والله
----------------------------------------------------------------------
بت يا دكتوره ياسمين
حتى نكتك رخمه...وفن ايه وهباب ايه..زى انا ما قلت والله بيقولوا ان الاستاذ حافظ عقله ضرب دلوقت..ربنا يشفيه..
وخلاص..انت اخدت ع الحاج قوى...عارفك يا معلونه..
عاوزه الحاج والحاجه يحبوكى

دماغ برده
----------------------------------------------------------------------
ميـــمو
الف شكر ع الزياره وكلامتك الجميله..
ربنا يزيدك ضحك وفرحه كمان وكمان
----------------------------------------------------------------------
سمراء
مش مهم تصدقى..فى ناس تانيه مصدقه...وبعدين انا لو اعرف انتى بتعرفى فرنساوى
كنت صورت لك ختم دخول باريس..
هههههههههههههههههههه
منه لله التعليم فى مصر...يدوب بتعرفوا تفكوا الخط

الزعيـمة said...

رأفتانى

اوعي تكون زعلان مني
اكيد فى محاور اتفاق ومحاور خلاف

لكن الخلاف فى الراي بين الاخوه
لا يفسد للود قضية ولا اية ؟

صافي يا لبن باه وانت برضة الكبير

بتقول عرفت منين انك الكبير ؟

لانك من ايام الاستاذ حافظ والاسم دا اتلغي فى الخمسينات

Ma 3lina said...

Iron Cobra:

انا سمعت الاغنية بتاعة حسين الجاسمى
soo romantic
و فيها احاسيس غريبة و جديدة

بتهيالى رافت مالوش فى الكلام ده و مش هيعرف يحس الاغانى دى

انت قلو اغنية بعرور اغنية العنب الفول الكشرى لكن احاسيس و بحبك و حشتينى صعب اوى يفهم الحاجات دى

الأغاني للرأفتاني said...

منــــال
معلش بأه...خلصى الشهاده الزفت دى وبعد كده اشتغلى فى اللى انتى بتحبيه..
انت قولتيها..نظام التعليم وحش وبناء عليه..
الدوله بتخسر ناس موهبيين كتير فى مجالات عديده
كان لى واحد معرفه..موهوب اوى وكان نفسه يطلع مهندس معمارى..مصمم بيوت ومبانى وكده
لكن للاسف ماعرفش يروح الكليه دى فى مصر علشان نص درجه
فسافر هنا ودخل هندسه..وماشاء الله عليه ..
مشارك فى مشاريع جميله هنا نيويورك

فى انتظار بعروره الجميل

الأغاني للرأفتاني said...

الزعيـــــــــــمه
لا طبعا يا جميل انا عمرى مازعلت ولا هازعل منك..
الاختلاف فى الرأى حاجه مفيده وصحيه جدا بين الحبايب..ربنا ما يجيب زعل..
انا جاى قريب ان شاء الله..
وها نتتكلم اكتر فى الموضوع ده

لان اناهنا باسخن ع الامريكان برده لما حد يقول ان مصر مافيهاش غير جمال بس؟؟

المهم لما اجى هنتفاهم
ابعت لى ايميل علشان يكون معايا ايميلك

الأغاني للرأفتاني said...

ماعليـــــــــنا
بأه رافت مالوش فى الاحساسيس
ماشى يا ام لسان طويل..
ايوه ياختى...مالوه بعروره والعنب والكشرى
سيبنا لكم الاحساسيس الجاياشه

وعلي النعمه لنولع لك فى الصيدليه

Malk Almasria said...

بجد اظرف حكاية سمعتها من فترة طويلة احيك على خفة دمك

وشكرا لاسعادى

ملك المصرية

الأغاني للرأفتاني said...

ملك المصــريه
ربنا يسعدك كمان وكمان..
وتفضلى تضحكى كده وسعيده علطول يا رب

زورونا تجدوا ما يسركم ..فشر محلات صدناوى وشمله

واحـــد مـــــن الـنـــاس said...

لا والله يا رأفتاني
وانا في الثانوية كنت طفل برئ
ملاك طاهر
ولا ليا في الطور ولا في الطحين
طب وربنا المعبود اصحابي في اولى ثانوي اللي كانو بياخدو دروس معايا
كانو بيشربو سجاير وجم في مرة قالولي تعالى اشرب معانا
انا عملت مقلب فيهم
ورحت معاهم ومشربتش
ورحت سيحتلهم عند ابهاتهم
العيال من يوميها كرهوني
وربنا لو شافوني هيدبحوني
ياااااااااااه
ايام يا رأفت والله
انما الواحد فسد وباظ لما اتنيل ودخل الكلية
يالا
ربنا يتمم بخير

الأغاني للرأفتاني said...

واحد من الناس
اخص عليك يا مان
هو انت كنت من العيال دى...؟؟؟تروح تسيح ؟؟
بس انتوا يامان كنتوا بتطلعوا بره المدرسه...؟
احنا كنا بعون الله بنشرب فى الفصل...

كانت ايام حلوه؟ لا شغل ولا مشاغل
ياريت كان الواحد فضل كده علطول
ههههههههههه
تحياتى يا غالى

همس الليل said...

ههههههههههههههه
الله يقطعك يا رافت متشرد طول عمرك
الا بالحق انت كمنت فى مدرسه ايه هههههههههههه

smraa alnil said...

ياريت الواحد يفضل كدة علي طول
انت فاكر ان انت كنت صغير زينا وكبرت
لا دول قشروك من علي الحاجة
وبعدين انا بقي خريجة مدرسة لغات
يعني عارفة الفرنساوي كويس ومش سايباك الا لما توريني ختم دخول باريس
شكلك اصلا لا من امريكا ولا نيلة
انت اخرك يا ابني كفر ابو طشت
ومش عايزين طولة لسان ها :p
ههههههه

الأغاني للرأفتاني said...

همس الليل
ايه رأيك فى جمال عبد الناصر العسكريه
مسخره مفيش بعد كده؟؟؟؟

همس الليل said...

جمال عبد الناصر يا فاشل ههههههههههه
انت اخرك مدرسه الزراعه اللى فى الراس السودا اكيد تعرفها وبلاش نسيح لبعض بئا ههههههههههههه
تعرف يا واد يا رافتانى جتلى اخبار ان استاذ حافظ لسه عايش هههههههه
وبيبوس ايدك وش وقفا
الحمد لله ان مكنش فى مدرسه بنات جمبكو والا كنتو قطعتو خلفهم
هههههههههههه

الأغاني للرأفتاني said...

همس الليل
طبعا عارف الراس السودا
ياه دى انتى قلبك اسود قوى
الاستاذ حافط اتجنن على ما اسمع
ما اعرفش ايه اللى حصلو
هييييييه دنيا

عمر said...

بقولك ايه يا رافتاني
بما انك مش عايز تدوس في مشروع الأباحة في الأغاني المصرية، ايه رأيك تعمل عدد جديد عن اقتباس المطربين الأجانب من التراث الشعبي المصري؟

انت طبعا عارف ان المطربين في الغرب عواطلية وما وراهمش غير اهم يسرقوا التراث بتاعنا، يعني عند مثلا أغنية
hit me baby one more time
دي مقتبسة من توبة ان كنت أحبك بس قابلني مرة وتبقي دي آخر نوبة.. الخ

والأخت شاكيرا بتقول
i used to cry against the wall but now i've got a shoulder that i can lean on

الحتة دي بقي مقتبسة من المثل الشعبي: ضل راجل ولا ضل حيطة

كدة يعني.. شغل الجمجمة

الأغاني للرأفتاني said...

احا جدا يا عمر
الاجانت هما اللى سرقوا التراث بتاعنا
انت باين عليك خلصت مذاكره وطالبه معاك...انت ترخم على صاحبك
يا صديقى
العدد القادم بعنوان الغتاته فى الغرام
واذا كان الموضوع بتاع سرقه التراث بتاعنا شاغلك
لما تيجى عندنى نروح نشرب معسل ..ونناقش الموضوع ده سوى

الأغاني للرأفتاني said...

ايبى
الحمد لله ان انتى بخير
انا قولت برده انها زحمه امتحانات
انا مش عارف انتو ليه بتمتحنوا كتير كده وفى الاخر برده بتتخرجوا مش عارفين حاجه
ربنا يقويكى وتخلصى
شدى حيلك

الأغاني للرأفتاني said...

صح يا منـــال
هو عمـــر عامل دماغ بس لسه انا مش عارف ايه هى..بس هاجيب قراره؟؟
هى طالبه معاه تاريخ على مزيكا على تراث
ربنا يستر والايام دى تعدى على خير

Yasmine Adel Fouad said...

ازيك ياواد
حبيت اسلم عليك
كده من غير سبب
قلة ادب
بعيد عنك
و للا بعيد ليه
اتفضل شويه

هههههههههه

الأغاني للرأفتاني said...

انا حره
طبعا..هو انتى اتهبلت ولا انطسيتى فى دماغك لا قدر الله انكى تسلمى من طوله لسان..ازاى؟ ما يصحش
لازم لسانك اللى عاوز قطعه يعمل عمايله
فعلا مرات الاب العن حاجه فى الدنيا

عمر said...

يا عم انت شكلك كدة تركت محراب الفن

انا عن نفسي حدوس في سكة الأباحة في الأغاني وخاصة اغنية ادخله جوة يطلعلي برة، وأغنية الفنانة المستقيمة اليسا: سلمتلك اغلي ما عندي

وابقي سلملي علي الرقابة

الأغاني للرأفتاني said...

عمــــــــــر
ايه اللى جرى لك يا وريث..
الفن فى دمى يا وريث حتى اسأل بعروره..
بس انت باين عليك مش مضبوط اليومين دول..
ع العموم لما تيجى فى رقاصه هنا اسمها سوسن..من المغرب الشقيق...هنقعدك معاها يمكن تفك ازمتك دى

ولو عاوزنا نضرب اباحه..عادى يامان
هو انا لى اغلى منك

همس الليل said...

رأفت اصيل يا وله من يومك تحب الخير ليك ولصحابك اهو كدا التعاون
بأه تاخد الواد للرقاصه وقال من المغرب الشقيق
دا انت شيطان يا عم
وبعدين ماهى حته عربى اهو امال عاملنا فيها فيلم الحرمان
ههههههههههه
اه يا منحرف

الأغاني للرأفتاني said...

همس الليل
الله يلعن طوله لسانك اللى عامل زى المبرد ده
عمر حبيبى..ولازم اشوف ماله..هى طالبه معاه اغانى ليه
والست سوسن انسانه كويسه رغم انها رقاصه..
روحى يا شيخه ربنا يهدك

همس الليل said...

هههههههههه الست سوسن ست كويسه هههههههه انت ادرى بئا عم رافت
خبير والله ياابنى

بعدين عمر حبيبك تعمل فيه كدا اخرتاو تبقى سوسن ههههههههه

ربنا يهدك عشان تبطل سوسن وسعاد وكل حرف السين

الأغاني للرأفتاني said...

همس
خلاص هنبطل حرف السين
فى رقاصه تانيه فى عماد الدين اسمها أوبــــح
ايه رأيك
---------------------------------
whyme
وحياتك بقينا ناخد غياب الفصل ع القهوه..واللى ما بيجيش بنتكتبه غياب

عمر said...

والله تعبان يا ريس... عندي امتحان يوم الاتنين وطبخت مسقعة من كام يوم والبتنجان كاتم علي نفسي

الأغاني للرأفتاني said...

عمـــــــــــــر
...عدى الامتحان يا وريث
ولما تيجى ان شاء الله هنغذيك..
ابعد عن البتجان والفول والحاجات علشان ما تنمش وانت بتمتحن